ಸೋಮವಾರ, ಡಿಸೆಂಬರ್ 23, 2019

How to download YouTube Video: ಮೊಬೈಲ್‌ನಲ್ಲಿ ಯೂಟ್ಯೂಬ್ ವಿಡಿಯೊ ಡೌನ್‌ಲೋಡ್‌ ಮಾಡಿಕೊಳ್ಳುವುದು ಹೇಗೆ?

- ಮಲ್ಲಿಕಾರ್ಜುನ ತಿಪ್ಪಾರ
ಈಗೇನಿದ್ದರೂ ವಿಡಿಯೊಗಳ ಕಾಲ. ಎಲ್ಲವೂ ವಿಡಿಯೊಮಯ. ನಿಮಗನ್ನಿಸಿದ್ದನ್ನು ಪಠ್ಯ ಅಥವಾ ಚಿತ್ರದ ಮೂಲಕವೇ ಹೇಳಬೇಕು ಎನ್ನುವ ಕಾಲ ಈಗಿಲ್ಲ. ಕೈಯಲ್ಲಿರುವ ಸ್ಮಾರ್ಟ್‌ಫೋನ್‌ ಮೂಲಕ ನಿಮಗನ್ನಿಸಿದ್ದನ್ನು ಚಿಕ್ಕ ವಿಡಿಯೊ ಮಾಡಿಯೋ ಅಥವಾ ನೀವು ನೋಡಿದ್ದ ಸ್ಥಳ, ಘಟನೆ ಮತ್ತಿತರ ಸಂಗತಿಯನ್ನು ವಿಡಿಯೊ ಮಾಡಿ ಯೂಟ್ಯೂಬ್‌ ಸೇರಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿಷೇರ್‌ ಮಾಡಿಕೊಂಡರೆ ಸಾಕು. ಸಹಸ್ರಾರು ಜನರು ಅದನ್ನು ನೋಡುತ್ತಾರೆ; ತಮಗನ್ನಿಸಿದ್ದನ್ನು ಕಮೆಂಟ್‌ ರೂಪದಲ್ಲಿಫೀಡ್‌ಬ್ಯಾಕ್‌ ನೀಡುತ್ತಾರೆ. ಹಾಗಾಗಿ, ಇದು ‘ವಿಡಿಯೊ ಜಮಾನ’ ಎಂದು ಹೇಳಿದರೆ ತಪ್ಪಲ್ಲ.
ಈಗ ವಿಡಿಯೊ ಆಧರಿತ ಆ್ಯಪ್‌ಗಳೇ ಸಾಕಷ್ಟಿವೆ. ಆದರೆ, ಯೂಟ್ಯೂಬ್‌ ಒದಗಿಸುವ ಸೇವೆ ಮಾತ್ರ ಅನನ್ಯವಾಗಿರುತ್ತದೆ ಮತ್ತು ಗುಣಮಟ್ಟದಿಂದ ಕೂಡಿರುತ್ತದೆ. ಹಾಗಾಗಿ, ವಿಡಿಯೊ ಪ್ರಪಂಚದಲ್ಲಿಈಗಲೂ ಯೂಟ್ಯೂಬ್‌ ಅನಭಿಷಿಕ್ತ ದೊರೆಯ ರೀತಿಯಲ್ಲಿದೆ. ಯೂಟ್ಯೂಬ್‌ ಅನ್ನೋದು ವಿಡಿಯೊಗಳ ಸಮುದ್ರ. ಅಲ್ಲಿ, ಸಿನಿಮಾದಿಂದ ಹಿಡಿದು ಕಾರ್‌ ಕ್ಲೀನ್‌ ಹೇಗೆ ಮಾಡೋದು ಎಂದು ಹೇಳುವ ನಾನಾ ರೀತಿಯ, ನಾನಾ ವರ್ಗದ, ನಾನಾ ವಿಷಯದ ವಿಡಿಯೊಗಳು ಇವೆ. ಬೇಕು, ಬೇಡದ್ದು ಎಲ್ಲವಿಡಿಯೊಗಳು ನಿಮಗೆ ದೊರೆಯುತ್ತವೆ. ಯಾವುದನ್ನು ನೋಡಬೇಕು, ಯಾವುದನ್ನು ನೋಡಬಾರದು ಎಂಬುದು ನಿಮಗೆ ಬಿಟ್ಟದ್ದು. ಹೀಗೆ, ಯೂಟ್ಯೂಬ್‌ನಲ್ಲಿನೋಡಿದ ವಿಡಿಯೊಗಳನ್ನು ನಿಮ್ಮ ಡೆಸ್ಕ್‌ಟಾಪ್‌ ಇಲ್ಲವೇ ಸ್ಮಾರ್ಟ್‌ಫೋನ್‌ಗೆ ಡೌನ್‌ಲೋಡ್‌ ಮಾಡಿಕೊಳ್ಳವುದು ಹೇಗೆ? ಯಾಕೆಂದರೆ, ಡೌನ್‌ಲೋಡ್‌ ಮಾಡಿಕೊಳ್ಳುವ ಆಯ್ಕೆಯನ್ನು ಯೂಟ್ಯೂಬ್‌ ನಿಮಗೆ ನೀಡುವುದಿಲ್ಲ.
ಯೂಟ್ಯೂಬ್‌ನಿಂದ ವಿಡಿಯೊಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳಲು ಅನೇಕ ಆ್ಯಪ್‌ಗಳಿವೆ. ಆದರೆ, ಇವುಗಳ ಹೊರತಾಗಿಯೂ ಸಿಂಪಲ್‌ ಆದ ಸ್ಟೆಪ್‌ಗಳ ಮೂಲಕ ಸ್ಮಾರ್ಟ್‌ಫೋನ್‌ಲ್ಲಿಯೂಟ್ಯೂಬ್‌ ವಿಡಿಯೊಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಅದು ಹೇಗೆ ಎಂಬುದನ್ನು ಸಿಂಪಲ್‌ ಆಗಿ ಇಲ್ಲಿವಿವರಿಸಲಾಗಿದೆ.


 ಫೋನ್‌ನಲ್ಲಿಡೌನ್‌ಲೋಡ್‌ ಮಾಡಿಕೊಳ್ಳಲು ಹೀಗೆ ಮಾಡಿ....
- ಯೂಟ್ಯೂಬ್‌ ಆ್ಯಪ್‌ಗೆ ಹೋಗಿ. ನೀವು ಡೌನ್‌ಲೋಡ್‌ ಮಾಡಿಕೊಳ್ಳಲು ಇಚ್ಛಿಸಿರುವ ವಿಡಿಯೊ ಅನ್ನು ಓಪನ್‌ ಮಾಡಿಕೊಳ್ಳಿ
- ವಿಡಿಯೊ ಓಪನ್‌ ಮಾಡಿದ ಮೇಲೆ, ಪ್ಲೇನಲ್ಲಿರುವ ವಿಡಿಯೊವನ್ನು ಪಾಜ್‌ ಮಾಡಿ. ಆಗ ವಿಡಿಯೊ ಕೆಳಗೆ  ನೀವು ಷೇರ್‌ ಬಟನ್‌ ನೋಡಬಹುದು.
- ಆ ಷೇರ್‌ ಬಟನ್‌ ಮೇಲೆ ಕ್ಲಿಕ್‌ ಮಾಡಿ. ಆಗ ಕಾಪಿ ಲಿಂಕ್‌ ಎಂಬ ಆಪ್ಷನ್‌ ಕಾಣುತ್ತದೆ. ಅದರ ಮೇಲೆ ಕ್ಲಿಕ್‌ ಮಾಡಿ ಆ ಲಿಂಕ್‌ ಕಾಪಿ ಮಾಡಿಕೊಳ್ಳಿ.
- ಲಿಂಕ್‌ ಕಾಪಿ ಮಾಡಿಕೊಂಡ ಮೇಲೆ ನಿಮ್ಮ ಕ್ರೋಮ್‌ ಬ್ರೌಸರ್‌ಗೆ ಹೋಗಿ.
- ಬ್ರೌಸರ್‌ನಲ್ಲಿಹೊಸ ಟ್ಯಾಬ್‌ ಓಪನ್‌ ಮಾಡಿ, ಕಾಪಿ ಮಾಡಿಕೊಂಡ ಲಿಂಕ್‌ ಅನ್ನು ಸರ್ಚ್‌ ಬಾಕ್ಸ್‌ನಲ್ಲಿಪೇಸ್ಟ್‌ ಮಾಡಿ.
- ನೀವು ಆಯ್ಕೆ ಮಾಡಿದ ವಿಡಿಯೊ ಬ್ರೌಸರ್‌ನಲ್ಲಿತೆರೆದುಕೊಳ್ಳುತ್ತದೆ.
- ವಿಡಿಯೊ ಓಪನ್‌ ಆದ ಮೇಲೆ, ಯೂಟ್ಯೂಬ್‌ನಲ್ಲಿರುವ y ಅಕ್ಷ ರದ ಹಿಂದೆ ಕರ್ಸರ್‌ ತೆಗೆದುಕೊಂಡು ಬನ್ನಿ
- ಆ ನಂತರ ಯೂಟ್ಯೂಬ್‌ ಅಕ್ಷ ರ ಹಿಂದಿರುವ ಎಲ್ಲವನ್ನು ಅಳಸಿ ಹಾಕಿ.
-  http://m. ಅಳಸಿ ಹಾಕಿದ ಮೇಲೆ, ಯುಟೂಬ್‌ ಪದಕ್ಕಿಂತ ಮುಂಚೆ ಅದೇ ಜಾಗದಲ್ಲಿ ss ಟೈಪ್‌ ಮಾಡಿ.
- ಇಷ್ಟಾದ ಮೇಲೆ ಸರ್ಚ್‌ ಮೇಲೆ ಕ್ಲಿಕ್‌ ಮಾಡಿ. ಆಗ ಹೊಸ ಲಿಂಕ್‌ ತೆರೆದುಕೊಳ್ಳುತ್ತದೆ.
ಇಷ್ಟು ಮಾಡಿದ ಮೇಲೆ ನೀವು ಆಯ್ಕೆ ಮಾಡಿಕೊಂಡಿದ್ದ ವಿಡಿಯೊ ಅನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಇದೇ ಪದ್ಧತಿಯನ್ನು ನೀವು ಡೆಸ್ಕ್‌ಟಾಪ್‌ ಬಳಸಿಕೊಂಡು ಯೂಟ್ಯೂಬ್‌ ವಿಡಿಯೊಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಆ್ಯಪ್‌ಗಳನ್ನು ಬಳಸಿಕೊಂಡಿಯೂ ವಿಡಿಯೊಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಇದಕ್ಕಾಗಿಯೇ ಸಾಕಷ್ಟು ಆ್ಯಪ್‌ಗಳೂ ಇವೆ. ಆದರೆ ಎಲ್ಲಕ್ಕಿಂತ ಮೇಲು ಎಂದರೆ, ಈ ಮೇಲೆ ಹೇಳಿದ ಸಿಂಪಲ್‌ ಟಿಫ್ಸ್‌ ಬಳಸಿಕೊಂಡು ವಿಡಿಯೊ ಡೌನ್‌ಲೋಡ್‌ ಮಾಡಿಕೊಳ್ಳುವುದು. ಇದರಿಂದ ಅನಗತ್ಯವಾಗಿ ಆ್ಯಪ್‌ಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳುವುದು ತಪ್ಪುತ್ತದೆ.

 ಯೂಟ್ಯೂಬ್‌ ಬಗ್ಗೆ ನಿಮಗೆ ಗೊತ್ತಾ?
- 2005 ಫೆಬ್ರವರಿ 14ರಂದು ಯೂಟ್ಯೂಬ್‌ ಅನ್ನು ಸ್ಟಿವ್‌ ಚೆನ್‌, ಚಾದ್‌ ಹರ್ಲಿ ಮತ್ತು ಜಾವೆದ್‌ ಕರೀಮ್‌ ಎಂಬುವರು ಆರಂಭಿಸಿದರು.
- ಜಗತ್ತಿನಲ್ಲೇ 2ನೇ ಅತಿ ಹೆಚ್ಚು ಭೇಟಿ ನೀಡುವವರ ವೆಬ್‌ಸೈಟ್‌ ಎಂಬ ಖ್ಯಾತಿ ಇದೆ.
- 1,300,000,000 ಇದು ಯೂಟ್ಯೂಬ್‌ ಬಳಕೆದಾರರ ಸಂಖ್ಯೆ.
- ಪ್ರತಿ ದಿನ 5 ಕೋಟಿ ವಿಡಿಯೊಗಳನ್ನು ಜಗತ್ತಿನಾದ್ಯಂತ ನೋಡಲಾಗುತ್ತದೆ.
- ನಿತ್ಯ 3 ಕೋಟಿ ಜನರು ಯೂಟ್ಯೂಬ್‌ಗೆ ಭೇಟಿ ನೀಡುತ್ತಾರೆ.
- ಒಟ್ಟು ಯೂಟ್ಯೂಬ್‌ ನೋಡುವವರ ಪೈಕಿ ಅರ್ಧದಷ್ಟು ಜನರು ಮೊಬೈಲ್‌ ಬಳಕೆದಾರರಾಗಿದ್ದಾರೆ.


ಈ ಲೇಖನವು ವಿಜಯ ಕರ್ನಾಟಕದ 2019ರ ಡಿಸೆಂಬರ್ 23ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.

ಶುಕ್ರವಾರ, ಡಿಸೆಂಬರ್ 20, 2019

Donald Trump Impeachment: ಡೊನಾಲ್ಡ್‌ ಆಗ್ತಾರಾ ಬೋಲ್ಡ್‌?

- ಮಲ್ಲಿಕಾರ್ಜುನ ತಿಪ್ಪಾರ
ನಿರೀಕ್ಷೆಯಂತೆ ಅಮೆರಿಕದ ಕಾಂಗ್ರೆಸ್‌ನ ಹೌಸ್‌ ಆಫ್‌ ರಿಪ್ರಸೆಂಟೇಟಿವ್‌ನಲ್ಲಿಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ವಿರುದ್ಧದ ವಾಗ್ದಂಡನೆಗೆ ಗೆಲುವು ದೊರೆತಿದೆ. ಇನ್ನು ಮುಂದಿನ ಪ್ರಕ್ರಿಯೆ ಸೆನೆಟ್‌ನಲ್ಲಿನಡೆಯಲಿದ್ದು, ಇಲ್ಲಿರಿಪಬ್ಲಿಕನ್ನರು ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಈ ಸದನದಲ್ಲಿವಾಗ್ದಂಡನೆ ಪ್ರಕ್ರಿಯೆ ನಡೆದು, ಟ್ರಂಪ್‌ ವಿರುದ್ಧ ಗೆಲುವು ದೊರೆತರೆ ಅವರು ಹುದ್ದೆಯನ್ನು ಕಳೆದುಕೊಳ್ಳುತ್ತಾರೆ, ಇಲ್ಲದಿದ್ದರೆ ಅಧ್ಯಕ್ಷರಾಗಿ ಮುಂದುವರಿಯುತ್ತಾರೆ.

ಅಮೆರಿಕದ 45ನೇ ಅಧ್ಯಕ್ಷರಾಗಿರುವ ಡೊನಾಲ್ಡ್‌ ಟ್ರಂಪ್‌ ಅವರು ಸದಾ ವಿವಾದದಿಂದಲೇ ಸುದ್ದಿಯಾಗಿದ್ದು, ಇದೀಗ ತಮ್ಮ ಅವಧಿಯ ಕೊನೆಯ ಹಂತದಲ್ಲಿವಾಗ್ದಂಡನೆಗೆ ಗುರಿಯಾಗುತ್ತಿದ್ದಾರೆ. ಅಮೆರಿಕ ಸಂಸತ್ತಿನ 230 ವರ್ಷಗಳ ಇತಿಹಾದಲ್ಲಿಈ ವರೆಗೆ ಟ್ರಂಪ್‌ ಅವರನ್ನು ಸೇರಿಸಿಕೊಂಡು ಐವರು ಅಧ್ಯಕ್ಷರು ವಾಗ್ದಂಡನೆ ಪ್ರಕ್ರಿಯೆಗೊಳಪಟ್ಟಿದ್ದಾರೆ. ಆದರೆ, ಯಾವ ಅಧ್ಯಕ್ಷರ ವಿರುದ್ಧವೂ ವಾಗ್ದಂಡನೆ ಸಂಪೂರ್ಣವಾಗಿ ಗೆಲುವು ಕಂಡಿಲ್ಲ. ಟ್ರಂಪ್‌ ಪ್ರಕರಣದಲ್ಲೂಇದೇ ಫಲಿತಾಂಶವನ್ನು ನಿರೀಕ್ಷಿಸಬಹುದು.

ಟ್ರಂಪ್‌ ವಿರುದ್ಧ ವಾಗ್ದಂಡನೆ ಯಶಸ್ವಿಯಾಗಬೇಕಿದ್ದರೆ 'ನಂಬರ್‌ ಗೇಮ್‌' ಮುಖ್ಯ ಪಾತ್ರವಹಿಸುತ್ತದೆ. ಈ ಆಟದಲ್ಲಿಟ್ರಂಪ್‌ ಗೆಲುವು ಸಾಧಿಸಬಹುದು. ಆದರೆ, ಅವರ ವಿರುದ್ಧದ ಆರೋಪಗಳಂತೂ ನಿಷ್ಕರ್ಷೆಯಲ್ಲಿಇರಲಿವೆ ಮತ್ತು ಇತಿಹಾಸದಲ್ಲಿದಾಖಲಾಗಲಿವೆ. ಎಲ್ಲಕ್ಕಿಂತ ಹೆಚ್ಚಾಗಿ ಪ್ರಜ್ಞಾವಂತ ಪ್ರಜಾಪ್ರಭುತ್ವ ಎನಿಸಿಕೊಂಡಿರುವ ಅಮೆರಿಕದಲ್ಲಿತಪ್ಪು ಮಾಡಿದರೆ ಅಧ್ಯಕ್ಷರೂ ಶಿಕ್ಷೆಯನ್ನು ಅನುಭವಿಸಬೇಕು ಎಂಬ ಸಂದೇಶವನ್ನಂತೂ ಟ್ರಂಪ್‌ ಪ್ರಕರಣ ಇಡೀ ಜಗತ್ತಿಗೇ ರವಾನಿಸಿದೆ.
ಸಂವಿಧಾನ ಏನು ಹೇಳುತ್ತದೆ?
ಅವಧಿಪೂರ್ವ ಅಧ್ಯಕ್ಷರನ್ನು ಹುದ್ದೆಯಿಂದ ಕೆಳಗಿಳಿಸಲು ಕಾಂಗ್ರೆಸ್‌ಗೆ ಅಮೆರಿಕ ಸಂವಿಧಾನ ಸಂಪೂರ್ಣ ಅಧಿಕಾರ ನೀಡಿದೆ. ಆದರೆ, ಅದಕ್ಕೆ ಜನಪ್ರತಿನಿಧಿಗಳು ಹೆಚ್ಚಿನ ಸಂಖ್ಯೆಯಲ್ಲಿಒಪ್ಪಿಗೆ ನೀಡಬೇಕು. ಎಲ್ಲಕ್ಕಿಂತ ಹೆಚ್ಚಾಗಿ ಅಧ್ಯಕ್ಷರ ವಿರುದ್ಧ, ದೇಶದ್ರೋಹ, ಭ್ರಷ್ಟಾಚಾರ, ಗಂಭೀರ ಸ್ವರೂಪದ ಅಪರಾಧ ಮತ್ತು ದುಷ್ಕೃತ್ಯದಂಥ ಪ್ರಕರಣಗಳಿರಬೇಕು. ಆದರೆ, ಈ ಆರೋಪಗಳನ್ನು ಯಾವ ರೀತಿ ವ್ಯಾಖ್ಯಾನಿಸಬೇಕು ಎಂಬುದನ್ನು ಸಂವಿಧಾನ ಸ್ಪಷ್ಪಡಿಸಿಲ್ಲ. ಇದಕ್ಕಾಗಿಯೇ ಸ್ಟ್ಯಾಂಡರ್ಡ್‌ ಎನ್ನಬಹುದಾದ ಯಾವುದೇ ಮಾನದಂಡಗಳಿಲ್ಲ. ಹಾಗಾಗಿ ಬಹುತೇಕ ಸಂದರ್ಭದಲ್ಲಿಅಧ್ಯಕ್ಷರ ವಿರುದ್ಧದ ವಾಗ್ದಂಡನೆಗಳಿಗೆ ಸೋಲಾಗಿದೆ. ಹೀಗಿದ್ದೂ, ಬಲಿಷ್ಠ ರಾಷ್ಟ್ರವೊಂದರ ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿಮುಖ್ಯಸ್ಥರನ್ನು ವಾಗ್ದಂಡನೆಗೆ ಗುರಿಪಡಿಸುವ ಸಾಧ್ಯತೆಯನ್ನು ಮಾತ್ರ ತೆರೆದಿಟ್ಟಿದೆ.

ಟ್ರಂಪ್‌ ವಿರುದ್ಧ 2 ಆರೋಪ
1. ಅಧಿಕಾರದ ದುರುಪಯೋಗ. ಅಧ್ಯಕ್ಷ ಮರು ಆಯ್ಕೆಗೆ ವಿದೇಶಿ ಸರಕಾರದ ನೆರವು.
2. ವಾಗ್ದಂಡನೆ ಪ್ರಕ್ರಿಯೆಯಲ್ಲಿಕಾಂಗ್ರೆಸ್‌ ಕಾರ್ಯ ನಿರ್ವಹಣೆಗೆ ಅಡ್ಡಿ ಆರೋಪ

ಮುಂದೆ ಏನಾಗುತ್ತದೆ?
ಸಂಸತ್ತಿನಲ್ಲಿ(ಹೌಸ್‌ ಆಫ್‌ ರಿಪ್ರಸೆಂಟೆಟೀವ್‌) ಟ್ರಂಪ್‌ ವಿರುದ್ಧ ವಾಗ್ದಂಡನೆಗೆ ಒಪ್ಪಿಗೆ ಸಿಕ್ಕಿದೆ. ಟ್ರಂಪ್‌ ಅವರು ಶಿಕ್ಷೆ ಎದುರಿಸಬೇಕಿದ್ದರೆ ಅದಕ್ಕೆ ಅಮೆರಿಕದ ಸೆನೆಟ್‌ ಒಪ್ಪಿಗೆ ನೀಡಬೇಕಾಗುತ್ತದೆ. ಸಂಸತ್ತಿನಲ್ಲಿಡೆಮಾಕ್ರಟ್‌ಗಳ ಪಾರಮ್ಯವಿದ್ದರೆ, ಸೆನೆಟ್‌ನಲ್ಲಿರಿಪಬ್ಲಿಕನ್ನರ ಸಂಖ್ಯೆ ಹೆಚ್ಚಿದೆ. ಹಾಗಾಗಿ, ಸೆನೆಟ್‌ನಲ್ಲಿಈ ವಾಗ್ದಂಡನೆಗೆ ಸೋಲಾಗಬಹುದು. ಹಾಗಾಗಿ ಅಷ್ಟು ಸರಳವಾಗಿ ಟ್ರಂಪ್‌ ಅವರನ್ನು ಅಧ್ಯಕ್ಷ ಸ್ಥಾನದಿಂದ ಕೆಳಗಿಳಿಸಲು ಸಾಧ್ಯವಿಲ್ಲ. ಸೆನೆಟ್‌ನಲ್ಲಿರಿಪಬ್ಲಿಕನ್ನರ ನಾಯಕರಾಗಿರುವ ಮಿಚ್‌ ಮೆಕ್‌ಕೆನ್ನಾಲ್‌ ಅವರು, ವಿಚಾರಣೆ ವೇಳೆ ಅಧ್ಯಕ್ಷರ ತಂಡದೊಂದಿಗೆ ರಿಪಬ್ಲಿಕನ್‌ ಸೆನೆಟರ್‌ಗಳು ಸಂಪೂರ್ಣ ಸಹಕಾರದೊಂದಿಗೆ ಕಾರ್ಯನಿರ್ವಹಿಸಲಿದ್ದಾರೆ ಎಂದು ಹೇಳಿದ್ದರು. ಇದೀಗ ಸೆನೆಟ್‌ನಲ್ಲಿವಾಗ್ದಂಡನೆಗೆ ಸಂಬಂಧಿಸಿದ ನಿಯಮಗಳನ್ನು ರಚಿಸಬೇಕಾದ ಹೊಣೆಗಾರಿಕೆ ಮೆಕ್‌ಕೆನ್ನಾಲ್‌ ಮೇಲಿದೆ.

ವಾಗ್ದಂಡನೆ ಪ್ರಕ್ರಿಯೆ ಹೀಗಿದೆ
- ಅಮೆರಿಕ ಹೌಸ್‌ ಆಫ್‌ ರಿಪ್ರಸೆಂಟೇಟಿವ್‌ನಲ್ಲಿಗೆದ್ದಿರುವ ವಾಗ್ದಂಡನೆ ಇನ್ನು ಸೆನೆಟ್‌ಗೆ ವರ್ಗಾವಣೆಯಾಗುತ್ತದೆ.
- ಸೆನೆಟ್‌ನಲ್ಲಿಸುದೀರ್ಘ ವಿಚಾರಣೆ ನಡೆಯುತ್ತದೆ. ಬಳಿಕ, ಅಧ್ಯಕ್ಷರ ವಿರುದ್ಧದ ವಾಗ್ದಂಡನೆಯನ್ನು ಮತಕ್ಕೆ ಹಾಕಲಾಗುತ್ತದೆ.
- ಒಂದು ವೇಳೆ, ಸೆನೆಟ್‌ನಲ್ಲಿಟ್ರಂಪ್‌ ವಿರುದ್ಧ ಮೂರನೇ ಎರಡಕ್ಕಿಂತ ಕಡಿಮೆ ಮತ ಬಿದ್ದರೆ ಅವರು ಅವರು ಶಿಕ್ಷೆಯಿಂದ ಪಾರಾಗಲಿದ್ದಾರೆ.
- ಟ್ರಂಪ್‌ಗೆ ಶಿಕ್ಷೆಯ ಪರವಾಗಿ ಮೂರನೇ ಎರಡಕ್ಕಿಂತ ಹೆಚ್ಚು ಅಂದರೆ ಶೇ.67ರಷ್ಟು ಮತ ಬಿದ್ದರೆ ಅವರು ತಮ್ಮ ಹುದ್ದೆಯಿಂದ ಕೆಳಗಿಳಯಬೇಕಾಗುತ್ತದೆ.

ಎಷ್ಟು ದಿನಗಳ ಕಾಲ ನಡೆಯಲಿದೆ?
- ಒಟ್ಟಾರೆ 126 ಗಂಟೆಗಳ ಕಾಲ ವಾಗ್ದಂಡನೆ ಪ್ರಕ್ರಿಯೆ ನಡೆಯಲಿದೆ
- ಡಿಸೆಂಬರ್‌ 18: ಈಗಾಗಲೇ ಹೌಸ್‌ ಆಫ್‌ ರಿಪ್ರಸೆಂಟೆಟೀವ್‌ನಲ್ಲಿವಾಗ್ದಂಡನೆಗೆ ಒಪ್ಪಿಗೆ ದೊರೆತಿದೆ.
- 2020 ಜನವರಿ 6: ರಿಪಬ್ಲಿಕನ್ನರೇ ಹೆಚ್ಚಾಗಿರುವ ಸೆನೆಟ್‌ನಲ್ಲಿವಿಚಾರಣೆ ಆರಂಭ. ವಾಗ್ದಂಡನೆಯ ಪ್ರಕ್ರಿಯೆಯೆ ನಿಯಮ, ಮಾರ್ಗದರ್ಶಿ ಸೂತ್ರಗಳನ್ನು ನಿಗದಿಪಡಿಸಲಾಗುವುದು.
- 2020 ಜನವರಿ 7: ಮುಖ್ಯ ನ್ಯಾಯಮೂರ್ತಿ ರಾಬರ್ಟ್ಸ್ ಮತ್ತು ಸೆನೆಟರ್‌ಗಳು ತೀರ್ಪುಗಾರರಾಗಿ ಪ್ರಮಾಣ ಸ್ವೀಕಾರ
- 2020 ಜನವರಿ 9: ಹೌಸ್‌ ಪ್ರಾಸೆಕ್ಯೂಟರ್‌ಗಳು ಮತ್ತು ಶ್ವೇತಭವನದ ಅಧಿಕಾರಿಗಳು ಪ್ರತಿ 24 ಗಂಟೆಗೆ ತಮ್ಮ ವಾದಗಳನ್ನು ಮಂಡಿಸುತ್ತಾರೆ.
- ಈ ಒಟ್ಟಾರೆ ಪ್ರಕ್ರಿಯೆ ಮುಗಿಯಲು ವಾರ ಬೇಕಾಗಬಹುದು. ಆದರೆ, ಅಮೆರಿಕ ಅಧ್ಯಕ್ಷರ ಪ್ರೈಮರಿ ಎಲೆಕ್ಷನ್‌ ಹೊತ್ತಿಗೆ ಈ ಪ್ರಕ್ರಿಯೆ ಮುಗಿಯಬೇಕೆಂದು ಡೆಮಾಕ್ರಟ್‌ಗಳು ಬಯಸುತ್ತಿದ್ದಾರೆ.

ಟ್ರಂಪ್‌ ರಾಜೀನಾಮೆ ನೀಡ್ತಾರಾ?
ಇಲ್ಲ. ಸದ್ಯಕ್ಕೆ ಇಲ್ಲ. ಸಂಸತ್ತಿನ ಜನಪ್ರತಿನಿಧಿಗಳ ಮನೆಯಲ್ಲಿಮಾತ್ರ ವಾಗ್ದಂಡನೆಗೆ ಒಪ್ಪಿಗೆ ದೊರೆತಿದೆ. ಅವರನ್ನು ಅಧಿಕಾರದಿಂದ ಕೆಳಗೆ ಇಳಿಸಬೇಕಿದ್ದರೆ ಸಂಸತ್ತಿನ ಮತ್ತೊಂದು ಹೌಸ್‌ ಸೆನೆಟ್‌ ಕೂಡ ಒಪ್ಪಿಗೆ ನೀಡಬೇಕು. ಆದರೆ, ಈಗಿರುವ ಲೆಕ್ಕಾಚಾರ ಪ್ರಕಾರ ಅಷ್ಟು ಸುಲಭವಲ್ಲ. ಟ್ರಂಪ್‌ ವಾಗ್ದಂಡನೆಗೆ ಸೆನೆಟ್‌ ಕೂಡ ಮೂರನೇ ಎರಡರಷ್ಟು ಮತ ಹಾಕಬೇಕು. ಆದರೆ, ಇಷ್ಟೊಂದು ಮತಗಳು ದೊರೆಯುವುದು ಕಷ್ಟ. ಯಾಕೆಂದರೆ, ಸೆನೆಟ್‌ನಲ್ಲಿರಿಪಬ್ಲಿಕನ್ನರು ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಸೆನೆಟ್‌ನಲ್ಲಿರುವ 45 ಡೆಮಾಕ್ರಟ್‌ ಹಾಗೂ ಇಬ್ಬರು ಸ್ವತಂತ್ರ ಸದಸ್ಯರ ಜತೆಗೆ 53 ರಿಪಬ್ಲಿಕನ್ನರ ಪೈಕಿ ಕನಿಷ್ಠ 20 ರಿಪಬ್ಲಿಕನ್ನರಾದರೂ ವಾಗ್ದಂಡನೆ ಪರವಾಗಿ ಮತ ಹಾಕಬೇಕು. ಆಗ ಮಾತ್ರ ಟ್ರಂಪ್‌ ತೊಂದರೆಗೆ ಸಿಲುಕಿಕೊಳ್ಳುತ್ತಾರೆ. ಈಗಿನ ಪರಿಸ್ಥಿತಿ ನೋಡಿದರೆ, ಡೆಮಾಕ್ರಟ್‌ಗಳ ಪೈಕಿಯೇ ಇಬ್ಬರು ಕೈಕೊಡುವ ಎಲ್ಲಸಾಧ್ಯತೆ ಇದೆ.

ಉಪಾಧ್ಯಕ್ಷ ಅಧ್ಯಕ್ಷ?
ಸದ್ಯದ ಲೆಕ್ಕಾಚಾರ ಪ್ರಕಾರ ಟ್ರಂಪ್‌ ಅಧ್ಯಕ್ಷ ಹುದ್ದೆಯಿಂದ ಕೆಳಗಿಳಿಯುವುದು ಅಸಂಭವ. ಸೆನೆಟ್‌ನಲ್ಲಿವಾಗ್ದಂಡನೆಗೆ ಸೋಲಾಗುವ ಎಲ್ಲಸಾಧ್ಯತೆಗಳಿವೆ. ಹೀಗಿದ್ದೂ ಒಂದು ವೇಳೆ, ವಾಗ್ದಂಡನೆಗೆ ಗುರಿಯಾಗಿ ಟ್ರಂಪ್‌ ಅಧಿಕಾರ ಬಿಟ್ಟು ಕೊಟ್ಟರೆ ಆಗ ಅಮೆರಿಕ ಅಧ್ಯಕ್ಷರು ಯಾರು ಆಗ್ತಾರೆ? ಅಲ್ಲಿನ ಸಂವಿಧಾನ ಪ್ರಕಾರ, ಸರಕಾರದ ಉಳಿದ ಅವಧಿಯವರೆಗೆ ಉಪಾಧ್ಯಕ್ಷರಾದವರು ಅಧ್ಯಕ್ಷರಾಗಿರುತ್ತಾರೆ. ಅಂದರೆ,ಉಪಾಧ್ಯಕ್ಷ ಮೈಕ್‌ ಪೆನ್ಸ್‌ ಅಧ್ಯಕ್ಷರಾಗಲಿದ್ದಾರೆ. ಆದರೆ, ಸದ್ಯಕ್ಕಂತೂ ಇದು ಸಾಧ್ಯವಿಲ್ಲ!

ರಾಜಕೀಯ ಪರಿಣಾಮವೇನು?
ಟ್ರಂಪ್‌ ವಿರುದ್ಧ ವಾಗ್ದಂಡನೆ ರಾಜಕೀಯ ಪರಿಣಾಮ ಬಗ್ಗೆ ಕೂಡ ಚರ್ಚೆಗಳು ನಡೆಯುತ್ತಿವೆ. ಈಗಾಗಲೇ ಟ್ರಂಪ್‌ ಹೇಳಿರುವ ಪ್ರಕಾರ, ಈ ವಾಗ್ದಂಡನೆ ಡೆಮಾಕ್ರಟ್‌ಗಳಿಗೆ ಹಿನ್ನಡೆಯುಂಟು ಮಾಡಲಿದ್ದು, ಅಧ್ಯಕ್ಷೀಯ ಚುನಾವಣೆ ವೇಳೆ ಪ್ರತಿಕೂಲ ಪರಿಣಾಮ ಬೀರಲಿದೆ ಎಂದು ಹೇಳಿದ್ದಾರೆ. ಹಾಗೆ ನೋಡಿದರೆ, ಇದು ಎರಡು ಅಗಲಿನ ಕತ್ತಿಯ ನಡಿಗೆಯೇ ಆಗಿದೆ. ಮುಂದಿನ ವರ್ಷ ನವೆಂಬರ್‌ 20ರ ಹೊತ್ತಿಗೆ ಅಮೆರಿಕದ ಅಧ್ಯಕ್ಷೀಯ ಚುನಾವಣೆ ನಡೆಯಲಿದೆ. ಟ್ರಂಪ್‌ ಎರಡನೇ ಅವಧಿಗೆ ಮರು ಆಯ್ಕೆ ಬಯಸಿದ್ದಾರೆ. ಒಂದು ವೇಳೆ, ವಾಗ್ದಂಡನೆ ಅವರ ಪರವಾಗಿ ಸಹಾನುಭೂತಿ ಸೃಷ್ಟಿಸಿದರೆ ಖಂಡಿತವಾಗಿಯೂ ಅವರ ಗೆಲುವಿಗೆ ಇದು ಕಾರಣವಾಗಲಿದೆ. ಹಾಗೆಯೇ, ಡೆಮಾಕ್ರಟ್‌ಗಳ ರೀತಿಯಲ್ಲಿಅಮೆರಿಕದ ಜನ ಕೂಡ ಯೋಚನೆ ಮಾಡಿದ್ದಾದರೆ, ಖಂಡಿತವಾಗಿಯೂ ಟ್ರಂಪ್‌ ಹಿನ್ನಡೆಯಾಗಲಿದೆ.

ಐವರು ಅಧ್ಯಕ್ಷರ ವಿರುದ್ಧ ವಾಗ್ದಂಡನೆ
- ಭ್ರಷ್ಟಾಚಾರ ಆರೋಪ ಹೊತ್ತಿದ್ದ ಅಧ್ಯಕ್ಷ ಜೇಮ್ಸ್‌ ಬ್ಯೂಕ್ಯಾನನ್‌ ಅವರ ವಿರುದ್ಧ 1860ರಲ್ಲಿವಾಗ್ದಂಡನೆ ಪ್ರಕ್ರಿಯೆ ನಡೆಸಲಾಗಿತ್ತು. ಆದರೆ, ಅವರು ಶಿಕ್ಷೆಯಿಂದ ಪಾರಾಗಿದ್ದರು.
- ಟೆನ್ಯೂರ್‌ ಆಫೀಸ್‌ ಕಾಯಿದೆ ಉಲ್ಲಂಘನೆಯ ಆರೋಪದ ಹಿನ್ನೆಲೆಯಲ್ಲಿ1868ರಲ್ಲಿಆಂಡ್ರೋ ಜಾನ್ಸನ್‌ ವಿರುದ್ಧ ವಾಗ್ದಂಡನೆ ಪ್ರಕ್ರಿಯೆ ನಡೆದಿತ್ತು. ಕೇವಲ ಒಂದು ಮತದ ಅಂತರದಲ್ಲಿಅವರು ವಾಗ್ದಂಡನೆಯಿಂದ ಪಾರಾಗಿದ್ದರು.
- 1974ರಲ್ಲಿಅಧ್ಯಕ್ಷ ರಿಚರ್ಡ್‌ ನಿಕ್ಸನ್‌ ಅವರ ವಿರುದ್ಧವೂ ವಾಗ್ದಂಡನೆ ನಡೆದಿತ್ತು. ಅಧಿಕಾರದ ದುರುಪಯೋಗ ಸೇರಿದಂತೆ ನಾನಾ ಕಾರಣಗಳಿಂದ ವಾಗ್ದಂಡನೆ ಪ್ರಕ್ರಿಯೆ ಕೈಗೊಳ್ಳಲಾಗಿತ್ತು. ಇನ್ನೇನು ತನಿಖೆ ಮುಗಿಯುವ ಹಂತದಲ್ಲಿಅವರು ರಾಜೀನಾಮೆ ನೀಡಿದ್ದರಿಂದ ವಾಗ್ದಂಡನೆ ಕೈ ಬಿಡಲಾಗಿತ್ತು.
- 1998ರಲ್ಲಿಅಧ್ಯಕ್ಷ ಬಿಲ್‌ ಕ್ಲಿಂಟನ್‌ ಅವರು ವಾಗ್ದಂಡನೆ ಪ್ರಕ್ರಿಯೆಗೆ ಒಳಗಾಗಬೇಕಾಯಿತು. ವಿಚಾರಣೆಯಲ್ಲಿಅವರು ನಿರ್ದೋಷಿ ಎಂದು ಸಾಬೀತಾಗಿ, ವಾಗ್ದಂಡನೆ ವಿರುದ್ಧ ಗೆಲುವು ಸಾಧಿಸಿದ್ದರು.
- 2019ರಲ್ಲಿ ಹಾಲಿ ಅಧ್ಯಕ್ಷ ಟ್ರಂಪ್‌ ವಿರುದ್ಧವೂ ವಾಗ್ದಂಡನೆ ಪ್ರಕ್ರಿಯೆ ನಡೆಯುತ್ತಿದೆ. ಮರು ಆಯ್ಕೆಗೆ ವಿದೇಶಿ ಸರಕಾರಗಳ ನೆರವು ಸೇರಿದಂತೆ ಇನ್ನಿತರ ಆರೋಪಗಳನ್ನು ಅವರು ಎದುರಿಸುತ್ತಿದ್ದಾರೆ.

ಸೋಮವಾರ, ಡಿಸೆಂಬರ್ 16, 2019

How did Google Assistant works: ರಿಯಲ್‌ ಟೈಮ್‌ ದುಭಾಷಿ ಹೇಗೆ ಕೆಲಸ ಮಾಡುತ್ತದೆ?

- ಮಲ್ಲಿಕಾರ್ಜುನ ತಿಪ್ಪಾರ

ಗೂಗಲ್‌ ಹೊರ ತಂದಿರುವ ಅನೇಕ ಉತ್ಪನ್ನಗಳಲ್ಲಿ'ಗೂಗಲ್‌ ಅಸಿಸ್ಟೆಂಟ್‌' ಭಿನ್ನವಾಗಿದ್ದು, ಅತ್ಯುಪಯುಕ್ತ ಮತ್ತು ಬಳಕೆದಾರರ ಸ್ನೇಹಿಯಾಗಿದೆ. ಐಫೋನ್‌ನಲ್ಲಿ ಸಿರಿ, ವಿಂಡೋಸ್‌ ಫೋನ್‌ನಲ್ಲಿ ಕೋರ್ಟನಾ, ಅಮೆಜಾನ್‌ನ ಅಲೆಕ್ಸಾ ರೀತಿಯಲ್ಲೇ ಗೂಗಲ್‌ನ ಈ 'ಗೂಗಲ್‌ ಅಸಿಸ್ಟೆಂಟ್‌' ಕೆಲಸ ಮಾಡುತ್ತದೆ. ಈ ಉತ್ಪನ್ನ ಮೊದಲಿಗೆ ಆರಂಭವಾದಾಗ ಗೂಗಲ್‌ನ ಪ್ರಾಡಕ್ಟ್‌ಗಳಾದ ಪಿಕ್ಸೆಲ್‌ ಫೋನ್‌ ಅಥವಾ ಗೂಗಲ್‌ ಹೋಮ್‌ ಗ್ಯಾಜೆಟ್‌ಗಳಿಗೆ ಮಾತ್ರ ಸಿಮೀತವಾಗಿತ್ತು. ಆದರೆ, ಇದೀಗ ಎಲ್ಲಆ್ಯಂಡ್ರಾಯ್ಡ್‌ ಹಾಗೂ ಐಒಎಸ್‌ ಆಧರಿತ ಫೋನ್‌, ಡಿವೈಸ್‌ಗಳಿಗೂ ಇದು ಸಪೋರ್ಟ್‌ ಮಾಡುತ್ತದೆ.

ಆರಂಭದಲ್ಲಿ ಗೂಗಲ್‌ ಅಸಿಸ್ಟೆಂಟ್‌ ಇಂಗ್ಲಿಷ್‌ನಲ್ಲಿ ಮಾತ್ರ ಸೇವೆಯನ್ನು ಒದಗಿಸುತ್ತಿತ್ತು. ಆನಂತರ ಜಗತ್ತಿನ ಅನೇಕ ಭಾಷೆಗಳಲ್ಲಿ ಸೇವೆಯನ್ನು ನೀಡಲಾರಂಭಿಸಿತು. ಇದರಲ್ಲಿ ನಮ್ಮ ಕೆಲವು ಭಾರತೀಯ ಭಾಷೆಗಳೂ ಸೇರಿವೆ. ಇದೆಲ್ಲವೂ ಗೊತ್ತಿರುವ ಸಂಗತಿಯೇ. ಆದರೆ, ಹೊಸ ವಿಷಯ ಏನೆಂದರೆ, ಗೂಗಲ್‌ ಅಸಿಸ್ಟೆಂಟ್‌ ಇನ್ನು ಮುಂದೆ 'ರಿಯಲ್‌ ಟೈಮ್‌ನಲ್ಲಿ ಭಾಷಾಂತರ ಮಾಡಲಿದೆ'! ಅರ್ಥಾತ್‌ ಅದು ದುಭಾಷಿ ರೀತಿಯಲ್ಲಿಕೆಲಸ ಮಾಡಲಿದೆ.


ಹೌದು, ಇದು ನಿಜ. ಇದಕ್ಕಾಗಿ ಗೂಗಲ್‌, ಅಸಿಸ್ಟೆಂಟ್‌ಗೆ 'ಇಂಟರ್‌ಪ್ರೆಟರ್‌ ಮೋಡ್‌' ಪರಿಚಯಿಸಿದೆ. ಇದು ಆ್ಯಂಡ್ರಾಯ್ಡ್‌ ಮತ್ತು ಐಒಎಸ್‌ ಆಧರಿತ ಸಾಧನಗಳಿಗೆ ಸಪೋರ್ಟ್‌ ಮಾಡಲಿದೆ. 2019ರ ಜನವರಿಯಲ್ಲೇ ಈ ಬಗ್ಗೆ ಗೂಗಲ್‌ ಘೋಷಣೆ ಮಾಡಿ, ಗೂಗಲ್‌ ಹೋಮ್‌ ಸ್ಪೀಕರ್‌, ಸ್ಮಾರ್ಟ್‌ ಡಿಸ್‌ಪ್ಲೇಸ್‌ ಸೇರಿದಂತೆ ಇನ್ನಿತ ಸಾಧನಗಳಿಗೆ ಪರಿಚಯಿಸಿತ್ತು. ಇದೀಗ ಈ ಫೀಚರ್‌ ಜಾಗತಿಕವಾಗಿ ಎಲ್ಲ ಫೋನ್‌ ಬಳಕೆದಾರರಿಗೆ ವಿಸ್ತರಿಸಲಾಗಿದೆ.

ವಿಮಾನಗಳು, ಸ್ಥಳೀಯ ರೆಸ್ಟೊರೆಂಟ್‌ಗಳ ಶೋಧ ಸೇರಿದಂತೆ ಇನ್ನಿತರ ಮಾಹಿತಿಗಾಗಿ ಪ್ರವಾಸಿಗರು ಗೂಗಲ್‌ ಅಸಿಸ್ಟೆಂಟ್‌ ನೆರವು ಪಡೆಯುತ್ತಿದ್ದಾರೆ. ಪ್ರಯಾಣದ ವೇಳೆ ಇನ್ನೂ ಹೆಚ್ಚಿನ ನೆರವು ನೀಡುವ ನಿಟ್ಟಿನಲ್ಲಿಅಸಿಸ್ಟೆಂಟ್‌ ಇದೀಗ ರಿಯಲ್‌ ಟೈಮ್‌ ಭಾಷಾಂತರ ಫೀಚರ್‌ ಇಂಟರ್‌ಪ್ರಿಟರ್‌ ಮೋಡ್‌ನೊಂದಿಗೆ ನಿಮ್ಮ ಮುಂದೆ ಬಂದಿದೆ. ಜಗತ್ತಿನಾದ್ಯಂತದ ಆ್ಯಂಡ್ರಾಯ್ಡ್‌ ಮತ್ತು ಐಒಎಸ್‌ ಫೋನ್‌ಗಳಲ್ಲಿನ ಅಸಿಸ್ಟೆಂಟ್‌ಗಳಿಗೆ ಇದು ಲಭ್ಯವಾಗಲಿದೆ ಎಂದು ಗೂಗಲ್‌ ತನ್ನ ಬ್ಲಾಗ್‌ನಲ್ಲಿತಿಳಿಸಿದೆ.

ಕನ್ನಡ ಸಹಿತ 44 ಭಾಷೆಗೆ ಬೆಂಬಲ

ಪ್ರಯಾಣದ ವೇಳೆ ವಿದೇಶಿ ಭಾಷೆಯಲ್ಲಿ ಮಾತನಾಡುವವರಿದ್ದರೆ ನೀವು ನಿಮ್ಮ ಫೋನ್‌ನಲ್ಲಿರುವ ಈ ಫೀಚರ್‌ ಅನ್ನು ಬಳಸಿಕೊಂಡು ಅವರೊಂದಿಗೆ ಮಾತನಾಡಬಹುದು. ಉದಾಹರಣೆಗೆ, ''ಹೇ ಗೂಗಲ್‌, ಬಿ ಮೈ ಫ್ರೆಂಚ್‌ ಟ್ರಾನ್ಸ್‌ಲೇಟರ್‌,'' ಎಂದು ಹೇಳಿದರೆ, ಆ ಭಾಷೆಯಲ್ಲಿನೀವು ಮತ್ತೊಬ್ಬರೊಂದಿಗೆ ಸಂವಹನ ಮಾಡಬಹುದು. ಗೂಗಲ್‌ ಹೇಳುವಂತೆ ಗೂಗಲ್‌ ಅಸಿಸ್ಟೆಂಟ್‌ ಇಂಟರ್‌ಪ್ರೆಟರ್‌ ಜಗತ್ತಿನ 44 ಭಾಷೆಗಳಿಗೆ ಸಪೋರ್ಟ್‌ ಮಾಡಲಿದೆ. ಈ ಪಟ್ಟಿಯಲ್ಲಿ ಕನ್ನಡವೂ ಇದೆ ಎಂದು ಪ್ರತ್ಯೇಕವಾಗಿ ಹೇಳಬೇಕಿಲ್ಲ.

ಯಾವೆಲ್ಲ ಭಾಷೆಗಳಿವೆ?

ಅರೆಬಿಕ್‌, ಬಂಗಾಲಿ, ಬರ್ಮೀಸ್‌, ಕಾಂಬೋಡಿಯನ್‌, ಜೆಕ್‌, ಡ್ಯಾನಿಷ್‌, ಡಚ್‌, ಇಂಗ್ಲಿಷ್‌, ಇಸ್ಟೋನಿಯನ್‌, ಫಿಲಿಪಿನೊ, ಫ್ರೆಂಚ್‌, ಜರ್ಮನ್‌, ಗ್ರೀಕ್‌, ಗುಜರಾತಿ, ಹಿಂದಿ, ಹಂಗೇರಿಯನ್‌, ಇಂಡೋನೇಷಿಯನ್‌, ಇಟಾಲಿಯನ್‌, ಜಾಪನೀಸ್‌, ಕೊರಿಯನ್‌, ಮಲಯಾಳಂ, ಮರಾಠಿ, ನೇಪಾಳಿ, ಮ್ಯಾಂಡ್ರಿಯನ್‌, ನಾರ್ವೇಯಿನ್‌, ಪೋರ್ಚುಗೀಸ್‌, ರೋಮಾನಿಯನ್‌, ರಷ್ಯನ್‌, ಸಿಂಹಳಿ, ಸ್ಪ್ಯಾನಿಶ್‌, ಸ್ವೀಡಿಶ್‌, ತಮಿಳು, ತೆಲುಗು, ತುರ್ಕಿಷ್‌, ಉಕ್ರೇನಿಯನ್‌, ಉರ್ದು ಇತ್ಯಾದಿ ಭಾಷೆಗಳಲ್ಲಿಗೂಗಲ್‌ ಅಸಿಸ್ಟೆಂಟ್‌ ಇಂಟರ್‌ಪ್ರೆಟರ್‌ ಸೇವೆ ಲಭ್ಯವಿದೆ. ಸಂಭಾಷಣೆ ಮೇಲೆ ಹೆಚ್ಚು ನಿಯಂತ್ರಣ ಸಾಧಿಸುವುದಕ್ಕಾಗಿ ಇದು ನಿಮಗೆ ಮ್ಯಾನುವಲ್‌ ಮೋಡ್‌ ಕೂಡ ಒದಗಿಸುತ್ತದೆ. ಹಾಗೆಯೇ, ಕೀ ಬೋರ್ಡ್‌ ಮೋಡ್‌ನಿಂದಾಗಿ ನೀವು ಟೈಪಿಸಿಯೂ ಭಾಷಾಂತರ ಮಾಡಬಹುದು. ಈ ಮೋಡ್‌ಗಳನ್ನು ಬಳಸುವಾಗ ನೀವು ಇಂಟರ್‌ಪ್ರೆಟರ್‌ ಮೋಡ್‌ ಅಥವಾ ವಾಯ್ಸ್ ಕಮಾಂಡ್‌ ಅನ್ನು ಟ್ರಿಗರ್‌ ಬಟನ್‌ ಮೇಲೆ ಟ್ಯಾಪ್‌ ಮಾಡುವ ಮೂಲಕ ಸ್ವಿಚ್‌ ಆಫ್‌ ಮಾಡಬಹುದು.


ಏನಿದು ಗೂಗಲ್‌ ಅಸಿಸ್ಟೆಂಟ್‌?

ಇದು ಗೂಗಲ್‌ನ ಅತಿ ಜನಪ್ರಿಯ ಉತ್ಪನ್ನವಾಗಿದ್ದು, ಆರ್ಟಿಫಿಷಿಯಲ್‌ ಇಂಟೆಲಿಜೆನ್ಸ್‌(ಕೃತಕ ಬುದ್ಧಿಮತ್ತೆ) ಆಧರಿತ ವರ್ಚುವಲ್‌ ಸೇವೆಯಾಗಿದೆ. ಮೊಬೈಲ್‌ ಮತ್ತು ಸ್ಮಾರ್ಟ್‌ ಹೋಮ್‌ ಗ್ಯಾಜೆಟ್‌ಗಳಲ್ಲಿಈ ಸೇವೆ ದೊರೆಯುತ್ತದೆ. ಈ ಹಿಂದಿನ ಗೂಗಲ್‌ ನೌ ಏಕಮುಖವಾಗಿ ಸಂಭಾಷಣೆಗೆ ಅನುವು ಮಾಡಿಕೊಡುತ್ತಿತ್ತು. ಆದರೆ, ಗೂಗಲ್‌ ಅಸಿಸ್ಟೆಂಟ್‌ ದ್ವಿಮುಖ ಸಂಭಾಷಣೆಗೆ ಬೆಂಬಲ ನೀಡುತ್ತದೆ. ಗೂಗಲ್‌ನ ಮೆಸೇಜಿಂಗ್‌ ಆ್ಯಪ್‌ 'ಅಲ್ಲೋ' ಭಾಗವಾಗಿ ಈ ಅಸಿಸ್ಟೆಂಟ್‌ ಸೇವೆ 2016ರಲ್ಲಿಆರಂಭವಾಯಿತು. 2017ರಲ್ಲಿ ಆ್ಯಂಡ್ರಾಯ್ಡ್‌ ಸಾಧನಗಳಿಗೂ ವಿಸ್ತರಣೆಯಾಯಿತು. 2017ರಲ್ಲಿ ಅಂದಾಜು 40 ಕೋಟಿ ಬಳಕೆದಾರರು ಗೂಗಲ್‌ ಅಸಿಸ್ಟೆಂಟ್‌ ಇನ್ಸ್‌ಟಾಲ್‌ ಮಾಡಿಕೊಂಡಿದ್ದಾರೆ.

Finland PM Sanna Marin- 'ಸನ್ನ' ವಯಸ್ಸಿಗೇ ಪ್ರಧಾನಿ!

ಸಲಿಂಗ ಕುಟುಂಬದ ಹಿನ್ನೆಲೆ ಹೊಂದಿರುವ ಸನ್ನಾ ಮರಿನ್‌ ತಮ್ಮ ಆರಂಭದ ದಿನಗಳಲ್ಲಿಬೇಕರಿಯಲ್ಲಿಕೆಲಸ ಮಾಡುತ್ತಿದ್ದರು...


- ಮಲ್ಲಿಕಾರ್ಜುನ ತಿಪ್ಪಾರ
ಡಿಸೆಂಬರ್‌ ಹತ್ತಕ್ಕಿಂತ ಮೊದಲು 'ಸನ್ನಾ ಮರಿನ್‌' ಎಂಬ ಯುವತಿಯ ಬಗ್ಗೆ ಫಿನ್ಲೆಂಡ್‌ ಬಿಟ್ಟು ಹೊರ ಜಗತ್ತಿಗೆ ಅಷ್ಟೇನೂ ಗೊತ್ತಿರಲಿಲ್ಲ. ಆದರೆ, 34 ವರ್ಷ ವಯಸ್ಸಿನಲ್ಲೇ ಫಿನ್ಲೆಂಡ್‌ನ ಪ್ರಧಾನಿ ಹುದ್ದೆಗೇರಿರುವ ಈ ಯುವತಿಯ ಬಗ್ಗೆ ಈ ಇಡೀ ಜಗತ್ತೇ ಈಗ ಮಾತನಾಡುತ್ತಿದೆ. ತೀರಾ ಚಿಕ್ಕ ವಯಸ್ಸಿಗೇ ಪ್ರಧಾನಿ ಹುದ್ದೆಗೇರಿದರು ಎಂಬ ಕಾರಣಕ್ಕಲ್ಲ; ಬದಲಿಗೆ ಅವರಲ್ಲಿರುವ ನಾಯಕತ್ವ, ಬದ್ಧತೆಗಾಗಿ. ಹಾಗೆಯೇ, ಸದ್ಯ ಸೇವೆ ಸಲ್ಲಿಸುತ್ತಿರುವ ಪ್ರಧಾನಿಗಳ ಪೈಕಿ ಇವರೇ ಅತ್ಯಂತ ಕಿರಿಯ ಪ್ರಧಾನಿ. ಸನ್ನಾ ನಂತರದ ಕಿರಿಯ ಸ್ಥಾನದ ಪ್ರಧಾನಿಗಳ ಸಾಲಿನಲ್ಲಿನ್ಯೂಜಿಲೆಂಡ್‌ನ ಪ್ರಧಾನಿ ಜಸಿಂದಾ ಆರ್ಡೇನ್‌(39) ಮತ್ತು ಉಕ್ರೇನಿಯನ್‌ ಪ್ರಧಾನಿ ಒಲೆಕ್ಸಿಯ ಹಂಚರಕ್‌(35) ಇದ್ದಾರೆ.

ಸಂಸದೀಯ ಜನಪ್ರತಿನಿಧಿ ಪ್ರಜಾಪ್ರಭುತ್ವ ಹೊಂದಿರುವ ಫಿನ್ಲೆಂಡ್‌ನಲ್ಲಿಮೊದಲಿನಿಂದಲೂ ಮಹಿಳೆಯರು ರಾಜಕಾರಣದಲ್ಲಿಸಕ್ರಿಯವಾಗಿ ತೊಡಗಿಸಿಕೊಂಡಿದ್ದಾರೆ. ಬಹುಶಃ ಜಗತ್ತಿನಲ್ಲೇ ಪ್ರಥಮ ಬಾರಿಗೆ ಮಹಿಳೆಯರಿಗೆ ಅನಿಯಂತ್ರಿತ ಸ್ವಾತಂತ್ರ್ಯ ಹಾಗೂ ಮತದಾನದ ಹಕ್ಕು ನೀಡಿದ ಕೀರ್ತಿ ಫಿನ್ಲೆಂಡ್‌ಗೆ ಸಲ್ಲುತ್ತದೆ. ಅದರ ಪರಿಣಾಮವೇ ಈ ವರೆಗೆ ಮೂವರು ಮಹಿಳೆಯರು ಫಿನ್ಲೆಂಡ್‌ನ ಪ್ರಧಾನಿಯಾಗಲು ಸಾಧ್ಯವಾಗಿದೆ. ಈಗ ಪ್ರಧಾನಿಯಾಗಿರುವ ಸನ್ನಾ ಮರಿನ್‌ ನೇತೃತ್ವದ ಸರಕಾರದ ಸಂಪುಟದ ಒಟ್ಟು 14 ಸಚಿವರ ಪೈಕಿ 9 ಮಹಿಳೆಯರಿದ್ದಾರೆ! ಅದರರ್ಥ, ಫಿನ್ಲೆಂಡ್‌ ರಾಜಕೀಯದಲ್ಲಿಮಹಿಳೆ ಮತ್ತು ಪುರುಷರ ನಡುವಿನ ವ್ಯತ್ಯಾಸ ತೀರಾ ತೆಳುವು. ಹಾಗಾಗಿಯೇ, ಸನ್ನಾ ಮರಿನ್‌ನಂಥ ಯುವತಿ ಚಿಕ್ಕ ವಯಸ್ಸಿಗೇ ಪ್ರಧಾನಿಯಾಗಲು ಸಾಧ್ಯವಾಗುತ್ತದೆ.

ಸೋಷಿಯಲ್‌ ಡೆಮಾಕ್ರಟಿಕ್‌ ಪಾರ್ಟಿಯ ನಾಯಕಿ ಮತ್ತು ಪ್ರಧಾನಿಯಾಗಿದ್ದ ಆಂಟ್ಟಿ ರಿನ್ನಾ ಪ್ರಧಾನಿ ಹುದ್ದೆಯಿಂದ ಕೆಳಗಿಳಿದಾಗ ಪಕ್ಷದ ಕಣ್ಣಿಗೆ ಬಿದ್ದಿದ್ದೇ ಸಾರಿಗೆ ಸಚಿವೆಯಾಗಿದ್ದ ಈ ಸನ್ನಾ ಮರಿನ್‌. ಸೋಷಿಯಲ್‌ ಡೆಮಾಕ್ರಟಿಕ್‌ ಪಕ್ಷದ ಜತೆಗೆ ಇನ್ನೂ ನಾಲ್ಕು ಪಕ್ಷಗಳು ಸೇರಿ ರಚಿಸಿಕೊಂಡಿರುವ ಸರಕಾರದ ನೇತೃತ್ವವನ್ನು ಸನ್ನಾ ವಹಿಸಿದ್ದಾರೆ. ಚಿಕ್ಕ ವಯಸ್ಸಿಗೇ ರಾಜಕಾರಣದಲ್ಲಿಪಳಗಿರುವ ಸನ್ನಾ ಅವರ ಆರಂಭದ ದಿನಗಳೇನೂ ಅತ್ಯುತ್ತಮವಾಗಿರಲಿಲ್ಲ. ಕಾಲೇಜು ಶಿಕ್ಷಣ ಮುಗಿದ ಕೂಡಲೇ 2006ರಲ್ಲಿಸೋಷಿಯಲ್‌ ಡೆಮಾಕ್ರಟಿಕ್‌ ಪಕ್ಷದ ಯುವ ವಿಭಾಗವನ್ನು ಸೇರಿ, 2010ರಿಂದ 2012ರವರೆಗೆ ಅದರ ಮೊದಲ ಉಪಾಧ್ಯಕ್ಷರಾಗಿ ಕಾರ್ಯ ನಿರ್ವಹಿಸಿದರು.


2008ರಲ್ಲಿನಡೆದ ಫಿನ್ನಿಷ್‌ ಮುನ್ಸಿಪಲ್‌ ಚುನಾವಣೆಗೆ ಸನ್ನಾ ಸ್ಪರ್ಧಿಸಿದ್ದರು. 'ಪ್ರಥಮ ಚುಂಬನಂ ದಂತ ಭಗ್ನಂ' ಎಂಬಂತೆ ಅವರಿಗೆ ಸೋಲು ಎದುರಾಯಿತು. ಮಧ್ಯೆ ಸ್ವಲ್ಪ ಬಿಡುವು ತೆಗೆದುಕೊಂಡು ಮತ್ತೆ 2012ರಿಂದ ರಾಜಕಾರಣದಲ್ಲಿಪೂರ್ಣ ಪ್ರಮಾಣದಲ್ಲಿಸನ್ನಾ ಸಕ್ರಿಯರಾದರು. 27ನೇ ವಯಸ್ಸಿನಲ್ಲೇ ಟ್ಯಾಂಪೇರ್‌ ಸಿಟಿ ಕೌನ್ಸಿಲ್‌ಗೆ ಆಯ್ಕೆಯಾದರು. ಇದು ಅವರ ರಾಜಕೀಯ ಜೀವನಕ್ಕೆ ಬಹುದೊಡ್ಡ ತಿರುವು ನೀಡಿತ್ತು. ಅಷ್ಟೇ ಅಲ್ಲದೆ, ಅವರು ಇಲ್ಲಿಂದ ಮತ್ತೆ ಹಿಂದಿರುಗಿ ನೋಡಲೇ ಇಲ್ಲ. ಅವರ ರಾಜಕೀಯ ಪಯಣವು ಪ್ರಧಾನಿಯ ಹುದ್ದೆಯವರೆಗೆ ಟಾಪ್‌ ಗೇರ್‌ನಲ್ಲಿಓಡಿತು. 2013ರಿಂದ 2017ರ ವರೆಗೂ ಸಿಟಿ ಕೌನ್ಸಿಲ್‌ನ ಅಧ್ಯಕ್ಷರಾಗಿದ್ದರು. 2017ರಲ್ಲಿಪುನಃ ಆಯ್ಕೆಯಾದರು. ಆ ಮೇಲೆ ಟ್ಯಾಂಪೇರ್‌ ಪ್ರಾದೇಶಿಕ ಅಸೆಂಬ್ಲಿಯ ಸದಸ್ಯರಾಗಿದ್ದರು. ಇದೇ ಸಮಯದಲ್ಲಿ2013-16ವರೆಗೆ ಪಿರ್ಕಾನ್ಮಾ ರಿಜನಲ್‌ ಕೌನ್ಸಿಲ್‌ನ ಮೇಂಬರ್‌ ಕೂಡ ಆಗಿದ್ದರು.

30ನೇ ವರ್ಷದಲ್ಲಿಅಂದರೆ, 2014ರಲ್ಲಿಸನ್ನಾ ಸೋಷಿಯಲ್‌ ಡೆಮಾಕ್ರಟಿಕ್‌ ಪಾರ್ಟಿಯ ಎರಡನೇ ಡೆಪ್ಯುಟಿ ಚೇರ್ಮನ್ನರಾಗಿ ಆಯ್ಕೆಯಾದರು. 2015ರಲ್ಲಿಪಿರ್ಕಾನ್ಮಾ ಪ್ರದೇಶದ ಪ್ರತಿನಿಧಿಯಾಗಿ ಫಿನ್ಲೆಂಡ್‌ ಸಂಸತ್ತಿಗೆ ಅಡಿಯಿಟ್ಟರು. ನಾಲ್ಕು ವರ್ಷಗಳ ಬಳಿಕ ಪುನಃ ಆಯ್ಕೆಗೊಂಡ ಸನ್ನಾ, 2019ರ ಜೂನ್‌ 6ರಂದು ಸಾರಿಗೆ ಮತ್ತು ಸಂವಹನ ಇಲಾಖೆಯ ಸಚಿವೆಯಾಗಿ ನೇಮಕಗೊಂಡರು.

ಹಂತ ಹಂತವಾಗಿ ರಾಜಕೀಯದಲ್ಲಿಮೇಲೇರಿದ ಸನ್ನಾ ಮರಿನ್‌ಗೆ ಚಿಕ್ಕ ವಯಸ್ಸಿಗೇ ದೇಶದ ಪ್ರಧಾನಿಯಾಗಬಹುದೆಂಬ ಸಣ್ಣ ಸುಳಿವು ಕೂಡ ಆರಂಭದ ದಿನಗಳಲ್ಲಿಇರಲಿಲ್ಲವೇನೋ? ಆದರೆ, ಅವರ ಬದ್ಧತೆ ಮತ್ತು ದೇಶದೆಡೆಗಿನ ಕಾಳಜಿ, ಸಮ್ಮಿಶ್ರ ಸರಕಾರವನ್ನು ಕರೆದೊಯ್ಯುವ ಛಾತಿ ಅವರನ್ನು ಇಂದು ದೇಶದ ಉನ್ನತ ಹುದ್ದೆಯವರೆಗೂ ಕರೆ ತಂದಿದೆ. ಸನ್ನಾಗಿಂತ ಮೊದಲ ಪ್ರಧಾನಿಯಾಗಿದ್ದ ರಿನ್ನಾ ಅವರು ಪೋಸ್ಟಲ್‌ ಮುಷ್ಕರವನ್ನು ಸರಿಯಾಗಿ ನಿರ್ವಹಣೆ ಮಾಡಲಿಲ್ಲಎಂಬ ಆರೋಪ ಕೇಳಿಬಂದಿತ್ತು. ಈ ಹಿನ್ನೆಲೆಯಲ್ಲಿಅವರು ಅಧಿಕಾರದಿಂದ ಕೆಳಗಿಳಿಯಬೇಕಾಯಿತು.

ಸನ್ನಾ ಮರಿನ್‌ ಅವರಿಗೇನೂ ರಾಜಕೀಯ ಕುಟುಂಬದ ಹಿನ್ನೆಲೆ ಇಲ್ಲ; ಶ್ರೀಮಂತರೂ ಅಲ್ಲ. 1985 ನವೆಂಬರ್‌ 16ರಂದು ಸನ್ನಾ ಮರಿನ್‌ ಅವರು ಹೆಲ್ಸಿಂಕಿಯಲ್ಲಿಜನಸಿದರು. ತಂದೆ ಕುಡುಕನಾಗಿದ್ದ. ಹೀಗಾಗಿ ತಂದೆ-ತಾಯಿಗಳಿಬ್ಬರು ಸನ್ನಾ ತೀರಾ ಚಿಕ್ಕವಳಿದ್ದಾಗಲೇ ಬೇರೆ ಬೇರೆಯಾದರು. ಆಗ ಇಡೀ ಕುಟುಂಬ ಹಣಕಾಸಿನ ಮುಗ್ಗಟ್ಟು ಎದುರಿಸುತ್ತಿತ್ತು. ತಾಯಿ ಮತ್ತು ತಾಯಿಯ ಗೆಳತಿ(ಸಂಗಾತಿ)ಯ ಪೋಷಕತ್ವದಲ್ಲಿಸನ್ನಾ ಬೆಳೆದರು. ಸನ್ನಾ ಅವರದ್ದು ರೇನ್‌ಬೋ ಫ್ಯಾಮಿಲಿ(ಎಲ್‌ಜಿಬಿಟಿ ಕಮ್ಯುನಿಟಿ). ತಮ್ಮ ಈ ಕುಟುಂಬದ ಬಗ್ಗೆ ಮುಕ್ತವಾಗಿ ಮಾತನಾಡುವ ಅವಕಾಶವಿರಲಿಲ್ಲ. ಫಿನ್ಲೆಂಡ್‌ ಸಮಾಜದಲ್ಲಿಸಲಿಂಗ ಕುಟುಂಬಗಳು ನಿಷಿದ್ಧವಾಗಿವೆ. ಇಂಥ ಸಾಮಾಜಿಕ ಪರಿಸ್ಥಿತಿಯಲ್ಲಿಸನ್ನಾ ಅವರ ಮೇಲಾದ ಪರಿಣಾಮ ಬಗ್ಗೆ ನಾವು ಊಹಿಸಬಹುದು.

ಮಗುವಾಗಿ ತಾವು ಎದುರಿಸಿದ ಆ ದಿನಗಳನ್ನು ಅವರದ್ದೇ ಮಾತಿನಲ್ಲಿಹೇಳುವುದಾದರೆ, ಅವರಿಗೆ ಅದು ಸಂಪೂರ್ಣ ನಿಶ್ಶಬ್ಧ ರೀತಿಯ ಅನುಭವ. ಇದು ಅವರಿಗೆ ಅಸಮರ್ಥತೆಯ ಭಾವನೆಯನ್ನು ತಂದುಕೊಡುತ್ತಿತ್ತು. ಅವರನ್ನು ಒಂದು ಕುಟುಂಬ ರೀತಿಯಲ್ಲಿಅಥವಾ ಇನ್ನುಳಿದವರ ಜತೆ ಸರಿಸಮಾನವಾಗಿ ನೋಡುವ ಸ್ಥಿತಿಯಲ್ಲಿಫಿನ್ಲೆಂಡ್‌ ಸಮಾಜ ಇಲ್ಲ. ಆದರೆ, ಇದಾವುದೂ ಸನ್ನಾ ಅವರ ಆತ್ಮವಿಶ್ವಾಸವನ್ನು ಕುಂದಿಸಲಿಲ್ಲ. ತಮಗೆ ಬೇಕಾದದ್ದನ್ನು ಸಾಧಿಸುವ ಛಲಕ್ಕೆ ಅಡ್ಡಿಯಾಗಲಿಲ್ಲ.

ತಮ್ಮ ಆರಂಭದ ದಿನಗಳನ್ನು ಬಹುತೇಕ ಅವರು ಬೇಕರಿಯಲ್ಲಿಕೆಲಸ ಮಾಡುತ್ತಾ ಕಳೆದರು. ವಿಶೇಷ ಎಂದರೆ, ಅವರ ಕುಟುಂಬದಲ್ಲಿವಿಶ್ವವಿದ್ಯಾಲಯ ಮೆಟ್ಟಿಲು ತುಳಿದ ಮೊದಲ ವ್ಯಕ್ತಿ ಇವರು. ಸನ್ನಾ ಅವರ ಪ್ರತಿ ಸಾಹಸಕ್ಕೂ ತಾಯಿಯಿಂದ ಬೆಂಬಲ ದೊರೆಯುತ್ತಿತ್ತು ಎಂದು ಹೇಳಿಕೊಂಡಿದ್ದಾರೆ. ರಾಜಕಾರಣದ ಆಚೆಯೂ ಕೌಟುಂಬಿಕ ಜೀವನಕ್ಕೆ ಹೆಚ್ಚು ಮಹತ್ವ ನೀಡುವ ಸನ್ನಾ, ಮಾರ್ಕೋಸ್‌ ರಾಯ್ಕೊನೆನ್‌ ಎಂಬವರನ್ನು ವಿವಾಹವಾಗಿದ್ದು, 2018ರ ಜನವರಿಯಲ್ಲಿಅವರು ಎಮ್ಮಾ ಎಂಬ ಹೆಣ್ಣು ಮಗುವಿನ ತಾಯಿಯಾದರು. ಮಗುವಿಗೆ ಈಗ 22 ತಿಂಗಳು. ಸೋಷಿಯಲ್‌ ಮೀಡಿಯಾದಲ್ಲಿಗರ್ಭಿಣಿಯಾದಾಗಿನಿಂದ ಹಿಡಿದು ತಾಯಿಯಾಗುವವರೆಗಿನ ಮಾಹಿತಿಯನ್ನು ಹಂಚಿಕೊಳ್ಳುತ್ತಾ ಬಂದಿದ್ದಾರೆ. ಆ ಮೂಲಕ ವೃತ್ತಿನಿರತ ತಾಯಿಯಾಗುವ ಮಹಿಳೆಯರಿಗೆ ಸ್ಫೂರ್ತಿಯಾಗಿದ್ದಾರೆ.

ಯುನಿವರ್ಸಿಟಿ ಆಫ್‌ ಟ್ಯಾಂಪೇರ್‌ನಿಂದ ಪದವಿ ಪಡೆದಿರುವ ಸನ್ನಾ ಫಿನ್ನಿಷ್‌, ಇಂಗ್ಲಿಷ್‌ ಮತ್ತು ಸ್ವೀಡಿಷ್‌ ಭಾಷೆಗಳಲ್ಲಿಸರಾಗವಾಗಿ ಮಾತನಾಡುತ್ತಾರೆ. ಹೊರಾಂಗಣ ಚಟುವಟಿಕೆಗಳೆಂದರೆ ತುಂಬ ಇಷ್ಟ. ಸಮ್ಮಿಶ್ರ ಸರಕಾರದ ನೇತೃತ್ವ ವಹಿಸಿರುವ ಸನ್ನಾ ಎದುರು ಆಡಳಿತವೇನೂ ಸುಲಭವಾಗಿಲ್ಲ. ಪೋಸ್ಟಲ್‌ ಮುಷ್ಕರದಿಂದಾಗಿ ಮುನಿಸಿಕೊಂಡಿರುವ ಮೈತ್ರಿ ಪಕ್ಷಗಳನ್ನು ಒಂದೇ ದಿಕ್ಕಿನಡಿ ಕೊಂಡೊಯ್ಯುವ ಮಹತ್ತರ ಜವಾಬ್ದಾರಿ ಇದೆ. ಸರಕಾರದ ಬಗ್ಗೆ ಜನರು ಕಳೆದುಕೊಂಡಿರುವ ವಿಶ್ವಾಸವನ್ನು ಮತ್ತೆ ಗಳಿಸುವ ದಾರಿ ಕೂಡ ಅಷ್ಟು ಸುಲಭವಾಗಿಲ್ಲ. ಹಾಗಾಗಿ, ತೀರಾ ಚಿಕ್ಕ ವಯಸ್ಸಿಗೇ ಪ್ರಧಾನಿಯಾಗಿರುವ ಸನ್ನಾ ಇದೆಲ್ಲವನ್ನೂ ನಿಭಾಯಿಸಬಲ್ಲರೇ ಎಂಬ ಪ್ರಶ್ನೆಗೆ ಅವರು ಆತ್ಮವಿಶ್ವಾಸದಿಂದಲೇ, ''ನನ್ನ ವಯಸ್ಸು ಅಥವಾ ಲಿಂಗದ ಬಗ್ಗೆ ಎಂದೂ ಯೋಚಿಸುವುದಿಲ್ಲ,'' ಎನ್ನುತ್ತಾರೆ. ಅಂದರೆ, ರಾಜಕಾರಣವೇ ಇರಲಿ, ಆಡಳಿತ ರಂಗವೇ ಇರಲಿ ನೀವು ಹೇಗೆ ವರ್ತಿಸುತ್ತೀರಿ, ನಿಮ್ಮ ಸಾಮರ್ಥ್ಯವನ್ನು ಹೇಗೆ ಪ್ರತಿಷ್ಠಾಪಿಸುತ್ತೀರಿ ಎಂಬುದಷ್ಟೇ ಮಹತ್ವದ್ದಾಗಿರುತ್ತದೆ. ಬಾಕಿ ಎಲ್ಲವೂ ನಗಣ್ಯ ಎಂಬುದನ್ನು ಅವರ ಮಾತುಗಳು ಧ್ವನಿಸುತ್ತವೆ.

ಸಾಂಸ್ಕೃತಿಕವಾಗಿ ಮತ್ತು ರಾಜಕೀಯವಾಗಿ ಭಿನ್ನವಾಗಿರುವ ಫಿನ್ಲೆಂಡ್‌ ದೇಶದ ಚುಕ್ಕಾಣಿ ಹಿಡಿದಿರುವ ಸನ್ನಾ ಮರಿನ್‌, ಜಗತ್ತಿನ ಯುವತಿಯರಿಗೆ ಹೊಸ ರೋಲ್‌ ಮಾಡೆಲ್‌ ಅಂದರೆ ತಪ್ಪಲ್ಲ.

ಸೋಮವಾರ, ಡಿಸೆಂಬರ್ 9, 2019

Safety Apps: ಮಹಿಳೆಯರ ಫೋನ್‌ನಲ್ಲಿ ಇರಲೇಬೇಕಾದ ಆ್ಯಪ್ಸ್

'ಮಧ್ಯರಾತ್ರಿಯಲ್ಲಿ ಮಹಿಳೆಯೊಬ್ಬಳು ಸುರಕ್ಷಿತವಾಗಿ ಸಂಚರಿಸಿದಾಗಲೇ ನಮಗೆ ನಿಜವಾದ ಸ್ವಾತಂತ್ರ್ಯ ಸಿಕ್ಕ ಹಾಗೆ' ಎಂದು ಮಹಾತ್ಮ ಗಾಂಧಿ ಹೇಳಿದ್ದರು. ಆದರೆ, ಇತ್ತೀಚಿನ ಅತ್ಯಾಚಾರ, ಮಹಿಳೆಯರ ಮೇಲಿನ ದೌರ್ಜನ್ಯಗಳನ್ನು ಗಮನಿಸಿದರೆ ನಮಗೆ ಇನ್ನೂ ಸ್ವಾತಂತ್ರ್ಯ ಸಿಕ್ಕಿಲ್ಲಎಂದು ಹೇಳಬೇಕು. ಯಾಕೆಂದರೆ, ಇತ್ತೀಚೆಗಷ್ಟೇ ಬೆಳಕಿಗೆ ಬಂದ ತೆಲಂಗಾಣದ 'ದಿಶಾ ಅತ್ಯಾಚಾರ' ಪ್ರಕರಣವು ಇಡೀ ದೇಶದಲ್ಲಿಆಕ್ರೋಶಕ್ಕೆ ಕಾರಣವಾಗಿದೆ. 2012ರಲ್ಲಿ ದಿಲ್ಲಿಯಲ್ಲಿ ನಡೆದ 'ನಿರ್ಭಯಾ ಪ್ರಕರಣ'ವಂತೂ ಇಡೀ ಜಗತ್ತನ್ನೇ ತಲ್ಲಣಗೊಳಿಸಿತ್ತು. ವಸ್ತುಸ್ಥಿತಿ ಹೀಗಿದ್ದಾಗಲೂ, ಲಭ್ಯವಿರುವ ತಂತ್ರಜ್ಞಾನವನ್ನು ಬಳಸಿಕೊಂಡು ಮಹಿಳೆಯರು ತಮ್ಮನ್ನು ತಾವು ತಕ್ಕಮಟ್ಟಿಗಾದರೂ ಸುರಕ್ಷಿತವಾಗಿಟ್ಟುಕೊಳ್ಳಬಹುದು. ಸ್ಮಾರ್ಟ್‌ಫೋನ್‌ ದಿನಮಾನದಲ್ಲಿ ಬದುಕುತ್ತಿರುವ ನಮಗೆ ತಂತ್ರಜ್ಞಾನ ಲಾಭ ಅಗಾಧವಾಗಿದೆ. ವಿಶೇಷವಾಗಿ ಮಹಿಳೆಯ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ಅನೇಕ ಆ್ಯಪ್‌ಗಳು ಕಾರ್ಯಾಚರಿಸುತ್ತಿವೆ. ವಿಷಮ ಸ್ಥಿತಿಯಲ್ಲಿಅಲರ್ಟ್‌ ರವಾನಿಸುವ, ಅಸುರಕ್ಷಿತ ಪ್ರದೇಶಗಳನ್ನು ಎಚ್ಚರಿಕೆ ನೀಡುವುದು ಸೇರಿದಂತೆ ಅನೇಕ ಫೀಚರ್‌ಗಳನ್ನು ಒಳಗೊಂಡ ಆ್ಯಪ್‌ಗಳಿವೆ. ಅಂಥ ಆ್ಯಪ್‌ಗಳ ಬಗ್ಗೆ ಇಲ್ಲಿದೆ ಮಾಹಿತಿ.
ಸುರಕ್ಷಾ ಆ್ಯಪ್‌ (Suraksha)
ಈ ಆ್ಯಪ್‌ನಲ್ಲಿ ಬಳಕೆದಾರರು ತುರ್ತು ಸಂದರ್ಭದಲ್ಲಿ ಸಂಪರ್ಕಿಸಬಹುದಾದ ಸ್ನೇಹಿತರು, ಪೋಷಕರ ಮೊಬೈಲ್‌ ನಂಬರ್‌ಗಳನ್ನು ಸೇರಿಸಬಹುದು. ತುರ್ತು ಸಂದರ್ಭದಲ್ಲಿ ಆ್ಯಪ್‌ ತರೆದು ಪವರ್‌ ಬಟನ್‌ ಅನ್ನು ಒತ್ತಿ ಹಿಡಿದರೆ ಪೊಲೀಸ್‌ ಸಹಾಯವಾಣಿಗೆ ಕರೆ ಹೋಗುತ್ತದೆ. ಇಷ್ಟು ಮಾತ್ರವಲ್ಲದೇ, ಬಳಕೆದಾರರು ಇರುವ ಪ್ರದೇಶದ ಸ್ಥಳ ಗುರುತು, ಆಡಿಯೊ ಮತ್ತು ವಿಡಿಯೊ ಕೂಡ ರವಾನೆಯಾಗುತ್ತದೆ. ಜತೆಗೆ, ಸೂಚಿಸಲಾದ ತುರ್ತು ನಂಬರ್‌ಗಳಿಗೂ ಕರೆ ಕೂಡ ಹೋಗುತ್ತದೆ. ಇದರಿಂದಾಗಿ ಸಂಕಷ್ಟದಲ್ಲಿ ಸಿಲುಕಿರುವ ಮಹಿಳಾ ಬಳಕೆದಾರರು ನೆರವು ಪಡೆಯಲು ಸಾಧ್ಯವಾಗುತ್ತದೆ. ಅಂದ ಹಾಗೆ ಈ ಆ್ಯಪ್‌ ಅನ್ನು ಬೆಂಗಳೂರು ಪೊಲೀಸರು ಅಭಿವೃದ್ಧಿಪಡಿಸಿದ್ದಾರೆ.

ಎಸ್‌ಒಎಸ್‌(SOS Stay Safe)

ಯಾವುದೇ ರೀತಿಯ ಕಷ್ಟದಲ್ಲಿ ಸಿಲುಕಿದಾಗ ಸಹಾಯಕ್ಕಾಗಿ ಮತ್ತೊಬ್ಬರ ನೆರವು ಪಡೆಯಲು ಈ ಆ್ಯಪ್‌ ಅವಕಾಶ ಕಲ್ಪಿಸಿಕೊಡುತ್ತದೆ. ಇಂಥ ಸಂದರ್ಭದಲ್ಲಿಈ ಆ್ಯಪ್‌ ಬಳಕೆದಾರರ ಗೆಳೆಯರು, ಕುಟುಂಬದ ಸದಸ್ಯರಿಗೆ ತ್ವರಿತ ಗತಿಯಲ್ಲಿಸಂದೇಶವನ್ನು ರವಾನಿಸುತ್ತದೆ. ಬಳಕೆದಾರರು ತಮ್ಮ ಕೈಯಲ್ಲಿರುವ ಉಪಕರಣವನ್ನು ಅಲುಗಾಡಿಸಿದರೆ ಸಾಕು ಎಸ್‌ಒಎಸ್‌ ಸಂದೇಶ ಹೋಗುತ್ತದೆ. ಲೈಂಗಿಕ ಕಿರುಕುಳ ಅಥವಾ ವೈದ್ಯಕೀಯ ತುರ್ತು ಪರಿಸ್ಥಿತಿಯಲ್ಲಿ ಈ ಆ್ಯಪ್‌ನ ನೆರವು ಪಡೆಯಬಹುದು.

​ಸ್ಮಾರ್ಟ್‌ 24x7(Smart 24x7)'
ಈ ಆ್ಯಪ್‌ನಲ್ಲಿರುವ ಪ್ಯಾನಿಕ್‌ ಬಟನ್‌ ಪ್ರೆಸ್‌ ಮಾಡಿದರೆ ಪೊಲೀಸರಿಗೆ ಕರೆ ಹೋಗುತ್ತದೆ. ಹಾಗೆಯೇ ಈ ಮೊದಲೇ ಬಳಕೆದಾರರು ಸೆಟ್‌ ಮಾಡಿದ ಫೋನ್‌ ನಂಬರ್‌ಗಳಿಗೂ ಕರೆ ಮಾಡುವ ಅವಕಾಶವನ್ನು ಈ ಆ್ಯಪ್‌ ಒದಗಿಸುತ್ತದೆ. ಒಂದು ವೇಳೆ, ಜಿಪಿಆರ್‌ಎಸ್‌ ಕಾರ್ಯನಿರ್ವಹಿಸದಿದ್ದ ಪಕ್ಷದಲ್ಲಿ ಲೊಕೇಷನ್‌ ಮಾಹಿತಿಯನ್ನು ಎಸ್‌ಎಂಎಸ್‌ ಮೂಲಕ ಈ ಆ್ಯಪ್‌ ಕಳುಹಿಸುತ್ತದೆ. ಟ್ರ್ಯಾಕಿಂಗ್‌, ಕಸ್ಟಮ್‌ ಕೇರ್‌ ಮತ್ತು ಚಾಟ್‌ ಸೇರಿದಂತೆ ಇನ್ನೂ ಅನೇಕ ಫೀಚರ್‌ಗಳಿವೆ. ತುರ್ತು ಸಂದರ್ಭದಲ್ಲಿ ಬಳಕೆದಾರರಿರುವ ಜಾಗದ ಆಡಿಯೊ-ವಿಡಿಯೊವನ್ನು ದಾಖಲಿಸಿಕೊಳ್ಳುತ್ತದೆ.

ಮೈ ಸೇಫ್ಟಿಪಿನ್‌(My Safetipin)

ಮ್ಯಾಪ್‌ ಬೇಸ್ಡ್‌ ಸೇಫ್ಟಿ ಆ್ಯಪ್‌ ತುಂಬ ಉಪಯುಕ್ತವಾಗಿದೆ. ಈ ಆ್ಯಪ್‌ ವಿಶೇಷ ಏನೆಂದರೆ, ನೀವಿರುವ ಸ್ಥಳದ ಸುರಕ್ಷತೆಯ ಶ್ರೇಯಾಂಕವನ್ನು ಸೂಚಿಸುತ್ತದೆ. ಆ್ಯಪ್‌ ನಕ್ಷೆಯಲ್ಲಿರುವ ಪಿನ್‌ ಸ್ಥಳದ ಸುರಕ್ಷತೆಯ ಶ್ರೇಯಾಂಕವನ್ನು ಒದಗಿಸುತ್ತದೆ. ಅಸುರಕ್ಷಿತ ಪ್ರದೇಶವಾಗಿದ್ದರೆ ಪಿನ್‌ ಕೆಂಪು ಬಣ್ಣದ್ದಾಗಿರುತ್ತದೆ. ಸುರಕ್ಷಿತ ಪ್ರದೇಶವಾಗಿದ್ದರೆ ಅದು ಹಸಿರು ಬಣ್ಣದ್ದಾಗಿರುತ್ತದೆ. ಕಡಿಮೆ ಸುರಕ್ಷತೆಯ ಪ್ರದೇಶವನ್ನು ಅಂಬರ್‌(ತುಸು ಹಳದಿ) ಪಿನ್‌ ಸೂಚಿಸುತ್ತದೆ. ನೀವಿರುವ ಪ್ರದೇಶದಲ್ಲಿನ ಸಾರ್ವಜನಿಕ ಸಾರಿಗೆ, ಅಲ್ಲಿರುವ ಪೊಲೀಸ್‌ ಠಾಣೆ, ಫಾರ್ಮಸಿ ಅಥವಾ ಹತ್ತಿರದ ಎಟಿಎಂ, ಜನಸಂದಣಿ ಪ್ರದೇಶ ಮಾಹಿತಿ ನೀಡುವುದು ಮಾತ್ರವಲ್ಲದೆ, ರಿಯಲ್‌ ಟೈಮ್‌ ಲೊಕೇಷನ್‌ ವಿವರವನ್ನು ಜಿಪಿಎಸ್‌ ಟ್ರ್ಯಾಕಿಂಗ್‌ ಮೂಲಕ ನಿಮ್ಮ ಹತ್ತಿರದವರೆಗೆ ರವಾನಿಸುತ್ತದೆ. ಉಳಿದ ಬಳಕೆದಾರರಿಗೆ ನೆರವಾಗುವ ನಿಟ್ಟಿನಲ್ಲಿ ನಿಮಗೆ ಅಸುರಕ್ಷಿತ ಎನಿಸಿದ ಪ್ರದೇಶವನ್ನೂ ಮ್ಯಾಪ್‌ನಲ್ಲಿ ಪಿನ್‌ ಮಾಡಬಹುದು.

ರೆಸ್ಕೂಯರ್‌ (Rescuer)

ಬಳಕೆದಾರರು ಈ ಆ್ಯಪ್‌ನಲ್ಲಿರುವ ಎಮರ್ಜೆನ್ಸಿ ಟ್ಯಾಬ್‌ ಪ್ರೆಸ್‌ ಮಾಡಿದರೆ ತಕ್ಷಣವೇ ಗೂಗೂಲ್‌ ಲೊಕೇಷನ್‌ ಸಹಿತ ಸಂದೇಶವನ್ನು ಬಳಕೆದಾರರ ಕಾಂಟಾಕ್ಟ್ ಲಿಸ್ಟ್‌ ಮತ್ತು ಫೇಸ್‌ಬುಕ್‌ ಫ್ರೆಂಡ್‌ ಲಿಸ್ಟ್‌ನಲ್ಲಿರುವ ಐವರಿಗೆ ಸಂದೇಶವನ್ನು ಕಳುಹಿಸುತ್ತದೆ. ಹಾಗೆಯೇ, ತುರ್ತು ಸಂದರ್ಭದಲ್ಲಿ ಇಬ್ಬರಿಕೆ ಕರೆ ಮಾಡುವ ಆಯ್ಕೆಯನ್ನು ಹೊಂದಿದೆ.

ನಿರ್ಭಯ(Nirbhaya)

ಮಹಿಳೆಯರ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡೇ ಈ ಆ್ಯಪ್‌ ಅನ್ನು ರೂಪಿಸಲಾಗಿದೆ. ಬಳಕೆದಾರರು ದಾಖಲಿಸಿದ ಫೋನ್‌ ನಂಬರ್‌ಗಳಿಗೆ ಅಲರ್ಟ್‌ ರವಾನಿಸುವ ಕೆಲಸವನ್ನು ಇದು ಮಾಡುತ್ತದೆ. ಅಸುರಕ್ಷಿತ ಪ್ರದೇಶದ ಬಗ್ಗೆಯೂ ಇದು ಮಾಹಿತಿ ನೀಡುತ್ತದೆ. ಬಳೆಕದಾರರು ಅಂಥ ಪ್ರದೇಶಕ್ಕೆ ಹೋದಾಗ ಈ ಮಾಹಿತಿಯನ್ನು ನೀಡುತ್ತದೆ.

ಸಿಟಿಜನ್‌ಕಾಪ್‌ (CitizenCop)

ಈ ಆ್ಯಪ್‌ ಬಳಸಿಕೊಂಡು ನೀವಿರುವ ಸ್ಥಳಲ್ಲಿ ನಡೆಯುವ ಕ್ರಿಮಿನಲ್‌ ಕೆಲಸಗಳು ಅಥವಾ ಕಾನೂನು ಬಾಹಿರ ಚಟುವಟಿಕೆಗಳ ಬಗ್ಗೆ ರಿಪೋರ್ಟ್‌ ಮಾಡಬಹುದು. ಮತ್ತು ನಿಮ್ಮ ಹೆಸರನ್ನು ಗುಪ್ತವಾಗಿಡಲಾಗುತ್ತದೆ. ಈ ಆ್ಯಪ್‌ನಲ್ಲಿ ಲಕ್ಷಣ್‌ರೇಖಾ ಎಂಬ ಫೀಚರ್‌ ಇದ್ದು, ಅದನ್ನು ಮಹಿಳೆಯರು ತುರ್ತು ಸಂದರ್ಭದಲ್ಲಿ ಬಳಸಬಹುದು. ಟ್ರ್ಯಾಕಿಂಗ್‌, ಎಮರ್ಜೆನ್ಸಿ ಕರೆ, ಎಸ್‌ಒಎಸ್‌ ಎಚ್ಚರಿಕೆಗಳನ್ನು ರವಾನಿಸುತ್ತದೆ.

​ಚಿಲ್ಲಾ(Chilla)

ತುರ್ತು ಸಂದರ್ಭದಲ್ಲಿ ಮಹಿಳೆಯರು ತಮ್ಮ ಫೋನ್‌ ಅನ್ನು ಬಳಸಲು ಸಾಧ್ಯವಾಗದಿದ್ದಾಗ, ಜೋರಾಗಿ ಕೂಗುವ ಮೂಲಕ ಈ ಚಿಲ್ಲಾ ಆ್ಯಪ್‌ ಸಕ್ರಿಯಗೊಳಿಸಬಹುದು. ಆಗ ಈ ಆ್ಯಪ್‌ ಪೋಷಕರಿಗೆ ತುರ್ತು ಸಂದೇಶವನ್ನು ರವಾನಿಸುತ್ತದೆ. ಇದರ ಹೊರತಾಗಿಯೂ, ಈ ಮೊದಲೇ ಸೆಟ್‌ ಮಾಡಿದ ಫೋನ್‌ ನಂಬರ್‌ಗಳಿಗೂ ಸಂದೇಶಗಳನ್ನು ಕಳುಹಿಸುತ್ತದೆ. ಇದಕ್ಕಾಗಿ ನೀವು ಪವರ್‌ ಬಟನ್‌ ಅನ್ನು 5 ನಿಮಿಷದವರೆಗೆ ಒತ್ತಿ ಹಿಡಿಯಬೇಕು.


DuckDuckGo: ಗೂಗಲ್‌ಗೆ ಸ್ಪರ್ಧೆ ಒಡ್ಡಲಿದೆಯೇ ಡಕ್‌ಡಕ್‌ಗೋ?

- ಮಲ್ಲಿಕಾರ್ಜುನ ತಿಪ್ಪಾರ

ಮೊನ್ನೆ ಮೊನ್ನೆಯಷ್ಟೇ ಟ್ವಿಟರ್‌ ಸಿಇಒ ಜಾಕ್‌ ಡಾರ್ಸೆ ಅವರು, ''ಡಕ್‌ಡಕ್‌ಗೋ ನನಗೆ ತುಂಬ ಇಷ್ಟವಾಗಿದ್ದು, ಅದನ್ನೇ ನನ್ನ ಡಿಫಾಲ್ಟ್‌ ಸರ್ಚ್ ಎಂಜಿನ್‌ ಆಗಿ ಬದಲಿಸಿಕೊಂಡಿರುವೆ,'' ಎಂದು ಟ್ವೀಟ್‌ ಮಾಡಿದ್ದು ದೊಡ್ಡ ಸುದ್ದಿಗೆ ಕಾರಣವಾಯಿತು. ತಂತ್ರಜ್ಞಾನ ಮಾರುಕಟ್ಟೆಯಲ್ಲಿಗೂಗಲ್‌ ಸರ್ಚ್ ಎಂಜಿನ್‌ ಏಕಸ್ವಾಮ್ಯವನ್ನು ಹೊಂದಿದೆ. ಇದರಲ್ಲಿ ಯಾವುದೇ ಅನುಮಾನವಿಲ್ಲ. ಆದರೆ, ಇತ್ತೀಚಿನ ದಿನಗಳಲ್ಲಿ ಡಕ್‌ಡಕ್‌ಗೋ ಕೂಡ ಸದ್ದು ಮಾಡುತ್ತಿದೆ. ಹಾಗಂತ, ಸಿಕ್ಕಾಪಟ್ಟೆ ಸ್ಪರ್ಧೆ ನೀಡುತ್ತಿದೆ ಎಂದರ್ಥವಲ್ಲ. ಗೂಗಲ್‌ ಸರ್ಚ್ ಎಂಜಿನ್‌ ಬಳಕೆಯಲ್ಲಿಶೇ. 81.5ರಷ್ಟು ಪಾಲು ಹೊಂದಿದ್ದರೆ, ಡಕ್‌ಡಕ್‌ಗೋ ಪಾಲು ಕೇವಲ ಶೇ. 0.28 ಮಾತ್ರ. ಆದರೆ, ಅದರ ವಿಶ್ವಾಸರ್ಹತೆ ಹೆಚ್ಚಾಗುತ್ತಿದೆ ಎಂದರೆ ತಪ್ಪಲ್ಲ.

ಗೂಗಲ್‌ ಸರ್ಚ್ ಎಂಜಿನ್‌ ನಮ್ಮ ಬದುಕಿನ ಭಾಗವೇ ಆಗಿದ್ದರೂ, ಅದು ನಮ್ಮ ಖಾಸಗಿತನಕ್ಕೆ ಕನ್ನ ಹಾಕಿದೆ, ನಮ್ಮ ನಡವಳಿಕೆ ಮೇಲೆ ಸದಾ ಕಣ್ಣಿಟ್ಟಿರುತ್ತದೆ, ಬಳಕೆದಾರರ ಎಲ್ಲ ಚಟುವಟಿಕೆಗಳನ್ನು ಬೆನ್ನಟ್ಟಿ ಅದರ ಅನ್ವಯ ಜಾಹೀರಾತುಗಳನ್ನು ಪೂರೈಸುತ್ತಿದೆ... ಹೀಗೆ ನಾನಾ ಕಾರಣಗಳಿಂದ ಬಳಕೆದಾರರಿಗೆ ಒಂದಿಷ್ಟು ಕಿರಿಕಿರಿಯನ್ನುಂಟು ಮಾಡುತ್ತಿದೆ ಎಂಬ ಆರೋಪಗಳಿವೆ. ಎಲ್ಲಕ್ಕಿಂತ ಹೆಚ್ಚಾಗಿ, ಬಳಕೆದಾರರ ಖಾಸಗಿತನಕ್ಕೆ ಧಕ್ಕೆ ಮಾಡುತ್ತಿದೆ ಎಂಬ ಗಂಭೀರ ಆರೋಪವನ್ನು ಎದುರಿಸುತ್ತಿದ್ದು, ಅದಕ್ಕಾಗಿ ಯುರೋಪ್‌ ಕೋರ್ಟ್‌ಗಳ ಕಟೆಕಟೆಯಲ್ಲಿ ನಿಂತಿದೆ. ಇಂಥ ಹೊತ್ತಿನಲ್ಲಿ ಟ್ವಿಟರ್‌ ದೈತ್ಯ ಕಂಪನಿಯೊಬ್ಬರು ಸಿಇಒ ತಮ್ಮ ಡಿಫಾಲ್ಟ್‌ ಸರ್ಚ್ ಎಂಜಿನ್‌ ಡಕ್‌ಡಕ್‌ಗೋ ಎಂದು ಹೇಳಿದ್ದಾರೆಂದರೆ ಅದಕ್ಕೆ ಮಹತ್ವ ಬಂದೇ ಬರುತ್ತದೆ.


ಕೃತಿಕ ಬುದ್ಧಿಮತ್ತೆ(ಎಐ) ಆಧರಿತ ಡಿಜಿಟಲ್‌ ಸೇವೆಗಳು ನಮ್ಮನ್ನು ಆವರಿಸಿಕೊಳ್ಳುತ್ತಿರುವ ಸಂದರ್ಭದಲ್ಲಿ ಯಾವ ಮಾಹಿತಿಯೂ ರಹಸ್ಯವಾಗಿ ಉಳಿಯುವುದಿಲ್ಲ. ಎಷ್ಟೇ ಕಠಿಣ ಪಾಸ್‌ವರ್ಡ್ ನಮ್ಮ ಮಾಹಿತಿ ಪರರ ಪಾಲಾಗುವುದನ್ನು ತಡೆಯಲಾರದು. ಮಾಹಿತಿ ತಂತ್ರಜ್ಞಾನ ಎಂಬ ಬಟಾ ಬಯಲಿನಲ್ಲಿನಿಂತಿರುವ ನಾವು, ನಮ್ಮ ಬಗ್ಗೆ ಯಾರಿಗೂ ಗೊತ್ತಿಲ್ಲ ಎಂದು ಎದೆಯುಬ್ಬಿಸಿಕೊಂಡಿದ್ದೇವೆ. ಆನ್‌ಲೈನ್‌ನಲ್ಲಿನ ನಮ್ಮ ಪ್ರತಿ ಚಟುವಟಿಕೆಯೂ ನಮ್ಮನ್ನು ಬೆತ್ತಲಾಗಿಸುತ್ತದೆ! ಖಾಸಗಿ ಮಾಹಿತಿಯನ್ನು ಕಾಪಾಡಿಕೊಳ್ಳುವ ವಾಗ್ದಾನಗಳನ್ನು ಎಲ್ಲಸಂಸ್ಥೆಗಳು ನೀಡುತ್ತವೆ. ಆದರೆ, ಅದೇನೂ ಪರಮ ಸತ್ಯವಲ್ಲ.

ಹೀಗಿದ್ದೂ ಡಕ್‌ಡಕ್‌ಗೋ ಮಾತ್ರ ತಾನು ಬಳಕೆದಾರರ ಖಾಸಗಿ ಮಾಹಿತಿಯನ್ನು ಬಿಟ್ಟುಕೊಡುವುದಿಲ್ಲ ಎಂದು ಹೇಳುತ್ತಿದೆ. ಗೂಗಲ್‌ನಂತೆ ಡಕ್‌ಡಕ್‌ಗೋ, ಬಳಕೆದಾರರ ಚಟುವಟಿಕೆ ಮೇಲೆ ನಿಗಾ ವಹಿಸುವುದು, ಐಪಿ ಅಡ್ರೆಸ್‌ಗಳನ್ನು ಪಡೆಯುವುದು ಮತ್ತು ಆನ್‌ಲೈನ್‌ ನಡುವಳಿಕೆಯ ಆಧಾರದ ಮೇಲೆ ಜಾಹೀರಾತುಗಳನ್ನು ಫುಶ್‌ ಮಾಡುವುದಾಗಲಿ ಮಾಡುವುದಿಲ್ಲಎಂಬುದು ಬಳಕೆದಾರರ ಅಂಬೋಣ. ಹಾಗಾಗಿ, ನಿಧಾನವಾಗಿ ಗೂಗಲ್‌ ಸರ್ಚ್ ಎಂಜಿನ್‌ಗೆ ಡಕ್‌ಡಕ್‌ಗೋ ಪರ್ಯಾಯ ಎಂಬ ರೀತಿಯಲ್ಲಿ ಬಿಂಬಿತವಾಗುತ್ತದೆ. ಬಳಕೆಯ ಪ್ರಮಾಣದ ಗಮನಿಸಿದರೆ ಸದ್ಯಕ್ಕೆ ಹಾಗೇ ಹೇಳುವುದು ತಪ್ಪು. ಹಾಗಂತ, ತೀರಾ ಕಡೆಗಣಿಸುವಂತೆಯೂ ಇಲ್ಲ.

2019ರ ನವೆಂಬರ್‌ ಅಂಕಿ-ಸಂಖ್ಯೆಗಳನ್ವಯ ಡಕ್‌ಡಕ್‌ಗೋ ನಿತ್ಯ ಸರಾಸರಿ 4.8 ಕೋಟಿ ಬಳಕೆದಾರರನ್ನು ಹೊಂದಿದೆ. ಅತಿ ಹೆಚ್ಚು ವೀಕ್ಷಿಸಿದ ಆಧಾರದ ಮೇಲೆ ಶೋಧಗಳನ್ನು ಗೂಗಲ್‌ ನಿಮ್ಮ ಮುಂದಿಟ್ಟರೆ, ಡಕ್‌ಡಕ್‌ಗೋ ಅತಿ ಹೆಚ್ಚು ನಿಖರವಾದ ಶೋಧಗಳನ್ನು ಬಳಕೆದಾರರಿಗೆ ನೀಡುತ್ತದೆ. ಹಾಗಂತ ಅದು ಹೇಳಿಕೊಂಡಿದೆ. ಇದು ತಕ್ಕಮಟ್ಟಿಗೂ ನಿಜವೂ ಹೌದು. ಡಕ್‌ಡಕ್‌ಗೋ ಸರ್ಚ್ಎಂಜಿನ್‌ನಲ್ಲಿ ನಿಮಗೆ ಬೇಕಿರುವ ವಿಷಯವನ್ನು ಶೋಧಿಸಿದರೆ ಅಸಂಖ್ಯ ಮಾಹಿತಿ ನಿಮ್ಮ ಮುಂದೆ ಬಂದು ಬೀಳುವುದಿಲ್ಲ.

ಗ್ರೇಟರ್‌ ಫಿಲಡೆಲ್ಫಿಯಾದ ಪೆನ್ಸಿಲ್ವೇನಿಯಾದ ಪಾವೊಲಿಯಲ್ಲಿ ಡಕ್‌ಡಕ್‌ಗೋ ಕಚೇರಿಯನ್ನು ಹೊಂದಿದ್ದು, ಬೆರಳೆಣಿಕೆ ಉದ್ಯೋಗಿಗಳನ್ನು ಹೊಂದಿದೆ. 11 ವರ್ಷಗಳ ಹಿಂದೆ ಗೆಬ್ರೀಯಲ್‌ ವಿನ್‌ಬರ್ಗ್‌ ಎಂಬುವವರು ಇದನ್ನು ಹುಟ್ಟುಹಾಕಿದರು. 2011 ಫೆಬ್ರವರಿ 22ರಂದು ಡಿಡಿಜಿ.ಜಿಜಿ(ddg.gg) ಡೊಮೈನ್‌ ನೇಮ್‌ ಅಡಿ ಕಂಪನಿ ನೋಂದಣಿಯಾಗಿದೆ. 2018ರಲ್ಲಿ ಡಕ್‌.ಕಾಂ(duck.com) ಸ್ವಾಧೀನ ಪಡಿಸಿಕೊಂಡ ಬಳಿಕ ಡಕ್‌ಡಕ್‌ಗೋ.ಕಾಂ(https://duckduckgo.com/) ಎಂದು ಬದಲಾಯಿತು. ಇನ್ಸ್‌ಟಂಟ್‌ ಆನ್ಸರ್ಸ್‌, ಟಾರ್‌ ಅಕ್ಸೆಸ್‌, ವಾಟ್ಸ್‌ ಸರ್ಚ್, ಬ್ಯಾಂಗ್ಸ್‌ ಇವುಗ ಡಕ್‌ಡಕ್‌ಗೋ ಸರ್ಚ್ ಎಂಜಿನ್‌ನ ವಿಶೇಷತೆಗಳಾಗಿವೆ.

ವೈಯಕ್ತಿಕ ಮಾಹಿತಿ ಸಂಗ್ರಹವಿಲ್ಲಡಕ್‌ಡಕ್‌ ಗೋ ಡಿಫಾಲ್ಟ್‌ ಆಗಿ ವೈಯಕ್ತಿಕ ಮಾಹಿತಿಯನ್ನು ಸಂಗ್ರಹಿಸುವುದಿಲ್ಲಅಥವಾ ಹಂಚಿಕೆ ಮಾಡುವುದಿಲ್ಲ. ಇದು ತಮ್ಮ ಪ್ರೈವೇಸಿ ಪಾಲಿಸಿಯಾಗಿದೆ ಎನ್ನುತ್ತಾರೆ ಡಕ್‌ಡಕ್‌ಗೋ ಹಿಂದಿನ ರೂವಾರಿ ಗೆಬ್ರೀಯಲ್‌ ವಿನ್‌ಬರ್ಗ್‌ ಅವರು.

ಪ್ರಮುಖ ಸರ್ಚ್ ಎಂಜಿನ್‌ಗಳುಗೂಗಲ್‌, ಯಾಹೂ, ಬಿಂಗ್‌, ಯಾಂಡೆಕ್ಸ್‌.

ಈ ಲೇಖನವು ವಿಜಯ ಕರ್ನಾಟಕದ 2019ರ ಡಿಸೆಂಬರ್ 12ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ

ಸೋಮವಾರ, ಡಿಸೆಂಬರ್ 2, 2019

Farmer Apps: ರೈತೋಪಯೋಗಿ ಆ್ಯಪ್‌ಗಳು

- ಮಲ್ಲಿಕಾರ್ಜುನ ತಿಪ್ಪಾರ

ಅಸ್ಥಿರತೆಗೆ ಇನ್ನೊಂದು ಹೆಸರೇ ಕೃಷಿ. ಈ ಕ್ಷೇತ್ರದಲ್ಲಿರುವಷ್ಟು ಅಸ್ಥಿರತೆ, ಆತಂಕ ಮತ್ತ್ಯಾವ ಕ್ಷೇತ್ರದಲ್ಲೂ ಇಲ್ಲ. ಸರಕಾರದ ನೀತಿಗಳು, ದಲ್ಲಾಳಿಗಳು, ಮಾರುಕಟ್ಟೆಯಲ್ಲಿನ ಲೋಪಗಳಿಂದಾಗಿ ಇಂದಿಗೂ ರೈತರು ತಮ್ಮ ಬೆಳೆಗಳಿಗೆ ಸೂಕ್ತ ಬೆಲೆಯನ್ನು ಪಡೆಯಲು ಸಾಧ್ಯವಾಗುತ್ತಿಲ್ಲ. ಇದಕ್ಕೆ ತಾಜಾ ಉದಾಹರಣೆ ಎಂದರೆ, ಈರುಳ್ಳಿ ಬೆಲೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ಕೆ.ಜಿ.ಗೆ ನೂರು ರೂ. ದಾಟಿದ್ದರೂ ರೈತರಿಗೇನೂ ಬಂಪರ್ ಬೆಲೆ ಸಿಗುತ್ತಿಲ್ಲ. ಮಧ್ಯವರ್ತಿಗಳೇ ಹೆಚ್ಚು ಲಾಭ ಮಾಡಿಕೊಳ್ಳುತ್ತಿದ್ದಾರೆ. ಇಂಥ ಸಂದರ್ಭದಲ್ಲಿ ರೈತರು ಲಭ್ಯ ಇರುವ ತಂತ್ರಜ್ಞಾನ ಬಳಸಿಕೊಂಡು ತಮ್ಮ ಉತ್ಪನ್ನಗಳನ್ನು ಸೂಕ್ತ ಸಮಯದಲ್ಲಿ ಮಾರಾಟ ಮಾಡಿ ಲಾಭ ಗಳಿಸಬಹುದು. ಇದರ ಜತೆಗೆ, ಹವಾಮಾನ, ರಸಗೊಬ್ಬರ, ಬೆಳೆಗಳ ಬಗ್ಗೆ ಪೂರ್ಣವಾದ ಮಾಹಿತಿ ಇದ್ದರೆ ಅತ್ಯುತ್ತಮ ಕೃಷಿ ಸಾಧ್ಯ. ಹಾಗಾಗಿ, ರೈತರಿಗೆ ನೆರವಾಗುವ ನಿಟ್ಟಿನಲ್ಲಿ ಅನೇಕ ಆ್ಯಪ್‌ಗಳಿವೆ. ಕೆಲವೊಂದು ಆ್ಯಪ್‌ಗಳನ್ನು ಕೇಂದ್ರ ಹಾಗೂ ರಾಜ್ಯ ಸರಕಾರಗಳು ಬಿಡುಗಡೆ ಮಾಡಿದ್ದರೆ, ಮತ್ತೊಂದಿಷ್ಟು ಆ್ಯಪ್‌ಗಳನ್ನು ಕೃಷಿ ಸಂಬಂಧಿಸಿದ ಸಂಸ್ಥೆಗಳು ನಿರ್ವಹಣೆ ಮಾಡುತ್ತಿವೆ. ರೈತರು ಈ ಆ್ಯಪ್‌ಗಳ ಮಾಹಿತಿಯನ್ನು ಬಳಸಿಕೊಂಡು ಅತ್ಯುತ್ತಮ ಕೃಷಿ ಮಾಡಬಹುದು, ತಮ್ಮ ಉತ್ಪನ್ನಗಳಿಗೆ ಸೂಕ್ತ ಬೆಲೆಯನ್ನು ಪಡೆದುಕೊಳ್ಳಬಹುದು. ಅಂಥ ಆ್ಯಪ್‌ಗಳ ಬಗ್ಗೆ ಇಲ್ಲಿದೆ ಮಾಹಿತಿ. ಕ್ರಾಪ್ ಇನ್ಶೂರೆನ್ಸ್(Crop Insurance)
ಹೆಸರು ಸೂಚಿಸುವಂತೆ ಇದು ಬೆಳೆ ವಿಮೆಗೆ ಸಂಬಂಧಿಸಿದ ಮಾಹಿತಿ ಒದಗಿಸುವ ಆ್ಯಪ್‌. ಅಧಿಸೂಚಿತ ಬೆಳೆಗಳ ಇನ್ಶೂರೆನ್ಸ್ ಪ್ರಿಮೀಯಂ ಅನ್ನು ಲೆಕ್ಕ ಹಾಕಲು ಈ ಆಪ್ ನೆರವಾಗುತ್ತದೆ. ಕಟ್-ಆಫ್ ಡೇಟ್ಸ್ ಮತ್ತು ಬೆಳೆ ಹಾಗೂ ಸ್ಥಳದ ಬಗ್ಗೆ ಕಂಪನಿ ಸಂಪರ್ಕದ  ಬಗ್ಗೆ ಮಾಹಿತಿ ನೀಡುತ್ತದೆ. 

 ಕಿಸಾನ್ ಸುವಿಧಾ(Kisan Suvidha)
ಈ ಆ್ಯಪ್‌ಗೆ ಪ್ರಧಾನಿ ನರೇಂದ್ರ ಮೋದಿ ಅವರು 2016ರಲ್ಲಿ ಚಾಲನೆ ನೀಡಿದರು.  ಪ್ರಸಕ್ತ ಹವಾಮಾನ ಮತ್ತು ಮುಂದಿನ ಐದು ದಿನಗಳ ಹವಾಮಾನ ಮಾಹಿತಿಯನ್ನು ಒದಗಿಸುತ್ತದೆ. ಹತ್ತಿರದ ಪಟ್ಟಣಗಳಲ್ಲಿರುವ ಧಾರಣಿ, ರಸಗೊಬ್ಬರು, ಬೀಜ, ಯಂತ್ರೋಪಕರಣಗಳ ಮಾಹಿತಿ ನೀಡುತ್ತದೆ. ದೇಶದ  ನಾನಾ ಭಾಷೆಗಳಲ್ಲಿ ಈ ಆ್ಯಪ್‌ ಮಾಹಿತಿಯನ್ನು ನೀಡುತ್ತದೆ.

ಅಗ್ರಿ ಮಾರ್ಕೆಟ್(Agri Market)
ಕ್ರಾಪ್ ಇನ್ಶೂರೆನ್ಸ್ ಆ್ಯಪ್‌ ಜತೆಗೆ ಅಗ್ರಿ ಮಾರ್ಕೆಟ್ ಆಪ್ ಅನ್ನು ಭಾರತ ಸರಕಾರ ಬಿಡುಗಡೆ ಮಾಡಿತ್ತು. ಬೆಳೆಗಳ ಧಾರಣಿ ಬಗ್ಗೆ ಸಂಪೂರ್ಣವಾದ ಮಾಹಿತಿ ನೀಡುವ ಉದ್ದೇಶದಿಂದಲೇ ಈ ಆಪ್ ಅಭಿವೃದ್ಧಿಪಡಿಸಲಾಗಿದೆ. ರೈತರು ತಮ್ಮ ಸುತ್ತಲಿನ ಅಂದರೆ 50 ಕಿ.ಮೀ. ವ್ಯಾಪ್ತಿಯ ಮಾರುಕಟ್ಟೆಯಲ್ಲಿರುವ ಬೆಳೆಗಳ ಧಾರಣಿಯನ್ನು ಈ ಆ್ಯಪ್‌ ಬಳಸಿಕೊಂಡು ತಿಳಿದುಕೊಳ್ಳಬಹುದು. 

ಉಳವಾನ್(Uzhavan)
ಈ ಆ್ಯಪ್‌ನಿಂದ ರೈತರು 9 ರೀತಿಯ ಸೇವೆಗಳನ್ನು ಪಡೆಯಬಹುದಾಗಿದೆ. ಬೆಳೆ ವಿಮೆ, ಕೃಷಿ ಸಬ್ಸಿಡಿ, ಕೃಷಿ ಉಪಕರಣಗಳು ಮತ್ತು ಸಂಬಂಧಿಸಿದ ಮೂಲಭೂತ ಸೌಲಭ್ಯಗಳ ಕುರಿತು ಸಂಪೂರ್ಣ ಮಾಹಿತಿಯನ್ನು ಈ ಆ್ಯಪ್‌ ಒದಗಿಸುತ್ತದೆ. ಹಾಗೆಯೇ, ಮುಂದಿನ ನಾಲ್ಕು ದಿನಗಳವರೆಗಿನ ಹವಾಮಾನ ಮಾಹಿತಿಯನ್ನು ಈ ಆ್ಯಪ್‌ ಒದಗಿಸುತ್ತದೆ.

ಪುಸಕೃಷಿ(Pusa Krishi)
ಭಾರತೀಯ ಕೃಷಿ ಸಂಸೋಧನಾ ಸಂಸ್ಥೆ(ಐಎಆರ್‌ಐ) ಅಭಿವೃದ್ಧಿಪಡಿಸಿರುವ ತಂತ್ರಜ್ಞಾನಗಳು ಮತ್ತು ರೈತರಿಗೆ ನೆರವಾಗುವ ಇತರೆ ಮಾಹಿತಿಯನ್ನು ಒದಗಿಸುವ ಗುರಿಯನ್ನು ಹೊಂದಿದೆ.  ಎಐಆರ್‌ಐ ಅಭಿವೃದ್ಧಿಪಡಿಸಿರುವ ನಾನಾ ಮಾದರಿಯ ಬೆಳೆಗಳು, ಸಂಪನ್ಮೂಲಗಳ ರಕ್ಷಣೆ, ಸುಧಾರಿತ ಕೃಷಿ ಪದ್ಧತಿಗಳು, ಕೃಷಿ ಯಂತ್ರೋಪಕರಣಗಳು ಬಗ್ಗೆ ಮಾಹಿತಿ ಒದಗಿಸುತ್ತದೆ.

ಸ್ಪ್ರೇ ಗೈಡ್(Spray Guide)
ಕ್ರಿಮಿನಾಶಕ ಹಾಗೂ ಇತರ ರಾಸಾಯನಿಕ ದ್ರಾವಣಗಳನ್ನು ಬೆಳೆಗಳಿಗೆ ಸಿಂಪಡಿಸುವುದು ಕೃಷಿಯ ಒಂದು ಭಾಗವಾಗಿದೆ. ಆದರೆ, ಈ ದ್ರಾವಣಗಳನ್ನು ಹೇಗೆ, ಎಷ್ಟು ಪ್ರಮಾಣದಲ್ಲಿ ಬೆರೆಸಬೇಕು ಎಂಬ ಮಾಹಿತಿ ಬಹಳಷ್ಟು ರೈತರಿಗೆ ಇರುವುದಿಲ್ಲ. ಈ ಮಾಹಿತಿಯ ಕೊರತೆಯನ್ನು ಈ ಆ್ಯಪ್‌ ನೀಗಿಸುತ್ತದೆ. ನೀವು ಮಾಡಿದ ಪ್ರಯೋಗಗಳ ಮಾಹಿತಿಯನ್ನು ಸಾಮಾಜಿಕ ಜಾಲತಾಣಗಳ ಮೂಲಕ ಇತರ ರೈತರೊಂದಿಗೆ ಹಂಚಿಕೊಳ್ಳಬಹುದು. 

 ಮಷಿನರಿ ಗೈಡ್(Machinery Guide)
ಹೆಸರೇ ಸೂಚಿಸುವಂತೆ ಇದು ಕೃಷಿ ಉಪಕರಣಗಳಿಗೆ ಸಂಬಂಧಿಸಿದ ಆ್ಯಪ್‌.  ಮಣ್ಣು ಸಾಗುವಳಿ, ಬಿತ್ತನೆ, ಗೊಬ್ಬರ, ನಾಟಿ, ಫಲೀಕರಣ, ಕೀಟ ನಿಯಂತ್ರಣ, ವಿಂಗಡಣೆ, ಕೊಯ್ಲು, ನೀರಾವರಿ ಮುಂತಾದ ವಿವಿಧ ಉದ್ದೇಶಗಳಿಗಾಗಿ ಕೃಷಿ ಉಪಕರಣಗಳನ್ನು ಬಳಸಲು ರೈತರಿಗೆ ಈ ಆ್ಯಪ್‌ ನೆರವು ನೀಡುತ್ತದೆ.

ಸಿಸಿಮೊಬೈಲ್ ಆ್ಯಪ್ (CCMobile App)
ಈ ಆಪ್ ಕೂಡ ರೈತರ ಅಭ್ಯುದಯದ ಧ್ಯೇಯದೊಂದಿಗೆ ಆರಂಭವಾಗಿದೆ. ತಾಪಮಾನ, ತೇವಾಂಶ, ಗಾಳಿಯ ವೇಗ ಸೇರಿದಂತೆ ಇತರೆ ಮಾಪನಗಳ ಬಗ್ಗೆ ತಿಳಿದುಕೊಳ್ಳಬಹುದು. ಈ ಆಪ್ ಬೆಳೆಗಳೊಂದಿಗೆ ರೈತರನ್ನು ಬೆಸೆಯುತ್ತದೆ. ಆ್ಯಪ್‌ ಒದಗಿಸುವ ಮಾಪನ ಮಾಹಿತಿಯನ್ನು ರೈತರು ವಾರ, ಪಾಕ್ಷಿಕ ಅಥವಾ ತಿಂಗಳಿಗೊಮ್ಮೆ ಹೋಲಿಕೆ ಮಾಡಿಕೊಳ್ಳಬಹುದು. ಜತೆಗೆ ಬೆಳೆಗಳ ಮಾಹಿತಿಯನ್ನು ಪಡೆದುಕೊಳ್ಳಬಹುದು. ಎಸ್‌ಎಂಎಸ್ ಅಥವಾ ಇ ಮೇಲ್ ಮೂಲಕ ಅಲರ್ಟ್‌ ಪಡೆಯಬಹುದು. 

ಇಫ್ಕೊ ಕಿಸಾನ್ (IFFCO Kisan)
ಇಂಡಿಯನ್ ಫಾರ್ಮರ್ಸ್ ಫರ್ಟಿಲೈಸರ್ ಕೋ ಆಪರೇಟಿವ್ ಲಿ.(ಐಎಫ್‌ಎಫ್‌ಸಿಒ) ಈ ಆ್ಯಪ್‌ ಅನ್ನು ನಿರ್ವಹಣೆ ಮಾಡುತ್ತದೆ. ಬೆಳೆಗಳು, ಕೃಷಿ ಋತುಮಾನಗಳು, ಕೃಷಿ ಕ್ಷೇತ್ರ ಸಿದ್ಧತೆ, ನೀರು ನಿರ್ವಹಣೆ, ರೋಗ ನಿಯಂತ್ರಣ, ಕೃಷಿ ಪೂರ್ವ ಸಿದ್ಧತೆಗಳು ಸೇರಿದಂತೆ ಇತರೆ ಎಲ್ಲ ಮಾಹಿತಿಯನ್ನು ಬಳಕೆದಾರರು ಕೃಷಿ ತಜ್ಞರು, ವಿಜ್ಞಾನಿಗಳಿಂದ ಪಡೆಯಲು ಈ ಆ್ಯಪ್‌ ನೆರವು ನೀಡುತ್ತದೆ.

ಎಜಿ ಮೊಬೈಲ್(Ag Mobile)
ರೈತರಿಗೆ ಮತ್ತು ಕೃಷಿ ವೃತ್ತಿಪರರಿಗೆ ಸರಕು ಮಾರುಕಟ್ಟೆ ಮಾಹಿತಿಯನ್ನು ಒದಗಿಸುವ ಮತ್ತು ಕೃಷಿ ಸುದ್ದಿಗಳನ್ನು ಬಿತ್ತರಿಸಲು ಅನುವಾಗುವಂತೆ ಈ ಆ್ಯಪ್‌ ವಿನ್ಯಾಸಗೊಳಿಸಲಾಗಿದೆ. ರೈತರು ಸರಕು ಮಾರುಕಟ್ಟೆಯ ಮಾಹಿತಿ ಸೇರಿದಂತೆ ಕೃಷಿ ಮಾರುಕಟ್ಟೆಗೆ ಸಂಬಂಧಿಸಿದ ಎಲ್ಲ ಮಾಹಿತಿಯನ್ನು ಪಡೆದುಕೊಳ್ಳಬಹುದಾಗಿದೆ.

ಇನ್ನೂ ಇವೆ ಆ್ಯಪ್‌ಗಳು
ಇಂಡಿಯಾ ಸ್ಯಾಟಲೈಟ್ ವೆದರ್, ಅಗ್ರಿಕಲ್ಚರಲ್ ಬಿಸಿನೆಸ್, ಖೇತಿ ಬಾಡಿ, ಐಸಿಎಆರ್ ಅಪ್ಡೇಟ್ಸ್, ಫಾರ್ಮರ್ಸ್ ಇಂಡಿಯಾ ಪೋರ್ಟಲ್, ಮಾಡರ್ನ್ ಖೇತಿ, ಫರ್ಟಿಲೈಸರ್ ಕ್ಯಾಲ್ಕುಲೆಟರ್, ಅಗ್ರಿ ಲೈವ್, ಅಗ್ರಿ ಆ್ಯಪ್, ಕೃಷಿ ಮಿತ್ರ, ಅಗ್ರಿಕಲ್ಚರ್ ಡಿಕ್ಷನರಿ, ಕಿಸಾನ್ ಯೋಜನಾ ಇತ್ಯಾದಿ.

ಈ ಲೇಖನವು ವಿಜಯ ಕರ್ನಾಟಕದ 2019ರ ಡಿಸೆಂಬರ್ 2ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ

ಸೋಮವಾರ, ನವೆಂಬರ್ 25, 2019

Ajit Pawar: ಮಹಾರಾಷ್ಟ್ರ ರಾಜಕಾರಣದ ದಾದಾ

Google Adsense: ಹಣ ಸಂಪಾದಿಸುವುದು ಹೇಗೆ?

-ಮಲ್ಲಿಕಾರ್ಜುನ ತಿಪ್ಪಾರ


ನಮ್ಮ ಊಹೆ, ತರ್ಕ ಮೀರಿ ತಂತ್ರಜ್ಞಾನ ನಮ್ಮನ್ನು ಆವರಿಸಿಕೊಂಡಿದೆ. ತಂತ್ರಜ್ಞಾನ ಸಾಧನಗಳಿಲ್ಲದೆ ನಮ್ಮ ಜೀವನ ದುಸ್ತರವಾಗಿಬಿಡುತ್ತದೆ. ಅಷ್ಟರ ಮಟ್ಟಿಗೆ ನಾವು ಗ್ಯಾಜೆಟ್‌ಗಳ ಗುಲಾಮರಾಗಿದ್ದೇವೆ. ತಂತ್ರಜ್ಞಾನ ಮತ್ತು ಗ್ಯಾಜೆಟ್‌ಗಳ ಬಳಕೆಯು ಖರ್ಚಿನ ಬಾಬತ್ತೂ ಹೌದು. ನಿಮಗೆ ಅತ್ಯುತ್ತಮ ಸೇವೆ ಬೇಕು ಎಂದಾದರೆ ಹೆಚ್ಚೆಚ್ಚು ಹಣ ನೀಡಬೇಕಾಗುತ್ತದೆ. ಆದರೆ, ಇದೇ ಗ್ಯಾಜೆಟ್‌ ಅಥವಾ ತಂತ್ರಜ್ಞಾನ ಇಟ್ಟುಕೊಂಡು ನೀವು ಹಣ ಸಂಪಾದಿಸಬಹುದು ಗೊತ್ತಾ? ನಮ್ಮ ಬಹುತೇಕ ವರ್ಚುವಲ್‌ ಅವಶ್ಯಕತೆಗಳನ್ನು ಗೂಗಲ್‌ ಸರ್ಚ್ ಎಂಜಿನ್‌ ಪೂರೈಸುತ್ತಿದೆ ಅಲ್ಲವೇ, ಅದೇ ಸರ್ಚ್ ಎಂಜಿನ್‌ ನಿಮಗೆ ಹಣ ಗಳಿಸುವ ದಾರಿಯನ್ನು ಕೂಡ ತೋರಿಸುತ್ತದೆ. ಇದಕ್ಕೆ ನಿಮ್ಮಲ್ಲಿರುವ ಪ್ರತಿಭೆ ಮತ್ತು ಕಠಿಣ ಪರಿಶ್ರಮ ಇದ್ದರೆ ಸಾಕು. ಆನ್‌ಲೈನ್‌ನಲ್ಲಿ ಹಣ ಗಳಿಸುವುದಕ್ಕೆ ಗೂಗಲ್‌ ಒದಗಿಸುವ ಟೂಲ್‌ ನಿಮ್ಮ ನೆರವಿಗೆ ಬರುತ್ತದೆ.

ಗೂಗಲ್‌ ಆ್ಯಡ್‌ ಸೆನ್ಸ್‌ ಗೂಗಲ್‌ ಕಂಪನಿಯ ಆನ್‌ಲೈನ್‌ ಜಾಹೀರಾತು ನೆಟ್ವರ್ಕ್ ಆಗಿದೆ. ವೆಬ್‌ ಮಾಸ್ಟರ್‌ ಮೂಲಕ ಹಣ ಗಳಿಸುವುದಕ್ಕಾಗಿ ಗೂಗಲ್‌ ಆ್ಯಡ್‌ ಸೆನ್ಸ್‌ ಅತಿದೊಡ್ಡ ಆನ್‌ಲೈನ್‌ ಪಬ್ಲಿಷರ್‌ ನೆಟ್ವರ್ಕ್ ಎಂದು ಗುರುತಿಸಿಕೊಂಡಿದೆ. ಇತ್ತೀಚಿನ ದಿನಗಳಲ್ಲಿಆನ್‌ಲೈನ್‌ ಮೂಲಕ ಹಣ ಸಂಪಾದನೆ ಮಾಡುವುದು ಹೆಚ್ಚು ಜನಪ್ರಿಯವಾಗುತ್ತಿದೆ. ಬಹಳಷ್ಟು ಪ್ರತಿಭಾನ್ವಿತರು ತಮ್ಮಲ್ಲಿರುವ ಪ್ರತಿಭೆಯನ್ನು ಸರಿಯಾದ ರೀತಿಯಲ್ಲಿ ಬಳಸಿಕೊಂಡು ಸಾಕಷ್ಟು ಹಣ ಗಳಿಸುತ್ತಿದ್ದಾರೆ. ಹಾಗಂತ, ಆನ್‌ಲೈನ್‌ನಲ್ಲಿ ಹಣ ಗಳಿಸುವುದು ತುಂಬಾ ಸರಳವಾದ ಅಥವಾ ಸುಲಭ ಮಾರ್ಗ ಎಂದೇನೂ ಭಾವಿಸಬೇಕಿಲ್ಲ.

ಗೂಗಲ್‌ ಯಾಕೆ ದುಡ್ಡು ಕೊಡುತ್ತದೆ?ಹೌದು ಗೂಗಲ್‌ ಯಾಕೆ ಹಣ ನೀಡುತ್ತದೆಂಬ ಪ್ರಶ್ನೆ ನಿಮ್ಮಲ್ಲಿ ಮೂಡಿರಲಿಕ್ಕೂ ಸಾಕು. ಆದರೆ, ಇದರಲ್ಲೇನೂ ಅಂಥ ನಿಗೂಢ ರಹಸ್ಯವೇನೂ ಇಲ್ಲ. ಇದರಲ್ಲಿಎರಡು ವಿಧಾನಗಳಿವೆ. ಮೊದಲನೆಯದು- ಆ್ಯಡ್‌ ವರ್ಡ್ಸ್. ಇದರಲ್ಲಿ ಜಾಹೀರಾತುದಾರರು ತಮ್ಮ ಪ್ರಾಡಕ್ಟ್ ಗಳನ್ನು ಪ್ರಮೋಟ್‌ ಮಾಡಲು ಮುಂದಾಗುತ್ತಾರೆ. ಎರಡನೆಯದು- ಆ್ಯಡ್‌ ಸೆನ್ಸ್‌. ಗೂಗಲ್‌ ಆ್ಯಡ್‌ ಸೆನ್ಸ್‌ ಎಂಬ ಪೋ›ಗ್ರಾಮ್‌ ಮೂಲಕ ಪಬ್ಲಿಷರ್‌ ಸೈಟ್‌ಗಳಲ್ಲಿ ಜಾಹೀರಾತುಗಳು ಪ್ರಕಟಗೊಳ್ಳುತ್ತವೆ ಮತ್ತು ಆ ಮೂಲಕ ಪಬ್ಲಿಷರ್ಸ್‌ ಹಣ ಗಳಿಸಲು ಅವಕಾಶ ಸೃಷ್ಟಿಯಾಗುತ್ತದೆ.

ಆ್ಯಡ್‌ ಸೆನ್ಸ್‌ ಹೇಗೆ ಕೆಲಸ ಮಾಡುತ್ತದೆ?
ನಾವು ಈ ಆ್ಯಡ್‌ ಸೆನ್ಸ್‌ ಫೀಚರ್‌ ಅನ್ನು ವೆಬ್‌ ಸೈಟ್‌, ಬ್ಲಾಗ್ಸ್‌, ಫೋರಮ್ಸ್, ಮೊಬೈಲ್‌ ಯೂಟ್ಯೂಬ್‌, ಸರ್ಚ್ ಎಂಜಿನ್‌ ಇತ್ಯಾದಿಗಳಲ್ಲಿಬಳಸಬಹುದಾಗಿದೆ. ಗೂಗಲ್‌ ಆ್ಯಡ್‌ ಸೆನ್ಸ್‌ ಸಿಪಿಸಿ ಆಧರಿತ ಪಬ್ಲಿಷರ್‌ ನೆಟ್ವರ್ಕ್ ಆಗಿದೆ. ಸಿಪಿಸಿ ಎಂದರೆ- ಕಾಸ್ಟ್‌ ಪರ್‌ ಕ್ಲಿಕ್‌ ಅಂತ ಅರ್ಥ. ನಿಮ್ಮ ವೆಬ್‌ ಪೇಜ್‌ನಲ್ಲಿ ಕಾಣಿಸಿಕೊಳ್ಳುವ ಜಾಹೀರಾತು ಮೇಲೆ ಎಷ್ಟು ಕ್ಲಿಕ್‌ಗಳಾಗುತ್ತವೆ ಎಂಬುದರ ಮೇಲೆ ಆ್ಯಡ್‌ ಸೆನ್ಸ್‌ ಹಣ ದೊರೆಯುವಂತೆ ಮಾಡುತ್ತದೆ. ಗೂಗಲ್‌ ಸಿಪಿಸಿ ರೇಟ್‌ ವೆಬ್‌ ಸೈಟಿನಿಂದ ವೆಬ್‌ ಸೈಟಿಗೆ, ಸ್ಥಳದಿಂದ ಸ್ಥಳಕ್ಕೆ ವ್ಯತ್ಯಾಸವಾಗಿರುತ್ತದೆ. ಈ ಹಿನ್ನೆಲೆಯಲ್ಲಿ ಬಹುತೇಕ ಎಲ್ಲವೆಬ್‌ಸೈಟ್‌ಗಳು, ಜನಪ್ರಿಯ ಬ್ಲಾಗರ್‌ಗಳು ಮತ್ತು ಯುಟ್ಯೂಬ್‌ ಚಾನೆಲಿಗರು ಈ ಆ್ಯಡ್‌ ಸೆನ್ಸ್‌ ಬಳಸುತ್ತಾರೆ.

ಗೂಗಲ್‌ ಯಾಕೆ ಹಣ ನೀಡುತ್ತದೆ ಎಂಬ ಪ್ರಶ್ನೆಗೆ ಉತ್ತರ ಕಂಡುಕೊಳ್ಳುವುದು ಕಷ್ಟವೇನಲ್ಲ. ಜಗತ್ತಿನಲ್ಲೇ ಗೂಗಲ್‌ ಅತ್ಯಂತ ಉತ್ಕೃಷ್ಟ ವೆಬ್‌ ಬೇಸ್ಡ್‌ ಕಂಪನಿ ಎಂಬುದು ಎಲ್ಲರಿಗೂ ಗೊತ್ತಿರುವ ಸಂಗತಿ. ಗೂಗಲ್‌ನಿಂದ ಸರ್ಚ್ ಎಂಜಿನ್‌, ಜಿಮೇಲ್‌, ಯೂಟ್ಯೂಬ್‌, ಬ್ಲಾಗರ್‌, ಮ್ಯಾಫ್ಸ್‌, ಡ್ರೈವ್ಸ್, ಪಿಕಾಸಾ ಮತ್ತಿತರ ಸೇವೆಗಳು ದೊರೆಯುತ್ತವೆ. ಮತ್ತು ಇವುಗಳನ್ನು ಜಗತ್ತಿನಾದ್ಯಂತ ಬಹಳಷ್ಟು ಜನರು ಬಳಸುತ್ತಾರೆ ಕೂಡ. ಹಾಗಾಗಿ ಎಲ್ಲ ಬ್ರಾಂಡ್‌ಗಳು, ಕಂಪನಿಗಳು ತಮ್ಮ ಪ್ರಾಡಕ್ಟ್‌ಗಳನ್ನು ಗೂಗಲ್‌ ಮೂಲಕ ಪ್ರಮೋಟ್‌ ಮಾಡಲು ಮುಂದಾಗುತ್ತಾರೆ. ಇದಕ್ಕಾಗಿಯೇ ಗೂಗಲ್‌ ಈ ವ್ಯವಸ್ಥೆಯನ್ನು ಜಾರಿಗೆ ತಂದಿದೆ. ಅಸಂಖ್ಯ ಜಾಹೀರಾತುದಾರರಿಗೆ ಸಮಾನ ಅವಕಾಶ ಕಲ್ಪಿಸುವ ಕೆಲಸವನ್ನು ಈ ಆ್ಯಡ್‌ ಸೆನ್ಸ್‌ ಮಾಡುತ್ತದೆ.

ಹಾಗೆಯೇ, ಉತ್ಕೃಷ್ಟ ವೆಬ್‌ ಸೈಟ್‌ಗಳು, ಬ್ಲಾಗ್‌ಗಳು, ಯೂಟ್ಯೂಬ್‌ ಚಾನೆಲ್‌ಗಳಿಗೆ ಅವಕಾಶವನ್ನು ಕಲ್ಪಿಸುತ್ತದೆ. ಒಟ್ಟಾರೆ ಹೇಳಬೇಕೆಂದರೆ, ಈ ಗೂಗಲ್‌ ಆ್ಯಡ್‌ ಸೆನ್ಸ್‌ ಜಾಹೀರಾತುದಾರರು ಮತ್ತು ಪಬ್ಲಿಷರ್ಸ್‌ ನಡುವೆ ಮೂರನೇ ಪಾರ್ಟಿಯಾಗಿ ಕೆಲಸ ಮಾಡುತ್ತದೆ.

ಅಳವಡಿಸಿಕೊಳ್ಳುವುದು ಹೇಗೆ?ನಿಮ್ಮ ಬ್ಲಾಗ್‌ ಅಥವಾ ವೆಬ್‌ಸೈಟ್‌ಗೆ ಆ್ಯಡ್‌ ಸೆನ್ಸ್‌ ಅಳವಡಿಸಿಕೊಳ್ಳಲು ಮಾಡಬೇಕಾದದ್ದು ಇಷ್ಟೇ. (ಜಿಮೇಲ್ ಆ್ಯಡ್‌ಸೆನ್ಸ್)  www.google.com/adsense/start ಹೋಗಿ ನಿಮ್ಮ ಯುಟ್ಯೂಬ್‌ ಚಾನೆಲ್‌ ಅಥವಾ ವೆಬ್‌ ಸೈಟ್‌ ಯುಆರ್‌ಎಲ್‌ ಸೇರಿಸಿ. ಬಳಿಕ ಅಲ್ಲಿ ಕೇಳಲಾಗುವ ವೈಯಕ್ತಿಕ ಮಾಹಿತಿಯನ್ನು ನಮೂದಿಸಿ, ಅಪ್ಲಿಕೇಷನ್‌ ಸಬ್ಮಿಟ್‌ ಮಾಡಿ. ಒಂದೊಮ್ಮೆ ಬ್ಲಾಗ್‌ಗಳಿಗೆ ಆ್ಯಡ್‌ ಸೆನ್ಸ್‌ ಸೇರಿಸಬೇಕಿದ್ದರೆ, ಬ್ಲಾಗರ್‌ ಡ್ಯಾಶ್‌ ಬೋರ್ಡ್‌ಗೆ ಹೋಗಿ ಮತ್ತು ಅಲ್ಲಿರುವ ಆ್ಯಡ್‌ ಸೆನ್ಸ್‌ ಮೂಲಕ ನೇರವಾಗಿ ಸೈನ್‌ಅಪ್‌ ಆಗಿ. ಇಷ್ಟು ಮಾಡಿದರೆ ನಿಮಗೆ ಜಾಹೀರಾತು ಪ್ರದರ್ಶನವಾಗುತ್ತದೆ ಎಂದರ್ಥವಲ್ಲ. ಗೂಗಲ್‌ ಟೀಮ್‌ ಎಲ್ಲವನ್ನೂ ಪರೀಕ್ಷಿಸಿ ಓಕೆ ಮಾಡಿದ ಬಳಿಕವಷ್ಟೇ ಅದು ಕೆಲಸ ಮಾಡುತ್ತದೆ ಮತ್ತು ನಿಮಗೆ ಹಣ ದೊರೆಯುತ್ತದೆ.

ಈ ಲೇಖನವು ವಿಜಯ ಕರ್ನಾಟಕದ ಟೆಕ್ ನೌ ಪುಟದಲ್ಲಿ 2019ರ ನವೆಂಬರ್ 25ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.

History of Cricket: ಕ್ರಿಕೆಟ್‌ ರೂಪಾಂತರದ ರೋಚ'ಕತೆ'

- ಮಲ್ಲಿಕಾರ್ಜುನ ತಿಪ್ಪಾರ

ಕ್ರಿಕೆಟ್‌ ಅನ್ನು ಧರ್ಮದ ರೀತಿಯಲ್ಲಿಆರಾಧಿಸುವ ಭಾರತದಲ್ಲಿಇದೇ ಮೊದಲ ಬಾರಿಗೆ ಬಾಂಗ್ಲಾದೇಶ ಹಾಗೂ ಭಾರತೀಯ ತಂಡದ ನಡುವೆ ಹಗಲು-ರಾತ್ರಿ ಟೆಸ್ಟ್‌ ಕ್ರಿಕೆಟ್‌ ನಡೆಯುತ್ತಿದೆ. ಇದು ಜನರ ಅಭಿರುಚಿಗೆ ಅನುಗುಣವಾಗಿ ಕ್ರಿಕೆಟ್‌ ಕಾಣುತ್ತಿರುವ ರೂಪಾಂತರಕ್ಕೆ ಸಾಕ್ಷಿ. ಆಂಗ್ಲರಿಂದ 18ನೇ ಶತಮಾನದಲ್ಲಿಪರಿಚಯವಾದ ಈ ‘ಸಭ್ಯ ಆಟ’, ಆಯಾ ಕಾಲ ಘಟ್ಟದ ಅಗತ್ಯಕ್ಕೆ ತಕ್ಕಂತೆ ಬದಲಾಗುತ್ತತನ್ನ ಜನಪ್ರಿಯತೆಯನ್ನು ಕಾಯ್ದುಕೊಂಡು ಬಂದಿದೆ. ಐದು ದಿನದ ಟೆಸ್ಟ್‌, ಏಕ ದಿನ, 20ಟ್ವೆಂಟಿ, 10 ಓವರ್‌... ಹೀಗೆ ಕ್ರಿಕೆಟ್‌ ತನ್ನ ಸ್ವರೂಪವನ್ನು ಬದಲಿಸಿಕೊಂಡು ಜನರ ಮನಸ್ಸನ್ನು ಗೆಲ್ಲುತ್ತಿದೆ. ಬದಲಾವಣೆಯ ಪಿಚ್‌ನಲ್ಲಿಕ್ರಿಕೆಟ್‌ ಬೆಳೆದು ಬಂದ ಬಗೆ ಇಲ್ಲಿದೆ.

ಟೆಸ್ಟ್‌ ಕ್ರಿಕೆಟ್‌ನ ಟೆಸ್ಟ್‌!
‘ಟೆಸ್ಟ್‌ ಕ್ರಿಕೆಟ್‌’ ಕ್ರಿಕೆಟ್‌ನ ಅತ್ಯುತ್ತಮ ಮಾದರಿ ಇದು. ಒಬ್ಬ ಆಟಗಾರನ ಕ್ರಿಕೆಟ್‌ ಕೌಶಲಗಳು ಅನಾವರಣಗೊಳ್ಳುವುದೇ ಟೆಸ್ಟ್‌ ಕ್ರಿಕೆಟ್‌ನಲ್ಲಿಎನ್ನುವುದು ಪಂಡಿತರ ಅಭಿಪ್ರಾಯ. ಐದು ದಿನಗಳ ಕಾಲ ನಡೆಯುವ ಕ್ರಿಕೆಟ್‌ ಅಷ್ಟೇ ‘ಸಭ್ಯ’ ಆಟವೂ ಹೌದು. ಫುಟ್ಬಾಲ್‌, ಹಾಕಿ, ರಗ್ಬಿ ಸೇರಿದಂತೆ ಇತರ ತಂಡ ಆಟಗಳಲ್ಲಿರುಧಿವಂತೆ ಇಲ್ಲಿಹೊಡಿ, ಬಡಿಯಂಥ ಮನೋಧಿಭೂಮಿಕೆ ಇರುವುದಿಲ್ಲ. ಕ್ರಿಕೆಟ್‌ ಆಟ ಎನ್ನುವುದು ತನ್ನ ಪಾಡಿಗೆ ತಾನು ಹರಿದುಧಿಕೊಂಡು ಹೋಗುವ ಪ್ರಶಾಂತ ನದಿ ಇದ್ದ ಹಾಗೆ(ಇತ್ತೀಚಿನ ವರ್ಷಗಳಲ್ಲಿಈ ಸಭ್ಯ ಆಟಕ್ಕೆ ಮಸಿ ಬಳಿಯುವ ಘಟನೆಗಳು ನಡೆಯುತ್ತಿವೆ ಎಂಬುದು ಬೇರೆ ಮಾತು). ಕ್ರಿಕೆಟ್‌ ಇತಿಹಾಸವನ್ನು ಕೆದಕುತ್ತಾ ಹೋದರೆ ಅದು ನಿಮ್ಮನ್ನು 18ನೇ ಶತಮಾನಕ್ಕೆ ಕರೆದೊಯ್ಯುತ್ತದೆ. ಆಂಗ್ಲರ ನಾಡಿನಲ್ಲಿಜನಿಸಿದ ಈ ಕ್ರಿಕೆಟ್‌ ಆ ನಂತರ, ಭಾರತವೂ ಸೇರಿದಂತೆ ಇಂಗ್ಲೆಂಡ್‌ನ ವಸಾಹತುಶಾಹಿ ನಾಡುಗಳಲ್ಲಿಜನಪ್ರಿಯಧಿಗೊಂಡಿತು. 1877ರ ಮಾರ್ಚ್‌ 15ರಿಂದ 19ರ ವರೆಗೆ ಜಗತ್ತಿನ ಮೊದಲ ಅಧಿಕೃತ ಟೆಸ್ಟ್‌ ಕ್ರಿಕೆಟ್‌ ನಡೆಧಿಯಿತು. ಇಂಗ್ಲೆಂಡ್‌ ಮತ್ತು ಆಸ್ಪ್ರೇಲಿಯಾ ನಡುವೆ ಆಸ್ಪ್ರೇಲಿಯಾದ ಮೆಲ್ಬೋರ್ನ್‌ ಕ್ರಿಕೆಟ್‌ ಗ್ರೌಂಡ್‌ನಲ್ಲಿನಡೆದ ಈ ಪಂದ್ಯದಲ್ಲಿಇಂಗ್ಲೆಂಡ್‌ 45 ರನ್‌ಗಳಿಂದ ಗೆಲುವು ಸಾಧಿಸಿತು. ವಿಚಿತ್ರ ಎಂದರೆ, 1977ರಲ್ಲಿಟೆಸ್ಟ್‌ ಕ್ರಿಕೆಟ್‌ಗೆ 100 ವರ್ಷ ತುಂಬಿದ ಸಂದರ್ಭದಲ್ಲಿಇಂಗ್ಲೆಂಡ್‌ ಮತ್ತು ಆಸ್ಪ್ರೇಲಿಯ ನಡುವೆ ನಡೆದ ಪಂದ್ಯದಲ್ಲಿಆಸ್ಪ್ರೇಲಿಯಾ 45 ರನ್‌ಗಳಿಂದ ಗೆಲವು ಸಾಧಿಸಿತು! ಸದ್ಯ ಭಾರತೀಯ ಕ್ರಿಕೆಟ್‌ ತಂಡ ಪಟ್ಟಿಯಲ್ಲಿಅಗ್ರಸ್ಥಾನಿ.





ಟ್ವೆಂಟಿ 20 ಯುಗಾರಂಭ
ಐದು ದಿನಗಳ ಟೆಸ್ಟ್‌ ಕ್ರಿಕೆಟ್‌ನಿಂದ ಒಂದು ದಿನದ ಕ್ರಿಕೆಟ್‌ನ ಅನುಭವ ಹಾಗೂ ಆಟದ ಸವಿಯನ್ನು ಸವಿಯುತ್ತಿದ್ದ ಜನರಿಗೆ ಅದು ಕೂಡ ದೀರ್ಘ ಅವಧಿಯ ಕ್ರಿಕೆಟ್‌ ಅನಿಸಲಾರಂಭಿಸಿತು. ಆಗ ಇದಕ್ಕೆ ಪರ್ಯಾಯ ಹುಟ್ಟಿಕೊಂಡಿದ್ದೇ ಟ್ವೆಂಟಿ 20 ಕ್ರಿಕೆಟ್‌ ಮಾದರಿ. ಟ್ವೆಂಟಿ20 ಮಾದರಿಯ ದೇಸಿ ಟೂರ್ನಿಯನ್ನು ಇಂಗ್ಲೆಂಡ್‌ ಮತ್ತು ವೇಲ್ಸ್‌ ಕ್ರಿಕೆಟ್‌ ಮಂಡಳಿ 2003ರಲ್ಲಿಪರಿಚಯಿಸಿತು. ಈ ಮಾದಧಿರಿಯ ಕ್ರಿಕೆಟ್‌ನಲ್ಲಿಎರಡೂ ತಂಡಗಳು ತಲಾ 20 ಓವರ್‌ಗಳ ಕ್ರಿಕೆಟ್‌ ಆಡುತ್ತವೆ. ಆ ಬಳಿಕ ಐಸಿಸಿ ಮಾದರಿಗೆ ಅಧಿಕೃತ ಮುದ್ರೆಯನ್ನು ಒತ್ತಿತು. ಮೂರು ಗಂಟೆಗಳಲ್ಲಿಈ ಆಟ ಮುಗಿದು ಬಿಡುತ್ತದೆ. ಈಗ ಟ್ವೆಂಟಿ20 ಅತ್ಯಂತ ಜನಪ್ರಿಯ ಕ್ರಿಕೆಟ್‌ ಮಾದರಿಯಾಗಿದ್ದು, ಅಂತಾಧಿರಾಷ್ಟ್ರೀಯ ಕ್ರಿಕೆಟ್‌ ಆಡುವ ಬಹುತೇಕ ರಾಷ್ಟ್ರಗಳು ಈ ಮಾದರಿಯನ್ನು ಅಳವಡಿಸಿಕೊಂಡಿವೆ. 2007ರಿಂದ ಐಸಿಸಿ 20ಟ್ವೆಂಟಿ ವಿಶ್ವ ಕಪ್‌ ಕೂಡ ಪರಿಚಯಿಸಿತು. ಭಾರತ ಕ್ರಿಕೆಟ್‌ ತಂಡ ಮೊದಲ ವಿಶ್ವ ಚಾಂಪಿಯನ್‌ ಆಯಿತು. ಪ್ರತಿ ಎರಡು ವರ್ಷಕ್ಕೊಮ್ಮೆ ವಿಶ್ವಕಪ್‌ ಪಂದ್ಯಾವಳಿ ನಡೆಯುತ್ತದೆ. ಇತ್ತೀಚಿನ ದಿನಗಳಲ್ಲಿಟ್ವೆಂಟಿ20 ಕ್ರಿಕೆಟ್‌ ಬದಲಿಗೆ ಟೆನ್‌10 ಕ್ರಿಕೆಟ್‌ ಕೂಡ ಆಡಲಾಗುತ್ತಿದೆ. ಹಲವು ಕ್ರಿಕೆಟ್‌ ಅಕಾಡೆಮಿ ಮತ್ತು ಸ್ಥಳೀಯ ಟೂರ್ನಾಧಿಮೆಂಟ್‌ಗಳಲ್ಲಿಈ ಮಾದರಿಯ ಕ್ರಿಕೆಟ್‌ ಆಟ ಬಳಕೆಯಲ್ಲಿದೆ.

ಜರ್ಸಿ ರೂಪಾಂತರ
ಈಗ ಬಣ್ಣಬಣ್ಣದ ಜರ್ಸಿ ತೊಟ್ಟು ಆಡುವ ಕ್ರಿಕೆಟ್‌ ಆಟಗಾರರು ಹಿಂದೊಮ್ಮೆ ಏಕದಿನ ಕ್ರಿಕೆಟ್‌ ಆಗಲಿ, ಟೆಸ್ಟ್‌ ಕ್ರಿಕೆಟ್‌ ಆಗಲಿ ಬಿಳಿ ಬಣ್ಣದ ಜರ್ಸಿ ತೊಟ್ಟು ಆಡಬೇಕಿತ್ತು. ಆದರೆ, ಕಾಲದ ಅಗತ್ಯ ಮತ್ತು ಕ್ರೀಡೆಯ ಉನ್ನತೀಕರಣದ ಭಾಗವಾಗಿ 1951ರಲ್ಲಿಒಂದು ದಿನದ ಕ್ರಿಕೆಟ್‌ ಆರಂಭವಾಯಿತು. 1971ರಲ್ಲಿಮೊದಲ ಅಂತಾರಾಷ್ಟ್ರೀಯ ಏಕ ದಿನ ಪಂದ್ಯ ನಡೆಯಿತು. ಮುಂದೆ 1992ರ ವಿಶ್ವ ಕಪ್‌ವರೆಗೂ ಒಂದು ದಿನದ ಕ್ರಿಕೆಟ್‌ನಲ್ಲಿಆಟಗಾರರು ಬಿಳಿ ಬಣ್ಣದ ಜರ್ಸಿ ತೊಡುತ್ತಿದ್ದರು. ಆ ನಂತರ ಬಣ್ಣಬಣ್ಣದ ಜರ್ಸಿ ತೊಡಲು ಅವಕಾಶ ಕಲ್ಪಿಸಲಾಯಿತು. ಒಂದೊಂದು ರಾಷ್ಟ್ರ ಒಂದೊಂದು ಬಣ್ಣಕ್ಕೆ ಅಂಟಿಕೊಂಡಿವೆ. ಭಾರತೀಯ ಕ್ರಿಕೆಟ್‌ ತಂಡ ನೀಲಿ ಬಣ್ಣ ಹಾಗೂ ಅದಕ್ಕೆ ಹೊಂದುವ ಬಣ್ಣದ ಜರ್ಸಿಗಳನ್ನು ತೊಡುತ್ತದೆ. ಇನ್ನು ಟೆಸ್ಟ್‌ ಕ್ರಿಕೆಟ್‌ನಲ್ಲಂತೂ ತೀರಾ ಇತ್ತೀಚಿನವರೆಗೂ ಕೇವಲ ಬಿಳಿ ಬಣ್ಣದ ಜರ್ಸಿ ತೊಟ್ಟು ಕೊಳ್ಳಬೇಕಿತ್ತು. ಆದರೆ, ಇದೀಗ ಟೆಸ್ಟ್‌ನಲ್ಲೂಬಿಳಿ ಬಣ್ಣದ ಜರ್ಸಿ ಮೇಲೆ ಆಟಗಾರರ ಹೆಸರು ಮತ್ತು ನಂಬರ್‌ ಮುದ್ರಿಸಲಾಗುತ್ತಿದೆ.

ಐಪಿಎಲ್‌ ಎಂಬ ಕಮಾಲ್‌
ಕ್ರಿಕೆಟ್‌ನ ಲೆಕ್ಕಾಚಾರ ಮತ್ತು ಗ್ರಾಮರ್‌ ಬದಲಿಸಿ ಕ್ರಾಂತಿಕಾರಿ ಬದಲಾವಣೆಯೇ ಐಪಿಎಲ್‌. ಇದರ ಹುಟ್ಟಿಗೆ ಖಾಸಗಿ ಕ್ರಿಕೆಟ್‌ ಟೂರ್ನಿ ಐಸಿಎಲ್‌(ಇಂಡಿಯನ್‌ ಕ್ರಿಕೆಟ್‌ ಲೀಗ್‌) ಕಾರಣವಾಯಿತು. ಆದರೆ, ಇದಕ್ಕಾವುದೇ ಅಧಿಕೃತ ಮಾನ್ಯತೆ ಇರಲಿಲ್ಲ. ಆದರೂ, ಹಲವು ಆಟಗಾರರು, ಕ್ರಿಕೆಟ್‌ ಮಂಡಳಿ ಸದಸ್ಯರು ಈ ಲೀಗ್‌ನ ಭಾಗವಾಗತೊಡಗಿದರು. ಆಗ ಬಿಸಿಸಿಐ ‘ಇಂಡಿಯನ್‌ ಪ್ರಿಮೀಯರ್‌ ಲೀಗ್‌-ಐಪಿಎಲ್‌’ ಪರಿಚಯಿಸಿತು. ಇದಕ್ಕೀಗ ಯಶಸ್ವಿ ಟೂರ್ನಮೆಂಟ್‌ ಎಂಬ ಹೆಗ್ಗಳಿಕೆ ಇದೆ. ಅಂತಾರಾಷ್ಟ್ರೀಯ ಕ್ರಿಕೆಟ್‌ ರಾಷ್ಟ್ರಗಳ ನಡುವೆ ನಡೆದರೆ, ಐಪಿಎಲ್‌ ರಾಷ್ಟ್ರಗಳ ಗಡಿಗಳನ್ನೇ ಅಳಿಸಿ ಹಾಕಿತು. ಅಂತಾರಾಷ್ಟ್ರೀಯ ಆಟಗಾರರು ಐಪಿಎಲ್‌ ಭಾಗವಾಗಿ ಆಡ ತೊಡಗಿದ್ದರಿಂದ ಕ್ರಿಕೆಟ್‌ಗೆ ಹೊಸ ಖದರ್‌ ಬಂತು. 2008ರಲ್ಲಿಆರಂಭವಾದ ಐಪಿಎಲ್‌ ಈ ವರೆಗೆ 12 ಆವೃತ್ತಿ ಕಂಡಿದೆ. ಹಣಕಾಸಿನ ವ್ಯವಹಾರದಲ್ಲೂಐಪಿಎಲ್‌ ಎಲ್ಲಆಟಗಳಿಗಿಂತ ಮುಂದಿದೆ! 2019ರ ಐಪಿಎಲ್‌ ಬ್ರ್ಯಾಂಡ್‌ ಮೌಲ್ಯ 6.9 ಬಿಲಿಯನ್‌ ಡಾಲರ್‌ ಅಂದರೆ 47,500 ಕೋಟಿ ರೂ.! 2015ರ ಐಪಿಎಲ್‌ ಆವೃತ್ತಿ ಭಾರತದ ಜಿಡಿಪಿ 1150 ಕೋಟಿ ರೂಪಾಯಿ ಕಾಣಿಕೆ ನೀಡಿದೆಯಂತೆ! ಸದ್ಯ ಎಂಟು ತಂಡಗಳು ಐಪಿಎಲ್‌ ಆಡುತ್ತಿವೆ. ಮುಂಬೈ ಇಂಡಿಯನ್ಸ್‌ ನಾಲ್ಕು ಬಾರಿ ಟೈಟಲ್‌ ಗೆಲ್ಲುವ ಮೂಲಕ ಅಗ್ರಸ್ಥಾನಿಯಾಗಿದೆ. ಐಪಿಎಲ್‌ ಮಾದರಿಯಲ್ಲೇ ಕ್ರಿಕೆಟ್‌ ಆಡುವ ರಾಷ್ಟ್ರಗಳಲ್ಲಿಅನೇಕ ಲೀಗ್‌ಗಳು ಹುಟ್ಟಿಕೊಂಡಿವೆ. ಭಾರತದಲ್ಲೇ ಕೆಪಿಎಲ್‌, ಟಿಪಿಎಲ್‌ನಂಥ ಅನೇಕ ರಾಜ್ಯಮಟ್ಟದ ಟ್ವೆಂಟ್‌20 ಲೀಗ್‌ಗಳು ಜನ್ಮ ತಳೆದಿವೆ. ಇಷ್ಟೆಲ್ಲದರೂ ಹೊರತಾಗಿಯೂ ಐಪಿಎಲ್‌ ಏನೂ ವಿವಾದ ಮುಕ್ತವಾಗಿಲ್ಲ. ಮ್ಯಾಚ್‌ ಫಿಕ್ಸಿಂಗ್‌ನಂಥ ಕಳಂಕಗಳು ಮೆತ್ತಿಕೊಂಡಿವೆ.

ಏಕ ದಿನ ಹುಟ್ಟಿದ್ದೇ ಭಾರತದಲ್ಲಿ!
5 ದಿನಗಳ ಕಾಲ ಆಡುವ ಟೆಸ್ಟ್‌ ಕ್ರಿಕೆಟ್‌ ಜನರಿಗೆ ಬೋರ್‌ ಎನಿಸುವ ಭಾವ ಎಲ್ಲೆಡೆ ಆವರಿಸುವ ಸಮಯದಲ್ಲೇ ಏಕ ದಿನ ಕ್ರಿಕೆಟ್‌ ಮಾದರಿ ಆರಂಭವಾಯಿತು. ಆ ಬಳಿಕ, ಹಗಲು-ರಾತ್ರಿ ಪಂದ್ಯ ಆಡುವುದನ್ನು ರೂಪಿಸಿಕೊಳ್ಳಲಾಯಿತು. ನಿಮಗೊಂದು ವಿಷ್ಯ ಗೊತ್ತಾ..? ವಿಶ್ವದ ಮೊದಲ ಏಕ ದಿನ ಪಂದ್ಯ ನಡೆದಿದ್ದು ಭಾರತದಲ್ಲೇ! ಹೌದು, 1951ರಲ್ಲಿಕೇರಳದ ತ್ರಿಪ್ಪುನಿಥುರಾ ಎಂಬ ಸಣ್ಣ ಪಟ್ಟಣದಲ್ಲಿಮಾಜಿ ಕ್ರಿಕೆಟಿಗ ಕೆ.ವಿ.ಕೇಳಪ್ಪನ್‌ ಅವರು ಮೊದಲ ಬಾರಿಗೆ ಒಂದು ದಿನದ ಕ್ರಿಕೆಟ್‌ ಆರಂಭಿಸಿದರು. ನಂತರ ಇದೇ ಮಾದರಿಯನ್ನು 1962 ಮೇ 2ರಂದು ಇಂಗ್ಲಿಷ್‌ ಕೌಂಟಿ ಕ್ರಿಕೆಟ್‌ ತಂಡಗಳು ಅಳವಡಿಸಿಕೊಂಡವು. ಬಳಿಕ 1971ರಲ್ಲಿಮೊದಲ ಅಂತಾರಾಷ್ಟ್ರೀಯ ಏಕ ದಿನ ಕ್ರಿಕೆಟ್‌ ಪಂದ್ಯವನ್ನು ಆಸ್ಪ್ರೇಲಿಯಾದ ಮೇಲ್ಬೋರ್ನ್‌ನಲ್ಲಿಆಡಿಸಲಾಯಿತು. ಆಸ್ಪ್ರೇಲಿಯಾ ಉದ್ದಿಮೆದಾರ ಕೆರಿ ಪಾರ್ಕರ್‌ ಒಂದು ದಿನದ ಮಾದರಿ ಕ್ರಿಕೆಟ್‌ಗೆ ವಾಣಿಜ್ಯ ಸ್ಪರ್ಶ ನೀಡಿದರು. ಅಲ್ಲದೇ ಹಗಲು-ರಾತ್ರಿ ಪಂದ್ಯಕ್ಕೂ ಕಾರಣರಾದರು. ಜತೆಗೆ, ವಿಶ್ವ ಏಕ ದಿನ ಕ್ರಿಕೆಟ್‌ ಪಂದ್ಯ ಕೂಡ ಆರಂಭವಾಯಿತು. 1979ರಲ್ಲಿಮೊದಲ ವಿಶ್ವ ಕಪ್‌ ಪಂದ್ಯಾವಳಿ ಆರಂಭವಾಯಿತು. ಮೊದಲ ಎರಡು ಪಂದ್ಯಾವಳಿಯಲ್ಲಿ ವೆಸ್ಟ್‌ ಇಂಡೀಸ್‌ ವಿಶ್ವ ಚಾಂಪಿಯನ್‌ ಆಯಿತು. 1983ರ ವರ್ಲ್ಡ್‌ ಕಪ್‌ನಲ್ಲಿಯಾರೂ ಊಹಿಸದ ರೀತಿಯಲ್ಲಿಭಾರತ ಚಾಂಪಿಯನ್‌ ಆಗಿ, ವೆಸ್ಟ್‌ ಇಂಡೀಸ್‌ ಹ್ಯಾಟ್ರಿಕ್‌ ಕನಸನ್ನು ನುಚ್ಚುನೂರು ಮಾಡಿತು.

ಓವರ್‌ಗಳು ಬದಲಾದವು
ಐದು ದಿನಗಳ ಟೆಸ್ಟ್‌ನಲ್ಲಿದಿನಕ್ಕೆ ಕನಿಷ್ಠ 90 ಓವರ್‌ ಇಲ್ಲವೇ ಆರು ಗಂಟೆಗಳ ಕಾಲ ಕ್ರಿಕೆಟ್‌ ಆಡಲಾಗುತ್ತದೆ. ಆದರೆ, ಏಕ ದಿನದಲ್ಲಿಗರಿಷ್ಠ 50 ಓವರ್‌ಗಳ ಕ್ರಿಕೆಟ್‌ ಆಡಬಹುದು. ಏಕ ದಿನ ಪಂದ್ಯ ಪರಿಚಯಗೊಂಡಾಗ ಅದು ಗರಿಷ್ಠ 60 ಓವರ್‌ ಆಡಬಹುದಿತ್ತು. ಆ ಮೇಲೆ ಅದನ್ನು 40 ಓವರ್‌ಗಳಿಗೆ ಇಳಿಸಲಾಯಿತು. ಈಗ ಅಂತಿಮವಾಗಿ 50 ಓವರ್‌ಗಳಿಗೆ ಸೀಮಿತಗೊಳಿಸಲಾಗಿದೆ. ಟ್ವೆಂಟಿ20 ಕ್ರಿಕೆಟ್‌ನಲ್ಲಿಗರಿಷ್ಠ 20 ಓವರ್‌ ಆಡಲಾಗುತ್ತದೆ.

ಪಿಂಕ್‌ ಬಾಲು ಡೇ ಆ್ಯಂಡ್‌ ನೈಟು
ಟೆಸ್ಟ್‌ ಕ್ರಿಕೆಟ್‌ ಅನ್ನು ಹಗಲು ಹೊತ್ತಲ್ಲಿಮಾತ್ರ ಆಡಲಾಗುತ್ತಿತ್ತು. ಆದರೆ, 2015ರಿಂದ ಇತ್ತೀಚೆಗೆ ಹಗಲು-ರಾತ್ರಿ(ಡೇ ಆ್ಯಂಡ್‌ ನೈಟ್‌) ಆಡಲಾಗುತ್ತಿದೆ. ಟೆಸ್ಟ್‌ ಕ್ರಿಕೆಟ್‌ ಜನಪ್ರಿಯಗೊಳಿಸುವ ಭಾಗವಾಗಿಯೇ ಈ ಮಾದರಿ ಅನುಸರಿಸಲಾಗುತ್ತಿದೆ. ಮೊದಲ ಹಗಲು-ರಾತ್ರಿ ಟೆಸ್ಟ್‌ ಕ್ರಿಕೆಟ್‌ 2015ರ ನವೆಂಬರ್‌ 27ರಿಂದ ಡಿಸೆಂಬರ್‌ 1ರ ವರೆಗೆ ನ್ಯೂಜಿಲೆಂಡ್‌ ಮತ್ತು ಆಸ್ಪ್ರೇಲಿಯಾ ನಡುವೆ ಓವಲ್‌ನ ಅಡಿಲೇಡ್‌ ಕ್ರೀಡಾಂಗಣದಲ್ಲಿನಡೆಯಿತು. ಆ ನಂತರ ಒಂದೊಂದು ರಾಷ್ಟ್ರಗಳು ಈ ಹೊಸ ಮಾದರಿ ಟೆಸ್ಟ್‌ ಕ್ರಿಕೆಟ್‌ ಆಡಲು ಮುಂದಾಗುತ್ತಿವೆ. ಸದ್ಯ ಭಾರತ ಮತ್ತು ಬಾಂಗ್ಲಾದೇಶಗಳ ನಡುವೆ ಹಗಲು ರಾತ್ರಿ ಟೆಸ್ಟ್‌ ಕ್ರಿಕೆಟ್‌ ಚಾಲ್ತಿಯಲ್ಲಿದೆ. ಇನ್ನು ಈ ಮಾದರಿಯ ಕ್ರಿಕೆಟ್‌ನಲ್ಲಿರೆಡ್‌ ಬಾಲ್‌ ಬದಲಿಗೆ ಪಿಂಕ್‌ ಬಳಸಲಾಗುತ್ತಿದೆ. ಒನ್‌ ಡೇ ಕ್ರಿಕೆಟ್‌ನಲ್ಲಿವೈಟ್‌ ಬಾಲ್‌ ಬಳಕೆಯಾಗುತ್ತದೆ.


ಈ ಲೇಖನವು ವಿಜಯ ಕರ್ನಾಟಕದ 23 ನವೆಂಬರ್ 2019ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.

ಸೋಮವಾರ, ನವೆಂಬರ್ 18, 2019

Data Backup: ಡೇಟಾ ಬ್ಯಾಕ್‌ ಅಪ್‌ ಮಾಡಿಕೊಳ್ಳುವುದು ಹೇಗೆ?

ಮಲ್ಲಿಕಾರ್ಜುನ ತಿಪ್ಪಾರಇತ್ತೀಚೆಗೆ ಮಾರುಕಟ್ಟೆಗೆ ಬಿಡುಗಡೆಯಾಗುತ್ತಿರುವ ಬಹುತೇಕ ಸ್ಮಾರ್ಟ್‌ಫೋನ್‌ಗಳಲ್ಲಿಸಿಕ್ಕಾಪಟ್ಟೆ ಮೆಮೊರಿ ಇರುತ್ತದೆ. ಆದರೆ, ಬಜೆಟ್‌ ಫೋನ್‌ಗಳಲ್ಲಿಈ ಸೌಲಭ್ಯ ಅಷ್ಟಾಗಿ ದೊರೆಯುವುದಿಲ್ಲ. ಅಂಥ ಸಂದರ್ಭದಲ್ಲಿಬಳಕೆದಾರರು ಬ್ಯಾಕ್‌ಅಪ್‌ ಮತ್ತು ರಿಸ್ಟೋರ್‌ ಆ್ಯಪ್‌ಗಳನ್ನು ಬಳಸಿಕೊಂಡು ತಮ್ಮ ಅಮೂಲ್ಯವಾದ ಮಾಹಿತಿಯನ್ನು ಸೇವ್‌ ಮಾಡಿಟ್ಟುಕೊಳ್ಳಬಹುದು.

ಮೊನ್ನೆಯಷ್ಟೇ ಗೂಗಲ್‌ ಸಂಸ್ಥೆ, ಬಳಕೆದಾರರಿಗೆ ಅನುಕೂಲವಾಗುವ ದೃಷ್ಟಿಯಿಂದ 'ಗೂಗಲ್‌ ಒನ್‌' ಎಂಬ ಹೊಸ ಬ್ಯಾಕ್‌ಅಪ್‌ ಮತ್ತು ರಿಸ್ಟೋರ್‌ ಆ್ಯಪ್‌ ಬಿಡುಗಡೆ ಮಾಡಿದೆ. ಇದನ್ನು ಬಳಸಿಕೊಂಡು ಬಳಕೆದಾರರು ತಮ್ಮ ಗೂಗಲ್‌ ಡ್ರೈವ್‌ನಲ್ಲಿ ಡೇಟಾವನ್ನು ಉಳಿಸಿಕೊಳ್ಳಬಹುದು. ಫೋಟೊಗಳಿಂದ ಹಿಡಿದು ಡಾಕ್ಯುಮೆಂಟ್‌ಗಳವರೆಗೂ ಇಲ್ಲಿಬ್ಯಾಕ್‌ಅಪ್‌ ಮಾಡಿಕೊಳ್ಳಬಹುದಾಗಿದೆ. ಸ್ಮಾರ್ಟ್‌ಫೋನ್‌ನಲ್ಲಿಗೂಗಲ್‌ ಒನ್‌ ಬಳಸಿಕೊಂಡು ಡೇಟಾ ಹೇಗೆ ಸೇವ್‌ ಮಾಡಿಕೊಳ್ಳಬಹುದು ಮತ್ತು ಅತ್ಯುತ್ತಮ ಬ್ಯಾಕ್‌ಅಪ್‌ ಆ್ಯಪ್‌ಗಳ ಬಗ್ಗೆ ಇಲ್ಲಿದೆ ಮಾಹಿತಿ.

ಗೂಗಲ್‌ ಒನ್‌ನಲ್ಲಿ ಬ್ಯಾಕ್‌ಅಪ್‌ ಹೇಗೆ ಮಾಡೋದು?ಮೊದಲಿಗೆ ಗೂಗಲ್‌ ಪ್ಲೇ ಸ್ಟೋರ್‌ಗೆ ಹೋಗಿ ಗೂಗಲ್‌ ಒನ್‌ ಆ್ಯಪ್‌ ಡೌನ್‌ಲೋಡ್‌ ಮಾಡಿಕೊಳ್ಳಿ. ಆನಂತರ, ನಿಮ್ಮ ಗೂಗಲ್‌ ಐಡಿ ಮತ್ತು ಪಾಸ್ವರ್ಡ್‌ ಬಳಸಿಕೊಂಡು ಗೂಗಲ್‌ ಒನ್‌ ಆ್ಯಪ್‌ ಓಪನ್‌ ಮಾಡಿ. ಸ್ಟೋರೇಜ್‌ ಪ್ಲ್ಯಾನ್‌ ಆಯ್ಕೆ ಮಾಡಿಕೊಳ್ಳಿ. ಆನಂತರ ಆ್ಯಪ್‌ನ ಹೋಮ್‌ ಸೆಕ್ಷನ್‌ನಲ್ಲಿರುವ ಬ್ಯಾಕ್‌ಅಪ್‌ ಆಪ್ಷನ್‌ ಮೇಲೆ ಟ್ಯಾಪ್‌ ಮಾಡಿ. ಆಗ ಅದು ನೀವು ಸೇವ್‌ ಮಾಡಿಟ್ಟುಕೊಳ್ಳಬೇಕೆಂದಿರುವ ಕಂಟೆಂಟ್‌ ಬಗ್ಗೆ ಕೇಳುತ್ತದೆ. ಬಳಿಕ ಅಲ್ಲಿರುವ ಆಯ್ಕೆಗಳನ್ನು ಸೆಲೆಕ್ಟ್ ಮಾಡಿಕೊಂಡು ನೆಕ್ಸ್ಟ್‌ ಬಟನ್‌ ಮೇಲೆ ಕ್ಲಿಕ್‌ ಮಾಡಿ. ಆ ಬಳಿಕ ಮತ್ತೆ ಬ್ಯಾಕ್‌ಅಪ್‌ ಮೇಲೆ ಟ್ಯಾಪ್‌ ಮಾಡಿ, ಆಗ ಬ್ಯಾಕ್‌ಅಪ್‌ ಪ್ರಕ್ರಿಯೆ ಆರಂಭವಾಗುತ್ತದೆ ಮತ್ತು ಪ್ರಕ್ರಿಯೆ ಮುಕ್ತಾಯದವರೆಗೂ ಕಾಯಿರಿ.

ರಿಸ್ಟೋರ್‌ ಮಾಡುವ ಹಂತಗಳು:ಆ್ಯಪ್‌ ಹೋಮ್‌ ಸೆಕ್ಷನ್‌ನಲ್ಲಿರುವ ರಿಸ್ಟೋರ್‌ ಆಪ್ಷನ್‌ ಮೇಲೆ ಟ್ಯಾಪ್‌ ಮಾಡಿ. ಆಗ ನಿಮಗೆ ಅಲ್ಲಿಲಭ್ಯ ಇರುವ ಎಲ್ಲಬ್ಯಾಕ್‌ಅಪ್‌ ಡೇಟಾ ಡಿಸ್‌ಪ್ಲೇ ಆಗುತ್ತದೆ. ನಿಮಗೆ ಯಾವ ಡೇಟಾ ರಿಸ್ಟೋರ್‌ ಆಗಬೇಕು ಆ ಡೇಟಾ ಮುಂದಿರುವ ರಿಸ್ಟೋರ್‌ ಬಟನ್‌ ಮೇಲೆ ಕ್ಲಿಕ್‌ ಮಾಡಿ. ಆಗ ರಿಸ್ಟೋರ್‌ ಪ್ರಕ್ರಿಯೆ ಆರಂಭವಾಗುತ್ತದೆ.

ನಿಮಗೆ ಈ ವಿಷಯ ನೆನಪಿರಲಿ- ಮೂಲ ಸ್ಟೋರೇಜ್‌ ಸೌಲಭ್ಯ 15 ಜಿಬಿ ಮಾತ್ರ ಇರುತ್ತದೆ. ಅಂದರೆ, ನೀವು ಯಾವುದೇ ಡೇಟಾವನ್ನು 15 ಜಿಬಿವರೆಗೆ ಸೇವ್‌ ಮಾಡಿಟ್ಟುಕೊಳ್ಳಬಹುದು. ಅದಕ್ಕಿಂತ ಹೆಚ್ಚಿನ ಜಿಬಿ ಅಗತ್ಯವಾದರೆ ದುಡ್ಡು ಕೊಟ್ಟು ಖರೀದಿಸಬೇಕಾಗುತ್ತದೆ.



ಅತ್ಯುತ್ತಮ ಬ್ಯಾಕ್‌ಅಪ್‌ ಆ್ಯಪ್‌ಗಳು

ಜಿ ಕ್ಲೌಡ್‌ ಬ್ಯಾಕ್‌ಅಪ್‌: ಆ್ಯಂಡ್ರಾಯ್ಡ್‌ ಸಾಧನಗಳಲ್ಲಿ ಬ್ಯಾಕ್‌ ಆ್ಯಪ್‌ ಜನಪ್ರಿಯವಾಗಿದೆ. ಗೂಗಲ್‌ ಪ್ಲೇ ಸ್ಟೋರ್‌ನಿಂದ ಉಚಿತವಾಗಿ ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಒಂದು ಜಿಬಿವರೆಗೆ ಬ್ಯಾಕ್‌ಅಪ್‌ಗೆ ಅವಕಾಶ ಕಲ್ಪಿಸುವ ಈ ಆ್ಯಪ್‌ಗೆ ನಿಮ್ಮ ಸ್ನೇಹಿತರನ್ನು ಆಹ್ವಾನಿಸಿದರೆ ಈ ಸ್ಥಳಾವಕಾಶ ಹೆಚ್ಚಾಗುತ್ತಾ ಹೋಗುತ್ತದೆ.

ಸೂಪರ್‌ ಬ್ಯಾಕ್‌ಅಪ್‌: ನಿಮ್ಮ ಫೋನ್‌ನ ಡೇಟಾ, ಆ್ಯಫ್ಸ್‌, ಕಾಂಟಾಕ್ಟ್ ಕಾಲ್‌ ಲಾಗ್‌ ಇತ್ಯಾದಿ ಮಾಹಿತಿಯನ್ನು ಸೇವ್‌ ಮಾಡಿಟ್ಟುಕೊಳ್ಳಲು ಈ ಆ್ಯಪ್‌ ನೆರವು ನೀಡುತ್ತದೆ. ನಿಮ್ಮ ಫೋನ್‌ನಲ್ಲಿಇನ್ಸ್‌ಟಾಲ್‌ ಮಾಡಿಕೊಳ್ಳಲಾಗುವ ಹೊಸ ಆ್ಯಪ್‌ಗಳ ಡೇಟಾವನ್ನು ಸ್ವಯಂ ಆಗಿ ದಾಖಲಿಸಿಕೊಳ್ಳುತ್ತದೆ.

ಹೆಲಿಯಂ: ಎಸ್‌ಡಿ ಕಾರ್ಡ್‌, ಕಂಪ್ಯೂಟರ್‌ ಮತ್ತು ಕ್ಲೌಡ್‌ ಬ್ಯಾಕ್‌ಅಪ್‌ ಡೇಟಾ ಸಂಗ್ರಹಿಸಲು ಸಹಾಯ ಮಾಡುವ ಈ ಆ್ಯಪ್‌ನಿಂದ ಮಾಹಿತಿಯನ್ನು ಎಲ್ಲಿಬೇಕಾದರೂ ಅತ್ಯಂತ ಸುಲಭವಾಗಿ ಅಕ್ಸೆಸ್‌ ಮಾಡಬಹುದು.

ಗೋ ಬ್ಯಾಕ್‌ಅಪ್‌ ಮತ್ತು ರಿಸ್ಟೋರ್‌ ಪ್ರೊ: ಇದು ಕೂಡ ಅತ್ಯುತ್ತಮ ಆ್ಯಪ್‌ ಆಗಿದ್ದು ಉಚಿತ ಆವೃತ್ತಿಯಲ್ಲಿನೀವು ನಿಮ್ಮ ಎಸ್‌ಎಂಎಸ್‌ ಮತ್ತು ಎಂಎಂಎಸ್‌ ಫೈಲ್‌ಗಳನ್ನು ಬ್ಯಾಕ್‌ಅಪ್‌ ಮಾಡಿಟ್ಟುಕೊಳ್ಳಬಹುದು. ಇನ್ನೂಹೆಚ್ಚಿನ ಸೌಲಭ್ಯಕ್ಕಾಗಿ ನೀವು ಇದರ ಖರೀದಿ ಆವೃತ್ತಿಯನ್ನು ಬಳಸಿಕೊಳ್ಳಬಹುದು.

ಈಜಿ ಆ್ಯಪ್‌ ಟೂಲ್‌ಬಾಕ್ಸ್‌: ಗೂಗಲ್‌ ಪ್ಲೇಸ್ಟೋರ್‌ನಲ್ಲಿಈ ಆ್ಯಪ್‌ ಕೂಡ ನಿಮಗೆ ಉಚಿತವಾಗಿ ದೊರೆಯುತ್ತದೆ. ಡೇಟಾ ಬ್ಯಾಕ್‌ಅಪ್‌ ಮಾಡಲು ಈ ಆ್ಯಪ್‌ ಚಿಕ್ಕ ಚಿಕ್ಕ ಟೂಲ್‌ಗಳನ್ನು ಒದಗಿಸುತ್ತದೆ. ಕ್ಲೌಡ್‌ ಬ್ಯಾಕ್‌ಅಪ್‌, ಎಸ್‌ಡಿ ಕಾರ್ಡ್‌ ಬ್ಯಾಕ್‌ಅಪ್‌ಗೂ ಇದು ಅವಕಾಶ ಕಲ್ಪಿಸಿಕೊಡುತ್ತದೆ.

ಸಿಎಂ ಬ್ಯಾಕ್‌ಅಪ್‌: ಇದು ತುಂಬ ಜನಪ್ರಿಯ ಆ್ಯಪ್‌. ಗೂಗಲ್‌ ಪ್ಲೇ ಸ್ಟೋರ್‌ನಲ್ಲಿಇದಕ್ಕೆ 4.7 ರೇಟಿಂಗ್‌ ಇದೆ ಅಂದರೆ ಅದರ ಜನಪ್ರಿಯತೆಯನ್ನು ತಿಳಿಯಬಹುದು. ಫೋನ್‌ನಲ್ಲಿರುವ ಕಾಂಟಾಕ್ಟ್ ಸಂದೇಶಗಳು, ಕಾಲ್‌ ಲಾಗ್‌, ಫೋಟೊಗಳು, ಬ್ರೌಸರ್‌ ಬುಕ್‌ಮಾರ್ಕ್‌ಗಳನ್ನು ಸುಲಭವಾಗಿ ಬ್ಯಾಕ್‌ಅಪ್‌ ಮಾಡಿಕೊಳ್ಳಬಹುದು. ಅಂದಾಜು 50 ದಶಲಕ್ಷ ಬಳಕೆದಾರರು ಈ ಆ್ಯಪ್‌ ಡೌನ್‌ಲೋಡ್‌ ಮಾಡಿಕೊಂಡಿದ್ದಾರೆ.

ಬುಧವಾರ, ನವೆಂಬರ್ 13, 2019

Keep Children Safe: ಅಪಾಯಕಾರಿ ವಸ್ತುಗಳು ಮಕ್ಕಳ ಕೈಗೆ ಸಿಗದಂತಿರಲಿ

- ಮಲ್ಲಿಕಾರ್ಜುನ ತಿಪ್ಪಾರ

ಮನೆ ತುಂಬ ಮಕ್ಕಳು ಆಟ ಆಡಿಕೊಂಡು, ಓಡಾಡಿಕೊಂಡಿರೋದನ್ನು ನೋಡೋದೇ ಖುಷಿ ಮತ್ತು ಚಂದ. ಆದರೆ, ಸ್ವಲ್ಪವೇ ಎಚ್ಚರ ತಪ್ಪಿದರೂ ಪೋಷಕರ ಈ ಖುಷಿ ಕ್ಷಣದಲ್ಲೇ ಮಾಯವಾಗಿ ಕಣ್ಣೀರು ಸುರಿಸಬೇಕಾಗುತ್ತದೆ.

ಇದಕ್ಕೆ ತಾಜಾ ಉದಾಹರಣೆ ಎಂದರೆ, ಚಿಕ್ಕಮಗಳೂರು ಜಿಲ್ಲೆ ಮೂಡಿಗೆರೆ ತಾಲೂಕಿನ ದುರ್ಗದ ಹಳ್ಳಿಯಲ್ಲಿ ಅಗಸ್ತ್ಯ ಎಂಬ 3 ವರ್ಷದ ಮಗುವೊಂದು ಜ್ಯೂಸ್‌ ಎಂದು ಭಾವಿಸಿ ಕ್ರಿಮಿನಾಶಕ ಸೇವಿಸಿ ಮೃತಪಟ್ಟ ಪ್ರಕರಣ. ಈ ರೀತಿಯ ಘಟನೆಗಳು ಆಗಾಗ ನಡೆಯುತ್ತಲೇ ಇರುತ್ತವೆ. ನಾಣ್ಯ ನುಂಗಿದ ಮಗು, ಮೇಲಿಂದ ಮಗು ಬಿದ್ದ ಸಾವು, ಆಡಲು
ಹೋಗಿ ಸಂಪ್‌ಗೆ ಬಿದ್ದ ಮಗು ಇತ್ಯಾದಿ ಸುದ್ದಿಗಳನ್ನು ನೀವು ಓದಿರುತ್ತೀರಿ. ಇವೆಲ್ಲವೂ ಪೋಷಕರು ಎಚ್ಚರ ತಪ್ಪಿದಾಗ, ಬೇಜವಾಬ್ದಾರಿಯಿಂದ ಇದ್ದಾಗ ನಡೆದ ದುರ್ಘಟನೆಗಳೇ ಆಗಿರುತ್ತವೆ. ಹಾಗಾಗಿ, ಮಕ್ಕಳ ಪಾಲನೆ, ಪೋಷಣೆಯಲ್ಲಿ ಅದರಲ್ಲೂ ಐದು ವರ್ಷದೊಳಗಿನ ಮಕ್ಕಳ ವಿಷಯದಲ್ಲಿ ಹೆಚ್ಚು ಜಾಗರೂಕವಾಗಿರಬೇಕು. ಇಲ್ಲದಿದ್ದರೆ ಅಪಾಯ ತಪ್ಪಿದ್ದಲ್ಲ.

ಮಕ್ಕಳಿಗೆ ಹಾನಿಯುಂಟು ಮಾಡುವ ಯಾವುದೇ ವಸ್ತುಗಳು ಅವರ ಕೈಸಿಗದಂತೆ ನೋಡಿಕೊಂಡರೆ ನೀವು ಅರ್ಧ ಗೆದ್ದಂತೆ. ಹಾಗಾದರೆ, ಮಕ್ಕಳನ್ನು ಸುರಕ್ಷಿತವಾಗಿಟ್ಟುಕೊಳ್ಳುವುದು ಹೇಗೆ? ಇದಕ್ಕೇನೂ ಮಹಾ ಜ್ಞಾನ ಬೇಕಾಗಿಲ್ಲ; ಒಂದಿಷ್ಟು ಸಾಮಾನ್ಯ ಜ್ಞಾನ ಇದ್ದರೆ ಸಾಕು. ಮಗುವಿಗೆ ಅಪಾಯ ತಂದೊಡ್ಡಬಹುದಾದ ವಸ್ತುಗಳನ್ನು ಗುರುತಿಸಿದರೆ ಸಾಕು. ನೀರು ಮತ್ತು ಬೆಂಕಿ ಹತ್ತಿರ ಮಕ್ಕಳು ಸುಳಿಯದಂತೆ ನೋಡಿಕೊಳ್ಳಬೇಕು. ಯಾವಾಗಲೂ ಮಕ್ಕಳ ಚಟುವಟಿಕೆಗಳ ಮೇಲೆ ನಿಗಾ
ಇಟ್ಟರೆ ಸಂಭಾವ್ಯ ಯಾವುದೇ ಅಪಾಯವನ್ನು ತಪ್ಪಿಸಬಹುದು.

ಅಪಾಯಕಾರಿ ವಸ್ತುಗಳು ಮಕ್ಕಳ ಕೈಗೆ ಸಿಗದಿರಲಿ

ನಾಣ್ಯ, ಬಟನ್‌, ಕ್ವಾಯಿನ್‌ ಬ್ಯಾಟರಿ: ಮಕ್ಕಳ ಗಂಟಲಲ್ಲಿ ನಾಣ್ಯ ಸಿಕ್ಕಿ ಹಾಕಿಕೊಂಡು ಅಸು ನೀಗಿದ ಉದಾಹರಣೆಗಳಿವೆ. ಹಾಗಾಗಿ ನಾಣ್ಯಗಳಿಂದ ದೂರ ಇರಲಿ. ಬಟನ್‌ (ಗುಂಡಿ), ಕ್ವಾಯಿನ್‌ ಗಾತ್ರದ ಬ್ಯಾಟರಿ ಸಿಗದಂತಿರಲಿ. ಸಿಂಗಿಂಗ್‌ ಗ್ರೀಟಿಂಗ್‌ ಕಾರ್ಡ್ಸ್, ರಿಮೋಟ್‌ ಕಂಟ್ರೋಲ್‌, ವಾಚ್‌ಗಳು, ಹಿಯರಿಂಗ್‌ ಸಾಧನಗಳು, ಡಿಜಿಟಲ್‌ ಸ್ಕೇಲ್ಸ್‌, ಥರ್ಮೋ ಮೀಟರ್ಸ್‌, ಕ್ಯಾಲ್ಕುಲೇಟರ್‌, ಆಟಿಕೆಗಳು, ಲೈಟ್‌ ಅಪ್‌ ಬಟನ್ಸ್‌ಗಳಲ್ಲಿ ಕ್ವಾಯಿನ್‌ ಗಾತ್ರದ ಬ್ಯಾಟರಿಗಳು ಇರುತ್ತವೆ.

ಆಟಿಕೆಗಳು: ಮ್ಯಾಗ್ನೆಟ್‌ ಮತ್ತು ಕ್ವಾಯಿನ್‌ ಬ್ಯಾಟರಿಗಳಿಲ್ಲದ ಆಟಿಕೆಗಳೂ ಮಕ್ಕಳ ಪ್ರಾಣಕ್ಕೆ ಎರವಾಗಬಹುದು. ಗಟ್ಟಿಮುಟ್ಟಾದ ಆಟಿಕೆಗಳಿರಲಿ. ಆಟಿಕೆಯ ಭಾಗಗಳು ಸುಲಭವಾಗಿ
ಕಿತ್ತು ಬರುವಂತಿರಬಾರದು. ಆಟಿಕೆಗಳಲ್ಲಿರುವ ಮ್ಯಾಗ್ನೆಟ್‌ಗಳನ್ನು ತೆಗೆದಿಡಿ. ಹೈ ಪವರ್‌ ಮ್ಯಾಗ್ನೆಟ್‌ಗಳು ಹೆಚ್ಚು ಅಪಾಯಕಾರಿ.

ಬಾತ್‌ಟಬ್ಸ್‌, ಟಾಯ್ಲೆಟ್ಸ್‌, ಬಕೆಟ್‌: ಮಕ್ಕಳನ್ನು ಒಂಟಿಯಾಗಿ ಬಾತ್‌ಟಬ್‌ಗೆ ಬಿಡಬೇಡಿ. ನಿಮ್ಮ ಬಾತ್‌ರೂಮ್‌ ಬಾಗಿಲುಗಳು ಯಾವಾಗಲೂ ಮುಚ್ಚಿರಲಿ. ಟಾಯ್ಲೆಟ್‌ ಸೀಟ್‌ ಕವರ್‌ ಆಗಿರಲಿ. ಆಯ ತಪ್ಪಿ ಕಮೋಡ್‌ನೊಳಗೆ ಮಕ್ಕಳ ಬಿದ್ದ ಉದಾಹರಣೆಗಳಿವೆ. ನೀರು ತುಂಬಿದ ದೊಡ್ಡ ಗಾತ್ರ ಬಕೆಟ್‌ಗಳತ್ತ ಹೋಗದಂತೆ ನೋಡಿಕೊಳ್ಳಿ.

ಔಷಧಗಳು, ಟ್ಯಾಬ್ಲೆಟ್ಸ್‌: ಮಕ್ಕಳ ಕೈಗೆ ಟ್ಯಾಬ್ಲೆಟ್‌, ಟಾನಿಕ್‌ ಬಾಟಲ್‌ಗಳು ಮತ್ತಿತರ ಔಷಧಗಳು ಸಿಗದಂತಿರಲಿ. ಮಕ್ಕಳ ಮುಂದೆ ನೀವು ಔಷಧವಾಗಲಿ, ಟ್ಯಾಬ್ಲೆಟ್‌ ಆಗಲಿ ಸೇವಿಸಲು ಹೋಗಬೇಡಿ. ಮಗು ನಿಮ್ಮನ್ನು ಅನುಕರಿಸುವ ಸಾಧ್ಯತೆ ಹೆಚ್ಚು.

ಬಾತ್‌ರೂಂ ಕ್ಲೀನರ್‌ಗಳು: ಸಾಬೂನುಗಳು, ಬ್ಲೀಚಿಂಗ್‌, ಬಾತ್‌ರೂಂ ಕ್ಲೀನ್‌ಗೆ ಬಳಸುವ ಇತರ ಯಾವುದೇ ರಾಸಾಯನಿಕ ಪದಾರ್ಥಗಳು ಮಕ್ಕಳಿಗೆ ನಿಲುಕದಂತೆ ನೋಡಿಕೊಳ್ಳಿ.

ವಸ್ತುಗಳು ಬೀಳದಂತಿರಲಿ: ಮಗು ಎಂದ ಮೇಲೆ ಅದು ಮನೆ ತುಂಬ ಓಡಾಡಿಕೊಂಡಿರುತ್ತದೆ. ಹಾಗಾಗಿ, ಯಾವುದೇ ವಸ್ತುಗಳು ಸುಲಭವಾಗಿ ನೆಲಕ್ಕೆ ಬೀಳದಂತೆ ಇರಲಿ. ಇಲ್ಲದಿದ್ದರೆ ಆಟವಾಡುವ ಹುಮ್ಮಸ್ಸಿನಲ್ಲಿ ಮನೆಯ ಯಾವುದೇ ವಸ್ತು ಹಿಡಿದು ಜಗ್ಗಿದರೆ ಅದು ಅದರ ಮೇಲೆ ಬೀಳುವ ಸಾಧ್ಯತೆಗಳಿರುತ್ತವೆ. ಅಂದರೆ ಫರ್ನಿಚರ್‌, ಟಿವಿಗಳು, ಡ್ರೆಸರ್ಸ್‌, ಬುಕ್‌ಗಳು ಇತ್ಯಾದಿ.

ವಾಲ್‌ ಪ್ಲಗ್‌, ವೈರ್‌, ಚಾರ್ಜರ್‌: ಈ ವಿಷಯದಲ್ಲಿ ಪೋಷಕರು ಬಹಳ ಎಚ್ಚರವಾಗಿರಬೇಕು. ಮಕ್ಕಳಿಗೆ ವಾಲ್‌ಪ್ಲಗ್‌ಗಳು, ಎಲೆಕ್ಟ್ರಿಕಲ್‌ ವೈರ್‌, ಮೊಬೈಲ್‌ ಚಾರ್ಜರ್‌ಗಳು ಎಟುಕದಂತಿರಲಿ. ಬಾತ್‌ಟಬ್‌, ಸಿಂಕ್‌ಗಳ ಹತ್ತಿರ ಎಲೆಕ್ಟ್ರಿಕಲ್‌ ಸಲಕರಣೆಗಳು ಇರದಿರಲಿ. ಮಕ್ಕಳಿಗೆ ಯಾವುದ ಸ್ವಿಚ್‌ಗಳನ್ನು ಆನ್‌ ಅಥವಾ ಆಫ್‌ ಮಾಡಲು ಹೇಳಬೇಡಿ.

ಚಾಕು, ಹರಿತ ವಸ್ತುಗಳು: ಮಕ್ಕಳಿಗೆ ಅಡಿಗೆ ಮನೆ ಯಾವಾಗಲೂ ಕುತೂಹಲದ ಕಣಜ. ಅಲ್ಲಿರುವ ಚಾಕು ಮತ್ತು ಇತರೆ ಹರಿತವಾದ ವಸ್ತುಗಳು ಅವರ ಕೈಗೆ ಸಿಗದಿರಲಿ. ಚೂಪಾದ ಪೆನ್ಸಿಲ್‌ಗಳು ಒಮ್ಮೊಮ್ಮೆ ಮಕ್ಕಳಿಗೆ ಗಾಯವುಂಟು ಮಾಡಬಹುದು. ಪೆನ್ಸಿಲ್‌ ಹೇಗೆ ಬಳಸಬೇಕು ಎಂಬುದನ್ನು ಹೇಳಿಕೊಡಬೇಕು.

ಗ್ಯಾಸ್‌ ಸಿಲಿಂಡರ್‌, ಸ್ಟೋವ್‌: ಅಡುಗೆ ಮನೆಯಲ್ಲಿರುವ ಸ್ಟೋವ್‌ ಹತ್ತಿರ ಮಕ್ಕಳು ಸುಳಿಯದಂತೆ ನೋಡಿಕೊಳ್ಳಿ. ಹಾಗೆಯೇ ಅಡುಗೆ ಸಿಲಿಂಡರ್‌ಗಳು ಕೂಡ ಮಕ್ಕಳಿಗೆ ಗೊತ್ತಾಗದಂತೆ ಇರಲಿ.

ಕ್ರಿಮಿನಾಶಕ, ಪೆಟ್ರೋಲ್: ಈ ವಿಷಯದಲ್ಲಿ ಹೆಚ್ಚು ಜಾಗೂರಕರಾಗಿರಬೇಕು. ಕ್ರಿಮಿನಾಶಕಗಳು, ಬೆಳೆಗೆ ಸಿಂಪಡಿಸುವ ಇತರೆ ಯಾವುದೇ ರಾಸಾಯನಿಕಗಳು ದೂರವಿಡಿ. ಪೆಟ್ರೋಲ್‌ ಮತ್ತು ಡೀಸೆಲ್ ಸಂಗ್ರಹ ಬಾಟಲ್‌ಗಳು ಮಕ್ಕಳ ಕಣ್ಣಿಗೆ ಬೀಳದಂತಿರಲಿ.

ಎತ್ತರ ಏರದಿರಲಿ: ಮಕ್ಕಳು ಒಂಟಿಯಾಗಿ ಸ್ಟೆಪ್‌ಗಳು, ಮಾಳಿಗೆ ಮೇಲೆ ಹೋಗದಂತೆ ನೋಡಿಕೊಳ್ಳಿ. ಆಡುತ್ತಾ ಮೇಲಿಂದ ಬಿದ್ದರೆ ಅಪಾಯ ಗ್ಯಾರಂಟಿ.

ಈ ವರದಿಯು ವಿಜಯ ಕರ್ನಾಟಕದ 2019ರ ನವೆಂಬರ್ 13ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.


Featured Post

BMC Commissioner Iqbal Singh Chahal: ಕೋವಿಡ್ ನಿಯಂತ್ರಣಕ್ಕೆ 'ಮುಂಬೈ ಮಾಡೆಲ್‌' ಸೃಷ್ಟಿಸಿದ ಚಹಲ್

ಫಿಟ್ನೆಸ್ ‌ ಫ್ರೀಕ್ ‌ ಐಎಎಸ್ ‌ ಅಧಿಕಾರಿ , ಬಿಎಂಸಿ ಆಯುಕ್ತ ಇಕ್ಬಾಲ್ ‌ ಸಿಂಗ್ ‌ ಚಹಲ್ ‌ ಅವರು ಮುಂಬೈನಲ್ಲಿ ಕೋವಿಡ್ ‌ ನಿಯಂತ್ರಣಕ್ಕೆ ತಂದು , ‘ ಮುಂಬೈ ಮಾಡೆಲ್ ‌’...