10 Deadliest Viruses: ಜಗತ್ತನ್ನು ಕಾಡಿದ ಆ 10 ವೈರಸ್‌ಗಳು!

- ಮಲ್ಲಿಕಾರ್ಜುನ ತಿಪ್ಪಾರ
ಕೊರೊನಾ ವೈರಸ್‌(ಕೋವಿಡ್‌-19)ಗೆ ಇಡೀ ಜಗತ್ತೇ ತಲ್ಲಣಿಸಿದೆ. 60 ರಾಷ್ಟ್ರಗಳಿಗೆ ಹಬ್ಬಿರುವ ಈ ವೈರಾಣುವಿಗೆ ಈಗಾಗಲೇ 30 ಸಾವಿರಕ್ಕೂ ಹೆಚ್ಚು ಜನರು ಪ್ರಾಣ ಕಳೆದುಕೊಂಡಿದ್ದಾರೆ. ಆದರೆ, ಕೊರೊನಾ ಹರಡದಂತೆ, ಮಾರಣಾಂತಿಕವಾಗದಂತೆ ತಡೆಯುವ ಪ್ರಯತ್ನಗಳು ನಡೆಯುತ್ತಿವೆಯಾದರೂ ಇನ್ನೂ ದೊಡ್ಡ ಪ್ರಮಾಣದಲ್ಲಿಯಶಸ್ಸು ದೊರೆಯುತ್ತಿಲ್ಲ.

ಆದರೆ, ಕೊರೊನಾ ವೈರಾಣುಗಿಂತಲೂ ಭೀಕರ ವೈರಸ್‌ಗಳ ಹಾವಳಿಯನ್ನು ಈ ಜಗತ್ತು ಕಂಡಿದೆ. 20ನೇ ಶತಮಾನದಲ್ಲಿಇಡೀ ಮನುಕುಲಕ್ಕೆ ಸಂಚಕಾರ ತಂದಿದ್ದ ಸಿಡುಬು(ಸ್ಮಾಲ್‌ ಪಾಕ್ಸ್‌) ವೈರಾಣು ಇದೀಗ ಭೂಮಿಯ ಮೇಲಿಲ್ಲ! ನಮ್ಮ ವೈದ್ಯ ವಿಜ್ಞಾನ ಬೆಳೆದಂತೆ ವೈರಾಣುಗಳಿಗೆ ಲಸಿಕೆಗಳು, ಔಷಧಗಳನ್ನು ಕಂಡುಹಿಡಿಯಲಾಗುತ್ತಿದೆ. ಆದರೂ ಈವರೆಗೂ ಕೆಲವು ವೈರಾಣುಗಳಿಗೆ ಯಾವುದೇ ರೀತಿಯ ಮದ್ದು ದೊರೆತಿಲ್ಲಮತ್ತು ಇನ್ನೂ ಕೆಲವು ರೋಗಾಣುಗಳನ್ನು ನಿಯಂತ್ರಿಸಲಾಗಿದೆ.

ಇತ್ತೀಚಿನ ವರ್ಷಗಳಲ್ಲಿ, ಕೊರೊನಾ ಮುಂಚೆ ಎಬೋಲಾ ಎಂಬ ವೈರಸ್‌ ಕೂಡ ಹೆಚ್ಚು ಭೀತಿಯನ್ನು ಸೃಷ್ಟಿಸಿತ್ತು. ಮೂರ್ನಾಲ್ಕು ವರ್ಷಗಳ ಹಿಂದೆ ಆಫ್ರಿಕಾದ ಕೆಲವು ರಾಷ್ಟ್ರಗಳಲಿ ಕಾಣಿಸಿಕೊಂಡಿದ್ದ ಎಬೋಲಾ ಸೃಷ್ಟಿಸಿದ್ದ ಭೀಕರತೆ ಮಾತ್ರ ಗಂಭೀರವಾಗಿತ್ತು. ಎಬೋಲಾ ಪೀಡಿತರ ಪೈಕಿ ಶೇ.90ರಷ್ಟು ಜನರು ಸರಿಯಾದ ಚಿಕಿತ್ಸೆ ದೊರೆಯದೆ ಸಾವಿಗೀಡಾಗಿದ್ದರು. ಇದೀಗ ಕೊರೊನಾ ಕೂಡ ಅಂಥದ್ದೇ ಸ್ಥಿತಿಯನ್ನು ಸೃಷ್ಟಿಸಿದೆ. ಆರೋಗ್ಯ ತುರ್ತು ಪರಿಸ್ಥಿತಿ ಮಾತ್ರವಲ್ಲದೇ ವಿಶ್ವದ ಆರ್ಥಿಕ ವಲಯದ ಮೇಲೆ ಕೊರೊನಾ ಕೆಟ್ಟ ಪರಿಣಾಮ ಬೀರಿದೆ.

ಕೊರೊನಾ ಹೊರತುಪಡಿಸಿ ಈ ವಿಶ್ವವನ್ನು ಕಾಡಿದ ಅತಿ ಭಯಂಕರ ಹತ್ತು ವೈರಾಣುಗಳ ಬಗ್ಗೆ ಇಲ್ಲಿದೆ ಮಾಹಿತಿ.

1. ಮಾರಣಾಂತಿಕ 'ಮಾರ್ಬರ್ಗ್‌'
1967ರಲ್ಲಿವಿಜ್ಞಾನಿಗಳು ಈ ವೈರಸ್‌ ಗುರುತಿಸಿದರು. ಉಗಾಂಡದಿಂದ ಮಂಗಗಳನ್ನು ಲ್ಯಾಬ್‌ ಕಾರ್ಮಿಕರು ಜರ್ಮನಿಗೆ ತರುತ್ತಿದ್ದರು. ಈ ವೇಳೆ, ಮಂಗಗಳಿಂದ ಅವರಿಗೂ ಈ ವೈರಸ್‌ ತಗುಲಿತ್ತು. ಎಬೋಲಾ ವೈರಸ್‌ ಮಾದರಿಯಲ್ಲೇ ಮಾರ್ಬರ್ಗ್‌ ವೈರಸ್‌ ಇದ್ದು, ಹೆಮರಾಜಿಕ್‌ ಫೀವರ್‌(ರಕ್ತಸ್ರಾವ ಜ್ವರ)ಕ್ಕೆ ಕಾರಣವಾಗುತ್ತದೆÜ. ಅಂದರೆ, ಮಾರ್ಬರ್ಗ್‌ ಸೋಂಕುಪೀಡಿತ ವ್ಯಕ್ತಿಗೆ ಸಿಕ್ಕಾಪಟ್ಟೆ ಜ್ವರ ಉಂಟಾಗಿ, ರಕ್ತಸ್ರಾವವಾಗುತ್ತದೆ. ಇದರ ಪರಿಣಾಮ ವ್ಯಕ್ತಿ ಶಾಕ್‌ಗೊಳಗಾಗಬಹುದು, ಬಹು ಅಂಗಾಂಗಗಳು ವೈಫಲ್ಯ ಕಾಣಬಹುದು ಮತ್ತು ಅಂತಿಮವಾಗಿ ಸಾವು ಸಂಭವಿಸಬಹುದು. ಮಾರ್ಬರ್ಗ್‌ ಮರಣದ ಪ್ರಮಾಣ ಶೇ.25ರಷ್ಟಿದೆ. ಆದರೆ, 1998 ಮತ್ತು 2000ರಲ್ಲಿ ಈ ವೈರಸ್‌ ಕಾಣಿಸಿಕೊಂಡಾಗ ಮರಣ ಪ್ರಮಾಣ ಶೇ.80ರಷ್ಟಿತ್ತು! ವಿಶೇಷವಾಗಿ ಕಾಂಗೊದಲ್ಲಿಈ ಜ್ವರ ಕಾಣಿಸಿಕೊಂಡ ನೂರು ಜನರ ಪೈಕಿ 80 ಜನರು ಸಾವಿಗೀಡಾಗುತ್ತಿದ್ದರು. 2005ರಲ್ಲಿಅಂಗೋಲಾದಲ್ಲಿ ಮಾರ್ಬರ್ಗ್‌ ಕಾಣಿಸಿಕೊಂಡು ಹೆಚ್ಚಿನ ಸಾವು ನೋವಿಗೆ ಕಾರಣವಾಗಿತ್ತು ಎನ್ನುತ್ತದೆ ವಿಶ್ವ ಆರೋಗ್ಯ ಸಂಸ್ಥೆ.

2. ಅಲ್ಲೋಲ ಕಲ್ಲೋಲ 'ಎಬೋಲಾ'

ಮಾರಣಾಂತಿಕ 'ಎಬೋಲಾ ವೈರಸ್‌' 1967ರ ಸಮಯದಲ್ಲಿಆಫ್ರಿಕಾದ ಕಾಂಗೊ ಮತ್ತೂ ಸೂಡಾನ್‌ ರಾಷ್ಟ್ರಗಳಲ್ಲಿಏಕಕಾಲಕ್ಕೆ ಕಾಣಿಸಿಕೊಂಡಿತು. ಇದು ಕೂಡ ಡೆಡ್ಲಿವೈರಸ್‌ ಆಗಿದ್ದು, ಸ್ವಲ್ಪ ನಿರ್ಲಕ್ಷ್ಯ ವಹಿಸಿದರೆ ಸಾವು ಖಚಿತ. ರಕ್ತಅಥವಾ ದೇಹದ ಇತರ ದ್ರವ ಅಥವಾ ಸೋಂಕಿತ ವ್ಯಕ್ತಿ, ಪ್ರಾಣಿಯ ಅಂಗಾಂಶಗಳಿಂದ ಈ ವೈರಸ್‌ ಹರಡುತ್ತದೆ.  ರಕ್ತಅಥವಾ ದೇಹದ ಇತರ ದ್ರವ ಅಥವಾ ಸೋಂಕಿತ ವ್ಯಕ್ತಿ, ಪ್ರಾಣಿಯ ಅಂಗಾಂಶಗಳಿಂದ ಈ ವೈರಸ್‌ ಹರಡುತ್ತದೆ. ತೀರಾ ಇತ್ತೀಚೆಗೆ 

ಅಂದರೆ 2014ರಲ್ಲಿಎಬೋಲಾ ಪಶ್ಚಿಮ ಆಫ್ರಿಕಾದಲ್ಲಿಕಾಣಿಸಿಕೊಂಡಿತ್ತು. ಆತಂಕಕಾರಿ ಸಂಗತಿ ಎಂದರೆ, ಈ ವರೆಗೂ ಕಂಡು ಬಂದಿರುವ ವೈರಸ್‌ಗಳ ಪೈಕಿ ಇದು ಅತ್ಯಂತ ಡೆಡ್ಲಿವೈರಸ್‌ ಎಂಬುದು ಡಬ್ಲ್ಯೂಎಚ್‌ಒ ಅಭಿಮತವಾಗಿದೆ. ವೈರಸ್‌ನಿಂದಾಗಿ ಸಾವಿನ ಪ್ರಮಾಣ ಶೇ.50ರಷ್ಟಿತ್ತು. ಸೂಡಾನ್‌ನಲ್ಲಿಈ ಪ್ರಮಾಣ ಶೇ.70ರಷ್ಟಿತ್ತು.

3. ಭಯಂಕರ 'ರೇಬಿಸ್‌'
ರೇಬಿಸ್‌ ವೈರಸ್‌ಗೆ ಈಗ ಮದ್ದು ಇದೆ. ಆದರೆ, 1920ಕ್ಕಿಂತ ಮುಂಚೆ ಈ ವೈರಸ್‌ ಮಾರಣಾಂತಿಕವಾಗಿತ್ತು. ಆ ಬಳಿಕ ರೇಬಿಸ್‌ಗೆ ಮದ್ದು ಕಂಡು ಹಿಡಿದು ಅದನ್ನು ಹತೋಟಿಗೆ ತರಲಾಗಿತ್ತು. ಅಭಿವೃದ್ಧಿ ಹೊಂದಿದ ರಾಷ್ಟ್ರಗಳಲ್ಲಿಈ ವೈರಸ್‌ನ ಉಪಟಳ ಅಷ್ಟಿಲ್ಲ. ಆದರೆ, ಈಗಲೂ ಭಾರತ ಮತ್ತು ಆಫ್ರಿಕದ ಕೆಲವು ಭಾಗಳಲ್ಲಿರೇಬಿಸ್‌ ಆಗಾಗ ಜನರಿಗೆ ತೊಂದರೆ ನೀಡುತ್ತದೆ. ರೇಬಿಸ್‌ಪೀಡಿತ ವ್ಯಕ್ತಿಯ ಮೆದುಳು ತನ್ನ ಕೆಲಸವನ್ನು ನಿಲ್ಲಿಸುತ್ತದೆ. ವಿಶೇಷವಾಗಿ ನಾಯಿ ಕಚ್ಚಿದಾಗ ಈ ವೈರಸ್‌ ಸೋಂಕು ತಗಲುತ್ತದೆ. ಕ್ರೋಧೋನ್ಮತ್ತ ಯಾವುದೇ ಪ್ರಾಣಿ ಕಚ್ಚಿದಾಗಲೂ ರೇಬಿಸ್‌ ಸೋಂಕು ಹರಡಬಹುದು. ಈಗಿನ ದಿನಗಳಲ್ಲಿರೇಬಿಸ್‌ಗೆ ಚುಚ್ಚುಮದ್ದು ಮತ್ತು ಆ್ಯಂಟಿಬಯೋಟಿಕ್ಸ್‌ಗಳು ಲಭ್ಯ ಇವೆ. ಆದರೆ, ರೇಬಿಸ್‌ಪೀಡಿತ ಪ್ರಾಣಿ ಕಚ್ಚಿದ ಕೂಡಲೇ ಚಿಕಿತ್ಸೆ ಪಡೆದುಕೊಳ್ಳಬೇಕು. ಇಲ್ಲದಿದ್ದರೆ ಶೇ.100ರಷ್ಟು ಸಾವು ಖಚಿತ ಎನ್ನುತ್ತಾರೆ ತಜ್ಞರು.

4. 'ಎಚ್‌ಐವಿ' ಎಂಬ ಪಾಶವಿ
ಬಹುಶಃ ಎಚ್‌ಐವಿ ವೈರಾಣು ಸೃಷ್ಟಿಸಿದ್ದ ಆತಂಕವನ್ನು ಬೇರೆ ಯಾವುದೇ ವೈರಾಣು ಸೃಷ್ಟಿಸಿಲ್ಲವೇನೋ? ಅದರಲ್ಲೂಭಾರತದಲ್ಲಂತೂ ಎಚ್‌ಐವಿ ವೈರಾಣು ಸೃಷ್ಟಿಸಿದ್ದ ಭೀಕರತೆ ಇನ್ನೂ ಇದೆ. ಆಧುನಿಕ ಜಗತ್ತಿನ ಅತ್ಯಂತ ಡೆಡ್ಲಿವೈರಸ್‌ ಎಂದು ಎಚ್‌ಐವಿಯನ್ನು ಪರಿಗಣಿಸಲಾಗುತ್ತದೆ. ಈಗಲೂ ಜನರನ್ನು ಕೊಲ್ಲುವುದರಲ್ಲಿಈ ವೈರಾಣು ನಂಬರ್‌ ಒನ್‌ ಸ್ಥಾನದಲ್ಲಿದೆ! 1980ರಲ್ಲಿಕಾಂಗೋದಲ್ಲಿಮೊದಲ ಬಾರಿ ಎಚ್‌ಐವಿ ವೈರಾಣು ಪತ್ತೆಯಾಯಿತು. ಅಲ್ಲಿಂದ ಇಲ್ಲಿವರೆಗೂ 3.6 ಕೋಟಿ ಜನರು ಈ ವೈರಾಣುವಿಗೆ ಬಲಿಯಾಗಿದ್ದಾರೆ. ಮಾನವ ಕುಲ ಈವರೆಗೆ ಕಂಡ ಅತ್ಯಂತ ಮಾರಣಾಂತಿಕ ವೈರಸ್‌ ಇದಾಗಿದೆ ಎಂಬುದು ತಜ್ಞರ ಅಭಿಪ್ರಾಯವಾಗಿದೆ. ಎಚ್‌ಐವಿಯನ್ನು ತಡೆಯಲು ಅತ್ಯಂತ ಶಕ್ತಿಶಾಲಿ ಆ್ಯಂಟಿ ವೈರಲ್‌ ಔಷಧ ಸಾಧ್ಯವಾಗಿದೆಯಾದರೂ ಈಗಲೂ ಕಡಿಮೆ ತಲಾದಾಯ ಇರುವ ರಾಷ್ಟ್ರಗಳಲ್ಲಿಎಚ್‌ಐವಿ ಆತಂಕ ಇನ್ನೂ ನಿಂತಿಲ್ಲ. ಸಬ್‌-ಸಹರನ್‌ ಆಫ್ರಿಕಾದಲ್ಲಿಪ್ರತಿ 20 ವಯಸ್ಕರಲ್ಲಿಒಬ್ಬರು ಎಚ್‌ಐವಿ ಪೀಡಿತರಾಗುತ್ತಿದ್ದಾರೆ. ಸದ್ಯ 3.1 ಕೋಟಿಯಿಂದ 3.5 ಕೋಟಿ ಜನರು ಎಚ್‌ಐವಿಪೀಡಿತರಿದ್ದಾರೆ. ಭಾರತದಲ್ಲಿಎಚ್‌ಐವಿಪೀಡಿತರ ಸಂಖ್ಯೆ ಹೆಚ್ಚಿತ್ತು. ಆದರೆ ಸರಕಾರ ಹಾಗೂ ಸಂಘಸಂಸ್ಥೆಗಳ ಜಾಗೃತಿಯ ಪರಿಣಾಮವಾಗಿ ಅದರ ಪರಿಣಾಮ ತಗ್ಗಿದೆ.

5. ಜಗತ್ತು ಕಾಡಿದ 'ಸಿಡುಬು'
1980ರಲ್ಲಿವಿಶ್ವ ಆರೋಗ್ಯ ಸಂಸ್ಥೆಯು ಇಡೀ ಜಗತ್ತನ್ನು ಸ್ಮಾಲ್‌ಪಾಕ್ಸ್‌(ಸಿಡುಬು) ಮುಕ್ತ ಮಾಡುವುದಾಗಿ ಘೋಷಿಸಿತು. ಆದರೆ, ಇದಕ್ಕೂ ಮೊದಲು ಸಾವಿರಾರು ವರ್ಷಗಳಿಂದ ಮಾನವ ಕುಲ ಈ ಸ್ಮಾಲ್‌ಪಾಕ್ಸ್‌ ರೋಗಾಣುವಿನ ಅಟ್ಟಹಾಸಕ್ಕೆ ನರಳಿದೆ. ಸೋಂಕುಪೀಡಿತ ಪ್ರತಿ ಮೂವರ ಪೈಕಿ ಒಬ್ಬರ ಸಾವು ಆಗ ಖಚಿತವಾಗಿತ್ತು. ಇದರಿಂದ ಬದುಕುಳಿದವರು ಶಾಶ್ವತ ಗಾಯದ ಗುರುತುಗಳು ಮತ್ತು ಅಂಧ ಸಮಸ್ಯೆಯಿಂದ ಬಳಲಬೇಕಾಗುವ ಅನಿವಾರ್ಯತೆ ಸೃಷ್ಟಿಯಾಗುತ್ತಿತ್ತು. 20ನೇ ಶತಮಾನದಲ್ಲಿಈ ಸ್ಮಾಲ್‌ಪಾಕ್ಸ್‌ನಿಂದಾಗಿ ಅಂದಾಜು 30 ಕೋಟಿ ಜನರು ಸಾವಿಗೀಡಾಗಿದ್ದಾರೆ!

6. ಅಮೆರಿಕದ ಹಂಟರ್‌ 'ಹ್ಯಾಂಟ್‌'
ಹ್ಯಾಂಟ್‌ವೈರಸ್‌ ಪಲ್ಮನರಿ ಸಿಂಡ್ರೋಮ್‌(ಎಚ್‌ಪಿಎಸ್‌) ಮೊದಲ ಬಾರಿಗೆ 1993ರಲ್ಲಿಅಮೆರಿಕದಲ್ಲಿಕಾಣಿಸಿಕೊಂಡಿತು. ಈ ವೈರಾಣು ವ್ಯಕ್ತಿಯಿಂದ ವ್ಯಕ್ತಿಗೆ ಹರಡುವುದಿಲ್ಲ. ಆದರೆ, ಸೋಂಕಿತ ಇಲಿಯ ಹಿಕ್ಕೆಯು ಮನುಷ್ಯ ಸಂಪರ್ಕಕ್ಕೆ ಬಂದರೆ ಸೋಂಕು ಗ್ಯಾರಂಟಿ ತಗಲುತ್ತದೆ. 1950ರಲ್ಲಿಈ ಹ್ಯಾಂಟ್‌ವೈರಸ್‌ ತೀವ್ರವಾಗಿ ಕಾಣಿಸಿಕೊಂಡಿತು. ಕೊರಿಯನ್‌ ವಾರ್‌ ವೇಳೆ 3,000ಕ್ಕೂ ಹೆಚ್ಚು ಸೈನಿಕರು ಈ ವೈರಾಣುವಿನಿಂದ ಬಳಲಿದ್ದರು ಮತ್ತು ಪೀಡಿತರ ಪೈಕಿ ಶೇ.12ರಷ್ಟು ಯೋಧರು ಸಾವಿಗೀಡಾಗಿದ್ದರು. ಪಾಶ್ಚಿಮಾತ್ಯ ರಾಷ್ಟ್ರಗಳಿಗೆ ಇದು ಆಗ ಹೊಸದಾದ ರೋಗಾಣು ಆದ್ದರಿಂದ ತಕ್ಷಣಕ್ಕೆ ಯಾವುದೇ ಚಿಕಿತ್ಸೆ ಇರಲಿಲ್ಲ. ನಂತರ ಪಾಶ್ಚಿಮಾತ್ಯ ರಾಷ್ಟ್ರಗಳು ಇದಕ್ಕೆ ಔಷಧವನ್ನು ಕಂಡುಹಿಡಿದವು.

7. ಇನ್‌ಫ್ಲುಯೆಂಜಾ
ವಿಶ್ವ ಆರೋಗ್ಯ ಸಂಸ್ಥೆ(ಡಬ್ಲ್ಯೂಎಚ್‌ಒ) ಪ್ರಕಾರ, ಜಗತ್ತಿನಾದ್ಯಂತ ವರ್ಷಕ್ಕೆ ಐದು ಲಕ್ಷ ಜನರು ಈ ವೈರಸ್‌ನಿಂದಾಗಿ ಸಾವಿಗೀಡಾಗುತ್ತಾರೆ. ಇದು ಕೂಡ ಅತ್ಯಂತ ಡೆಡ್ಲಿವೈರಾಣು ಆಗಿದ್ದು, ಇದನ್ನು ಕೆಲವೊಮ್ಮೆ ಸ್ಪಾನಿಸ್‌ ಫ್ಲುಎಂದೂ ಕರೆಯಲಾಗುತ್ತದೆ. 1918ರಲ್ಲಿಇದು ಮೊದಲ ಬಾರಿಗೆ ಪತ್ತೆಯಾಯಿತು ಮತ್ತು ಈವರೆಗೆ ಸುಮಾರು 5 ಕೋಟಿ ಜನರು ಈ ವೈರಾಣುವಿಗೆ ಬಲಿಯಾಗಿದ್ದಾರೆ. ಈಗ ಇಡೀ ಜಗತ್ತಿಗೆ ತಲೆನೋವು ತಂದಿರುವ ಕೋವಿಡ್‌-19(ಕೊರೊನಾ ವೈರಸ್‌) ಮರಣದ ಪ್ರಮಾಣದ ಈಇನ್‌ಫ್ಲುಯೆಂಜಾ ವೈರಸ್‌ಗಿಂತಲೂ ಹೆಚ್ಚಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಹೇಳಿದೆ.

8. 'ಡೆಂಗೆ' ಭೀತಿಯ ಡಂಗುರ
ಡೆಂಗೆ ವೈರಸ್‌ ಬಗ್ಗೆ ಹೇಳುವುದೇ ಬೇಡ! ಪ್ರತಿ ವರ್ಷ ಡೆಂಗೆ ವೈರಸ್‌ ಹಾವಳಿಯನ್ನು ಮಾಧ್ಯಮಗಳಲ್ಲಿಕಾಣುತ್ತವೆ. ಈ ವೈರಸ್‌ 1950ರಲ್ಲಿಫಿಲಿಪ್ಪಿನ್ಸ್‌ ಮತ್ತು ಥಾಯ್ಲೆಂಡ್‌ನಲ್ಲಿಮೊದಲ ಬಾರಿಗೆ ಪತ್ತೆಯಾಯಿತು. ಆ ಬಳಿಕ ಜಗತ್ತಿನ ಉಷ್ಣ ವಲಯ ಹಾಗೂ ಉಪಉಷ್ಣವಲಯಗಳ ರಾಷ್ಟ್ರಗಳಲ್ಲಿವ್ಯಾಪಕವಾಗಿ ಹರಡಿತು. ಸದ್ಯ, ಜಗತ್ತಿನ ಶೇ.40ರಷ್ಟು ಜನಸಂಖ್ಯೆ ಈ ಡೆಂಗೆ ಪ್ರಭಾವದ ಪ್ರದೇಶಗಳಲ್ಲಿದೆ. ಈ ವೈರಸ್‌ ಪ್ರಸರಣಕ್ಕೆ ಮುಖ್ಯ ಸೊಳ್ಳೆಗಳು ಕಾರಣ. ಈ ಸೊಳ್ಳೆಗಳಿಂದಾಗಿಯೇ ಇಡೀ ಜಗತ್ತಿನಾದ್ಯಂತ ವ್ಯಾಪಕ ರೀತಿಯಲ್ಲಿಡೆಂಗೆ ಹರಡುವಂತಾಗಿದೆ. ಪ್ರತಿ ವರ್ಷ ಜಗತ್ತಿನಾದ್ಯಂತ 5 ರಿಂದ 10 ಕೋಟಿ ಜನರು ಡೆಂಗೆ ಸೋಂಕುಪಿಡೀತರಾಗುತ್ತಾರೆ. ಇತರ ವೈರಸ್‌ಗಳಿಗೆ ಹೋಲಿಸಿದರೆ ಮರಣದ ಪ್ರಮಾಣ ಕಡಿಮೆ ಇದೆ. ಶೇ.2.5ರಷ್ಟು ಮಾತ್ರ ಮರಣ ಪ್ರಮಾಣವಿದೆ. ಹಾಗಂತ ವೈರಸ್‌ ನಿಯಂತ್ರಣಕ್ಕೆ ಮದ್ದು ಇದೆ ಎಂದು ಭಾವಿಸಬೇಕಿಲ್ಲ!

9. ಮಕ್ಕಳಿಗೆ ಕಂಟಕ 'ರೋಟ್‌'
ಮಕ್ಕಳಿಗೆ ಕಂಟಕಪ್ರಾಯವಾಗಿರುವ ಈ ರೋಟ್‌ ವೈರಸ್‌ ನಿಯಂತ್ರಣಕ್ಕೆ ಈಗ ಎರಡು ಲಸಿಕೆಗಳು ಲಭ್ಯ ಇವೆ. ಶಿಶುಗಳು ಹಾಗೂ ಮಕ್ಕಳಿಗೆ ಮಾರಣಾಂತಿಕವಾಗಿ ಕಾಯಿಲೆಯನ್ನು ಸೃಷ್ಟಿಸುತ್ತಿದ್ದ ಈ ವೈರಸ್‌ ಅತ್ಯಂತ ವೇಗವಾಗಿ ಹರಡಬಲ್ಲದು. ಸದ್ಯ ಅಭಿವೃದ್ಧಿ ಹೊಂದಿದ ರಾಷ್ಟ್ರಗಳಲ್ಲಿಈ ವೈರಸ್‌ ಕಾರಣಕ್ಕೆ ಸಾವಿಗೀಡಾಗುವ ಮಕ್ಕಳ ಸಂಖ್ಯೆ ತೀರಾ ಕಡಿಮೆ ಇದೆ. ಆದರೆ, ಅಭಿವೃದ್ಧಿ ಹೊಂದುತ್ತಿರುವ ರಾಷ್ಟ್ರಗಳಲ್ಲಿಇದು ಮಾರಣಾಂತಿಕವಾಗಿ ಪರಿಣಮಿಸಿದೆ. ರೀಹೈಡ್ರೇಷನ್‌ ಚಿಕಿತ್ಸೆ ಎಲ್ಲೆಡೆ ಇರದಿರುವುದೇ ಇದಕ್ಕೆ ಕಾರಣ. 2008ರಲ್ಲಿಐದು ವರ್ಷದೊಳಗಿನ 453,0000 ಮಕ್ಕಳು ಈ ವೈರಸ್‌ನಿಂದಾಗಿ ಮೃತಪಟ್ಟಿದ್ದಾರೆ! ಆದರೆ, ಆ ಬಳಿಕ ಲಸಿಕೆಗಳನ್ನು ಪೂರೈಸಿದ ಪರಿಣಾಮ ಮರದ ಪ್ರಮಾಣದಲ್ಲಿಭಾರೀ ಕುಸಿತವಾಗಿದೆ.

10. ಎಪ್ಪಾ... 'ನಿಫಾ!'
ಬಾವಲಿ ಕಚ್ಚಿದ ಹಣ್ಣುಗಳು ಮಾನವನ ಸಂಪರ್ಕಕ್ಕೆ ಬಂದಾಗ ಈ ನಿಫಾ ಸೋಂಕು ತಗಲುತ್ತದೆ. ಇದಕ್ಕೂ ಸದ್ಯಕ್ಕೆ ಯಾವುದೇ ಔಷಧಗಳಿಲ್ಲ. 2018ರ ಮಾಹಿತಿ ಪ್ರಕಾರ 700 ಜನರಿಗೆ ನಿಫಾ ಸೋಂಕು ತಗುಲಿತ್ತು ಮತ್ತು ವೈರಾಣುಪೀಡಿತರ ಪೈಕಿ ಶೇ.50ರಿಂದ 70ರಷ್ಟು ನಿಧನರಾಗಿದ್ದರು. ನಮ್ಮ ನೆರೆಯ ಕೇರಳದಲ್ಲಿನಿಫಾ ಭಾರಿ ಭೀತಿಯನ್ನು ಸೃಷ್ಟಿಸಿತ್ತಲ್ಲದೇ 17 ಜನರು ತಮ್ಮ ಪ್ರಾಣವನ್ನು ಕಳೆದುಕೊಂಡಿದ್ದರು.

(ಈ ಲೇಖನವು ವಿಜಯ ಕರ್ನಾಟಕದ 2020ರ ಮಾರ್ಚ್ 5ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ)

How To Apply Dark Mode Theme To Twitter?: ಟ್ವಿಟರ್‌ಗೆ ಡಾರ್ಕ್ ಮೋಡ್ ಥಿಮ್‌ಗೆ ಅನ್ವಯಿಸುವುದು ಹೇಗೆ?

- ಮಲ್ಲಿಕಾರ್ಜುನ ತಿಪ್ಪಾರ
ಇತ್ತೀಚಿನ ದಿನಗಳಲ್ಲಿ ಡಾರ್ಕ್‌ಮೋಡ್ ತುಂಬ ಜನಪ್ರಿಯವಾಗುತ್ತಿದೆ. ಬಹುತೇಕ ಎಲ್ಲಆ್ಯಪ್‌ಗಳು, ವೆಬ್‌ಸೈಟ್‌ಗಳು ಡಾರ್ಕ್‌ಮೋಡ್‌ಗೆ ಬದಲಾಗುತ್ತಿವೆ. ಸಾಮಾಜಿಕ ಜಾಲತಾಣಗಳ ಪೈಕಿ ಟ್ವಿಟರ್‌ ಡಾರ್ಕ್‌ಮೋಡ್ ಅಳವಡಿಕೆ ವಿಷಯದಲ್ಲಿ ತನ್ನೆಲ್ಲ ಸ್ಪರ್ಧಿಗಳಿಗಿಂತಲೂ ಮುಂದೆ ಇದೆ. ಫೇಸ್‌ಬುಕ್‌ ಹಾಗೂ ವಾಟ್ಸಪ್‌ಗಳು ಇನ್ನೂ ಬೀಟಾ ವರ್ಷನ್‌ನಲ್ಲಿ ಡಾರ್ಕ್‌ಮೋಡ್ ಪರೀಕ್ಷಿಸುತ್ತಿವೆ.

ಕಣ್ಣು, ಬ್ಯಾಟರಿ ಉಳಿತಾಯಕ್ಕೆ ಅನುಕೂಲ

ಮೈಕ್ರೊ ಬ್ಲಾಗಿಂಗ್‌ನಲ್ಲಿ ತನ್ನದೇ ಆದ ವೈಶಿಷ್ಟತೆಯನ್ನು ಹೊಂದಿರುವ ಈ ಟ್ವಿಟರ್‌, ಡಾರ್ಕ್‌ಮೋಡ್ ಮೂಲಕ ಬಳಕೆದಾರರ ಅನುಭವವನ್ನು ಹೆಚ್ಚಿಸಿದೆ. ಆಂಡ್ರಾಯ್ಡ್‌ ಮತ್ತು ಐಒಎಸ್‌ ಆಧರಿತ ಫೋನ್‌ಗಳಲ್ಲೂ ಡಾರ್ಕ್‌ಮೋಡ್ ಲಭ್ಯವಿದೆ. ಮೊಬೈಲ್‌ ಅಥವಾ ಡೆಸ್ಕ್‌ಟಾಪ್‌ನಲ್ಲಿ ಡಾರ್ಕ್‌ಮೋಡ್ ಬಳಸುವುದರಿಂದ ಸಾಕಷ್ಟ ಲಾಭಗಳಿವೆ. ಬ್ರೈಟ್‌ನೆಸ್‌ ಡಿಸ್‌ಪ್ಲೇ ಅತಿಯಾದ ಬಳಕೆಯಿಂದ ನಮ್ಮ ಕಣ್ಣಿನ ಆರೋಗ್ಯದ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತದೆ ಎಂಬುದು ಈಗಾಗಲೇ ದೃಢವಾಗಿದೆ. ಡಾರ್ಕ್‌ಮೋಡ್ ಅಳವಡಿಸಿಕೊಂಡಿದ್ದರೆ ಸ್ಕ್ರೀನ್‌ನಿಂದ ಹೊರಡುವ ಕಿರಣಗಳು ನಿಮ್ಮ ಕಣ್ಣಿಗೆ ತೊಂದರೆಯುಂಟು ಮಾಡಲಾರವು. ಇನ್ನು ಬ್ಯಾಟರಿ ಚಾರ್ಜಿಂಗ್‌ ದೃಷ್ಟಿಯಿಂದಲೂ ಡಾರ್ಕ್‌ಮೋಡ್ ಅಗತ್ಯ. ಶೇ. 50ರಷ್ಟು ಬ್ಯಾಟರಿ ಉಳಿತಾಯವಾಗಬಲ್ಲದು. ಜೊತೆಗೆ ಡಾರ್ಕ್‌ಮೋಡ್‌ನಿಂದ ಒಂದು ವಿಶಿಷ್ಟ ಸೌಂದರ್ಯ ನಿಮ್ಮ ಸ್ಮಾರ್ಟ್‌ಫೋನ್‌ಗೆ ಲಭ್ಯವಾಗುತ್ತದೆ. ಬಹಳಷ್ಟು ಜನರಿಗೆ ಟ್ವಿಟರ್‌ ಅನ್ನು ಡಾರ್ಕ್‌ಮೋಡ್‌ಗೆ ಹೇಗೆ ಬದಲಿಸಬೇಕು ಎಂಬುದು ಗೊತ್ತಿರುವುದಿಲ್ಲ. ಆ ಹಿನ್ನೆಯಲ್ಲಿ ಆ್ಯಂಡ್ರಾಯ್ಡ್‌ ಆಧರಿತ ಫೋನ್‌ಗಳಲ್ಲಿ ಟ್ವಿಟರ್‌ ಅನ್ನು ಡಾರ್ಕ್‌ಮೋಡ್‌ಗೆ ಬದಲಿಸುವ ಬಗ್ಗೆ ಇಲ್ಲಿದೆ ಮಾಹಿತಿ.

ಸಕ್ರಿಯಗೊಳಿಸುವುದು ಹೇಗೆ?

ಮೊದಲಿಗೆ ನಿಮ್ಮ ಸ್ಮಾರ್ಟ್‌ಫೋನ್‌ನಲ್ಲಿರುವ ಟ್ವಿಟರ್‌ ಆ್ಯಪ್‌ ಓಪನ್‌ ಮಾಡಿ. ಇದಾದ ಮೇಲೆ, ಮೊಬೈಲ್‌ ಸ್ಕ್ರೀನ್‌ನ ಎಡ ಭಾಗದ ಮೇಲ್ತುದಿಯಲ್ಲಿಕಾಣುವ ನಿಮ್ಮ ಪ್ರೊಫೈಲ್‌ ಐಕಾನ್‌ ಮೇಲೆ ಟ್ಯಾಪ್‌ ಮಾಡಿ. ಆಗ, ಆ್ಯಪ್‌ನ ಕೆಳಭಾಗದ ಎಡ ಮತ್ತು ಬಲ ಭಾಗದ ತುದಿಯಲ್ಲಿಎರಡು ಐಕಾನ್‌ಗಳನ್ನು ಕಾಣಬಹುದು. ಎಡ ಭಾಗದ ಐಕಾನ್‌ 'ಬಲ್ಬ್' ರೀತಿಯಲ್ಲಿದೆ. ಬಲಭಾಗದಲ್ಲಿ ನಾಲ್ಕು ಸ್ಕ್ವೇರ್‌ ಮಾರ್ಕಿನ ಐಕಾನ್‌ ಕಾಣಬಹುದು. ಎಡ ಭಾಗದ ಐಕಾನ್‌ ಮೇಲೆ ಟ್ಯಾಪ್‌ ಮಾಡಿ. ಆಗ ತಕ್ಷಣವೇ ಡಾರ್ಕ್‌ಮೋಡ್‌ಗೆ ಬದಲಾಗುತ್ತದೆ ನಿಮ್ಮ ಟ್ವಿಟರ್‌ ಆ್ಯಪ್‌. ಅದೇ ರೀತಿ, ಮೊದಲಿನ ರೀತಿಯಾಗಿ ಬ್ರೈಟ್‌ನೆಸ್‌ ಡಿಸ್‌ಪ್ಲೇ ಬೇಕಿದ್ದರೆ ಅದೇ ಐಕಾನ್‌ ಮೇಲೆ ಮತ್ತೆ ಟ್ಯಾಪ್‌ ಮಾಡಿ ಆಗ ಮೊದಲಿನಂತಾಗುತ್ತದೆ.ಟ

ಸೆಟ್ಟಿಂಗ್ಸ್‌ ಬದಲಾವಣೆ ಹೇಗೆ?

ಟ್ವಿಟರ್‌ ಆ್ಯಪ್‌ನ ಮೇಲ್ಭಾಗದ ಎಡ ತುದಿಯಲ್ಲಿರುವ ನಿಮ್ಮ ಪ್ರೊಫೈಲ್‌ ಐಕಾನ್‌ ಮೇಲೆ ಟ್ಯಾಪ್‌ ಮಾಡಿ. ಆಗ ಅಲ್ಲಿಅನೇಕ ಆಪ್ಷನ್‌ಗಳ ಕಾಣಬಹುದು. ಇವುಗಳ ಪೈಕಿ ಕೊನೆಯಲ್ಲಿರುವ 'ಸೆಟ್ಟಿಂಗ್‌ ಮತ್ತು ಪ್ರೈವೆಸಿ' ಆಪ್ಷನ್‌ ಮೇಲೆ ಟ್ಯಾಪ್‌ ಮಾಡಿ. ಆ ಬಳಿಕ ಜನರಲ್‌ ವಿಭಾಗದಲ್ಲಿರುವ 'ಡಿಸ್‌ಪ್ಲೇ ಆ್ಯಂಡ್‌ ಸೌಂಡ್‌ ಆಪ್ಷನ್‌' ಮೇಲೆ ಟ್ಯಾಪ್‌ ಮಾಡಿದಾಗ, ಮೀಡಿಯಾ, ಡಿಸ್‌ಪ್ಲೇ ಮತ್ತು ಸೌಂಡ್‌ ಸೇರಿದಂತೆ ಇತರೆ ವಿಭಾಗಗಳನ್ನು ಕಾಣಬಹುದು. 'ಡಿಸ್‌ಪ್ಲೇ' ವಿಭಾಗದಲ್ಲಿ'ಡಾರ್ಕ್‌ಮೋಡ್‌' ಇರುವುದನ್ನು ಗಮನಿಸಿ. ಇದರ ಮೇಲೆ ಕ್ಲಿಕ್‌ ಮಾಡಿದಾಗ ಬರುವ ಪಾಪ್‌ ಅಪ್‌ನಲ್ಲಿಆಫ್‌, ಆನ್‌ ಮತ್ತು 'ಆಟೊಮೆಟಿಕ್‌ ಅಟ್‌ ಸನ್‌ಸೆಟ್‌' ಎಂಬ ಆಯ್ಕೆಗಳು ಕಾಣಸಿಗುತ್ತವೆ. ನಿಮ್ಮ ಅಗತ್ಯಕ್ಕೆ ತಕ್ಕಂತೆ ಆಪ್ಷನ್‌ ಆಯ್ಕೆ ಮಾಡಿಕೊಳ್ಳಬಹುದು. ಡಾರ್ಕ್‌ಮೋಡ್‌ ಆಯ್ಕೆಯು ನಿಮಗೆ ಡಾರ್ಕ್‌ಮೋಡ್‌ ಅನ್ನು ಸ್ವಯಂ ಆಗಿ ಸೂರ್ಯೋದಯ ಬಳಿಕ ಸಕ್ರಿಯಗೊಳಿಸುವ ಆಯ್ಕೆಯನ್ನು ನೀಡುತ್ತದೆ. ನಿಮಗೆ ರಾತ್ರಿಯ ವೇಳೆ ಮಾತ್ರವೇ ಟ್ವಿಟರ್‌ ಡಾರ್ಕ್‌ಮೋಡ್‌ನಲ್ಲಿದ್ದರೆ ಚೆನ್ನ ಎನಿಸಿದರೆ ಈ ಆಟೊಮೆಟಿಕ್‌ ಆಪ್ಷನ್‌ ಅನ್ನು ಆಯ್ಕೆ ಮಾಡಿಕೊಳ್ಳುವುದು ಉತ್ತಮ.

ಡಿಮ್‌ ಮತ್ತು ಲೈಟ್ಸ್‌ ಔಟ್

ಡಿಸ್‌ಪ್ಲೇ ವಿಭಾಗದಲ್ಲಿನೀವು 'ಡಾರ್ಕ್‌ಮೋಡ್‌ ಅಪೀಯರನ್ಸ್‌' ಎಂಬ ಆಪ್ಷನ್‌ ಅನ್ನು ಗಮನಿಸಬಹುದು. ಡಾರ್ಕ್‌ಮೋಡ್‌ ಆಯ್ಕೆ ಕೆಳಭಾಗದಲ್ಲೇ ಇದೆ. ಒಂದು ವೇಳೆ ನೀವು 'ಡಾರ್ಕ್‌ಮೋಡ್‌ ಅಪೀಯರನ್ಸ್‌' ಮೇಲೆ ಟ್ಯಾಪ್‌ ಮಾಡಿದರೆ, 'ಡಿಮ್‌' ಮತ್ತು 'ಲೈಟ್ಸ್‌ ಔಟ್‌' ಆಪ್ಷನ್‌ಗಳಿರುವುದನ್ನು ಕಾಣುತ್ತೀರಿ. ಡಿಮ್‌ ಡಿಫಾಲ್ಟ್‌ ಆಪ್ಷನ್‌ ಆಗಿದ್ದು, ಟ್ವಿಟರ್‌ ಡಾರ್ಕ್ ನ್ಯಾವಿ ಬಣ್ಣವನ್ನು ಹಿನ್ನೆಲೆಯಾಗಿ ಒದಗಿಸುತ್ತದೆ. ಒಂದು ವೇಳೆ, ನೀವು ಲೈಟ್ಸ್‌ ಔಟ್‌ ಆಪ್ಷನ್‌ ಆಯ್ಕೆ ಮಾಡಿಕೊಂಡರೆ, ಟ್ವಿಟರ್‌ ಪೇಜ್‌ನ ಹಿನ್ನೆಲೆ ಸಂಪೂರ್ಣವಾಗಿ ಕಪ್ಪಾಗಿ ಬದಲಾಗುತ್ತದೆ. ವಿಶೇಷವಾಗಿ ಅಮೋಲಿಡ್ ಡಿಸ್‌ಪ್ಲೇಗಳಲ್ಲಿಈ ಆಪ್ಷನ್‌ ಹೆಚ್ಚು ಪರಿಣಾಮಕಾರಿಯಾಗಿರುತ್ತದೆ.

(ಈ ಲೇಖನವು ವಿಜಯ ಕರ್ನಾಟಕದ 2020 ಮಾರ್ಚ್ 3ರ ವಿಜಯ ಕರ್ನಾಟಕ ಸಂಚಿಕೆಯಲ್ಲಿ ಪ್ರಕಟವಾಗಿದೆ)

Joaquin Phoenix: ಅದ್ಭುತ ನಟ, ಹೃದಯವಂತ ವಾಕಿನ್‌

- ಮಲ್ಲಿಕಾರ್ಜುನ ತಿಪ್ಪಾರ
''ಹಸುವಿಗೆ ಕೃತಕ ಗರ್ಭಧಾರಣೆ ಮಾಡಲು ಮತ್ತು ಅದರ ಕರುವಿಗೆ ಸ್ವಾಭಾವಿಕವಾಗಿ ದಕ್ಕಬೇಕಿದ್ದನ್ನು ಕಸಿದುಕೊಳ್ಳುವ ಹಕ್ಕು ನಮಗಿದೆ ಎಂದು ನಾವು ಭಾವಿಸಿಕೊಳ್ಳುತ್ತಿದ್ದೇವೆ. ಹಸುವಿನ ಬೇಗುದಿಯ ಕೂಗಿಗೆ ಯಾವುದೂ ಸಮಾಧಾನ ತರಲಾರದು. ಅದರ ಕರುವಿಗೆ ಮಾತ್ರವೇ ಸಿಗಬೇಕಾದ ಹಾಲನ್ನು ನಾವು ನಮ್ಮ ಕಾಫಿ ಮತ್ತು ಊಟಕ್ಕೆ ಬಳಸಿಕೊಳ್ಳುತ್ತಿದ್ದೇವೆ...''

ಜೋಕರ್‌' ಎಂಬ ವಿಶಿಷ್ಟ ಸಿನಿಮಾದ ಅತ್ಯುತ್ತಮ ಅಭಿನಯಕ್ಕಾಗಿ 'ಆಸ್ಕರ್‌' ಪ್ರಶಸ್ತಿಯನ್ನು ತನ್ನ ಮುಡಿಗೇರಿಸಿಕೊಂಡ ನಟ ವಾಕಿನ್‌ ಫಿನಿಕ್ಸ್‌ ಅವರ ಅಂತರಾಳದ ಮಾತುಗಳು ಇವು. ಆಸ್ಕರ್‌ ಪ್ರಶಸ್ತಿ ಸ್ವೀಕರಿಸುವ ಸಮಯದಲ್ಲಿಆಡಿದ ಈ ಮಾತುಗಳಿಗೆ ಇಡೀ ಜಗತ್ತೇ ತಲೆದೂಗುತ್ತಿದೆ. ವಾಕಿನ್‌ ಅವರ ಸ್ಫೂರ್ತಿದಾಯಕ ಮಾತುಗಳಿಗೆ ಮಾರುಹೋಗಿ ಸುಮಾರಷ್ಟು ಜನರು ವೆಗಾನ್‌(ಸಂಪೂರ್ಣ ಸಸ್ಯಾಹಾರಿ)ಗಳಾಗುತ್ತಿದ್ದಾರೆ. ಒಬ್ಬ ಸೆಲಿಬ್ರಿಟಿ ನಟನೊಬ್ಬನ ಪ್ರಾಮಾಣಿಕ ಕಾಳಜಿಗೆ ಸಲ್ಲುತ್ತಿರುವ ಗೌರವ ಇದು.

ಬಹಳಷ್ಟು ನಟ- ನಟಿಯರು ಸಮಕಾಲೀನ ಆಗುಹೋಗುಗಳಿಗೆ ಸ್ಪಂದಿಸುವುದು ಅತಿ ವಿರಳ. ಆದರೆ, ವಾಕಿನ್‌ ಫಿನಿಕ್ಸ್‌ನಂಥ ನಟರು ತಮಗೆ ಸರಿ ಅನ್ನಿಸಿದ್ದನ್ನು ನಿರ್ಭೀತಿಯಿಂದ ಮಾಡುತ್ತಾರೆ. ಹಾಗಾಗಿಯೇ ಆಸ್ಕರ್‌ನಂಥ ಬಹುದೊಡ್ಡ ವೇದಿಕೆಯಲ್ಲಿಗೋ ರಕ್ಷಣೆಯ ಆ್ಯಕ್ಟಿವಿಸಮ್‌ ಬಗ್ಗೆ ಮಾತನಾಡುತ್ತಾರೆ. ಪಾಶ್ಚಿಮಾತ್ಯ ಸಂಸ್ಕೃತಿಯಲ್ಲಿದನದ ಮಾಂಸ ಆಹಾರ ಸಂಸ್ಕೃತಿಯ ಭಾಗವಾಗಿದೆ. ಹಾಗಾಗಿ, ಆಸ್ಕರ್‌ ವೇದಿಕೆಯಲ್ಲಿಗೋರಕ್ಷಣೆಯ ಬಗ್ಗೆ ಮಾತನಾಡಿರುವ ಫಿನಿಕ್ಸ್‌ ಅವರ ಮಾತುಗಳಿಗೆ ಹೆಚ್ಚು ಮಹತ್ವವಿದೆ. ಫಿನಿಕ್ಸ್‌ ಅವರ ಗೋ ಕಾಳಜಿಗೆ ಉದಾಹರಣೆ ಎಂಬಂತೆ, ಆಸ್ಕರ್‌ ಸ್ವೀಕರಿಸಿದ ಎರಡು ದಿನಗಳ ಬಳಿಕ ಅವರು ಹಸು ಮತ್ತು ಅದರ ಕರುವನ್ನು ರಕ್ಷಿಸಿ ಸುದ್ದಿಯಾದರು!

ಚಿಕ್ಕ ವಯಸ್ಸಿನಿಂದಲೇ ವೆಗಾನ್‌ ಆಗಿರುವ ವಾಕಿನ್‌ ಫಿನಿಕ್ಸ್‌ ಹಾಲಿವುಡ್‌ನಲ್ಲಿಬಹುದೊಡ್ಡ ಹೆಸರು. ಒಂದೆರಡು ಬಾರಿ ಆಸ್ಕರ್‌ ಪ್ರಶಸ್ತಿ ಕಣದಲ್ಲಿದ್ದರೂ ಸಂದಿರಲಿಲ್ಲ. ಆದರೆ, ಜೋಕರ್‌ ಸಿನಿಮಾ ಅವರ ಆ ಕೊರತೆಯನ್ನು ನೀಗಿಸಿದೆ. ಅವರು ಎಷ್ಟು ದೊಡ್ಡ ನಟರೋ, ಎಷ್ಟು ಸಹಜ ಅಭಿನಯ ನೀಡುತ್ತಾರೋ ಅಷ್ಟೇ ಅಂತಃಕರಣಿ; ನಿಸರ್ಗ ಪ್ರೇಮಿ. ಸಾಮಾಜಿಕ ಕಾರ್ಯಕರ್ತ. ಆಫ್ರಿಕಾದ ಮಕ್ಕಳ ಶಿಕ್ಷಣಕ್ಕೆ ನೆರವು ನೀಡುವ ಉದಾರಿ. ನಿಗರ್ವಿ ಮತ್ತು ಸೀದಾ ಸಾದಾ ವ್ಯಕ್ತಿ.

ವಾಕಿನ್‌ ಫಿನಿಕ್ಸ್‌ ಅವರ ಪೂರ್ತಿ ಹೆಸರು ವಾಕಿನ್‌ ರಫೇಲ್‌ ಫಿನಿಕ್ಸ್‌. 1974ರ ಅಕ್ಟೋಬರ್‌ 28ರಂದು ಪೋರ್ಟರಿಕೊ ಎಂಬ ಕೆರೆಬಿಯನ್‌ ದ್ವೀಪದ ಸ್ಯಾನ್‌ ಜುವಾನ್‌ನ ರಿಯೊ ಪಿಡ್ರಾಸ್‌ನಲ್ಲಿಜನಿಸಿದರು. ಪೋರ್ಟರಿಕೊ ದ್ವೀಪ ಅಮೆರಿಕ ನಿಯಂತ್ರಿತ ಪ್ರದೇಶ. ತಾಯಿ ಅರ್ಲಿನ್‌ ಫಿನಿಕ್ಸ್‌. ತಂದೆ ಜಾನ್‌ ಲೀ ಬಾಟಮ್‌. ಈ ದಂಪತಿಯ ಐದು ಮಕ್ಕಳ ಪೈಕಿ ವಾಕಿನ್‌ ಮೂರನೆಯವರು. ರೇನ್‌, ಸಮ್ಮರ್‌ ಮತ್ತು ಲಿಬರ್ಟಿ ಸಹೋದರಿಯರು ಮತ್ತು ರಿವರ್‌ ಸಹೋದರ. ವಿಶೇಷ ಎಂದರೆ ಇಷ್ಟೂ ಜನರು ಸಿನಿಮಾ ರಂಗದಲ್ಲಿದ್ದಾರೆ. ನಟ, ನಟಿಯರು. 'ಚಿಲ್ಡ್ರನ್‌ ಆಫ್‌ ಗಾಡ್‌' ಎಂಬ ಪಂಥವನ್ನು ಅನುಸರಿಸುತ್ತಿದ್ದ ಇವರ ತಂದೆ ತಾಯಿ ದಕ್ಷಿಣ ಅಮೆರಿಕ ತುಂಬ ಪ್ರವಾಸ ಮಾಡಿ, ಪ್ರಚಾರ ಮಾಡಲು ಪ್ರಯತ್ನಿಸಿದರು. ಆದರೆ, ಮುಂದೆ ಭಿನ್ನಾಭಿಪ್ರಾಯದಿಂದಾಗಿ ಈ ಪಂಥವನ್ನು ತೊರೆದು 1977ರಲ್ಲಿಅಮೆರಿಕಕ್ಕೆ ಮರಳಿದಾಗ ಫಿನಿಕ್ಸ್‌ಗೆ ಮೂರು ವರ್ಷ. ಫಿನಿಕ್ಸ್‌ ಸಹೋದರ ಮತ್ತು ಸಹೋದರಿಯರ ಹೆಸರು ಗಮನಿಸಿದರೆ ನಿಮಗೆ ನಿಸರ್ಗದ ಛಾಯೆ ಎದ್ದು ಕಾಣುತ್ತದೆ. ಬಹುಶಃ ಇದೇ ಮುಂದೆ ಫಿನಿಕ್ಸ್‌ ಕೂಡ ನಿಸರ್ಗಪ್ರೇಮಿಯಾಗಲು ಪ್ರೇರಣೆಯಾಯಿತೇನೊ?

ಬಾಲ್ಯ ಕಲಾವಿದನಾಗಿ ಫಿನಿಕ್ಸ್‌ ಸಹೋದರ ರಿವರ್‌ ಮತ್ತು ಸಿಸ್ಟರ್‌ ಸಮ್ಮರ್‌ ಜೊತೆಗೂಡಿ ನಟನೆಗಿಳಿದರು. ಸ್ಪೇಸ್‌ಕ್ಯಾಂಪ್‌(1986)ನಲ್ಲಿವಾಕಿನ್‌ಗೆ ಪ್ರಮುಖ ಪಾತ್ರ ದೊರೆಯಿತು. 1995ರ ತನಕ ಫಿನಿಕ್ಸ್‌ ಅವರ ಬೆಳ್ಳಿತೆರೆ ಹೆಸರು ಲೀಫ್‌ ಫಿನಿಕ್ಸ್‌ ಎಂದಿತ್ತು. 'ಟು ಡೈ ಫಾರ್‌'(1995) ಸಿನಿಮಾದಲ್ಲಿಅವರ ಮೂಲ ಹೆಸರು ಕಾಣಿಸಿಕೊಂಡಿತು. ವಿಶೇಷ ಎಂದರೆ, 'ಟು ಡೈ ಫಾರ್‌' ಚಿತ್ರವು ಫಿನಿಕ್ಸ್‌ ಅವರ ಸಿನಿಮಾ ಬದುಕಿಗೆ ಗಟ್ಟಿ ಅಡಿಪಾಯ ಹಾಕಿತು. ಈ ಕಾಮಿಡಿ-ಡ್ರಾಮಾ ಫಿಲ್ಮ್‌ನಲ್ಲಿಫಿನಿಕ್ಸ್‌ ನಿರ್ವಹಿಸಿದ ಪಾತ್ರಕ್ಕೆ ಅಪಾರ ಮೆಚ್ಚುಗೆ ದೊರೆಯಿತು. ಬಳಿಕ ಅವರು ಪಿರಿಯಾಡಿಕಲ್‌ ಚಿತ್ರ 'ಕ್ವಿಲ್ಸ್‌'(2000)ನಲ್ಲಿಕಾಣಿಸಿಕೊಂಡರು. ಇದೇ ಅವಧಿಯಲ್ಲಿತೆರೆ ಕಂಡ ಐತಿಹಾಸಿಕ ಕಥಾವಸ್ತು ಹೊಂದಿದ್ದ 'ಗ್ಲಾಡಿಯೇಟರ್‌' ಕೂಡ ಫಿನಿಕ್ಸ್‌ಗೆ ಹೆಚ್ಚು ಪ್ರಸಿದ್ಧಿ ತಂದುಕೊಟ್ಟಿತು. ಈ ಚಿತ್ರದ 'ಕೊಮೆಡೊಸ್‌' ಪಾತ್ರ ಎಷ್ಟು ಪ್ರಭಾವ ಬೀರಿತು ಎಂದರೆ, ಅತ್ಯುತ್ತಮ ಪೋಷಕ ಪಾತ್ರಕ್ಕಾಗಿ ಆಸ್ಕರ್‌ಗೆ ನಾಮಿನೇಟ್‌ ಆದರು. 2005ರಲ್ಲಿತೆರೆಕಂಡ 'ವಾಕ್‌ ದಿ ಲೈನ್‌' ಸಿನಿಮಾದಲ್ಲಿನಿರ್ವಹಿಸಿದ ಮ್ಯೂಸಿಯನ್‌ ಜಾನಿ ಕ್ಯಾಶ್‌ ಪಾತ್ರಕ್ಕೆ ವ್ಯಾಪಕ ಪ್ರಶಂಸೆ ವ್ಯಕ್ತವಾಯಿತಲ್ಲದೇ ಆಸ್ಕರ್‌ನ ಅತ್ಯುತ್ತಮ ನಟ ಪ್ರಶಸ್ತಿಗೆ ನಾಮಿನೇಟ್‌ ಆದರು. ಕುಡುಕ ಯೋಧನ ಪಾತ್ರ ನಿರ್ವಹಣೆಯ 'ದಿ ಮಾಸ್ಟರ್‌'(2012), 'ದಿ ವಿಲೇಜ್‌'(2004), ಐತಿಹಾಸಿಕ ಕಥಾವಸ್ತು ಹೊಂದಿದ 'ಹೊಟೇಲ್‌ ರವಂಡಾ'(2004), ರೋಮಾಂಟಿಕ್‌ ಡ್ರಾಮಾ 'ಹರ್‌'(2013), ಅಪರಾಧ ವಿಡಂಬನಾತ್ಮಕ ಕಥಾವಸ್ತುವಿರುವ 'ಇನ್‌ಹೆರೆಂಟ್‌ ವೈಸ್‌'(2014), ಸೈಕಾಲಜಿಕಲ್‌ ಥ್ರಿಲ್ಲರ್‌ 'ಯು ವೇರ್‌ ನೆವರ್‌ ರಿಯಲೀ ಹಿಯರ್‌'(2017) ಚಿತ್ರಗಳು ವಾಕಿನ್‌ ಫಿನಿಕ್ಸ್‌ಗೆ ಹಾಲಿವುಡ್‌ನಲ್ಲಿಗಟ್ಟಿ ಸ್ಥಾನ ಒದಗಿಸಿದವು. 2019ರಲ್ಲಿತೆರೆ ಕಂಡ 'ಜೋಕರ್‌' ಸಿನಿಮಾದ ಪಾತ್ರ ಫಿನಿಕ್ಸ್‌ಗೆ ಆಸ್ಕರ್‌ ತಂದುಕೊಟ್ಟಿತು. ಆ ಚಿತ್ರದಲ್ಲಿಫಿನಿಕ್ಸ್‌ ಅಭಿನಯಕ್ಕೆ ಮನಸೋಲದವರೇ ಇಲ್ಲ.

ವಾಕಿನ್‌ ಫಿನಿಕ್ಸ್‌ ಕೇವಲ ನಟನೆಯಲ್ಲಿತಮ್ಮನ್ನು ತೊಡಗಿಸಿಕೊಂಡಿಲ್ಲ. ಮ್ಯೂಸಿಕ್‌ ವಿಡಿಯೊಗಳಿಗೆ ನಿರ್ದೇಶನ ಮಾಡಿದ್ದಾರೆ, ಅನೇಕ ಸಿನಿಮಾ ಮತ್ತು ಟಿವಿ ಶೋ ನಿರ್ಮಾಣ ಮಾಡಿದ್ದಾರೆ. 'ವಾಕ್‌ ದಿ ಲೈನ್‌' ಚಿತ್ರದ ಸಂಗೀತ ರೆಕಾರ್ಡಿಂಗ್‌ಗಾಗಿ ಅವರಿಗೆ ಗ್ರ್ಯಾಮಿ ಅವಾರ್ಡ್‌ ಕೂಡ ಬಂದಿದೆ. ಅವರಿಗೆ ಎರಡು ಗೋಲ್ಡನ್‌ ಗ್ಲೋಬ್‌ ಪ್ರಶಸ್ತಿಗಳೂ ಬಂದಿವೆ.

ಫಿನಿಕ್ಸ್‌ ಮಾನವೀಯ ಸಂಘಟನೆಗಳಲ್ಲಿತೊಡಗಿಸಿಕೊಂಡಿದ್ದಾರೆ. ಅನೇಕ ಸೇವಾ ಕೆಲಸಗಳನ್ನು ಮಾಡಿಕೊಂಡು ಬಂದಿದ್ದಾರೆ. ಅಮ್ನೆಸ್ಟಿ ಇಂಟರ್‌ನ್ಯಾಷನಲ್‌, ದಿ ಆರ್ಟ್‌ ಆಫ್‌ ಎಲಿಸಿಯಮ್‌, ಹಾರ್ಟ್‌, ಪೀಸ್‌ ಅಲಾಯನ್ಸ್‌ ಸೇರಿದಂತೆ ಅನೇಕ ಸಂಘಟನೆಗಳಿಗೆ ನೆರವು ನೀಡಿದ್ದಾರೆ; ಅವುಗಳ ಕೆಲಸಕಾರ್ಯಗಳಲ್ಲಿತೊಡಗಿಸಿಕೊಂಡಿದ್ದಾರೆ. 'ದಿ ಲಂಚ್‌ಬಾಕ್ಸ್‌ ಫಂಡ್‌' ಎಂಬ ಸರಕಾರೇತರ ಸಂಸ್ಥೆಯ ನಿರ್ದೇಶಕರಾಗಿದ್ದಾರೆ. ಈ ಸಂಸ್ಥೆಯು ದಕ್ಷಿಣ ಆಫ್ರಿಕಾದ ಸೊವೆಟೊ ನಗರದ ಶಾಲಾ ಮಕ್ಕಳಿಗೆ ನಿತ್ಯ ಊಟ ಪೂರೈಸುತ್ತದೆ. ವಿಶೇಷ ಎಂದರೆ, ಫಿನಿಕ್ಸ್‌ ಅವರ ಮಾಜಿ ಪ್ರೇಯಸಿ ದಕ್ಷಿಣಾ ಆಫ್ರಿಕಾದ ಮಾಡೆಲ್‌ ತೋಪಾಜ್‌ ಪೇಜ್‌-ಗ್ರೀನ್‌ ಅವರು ಈ ಸಂಸ್ಥೆಯನ್ನು ಸ್ಥಾಪಿಸಿದ್ದಾರೆ. ಇಷ್ಟಲ್ಲದೆ, ವೆಗನಿಸಮ್‌ ಪ್ರಚುರ ಪಡಿಸುವುದಕ್ಕಾಗಿ ಫಿನಿಕ್ಸ್‌ ಅನೇಕ ಪ್ರಾಣಿದಯಾ ಸಂಘಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ಡಿಫೆನ್ಸ್‌ ಆಫ್‌ ಆ್ಯನಿಮಲ್ಸ್‌, ಪೆಟಾ ಸದಸ್ಯರಾಗಿದ್ದಾರೆ. ಪ್ರಾಣಿ ಚರ್ಮದಿಂದ ಮಾಡಿದ ಬಟ್ಟೆಗಳನ್ನು ಸಿನಿಮಾದಲ್ಲೂ ತೊಡುವುದಿಲ್ಲ!

(ಈ ಲೇಖನವು ವಿಜಯ ಕರ್ನಾಟಕದ 2020 ಫೆಬ್ರವರಿ 23ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.)

Google Maps @ 15 years: 15ರ ಹರೆಯದ ಗೂಗಲ್ ಮ್ಯಾಪ್ಸ್

- ಮಲ್ಲಿಕಾರ್ಜುನ ತಿಪ್ಪಾರ
ಇಂಟರ್ನೆಟ್‌ ದೈತ್ಯ ಗೂಗಲ್‌ ಅನೇಕ ಉತ್ಪನ್ನಗಳನ್ನು ಹೊಂದಿವೆ. ಗೂಗಲ್‌ ಸರ್ಚ್, ಜಿ ಮೇಲ್‌, ಯೂಟ್ಯೂಬ್‌, ಜಿ ಸೂಟ್‌, ಗೂಗಲ್‌ ಡ್ರೈವ್‌, ಗೂಗಲ್‌ ಪ್ಲೇ ಸ್ಟೋರ್‌ ಸೇರಿದಂತೆ ಅನೇಕ ಸೇವೆಗಳನ್ನು ಬಳಕೆದಾರರನ್ನು ಸಂತೃಪ್ತಗೊಳಿಸುತ್ತಿವೆ. ಇವೆಲ್ಲವುಗಳ ಪೈಕಿ ಗೂಗಲ್‌ ಮ್ಯಾಪ್ಸ್ ಕೂಡ ಅತ್ಯುತ್ತಮ ಸೇವೆಯನ್ನು ಒದಗಿಸುತ್ತಿದೆ. ಗೂಗಲ್‌ ಮ್ಯಾಪ್ಸ್ ಸೇವೆ ಶುರುವಾಗಿ ಫೆಬ್ರವರಿ 8ಕ್ಕೆ 15 ವರ್ಷಗಳು ಪೂರ್ಣಗೊಂಡವು. ಈ ಹದಿನೈದು ವರ್ಷದಲ್ಲಿ ಗೂಗಲ್‌ ಮ್ಯಾಪ್ಸ್ ಅನೇಕ ಏಳು ಬೀಳು, ಹೊಸ ವಿನ್ಯಾಸಗಳನ್ನು ಕಂಡಿದೆ. ಕಾಲ ಕಾಲಕ್ಕೆ ಅಪ್‌ಡೇಟ್‌ ಆಗುತ್ತ, ಬಳಕೆದಾರರ ಸ್ನೇಹಿ ಆ್ಯಪ್‌ ಆಗಿ ಬದಲಾಗಿದೆ.

15 ವರ್ಷ ಪೂರ್ಣಗೊಳಿಸಿದ ಮ್ಯಾಪ್ಸ್

ಬಹುಶಃ ಗೂಗಲ್‌ ಮ್ಯಾಪ್ಸ್ ಸೇವೆಯೊಂದು ಇಷ್ಟೊಂದು ಸರಳವಾಗಿ ಸಿಗದಿದ್ದರೆ ಇಂದಿನ ಅನೇಕ ಮ್ಯಾಪ್‌ ಆಧರಿತ ಸೇವೆಗಳು ನಮಗೆ ಲಭ್ಯವಾಗುತ್ತಿರಲಿಲ್ಲವೇನೊ? ಬಹಳಷ್ಟು ಇಂಟರ್ನೆಟ್‌ ಸೇವೆಗಳು, ಅನೇಕ ಕಂಪನಿಗಳು, ಬೈಕ್‌ ರೆಂಟಿಂಗ್‌ ಆಪರೇಟಿಂಗ್‌ ಕಂಪನಿಗಳು, ವೆದರ್‌ ಫೋರ್‌ಕಾಸ್ಟಿಂಗ್‌ ಸೇರಿದಂತೆ ಅನೇಕ ಸೇವೆಗಳು ಇದೇ ಗೂಗಲ್‌ ಮ್ಯಾಪ್ಸ್ ಸೇವೆಯನ್ನು ಬಳಸಿಕೊಂಡು ತಮ್ಮ ಉತ್ಕೃಷ್ಟ ಸೇವೆಯನ್ನು ಒದಗಿಸುತ್ತಿವೆ. ಬಹಳಷ್ಟು ನ್ಯಾವಿಗೇಷನ್‌ ಸಿಸ್ಟಮ್‌ಗಳು ಇದೇ ಗೂಗಲ್‌ ಮ್ಯಾಪ್ಸ್ ಬಳಸಿಕೊಳ್ಳುತ್ತಿವೆ ಎಂಬುದು ಎಲ್ಲರಿಗೂ ಗೊತ್ತಿರುವ ಸಂಗತಿ. ಹೀಗಾಗಿ, ಸದ್ಯ ಗೂಗಲ್‌ ಮ್ಯಾಪ್ಸ್ ಅತ್ಯಂತ ಪ್ರಭಾವಿ ಆ್ಯಪ್‌ ಆಗಿ ಹೊರ ಹೊಮ್ಮಿದೆ. 15 ವರ್ಷ ತುಂಬುತ್ತಿರುವ ಹಿನ್ನೆಲೆಯಲ್ಲಿಗೂಗಲ್‌ ಮ್ಯಾಪ್ಸ್ ಆ್ಯಪ್‌ನ ಒಟ್ಟು ವಿನ್ಯಾಸವನ್ನು ಬದಲಿಸಿದೆ.

ಗೂಗಲ್‌ ಮ್ಯಾಪ್ಸ್ ಮರುವಿನ್ಯಾಸ

ಐಒಎಸ್‌ ಮತ್ತು ಆ್ಯಂಡ್ರಾಯ್ಡ್ ಬಳಕೆದಾರರಿಗೆ ಹೆಚ್ಚು ನೆರವಾಗುವ ನಿಟ್ಟಿನಲ್ಲಿ ಗೂಗಲ್‌ ಮ್ಯಾಪ್ಸ್ ಅನ್ನು ಮರು ವಿನ್ಯಾಸಗೊಳಿಸಲಾಗಿದೆ. ಈ ಹಿನ್ನೆಲೆಯಲ್ಲಿಆ್ಯಪ್‌ನ ಬಾಟಮ್‌ನಲ್ಲಿಒಟ್ಟು ಐದು ಆಯ್ಕೆಗಳನ್ನು ನೀಡುವ ಮೂಲಕ ಬಳಕೆದಾರರಿಗೆ ಹೆಚ್ಚಿನ ಅವಕಾಶವನ್ನು ನೀಡಲಾಗುತ್ತಿದೆ. ಜತೆಗೆ ಇದು ಬಳಕೆದಾರರಿಗೆ ಇದು ಸುಲಭದಲ್ಲಿ ಲಭ್ಯವಾಗುವಂತಿದೆ.

ಎಕ್ಸ್‌ಪ್ಲೋರ್

ಎಕ್ಸ್‌ಪ್ಲೋರ್‌(Explore) ಮೇನ್‌ ಟ್ಯಾಬ್‌ನಲ್ಲಿ ಡಿಫಾಲ್ಟ್ ಆಗಿಯೇ ನ್ಯಾವಿಗೈಷನ್‌ ಆಪ್ಷನ್‌ಗಳಿವೆ. ಹಾಗೆಯೇ ನಿಯರ್‌ಬೈ(ಹತ್ತಿರದ) ಲೊಕೇಷನ್‌ಗಳನ್ನು ಹುಡುಕುವುದಕ್ಕೆ ಅವಕಾಶವಿದೆ. ಉದಾಹರಣೆಗೆ ಈ ಟ್ಯಾಬ್‌ ಅನ್ನು ಬಳಕೆದಾರರು ನಿಯರ್‌ಬೈ ರೆಸ್ಟೊರೆಂಟ್‌ಗಳನ್ನು ಹುಡುಕಲು ಬಳಸಬಹುದು. ಜತೆಗೆ ಆ ಲೊಕೇಷನ್‌ಗಳ ರೇಟಿಂಗ್‌ ಮತ್ತು ರಿವ್ಯೂಗಳನ್ನು ನೀಡಬಹುದು.

ಕಮ್ಯೂಟ್

ಕಮ್ಯೂಟ್‌(Commute) ಟ್ಯಾಬ್‌ ಇದು, ನೀವು ಕಚೇರಿಗೆ ಹೋಗುವ ಮಾರ್ಗದಲ್ಲಿಟ್ರಾಫಿಕ್‌ ಯಾವ ರೀತಿ ಇದೆ ಎಂಬುದನ್ನು ತೋರಿಸುತ್ತದೆ. ಇದಕ್ಕೆ ಇಂತಿಂಥದ್ದೇ ಸಾರಿಗೆ ಇರಬೇಕು ಎಂದೇನೂ ಇಲ್ಲ. ಹಾಗೆಯೇ ಸೇವ್ಡ್ (Saved) ಟ್ಯಾಬ್‌ ನೀವು ಸೇವ್‌ ಮಾಡಿಟ್ಟ ಲೊಕೇಷನ್‌ಗಳು ಸೇರಿದಂತೆ ನೀವು ಮಾಡಬಹುದಾದ ಟ್ರಿಪ್‌ ಕುರಿತ ಮಾಹಿತಿಯನ್ನು ಹೊಂದಿರುತ್ತದೆ.

ಕಾಂಟ್ರಿಬ್ಯೂಟ್

ಗೂಗಲ್‌ ಮ್ಯಾಪ್ಸ್ ಆ್ಯಪ್‌ ಅನ್ನು ಇನ್ನಷ್ಟು ಸುಧಾರಿಸುವ ನಿಟ್ಟಿನಲ್ಲಿಬಳಕೆದಾರರು ರಿವ್ಯೂಗಳನ್ನು, ಫೀಡ್‌ಬ್ಯಾಕ್‌ಗಳನ್ನು ಒದಗಿಸಲು ಗೂಗಪ್‌ ಮ್ಯಾಪ್ಸ್ ಕಾಂಟ್ರಿಬ್ಯೂಟ್‌(Contribute) ಟ್ಯಾಬ್‌ನಲ್ಲಿಅವಕಾಶ ಕಲ್ಪಿಸುತ್ತದೆ. ಕೊನೆಯದಾಗಿ ಅಪ್ಡೇಟ್ಸ್‌ (Updates) ಟ್ಯಾಬ್‌ ಹೊಸ ಲೊಕೇಷನ್‌ಗಳ ಶೋಧಕ್ಕೆ ಸಹಾಯ ಮಾಡುತ್ತದೆ. ಜತೆಗೆ ನೀವು ಇರುವ ಪ್ರದೇಶದಲ್ಲಿಬಿಸಿನೆಸ್‌ ಉದ್ದೇಶಕ್ಕಾಗಿ ಚಾಟ್‌ ಮಾಡಲು ಅವಕಾಶ ನೀಡುತ್ತದೆ.

ನೂತನ ಲೋಗೋ, ಫ್ರೆಶ್ ಲುಕ್

ಗೂಗಲ್‌ ಮ್ಯಾಪ್ಸ್‌ನಲ್ಲಿ 220ಕ್ಕೂ ಹೆಚ್ಚು ದೇಶಗಳು ಮತ್ತು ಪ್ರದೇಶಗಳನ್ನು ಮ್ಯಾಪಿಂಗ್‌ ಮಾಡಲಾಗಿದೆ. ಇದರಲ್ಲಿ ಲಕ್ಷಾಂತರ ಬಿಸಿನೆಸ್‌ ಮತ್ತು ಸ್ಥಳಗಳನ್ನು ಗುರುತಿಸಲಾಗಿದೆ. ರಿಯಲ್‌ ಟೈಮ್‌ ಜಿಪಿಎಸ್‌ ನ್ಯಾವಿಗೇಷನ್‌ ಕೂಡ ಒದಗಿಸುತ್ತದೆ. ಸಾರ್ವಜನಿಕ ಸಾರಿಗೆ ಮಾಹಿತಿಯ ಜತೆಗೆ ಟ್ರಾಫಿಕ್‌ ಬಗ್ಗೆಯೂ ರಿಯಲ್‌ ಟೈಮ್‌ ವಿವರವನ್ನು ನೀಡುತ್ತದೆ. ಗೂಗಲ್‌ ಮ್ಯಾಪ್ಸ್ ಒಟ್ಟು ಮರುವಿನ್ಯಾಸದ ಜೊತೆಗೆ ಅದರ ಲೋಗೊ ವಿನ್ಯಾಸ ಕೂಡ ಬದಲಾಗುತ್ತಿದೆ. ಈ ಹದಿನೈದು ವರ್ಷದಲ್ಲಿಐದಾರು ಬಾರಿ ಗೂಗಲ್‌ ಮ್ಯಾಪ್ಸ್ ಲೋಗೊ ವಿನ್ಯಾಸ ಬದಲಾಗುತ್ತಲೇ ಬಂದಿದೆ. ಹೊಸ ವಿನ್ಯಾಸವು ಲೊಕೇಷನ್‌ ಪಿನ್‌ ಮಾದರಿಯಲ್ಲೇ ಇದ್ದು, ಅದಕ್ಕೆ ಗೂಗಲ್‌ ಮಾತೃಸಂಸ್ಥೆ ಅಲ್ಫಾಬೆಟ್‌ ಹೊಂದಿರುವ ವಿವಿಧ ವರ್ಣಗಳನ್ನು ಸಂಯೋಜಿಸಲಾಗಿದೆ. ಈಗಿನ ಲೋಗೊ ವಿನ್ಯಾಸ ಫ್ರೆಶ್‌ ಎಂಬ ಭಾವನೆಯನ್ನು ಸೃಜಿಸುತ್ತದೆ.

ಕಾರ್ಯ ನಿರ್ವಹಣೆ ಹೇಗಿದೆ?

ಡೈರೆಕ್ಷನ್‌ ಮತ್ತು ಟ್ರಾನ್ಸಿಟ್‌

ಸಂಚಾರ ದಟ್ಟಣೆ ಮಾಹಿತಿ

ಸ್ಟ್ರೀಟ್‌ ವ್ಯೂ

ಬಿಸಿನೆಸ್‌ ಲಿಸ್ಟಿಂಗ್ಸ್

ಒಳಾಂಗಣ ಮ್ಯಾಪ್‌

ಮೈ ಮ್ಯಾಪ್‌

ಗೂಗಲ್‌ ಲೊಕಲ್‌ ಗೈಡ್ಸ್‌

ಡಾರ್ಕ್ ಮೋಡ್‌

(ಈ ಲೇಖನವು ವಿಜಯ ಕರ್ನಾಟಕದ 2020 ಫೆಬ್ರವರಿ 10 ಸಂಚಿಕೆಯಲ್ಲಿ ಪ್ರಕಟವಾಗಿದೆ)

Tangi v/s Tik Tok: ಟಿಕ್‌ ಟಾಕ್‌ಗೆ ಟಕ್ಕರ್‌ ಕೊಡಲು ಬಂತು ಗೂಗಲ್‌ನ ಹೊಸ ಆ್ಯಪ್‌

- ಮಲ್ಲಿಕಾರ್ಜುನ ತಿಪ್ಪಾರ
ಟಿಕ್‌ ಟಾಕ್‌ ಎಂಬ ಕಿರು ಅವಧಿಯ ವಿಡಿಯೊ ಆ್ಯಪ್‌ ಹುಟ್ಟು ಹಾಕಿದ ಉತ್ಕರ್ಷ ಅಗಾಧ. ಅತಿ ಕಡಿಮೆ ಅವಧಿಯಲ್ಲೇ ಇದಕ್ಕೆ ಜಗತ್ತಿನಾದ್ಯಂತ 50 ಕೋಟಿಗೂ ಅಧಿಕ ಸಕ್ರಿಯ ಬಳಕೆದಾರರಿದ್ದಾರೆ. ಭಾರತದಲ್ಲೂ ಟಿಕ್‌ ಟಾಕ್‌ 12 ಕೋಟಿ ಸಕ್ರಿಯ ಬಳಕೆದಾರರನ್ನು ಹೊಂದಿದೆ. ಈ ಅಂಕಿ ಸಂಖ್ಯೆಗಳೇ ಟಿಕ್‌ ಟಾಕ್‌ ಜನಪ್ರಿಯತೆಯನ್ನು ಸೂಚಿಸುತ್ತದೆ. ಇದೆಲ್ಲಾ ಯಾಕೆ ಹೇಳಬೇಕಾಯಿತು ಎಂದರೆ, ಇಂಟರ್ನೆಟ್‌ನ ದೈತ್ಯ ಕಂಪನಿಗಳಾದ ಗೂಗಲ್‌ ಮತ್ತು ಫೇಸ್‌ಬುಕ್‌ ಕೂಡ ಇದೀಗ, ಟಿಕ್‌ ಟಾಕ್‌ ಮಾದರಿಯ ಆ್ಯಪ್‌ಗಳನ್ನು ಹೊಂದಲು ಪ್ರಯತ್ನಿಸುತ್ತಿವೆ.

ನೋಕಿಯಾ ಉದಾಹರಣೆ

ಸ್ಪರ್ಧಾತ್ಮಕ ಜಗತ್ತಿನಲ್ಲಿನಿತ್ಯದ ಹೊಸ ಆವಿಷ್ಕಾರಗಳಿಗೆ ಒಗ್ಗಿಕೊಳ್ಳದೇ ಹೋದರೆ ಮಾರುಕಟ್ಟೆಯಿಂದಲೇ ಕಣ್ಮರೆಯಾಗುವ ಅಪಾಯಗಳಿರುತ್ತವೆ. ಇದಕ್ಕೆ ಬೆಸ್ಟ್‌ ಉದಾಹರಣೆ ಎಂದರೆ- ನೋಕಿಯಾ. ಒಂದು ಕಾಲದಲ್ಲಿ ಮೊಬೈಲ್‌ ಫೋನ್‌ ಮಾರುಕಟ್ಟೆಯಲ್ಲಿ ಪ್ರಭುತ್ವ ಸಾಧಿಸಿದ್ದ ನೋಕಿಯಾ, ಸ್ಮಾರ್ಟ್‌ಫೋನ್‌ಗಳ ಜಮಾನದಲ್ಲಿ ಹಿಂದೆ ಬಿತ್ತು. ಅದರರ್ಥ ಭವಿಷ್ಯದ ದಿನಗಳನ್ನು ಊಹಿಸುವಲ್ಲಿ ವಿಫಲವಾಗಿದ್ದೇ ಇದಕ್ಕೆ ಕಾರಣ.

ಟ್ಯಾಂಗಿ ಸೃಷ್ಟಿ

ಇದೇ ಮಾತನ್ನು ಟಿಕ್‌ ಟಾಕ್‌ ವಿಷಯದಲ್ಲೂ ಹೇಳಬಹುದು. ಈಗೇನಿದ್ದರೂ ಕಿರು ಅವಧಿಯ ವಿಡಿಯೊ ಆ್ಯಪ್‌ಗಳದ್ದೇ ಕಾರುಬಾರು. ಇದಕ್ಕೆ ಒಂದು ನಿರ್ದಿಷ್ಟ ದಿಕ್ಕು ತೋರಿಸಿದ್ದು ಟಿಕ್‌ ಟಾಕ್‌. ಈಗ ಅದೇ ಹಾದಿಯನ್ನು ಗೂಗಲ್‌ ಕೂಡ ತುಳಿಯುತ್ತಿದೆ. ಯೂಟ್ಯೂಬ್‌ನಂಥ ಜನಪ್ರಿಯ ವಿಡಿಯೋ ವೇದಿಕೆ ಇದ್ದರೂ ಗೂಗಲ್‌ ಇದೀಗ ಟ್ಯಾಂಗಿ(Tangi) ಕಿರು ಅವಧಿಯ ವಿಡಿಯೊ ಆ್ಯಪ್‌ ಬಿಡುಗಡೆ ಮಾಡಿದೆ. ಸದ್ಯ ಇದು ಪ್ರಯೋಗಾತ್ಮಕ ಆ್ಯಪ್‌ ಆಗಿದ್ದು, ಟ್ಯಾಂಗಿ ಎಂಬ ಪದವನ್ನು The Words TeAch aNd Glveನಿಂದ ಸೃಷ್ಟಿಸಲಾಗಿದೆ. ಈ ಹೊಸ ಮಾದರಿಯ ಆ್ಯಪ್‌ನಲ್ಲಿ ಬಳಕೆದಾರರು 60 ಸೆಕೆಂಡ್‌ಗಳ ಅವಧಿಯ ವಿಡಿಯೋ ಅಪ್‌ಲೋಡ್ ಮಾಡಬಹುದು. ಇಲ್ಲೂಆರ್ಟ್‌, ಡಿಐವೈ(ಡೂ ಇಟ್‌ ಯುವರ್‌ಸೆಲ್ಫ್), ಕುಕಿಂಗ್‌, ಫ್ಯಾಷನ್‌, ಬ್ಯೂಟಿ, ಲೈಫ್‌ಸ್ಟೈಲ್‌ ಸೇರಿ ನಾನಾ ವಿಧದ ವಿಭಾಗಗಳಿವೆ.

ಐಒಎಸ್‌ನಲ್ಲಿ ಮಾತ್ರ ಲಭ್ಯ

ಸದ್ಯಕ್ಕೆ ಈ ಆ್ಯಪ್‌ ಐಒಎಸ್‌ನಲ್ಲಿ ಮಾತ್ರ ಲಭ್ಯವಿದ್ದು, ಆ್ಯಂಡ್ರಾಯ್ಡ್ ಬಳಕೆದಾರರಿಗೆ ದೊರೆಯುವುದಿಲ್ಲ. ಅವರು ಇನ್ನೊಂದಿಷ್ಟ ದಿನ ಕಾಯಬೇಕಾಗಬಹುದು. ಆದರೆ, ವೆಬ್‌ನಲ್ಲಿ ನೀವು ಬಳಸಬಹುದು. ಗೂಗಲ್‌ ಈಗಾಗಲೇ ಯೂಟ್ಯೂಬ್‌ ವಿಡಿಯೋ ವೇದಿಕೆಯ ಮೂಲಕ ಅಗ್ರಸ್ಥಾನ ಕಾಯ್ದುಕೊಂಡಿದೆ. ಹೀಗಿದ್ದೂ, ಕಿರು ಅವಧಿಯ ವಿಡಿಯೋ ವೇದಿಕೆಯು ಯೂಟ್ಯೂಬ್‌ಗೆ ಪ್ರತಿಸ್ಪರ್ಧಿಯೊಂದನ್ನು ಹುಟ್ಟು ಹಾಕುತ್ತಿದೆಯಾ ಅಥವಾ ಟಿಕ್‌ ಟಾಕ್‌ನಂಥ ಆ್ಯಪ್‌ಗಳಿಗೆ ಸ್ಪರ್ಧೆ ನೀಡುತ್ತದೆಯೇ ಎಂಬುದು ಸ್ಪಷ್ಟವಾಗುತ್ತಿಲ್ಲ. ಜೊತೆಗೆ ಈ ಹೊಸ ಆ್ಯಪ್‌ ಬಳಕೆದಾರರನ್ನು ಸೆಳೆಯಲು ವಿಫಲವಾಗಬಹುದು. ಯಾಕೆಂದರೆ, ಇದು ಕೇವಲ ಕಿರು ಅವಧಿ ವಿಡಿಯೋಗೆ ಅವಕಾಶ ಕಲ್ಪಿಸುವುದರಿಂದ ಹೆಚ್ಚಿನ ಮಾಹಿತಿಯನ್ನು ಪಡೆಯಲಾಗುವುದಿಲ್ಲ. ಹಾಗಾಗಿ ಬಳಕೆದಾರರು ಯೂಟ್ಯೂಬ್‌ಗೆ ಮೊರೆ ಹೋಗಬಹುದು ಎಂಬುದು ತಜ್ಞರ ಅಭಿಪ್ರಾಯವಾಗಿದೆ.

​ಸೃಜನಾತ್ಮಕತೆಗೆ ಒತ್ತು

ಟ್ಯಾಂಗಿ ಆ್ಯಪ್‌ನ ಮುಖ್ಯ ಉದ್ದೇಶವೇ ಬಳಕೆದಾರರಲ್ಲಿನ ಸೃಜನಾತ್ಮಕತೆಗೆ ವೇದಿಕೆಯನ್ನು ಒದಗಿಸುವುದು ಆಗಿದೆ. ನಾವು ಕೇವಲ ಡಿಐವೈ ಮತ್ತು ಸೃಜನಶೀಲ ಕಟೆಂಟ್‌ ಬಗ್ಗೆ ಗಮನ ಕೇಂದ್ರೀಕರಿಸಿದ್ದೇವೆ. ಒಂದು ನಿಮಿಷದ ವಿಡಿಯೋ ಅಪ್ಲೋಡ್‌ ಮಾಡಲು ನಾವು ಅವಕಾಶ ಕಲ್ಪಿಸಿಕೊಡುತ್ತಿದ್ದೇವೆ ಎಂದು ಟ್ಯಾಂಗಿ ಸಂಸ್ಥಾಪಕ ಕೊಕೊ ಮಾವೊ ಅವರು ತಮ್ಮ ಬ್ಲಾಗ್‌ನಲ್ಲಿ ಬರೆದುಕೊಂಡಿದ್ದಾರೆ. ಈ ಆ್ಯಪ್‌ ಇನ್ನೊಂದು ವಿಶೇಷ ಏನೆಂದರೆ, ಇದರಲ್ಲಿರುವ ಟ್ರೈ ಇಟ್‌ ವಿಭಾಗದಲ್ಲಿ ಬಳಕೆದಾರರು ಅಲ್ಲಿರುವ ವಿಡಿಯೊಗಳನ್ನು ಮರು ಸೃಷ್ಟಿಸಬಹುದು ಮತ್ತು ಅವುಗಳನ್ನು ಶೇರ್ ಮಾಡಿಕೊಳ್ಳಬಹುದು. ಇದರಿಂದ ಬಹಳಷ್ಟು ಬಳಕೆದಾರರನ್ನು ತಲುಪಲು ಸಾಧ್ಯವಾಗಲಿದೆ

ಟಿಕ್‌ ಟಾಕ್‌ಗೆ ಪೈಪೋಟಿ

ಈ ಮೊದಲೇ ಹೇಳಿದಂತೆ ಟಿಕ್‌ ಟಾಕ್‌ಗೆ ಪೈಪೋಟಿ ನೀಡಲು ಅನೇಕ ಕಂಪನಿಗಳು ಕಿರು ಅವಧಿಯ ವಿಡಿಯೋ ಆ್ಯಪ್‌ಗಳನ್ನು ಪರಿಚಯಿಸುತ್ತಿವೆ. ಕೆಲವು ದಿನಗಳ ಹಿಂದೆ ಫೇಸ್‌ ಬುಕ್‌ ಕೂಡ ಲ್ಯಾಸ್ಸೊ ಆ್ಯಪ್‌ ಬಿಡುಗಡೆ ಮಾಡಿದೆ. ಆದರೆ, ಇದು ಇನ್ನೂ ಭಾರತ ಗ್ರಾಹಕರಿಗೆ ಲಭ್ಯವಾಗಿಲ್ಲ. ಹಾಗೆಯೇ ಟ್ಯಾಂಗಿ ಕೂಡ. ಇನ್ನೂ ಫೇಸ್‌ಬುಕ್‌ ಒಡೆತನದ ಇನ್‌ಸ್ಟಾಗ್ರಾಂ ಕೂಡ ರೀಲ್ಸ್‌ ಎಂಬ ಆಪ್‌ ಬಿಡುಗಡೆ ಮಾಡಿದ್ದನ್ನು ನಾವು ಗಮನಿಸಬಹುದು. ಈ ಬೆಳವಣಿಗೆಗಳು ಏನು ಹೇಳುತ್ತಿವೆ ಎಂದರೆ, ವಿಡಿಯೋ ಫ್ಲಾಟ್‌ಫಾರ್ಮ್‌ ಈಗಿನ ಟ್ರೆಂಡ್‌ ಆಗಿವೆ. ವಿಡಿಯೋ ಕಂಟೆಂಟ್‌ಗೆ ಈಗ ಎಲ್ಲಕ್ಕಿಂತ ಹೆಚ್ಚಿನ ಬೇಡಿಕೆ ಇದ್ದು, ಬಹುತೇಕ ದೊಡ್ಡ ದೊಡ್ಡ ಟೆಕ್‌ ಕಂಪನಿಗಳು ಈ ರೀತಿಯ ವೇದಿಕೆಗಳನ್ನು ಸೃಷ್ಟಿಸಿಕೊಂಡು ತಮ್ಮ ಮಾರುಕಟ್ಟೆಯನ್ನು ವಿಸ್ತರಿಸಿಕೊಳ್ಳುತ್ತವೆ.

(ಈ ಲೇಖನವು ವಿಜಯ ಕರ್ನಾಟಕದ 2020ರ ಫೆಬ್ರವರಿ 3ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ)

New Features for WhatsApp: ವಾಟ್ಸ್‌ಆ್ಯಪ್‌ಗೆ ಮತ್ತಷ್ಟು ಹೊಸ ಫೀಚರ್‌ಗಳು!

- ಮಲ್ಲಿಕಾರ್ಜುನ ತಿಪ್ಪಾರ
ವಾಟ್ಸಪ್ ಎಂಬುದು ಈಗ ನಮ್ಮ ಬದುಕಿನ ಅವಿಭಾಜ್ಯ ಅಂಗವಾಗಿದೆ. ನಮ್ಮ ನಿತ್ಯದ ಕೆಲಸ ಕಾರ್ಯಗಳಲ್ಲಿಅದರ ಅನಿವಾರ್ಯತೆಯ ಸೃಷ್ಟಿಯಾಗಿದೆ. ಅಂದರೆ ಅಷ್ಟರ ಮಟ್ಟಿಗೆ ವಾಟ್ಸಪ್ ನಮ್ಮನ್ನು ಆವರಿಸಿಕೊಂಡಿದೆ. ಇದಕ್ಕೆ ಕಾರಣ ಏನೆಂದು ಹುಡುಕುತ್ತಾ ಹೋದರೆ, ಬಳಕೆದಾರರ ಅಗತ್ಯಗಳನ್ನು ಮನಗಂಡು ಅದಕ್ಕ ತಕ್ಕಂತೆ ಹೊಸ ಹೊಸ ವೈಶಿಷ್ಟ್ಯಗಳನ್ನು ಪರಿಚಯಿಸುತ್ತದೆ. ಆ ಮೂಲಕ ಹೆಚ್ಚೆಚ್ಚು ಬಳಕೆದಾರರ ಸ್ನೇಹಿ ಆ್ಯಪ್‌ ಆಗಿ ಗುರುತಿಸಿಕೊಳ್ಳುತ್ತಿದೆ. ಹೊಸ ವರ್ಷದಲ್ಲೂ ವಾಟ್ಸಪ್ ಅನೇಕ ಹೊಸ ಫೀಚರ್‌ಗಳೊಂದಿಗೆ ನಿಮ್ಮ ಮುಂದೆ ಬರುತ್ತಿದೆ. ಬಹುದಿನಗಳ ಬೇಡಿಕೆಯಾದ ಡಾರ್ಕ್‌ಮೋಡ್ ಸೇರಿದಂತೆ ಅನೇಕ ಸಂಗತಿಗಳು ಸೇರ್ಪಡೆಯಾಗಲಿವೆ. ಜತೆಗೆ ಈ ವರ್ಷದಲ್ಲಿ ಕೆಲವು ಸ್ಮಾರ್ಟ್‌ಫೋನ್‌ಗಳಿಗೆ ವಾಟ್ಸಪ್ ಸಪೋರ್ಟ್‌ ಮಾಡುವುದನ್ನು ನಿಲ್ಲಿಸಲಿದೆ.

ಡಾರ್ಕ್ ಮೋಡ್‌

ಈಗಾಗಲೇ ಬಹಳಷ್ಟು ಆ್ಯಪ್‌ಗಳಲ್ಲಿ ಡಾರ್ಕ್ ಮೋಡ್‌ ಸಾಮಾನ್ಯವಾಗಿದೆ. ಹಾಗೆಯೇ ವಾಟ್ಸಪ್ ಕೂಡ ಡಾರ್ಕ್ ಮೋಡ್‌ ಪರಿಚಯಿಸಲು ಹಲವು ದಿನಗಳಿಂದ ಕಾರ್ಯನಿರತವಾಗಿದೆ. ಬಹುಶಃ ಈ ವರ್ಷದಲ್ಲಿ ಅದು ಕಾರ್ಯರೂಪಕ್ಕೆ ಬರಲಿದೆ. ವಾಬೀಟಾಇನ್ಫೊ ಪ್ರಕಾರ, ವಾಟ್ಸಪ್‌ನ ಡಾರ್ಕ್‌ ಮೋಡ್‌ ಸಿದ್ಧವಾಗಿದೆ. ಆದರೆ, ಸ್ಟೇಟಸ್‌ ಅಪ್‌ಡೇಟ್‌ ಸೆಲ್‌, ಪ್ರೊಫೈಲ್‌ ಸೆಲ್ಸ್‌, ಕಾಂಟಾಕ್ಟ್ ಮತ್ತು ಸ್ಟೋರೇಜ್‌ ಲಿಸ್ಟ್‌ ಸೇರಿದಂತೆ ಇನ್ನಿತರ ಕೆಲವು ಅಂಶಗಳನ್ನು ಡಾರ್ಕ್‌ ಮೋಡ್‌ಗೆ ಹೊಂದಿಸಬೇಕಿದೆ. ಹಾಗಾಗಿ, ಇದಕ್ಕೆ ಸ್ವಲ್ಪ ಸಮಯ ಬೇಕಾಗಬಹುದು. ಈ ವರ್ಷದಲ್ಲಿ ಖಂಡಿತವಾಗಿಯೂ ಐಒಎಸ್‌ ಮತ್ತು ಆಂಡ್ರಾಯ್ಡ್‌ ಫೋನ್‌ಗಳಲ್ಲಿ ನೀವು ಪರಿಪೂರ್ಣವಾದ ಡಾರ್ಕ್‌ ಮೋಡ್‌ ವಾಟ್ಸಪ್ ಅನ್ನು ನಿರೀಕ್ಷಿಸಬಹುದು.

ಐಪ್ಯಾಡ್‌ನಲ್ಲಿ ವಾಟ್ಸಪ್

ಆಂಡ್ರಾಯ್ಡ್‌ ಮತ್ತು ಐಫೋನ್‌ಗಳಲ್ಲಿ ವಾಟ್ಸಪ್ ಅನ್ನು ಸರಳವಾಗಿ ಬಳಸಬಹುದು. ಹಾಗೆಯೇ ಡೆಸ್ಕ್‌ಟಾಪ್‌ಗಳಲ್ಲೂ ವಾಟ್ಸಪ್ ಬಳಕೆ ಸುಲಭ. ಆದರೆ, ಇದುವರೆಗೆ ಐಪ್ಯಾಡ್‌ನಲ್ಲಿ ವಾಟ್ಸಪ್ ಬಳಕೆ ಸಾಧ್ಯವಾಗಿಲ್ಲ. ಒಂದೊಮ್ಮೆ ಆ್ಯಪ್‌ ಸ್ಟೋರ್‌ನಿಂದ ಐಪಾಡ್‌ನಲ್ಲಿ ವಾಟ್ಸಪ್ ಇನ್ಸ್ಟಾಲ್ ಮಾಡಿದರೂ ಅದು ಐಫೋನ್‌ನಲ್ಲಿ ತೆರೆದುಕೊಳ್ಳುವಂತೆ ತೆರೆದುಕೊಳ್ಳುತ್ತದೆ. ಐಪಾಡ್‌ನಲ್ಲಿ ಪೂರ್ಣ ಪ್ರಮಾಣದಲ್ಲಿ ವಾಟ್ಸಪ್ ಕಾರ್ಯನಿರ್ವಹಣೆ ಸಂಬಂಧ ಕಂಪನಿ ಕಾರ್ಯನಿರತವಾಗಿದೆ. ಈ ಬಗ್ಗೆ ಅಧಿಕೃತವಾದ ಮಾಹಿತಿ ಹೊರಬಿದ್ದಿಲ್ಲವಾದರೂ ಈ ವರ್ಷ ಐಪಾಡ್‌ಗೆ ವಾಟ್ಸಪ್ ಸಪೋರ್ಟ್‌ ಮಾಡಲಿದೆ. ಹಾಗಂತ ಐಪಾಡ್‌ಗೆ ರೂಪಿಸಲಾಗುತ್ತಿರುವ ವಾಟ್ಸಪ್ ಇತರ ವಾಟ್ಸಪ್ ಗಿಂತ ಭಿನ್ನವಾಗಿರುತ್ತದೆ ಎಂದು ಭಾವಿಸಬೇಕಿಲ್ಲ.

ಬ್ಲಾಕ್ಡ್ ಕಾಂಟಾಕ್ಟ್ ನೋಟಿಸ್‌

ಬ್ಲಾಕ್‌ ಮಾಡಲಾದ ಕಾಂಟಾಕ್ಟ್‌ಗಳನ್ನು ಮತ್ತೆ ಸಕ್ರಿಯಗೊಳಿಸುವ ಪ್ರಕ್ರಿಯೆಯನ್ನು ಸರಳಗೊಳಿಸುವ ಪ್ರಯತ್ನದಲ್ಲಿ ವಾಟ್ಸಪ್ ಇದೆ. ಬಹುಶಃ ಈ ವರ್ಷಕ್ಕೆ ಸಾಧ್ಯವಾಗಬಹುದು. ಹೊಸ ಫೀಚರ್‌ ಕಾರ್ಯ ಸಾಧ್ಯವಾದರೆ, ಒಂದೇ ಟ್ಯಾಪ್‌ನಲ್ಲಿ ಬ್ಲಾಕ್‌ ಮಾಡಲಾದ ಕಾಂಟಾಕ್ಟ್‌ಗಳನ್ನು ಅನ್‌ಲಾಕ್‌ ಮಾಡಬಹುದು.

ಡಿಲಿಟ್‌ ಮೆಸೇಜ್‌ಗಳು

ಹೊಸ ಡಿಲಿಟ್‌ ಮೆಸೇಜ್‌ ಫೀಚರ್‌ ಸಿದ್ಧತೆಯಲ್ಲಿದೆ ವಾಟ್ಸಪ್. ಈ ಹೊಸ ಫೀಚರ್‌ ವಾಟ್ಸಪ್ ಸಂದೇಶಗಳನ್ನು ನಿಗದಿತ ಸಮಯದ ಬಳಿಕ ಸ್ವಯಂ ಆಗಿ ಡಿಲಿಟ್‌ ಮಾಡುತ್ತದೆ. ಈ ಫೀಚರ್‌ ಖಾಸಗಿ ಮತ್ತು ಗ್ರೂಪ್‌ ಚಾಟ್‌ಗೂ ದೊರೆಯಲಿದೆ. ಈಗಾಗಲೇ ಕುರಿತು ವಾಟ್ಸಪ್ ಕಾರ್ಯನಿರತವಾಗಿದೆ.

ಈ ಫೋನ್‌ಗಳಿಗೆ ಸಪೋರ್ಟ್‌ ಮಾಡಲ್ಲ!

ಈ ಹೊಸ ವರ್ಷದಲ್ಲಿ ವಾಟ್ಸಪ್ ಕೆಲವು ಫೋನ್‌ಗಳಲ್ಲಿ ಕಾರ್ಯ ನಿರ್ವಹಿಸುವುದಿಲ್ಲ. ಈಗಾಗಲೇ ಕಂಪನಿ ಈ ಬಗ್ಗೆ ಮಾಹಿತಿ ನೀಡಿದೆ. ಆಂಡ್ರಾಯ್ಡ್‌ 2.3.7 ಜಿಂಜರ್‌ಬ್ರೆಡ್‌ ಮತ್ತು ಇದಕ್ಕೂ ಹಿಂದಿನ ಆವೃತ್ತಿಗಳಿರುವ ಫೋನ್‌ಗಳು ಹಾಗೂ ಐಒಎಸ್‌ 8 ಮತ್ತು ಅದಕ್ಕೂ ಮೊದಲಿನ ಫೋನ್‌ಗಳಿಗೆ ವಾಟ್ಸಪ್ ಸಪೋರ್ಟ್‌ ಮಾಡುವುದಿಲ್ಲ ಎಂದು ಕಂಪನಿ ತನ್ನ ಬ್ಲಾಗ್‌ನಲ್ಲಿ ಹೇಳಿಕೊಂಡಿದೆ. ಹಾಗಂತ, ವಾಟ್ಸಪ್ ಸಂಪೂರ್ಣವಾಗಿ ನಿಷ್ಕ್ರಿಯಗೊಳ್ಳುತ್ತದೆ ಎಂದರ್ಥವಲ್ಲ. ಈ ಮೊದಲೇ ಅಕೌಂಟ್‌ ಹೊಂದಿದ್ದರೆ ವಾಟ್ಸಪ್ ಬಳಕೆಯನ್ನು ಮುಂದುವರಿಸಬಹುದು. ಆದರೆ, ಅದರಲ್ಲಿರುವ ಫೀಚರ್‌ಗಳು ಯಾವುದೇ ಸಮಯದಲ್ಲಿ ನಿಷ್ಕ್ರಿಯಗೊಳ್ಳಬಹುದು. ಅದರಲ್ಲೂ ವಿಂಡೋಸ್‌ ಫೋನ್‌ ಬಳಸುವವರಿಗೆ ವಾಟ್ಸಪ್ ಬಳಕೆ ಕಷ್ಟಸಾಧ್ಯವಾಗಲಿದೆ.

ಈ ಲೇಖನವು ವಿಜಯ ಕರ್ನಾಟಕದ 6-1-2020ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.

How to download YouTube Video: ಮೊಬೈಲ್‌ನಲ್ಲಿ ಯೂಟ್ಯೂಬ್ ವಿಡಿಯೊ ಡೌನ್‌ಲೋಡ್‌ ಮಾಡಿಕೊಳ್ಳುವುದು ಹೇಗೆ?

- ಮಲ್ಲಿಕಾರ್ಜುನ ತಿಪ್ಪಾರ
ಈಗೇನಿದ್ದರೂ ವಿಡಿಯೊಗಳ ಕಾಲ. ಎಲ್ಲವೂ ವಿಡಿಯೊಮಯ. ನಿಮಗನ್ನಿಸಿದ್ದನ್ನು ಪಠ್ಯ ಅಥವಾ ಚಿತ್ರದ ಮೂಲಕವೇ ಹೇಳಬೇಕು ಎನ್ನುವ ಕಾಲ ಈಗಿಲ್ಲ. ಕೈಯಲ್ಲಿರುವ ಸ್ಮಾರ್ಟ್‌ಫೋನ್‌ ಮೂಲಕ ನಿಮಗನ್ನಿಸಿದ್ದನ್ನು ಚಿಕ್ಕ ವಿಡಿಯೊ ಮಾಡಿಯೋ ಅಥವಾ ನೀವು ನೋಡಿದ್ದ ಸ್ಥಳ, ಘಟನೆ ಮತ್ತಿತರ ಸಂಗತಿಯನ್ನು ವಿಡಿಯೊ ಮಾಡಿ ಯೂಟ್ಯೂಬ್‌ ಸೇರಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿಷೇರ್‌ ಮಾಡಿಕೊಂಡರೆ ಸಾಕು. ಸಹಸ್ರಾರು ಜನರು ಅದನ್ನು ನೋಡುತ್ತಾರೆ; ತಮಗನ್ನಿಸಿದ್ದನ್ನು ಕಮೆಂಟ್‌ ರೂಪದಲ್ಲಿಫೀಡ್‌ಬ್ಯಾಕ್‌ ನೀಡುತ್ತಾರೆ. ಹಾಗಾಗಿ, ಇದು ‘ವಿಡಿಯೊ ಜಮಾನ’ ಎಂದು ಹೇಳಿದರೆ ತಪ್ಪಲ್ಲ.
ಈಗ ವಿಡಿಯೊ ಆಧರಿತ ಆ್ಯಪ್‌ಗಳೇ ಸಾಕಷ್ಟಿವೆ. ಆದರೆ, ಯೂಟ್ಯೂಬ್‌ ಒದಗಿಸುವ ಸೇವೆ ಮಾತ್ರ ಅನನ್ಯವಾಗಿರುತ್ತದೆ ಮತ್ತು ಗುಣಮಟ್ಟದಿಂದ ಕೂಡಿರುತ್ತದೆ. ಹಾಗಾಗಿ, ವಿಡಿಯೊ ಪ್ರಪಂಚದಲ್ಲಿಈಗಲೂ ಯೂಟ್ಯೂಬ್‌ ಅನಭಿಷಿಕ್ತ ದೊರೆಯ ರೀತಿಯಲ್ಲಿದೆ. ಯೂಟ್ಯೂಬ್‌ ಅನ್ನೋದು ವಿಡಿಯೊಗಳ ಸಮುದ್ರ. ಅಲ್ಲಿ, ಸಿನಿಮಾದಿಂದ ಹಿಡಿದು ಕಾರ್‌ ಕ್ಲೀನ್‌ ಹೇಗೆ ಮಾಡೋದು ಎಂದು ಹೇಳುವ ನಾನಾ ರೀತಿಯ, ನಾನಾ ವರ್ಗದ, ನಾನಾ ವಿಷಯದ ವಿಡಿಯೊಗಳು ಇವೆ. ಬೇಕು, ಬೇಡದ್ದು ಎಲ್ಲವಿಡಿಯೊಗಳು ನಿಮಗೆ ದೊರೆಯುತ್ತವೆ. ಯಾವುದನ್ನು ನೋಡಬೇಕು, ಯಾವುದನ್ನು ನೋಡಬಾರದು ಎಂಬುದು ನಿಮಗೆ ಬಿಟ್ಟದ್ದು. ಹೀಗೆ, ಯೂಟ್ಯೂಬ್‌ನಲ್ಲಿನೋಡಿದ ವಿಡಿಯೊಗಳನ್ನು ನಿಮ್ಮ ಡೆಸ್ಕ್‌ಟಾಪ್‌ ಇಲ್ಲವೇ ಸ್ಮಾರ್ಟ್‌ಫೋನ್‌ಗೆ ಡೌನ್‌ಲೋಡ್‌ ಮಾಡಿಕೊಳ್ಳವುದು ಹೇಗೆ? ಯಾಕೆಂದರೆ, ಡೌನ್‌ಲೋಡ್‌ ಮಾಡಿಕೊಳ್ಳುವ ಆಯ್ಕೆಯನ್ನು ಯೂಟ್ಯೂಬ್‌ ನಿಮಗೆ ನೀಡುವುದಿಲ್ಲ.
ಯೂಟ್ಯೂಬ್‌ನಿಂದ ವಿಡಿಯೊಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳಲು ಅನೇಕ ಆ್ಯಪ್‌ಗಳಿವೆ. ಆದರೆ, ಇವುಗಳ ಹೊರತಾಗಿಯೂ ಸಿಂಪಲ್‌ ಆದ ಸ್ಟೆಪ್‌ಗಳ ಮೂಲಕ ಸ್ಮಾರ್ಟ್‌ಫೋನ್‌ಲ್ಲಿಯೂಟ್ಯೂಬ್‌ ವಿಡಿಯೊಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಅದು ಹೇಗೆ ಎಂಬುದನ್ನು ಸಿಂಪಲ್‌ ಆಗಿ ಇಲ್ಲಿವಿವರಿಸಲಾಗಿದೆ.

 ಫೋನ್‌ನಲ್ಲಿಡೌನ್‌ಲೋಡ್‌ ಮಾಡಿಕೊಳ್ಳಲು ಹೀಗೆ ಮಾಡಿ....
- ಯೂಟ್ಯೂಬ್‌ ಆ್ಯಪ್‌ಗೆ ಹೋಗಿ. ನೀವು ಡೌನ್‌ಲೋಡ್‌ ಮಾಡಿಕೊಳ್ಳಲು ಇಚ್ಛಿಸಿರುವ ವಿಡಿಯೊ ಅನ್ನು ಓಪನ್‌ ಮಾಡಿಕೊಳ್ಳಿ
- ವಿಡಿಯೊ ಓಪನ್‌ ಮಾಡಿದ ಮೇಲೆ, ಪ್ಲೇನಲ್ಲಿರುವ ವಿಡಿಯೊವನ್ನು ಪಾಜ್‌ ಮಾಡಿ. ಆಗ ವಿಡಿಯೊ ಕೆಳಗೆ  ನೀವು ಷೇರ್‌ ಬಟನ್‌ ನೋಡಬಹುದು.
- ಆ ಷೇರ್‌ ಬಟನ್‌ ಮೇಲೆ ಕ್ಲಿಕ್‌ ಮಾಡಿ. ಆಗ ಕಾಪಿ ಲಿಂಕ್‌ ಎಂಬ ಆಪ್ಷನ್‌ ಕಾಣುತ್ತದೆ. ಅದರ ಮೇಲೆ ಕ್ಲಿಕ್‌ ಮಾಡಿ ಆ ಲಿಂಕ್‌ ಕಾಪಿ ಮಾಡಿಕೊಳ್ಳಿ.
- ಲಿಂಕ್‌ ಕಾಪಿ ಮಾಡಿಕೊಂಡ ಮೇಲೆ ನಿಮ್ಮ ಕ್ರೋಮ್‌ ಬ್ರೌಸರ್‌ಗೆ ಹೋಗಿ.
- ಬ್ರೌಸರ್‌ನಲ್ಲಿಹೊಸ ಟ್ಯಾಬ್‌ ಓಪನ್‌ ಮಾಡಿ, ಕಾಪಿ ಮಾಡಿಕೊಂಡ ಲಿಂಕ್‌ ಅನ್ನು ಸರ್ಚ್‌ ಬಾಕ್ಸ್‌ನಲ್ಲಿಪೇಸ್ಟ್‌ ಮಾಡಿ.
- ನೀವು ಆಯ್ಕೆ ಮಾಡಿದ ವಿಡಿಯೊ ಬ್ರೌಸರ್‌ನಲ್ಲಿತೆರೆದುಕೊಳ್ಳುತ್ತದೆ.
- ವಿಡಿಯೊ ಓಪನ್‌ ಆದ ಮೇಲೆ, ಯೂಟ್ಯೂಬ್‌ನಲ್ಲಿರುವ y ಅಕ್ಷ ರದ ಹಿಂದೆ ಕರ್ಸರ್‌ ತೆಗೆದುಕೊಂಡು ಬನ್ನಿ
- ಆ ನಂತರ ಯೂಟ್ಯೂಬ್‌ ಅಕ್ಷ ರ ಹಿಂದಿರುವ ಎಲ್ಲವನ್ನು ಅಳಸಿ ಹಾಕಿ.
-  http://m. ಅಳಸಿ ಹಾಕಿದ ಮೇಲೆ, ಯುಟೂಬ್‌ ಪದಕ್ಕಿಂತ ಮುಂಚೆ ಅದೇ ಜಾಗದಲ್ಲಿ ss ಟೈಪ್‌ ಮಾಡಿ.
- ಇಷ್ಟಾದ ಮೇಲೆ ಸರ್ಚ್‌ ಮೇಲೆ ಕ್ಲಿಕ್‌ ಮಾಡಿ. ಆಗ ಹೊಸ ಲಿಂಕ್‌ ತೆರೆದುಕೊಳ್ಳುತ್ತದೆ.
ಇಷ್ಟು ಮಾಡಿದ ಮೇಲೆ ನೀವು ಆಯ್ಕೆ ಮಾಡಿಕೊಂಡಿದ್ದ ವಿಡಿಯೊ ಅನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಇದೇ ಪದ್ಧತಿಯನ್ನು ನೀವು ಡೆಸ್ಕ್‌ಟಾಪ್‌ ಬಳಸಿಕೊಂಡು ಯೂಟ್ಯೂಬ್‌ ವಿಡಿಯೊಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಆ್ಯಪ್‌ಗಳನ್ನು ಬಳಸಿಕೊಂಡಿಯೂ ವಿಡಿಯೊಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಇದಕ್ಕಾಗಿಯೇ ಸಾಕಷ್ಟು ಆ್ಯಪ್‌ಗಳೂ ಇವೆ. ಆದರೆ ಎಲ್ಲಕ್ಕಿಂತ ಮೇಲು ಎಂದರೆ, ಈ ಮೇಲೆ ಹೇಳಿದ ಸಿಂಪಲ್‌ ಟಿಫ್ಸ್‌ ಬಳಸಿಕೊಂಡು ವಿಡಿಯೊ ಡೌನ್‌ಲೋಡ್‌ ಮಾಡಿಕೊಳ್ಳುವುದು. ಇದರಿಂದ ಅನಗತ್ಯವಾಗಿ ಆ್ಯಪ್‌ಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳುವುದು ತಪ್ಪುತ್ತದೆ.

 ಯೂಟ್ಯೂಬ್‌ ಬಗ್ಗೆ ನಿಮಗೆ ಗೊತ್ತಾ?
- 2005 ಫೆಬ್ರವರಿ 14ರಂದು ಯೂಟ್ಯೂಬ್‌ ಅನ್ನು ಸ್ಟಿವ್‌ ಚೆನ್‌, ಚಾದ್‌ ಹರ್ಲಿ ಮತ್ತು ಜಾವೆದ್‌ ಕರೀಮ್‌ ಎಂಬುವರು ಆರಂಭಿಸಿದರು.
- ಜಗತ್ತಿನಲ್ಲೇ 2ನೇ ಅತಿ ಹೆಚ್ಚು ಭೇಟಿ ನೀಡುವವರ ವೆಬ್‌ಸೈಟ್‌ ಎಂಬ ಖ್ಯಾತಿ ಇದೆ.
- 1,300,000,000 ಇದು ಯೂಟ್ಯೂಬ್‌ ಬಳಕೆದಾರರ ಸಂಖ್ಯೆ.
- ಪ್ರತಿ ದಿನ 5 ಕೋಟಿ ವಿಡಿಯೊಗಳನ್ನು ಜಗತ್ತಿನಾದ್ಯಂತ ನೋಡಲಾಗುತ್ತದೆ.
- ನಿತ್ಯ 3 ಕೋಟಿ ಜನರು ಯೂಟ್ಯೂಬ್‌ಗೆ ಭೇಟಿ ನೀಡುತ್ತಾರೆ.
- ಒಟ್ಟು ಯೂಟ್ಯೂಬ್‌ ನೋಡುವವರ ಪೈಕಿ ಅರ್ಧದಷ್ಟು ಜನರು ಮೊಬೈಲ್‌ ಬಳಕೆದಾರರಾಗಿದ್ದಾರೆ.


ಈ ಲೇಖನವು ವಿಜಯ ಕರ್ನಾಟಕದ 2019ರ ಡಿಸೆಂಬರ್ 23ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.

Donald Trump Impeachment: ಡೊನಾಲ್ಡ್‌ ಆಗ್ತಾರಾ ಬೋಲ್ಡ್‌?

- ಮಲ್ಲಿಕಾರ್ಜುನ ತಿಪ್ಪಾರ

ನಿರೀಕ್ಷೆಯಂತೆ ಅಮೆರಿಕದ ಕಾಂಗ್ರೆಸ್‌ನ ಹೌಸ್‌ ಆಫ್‌ ರಿಪ್ರಸೆಂಟೇಟಿವ್‌ನಲ್ಲಿಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ವಿರುದ್ಧದ ವಾಗ್ದಂಡನೆಗೆ ಗೆಲುವು ದೊರೆತಿದೆ. ಇನ್ನು ಮುಂದಿನ ಪ್ರಕ್ರಿಯೆ ಸೆನೆಟ್‌ನಲ್ಲಿನಡೆಯಲಿದ್ದು, ಇಲ್ಲಿರಿಪಬ್ಲಿಕನ್ನರು ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಈ ಸದನದಲ್ಲಿವಾಗ್ದಂಡನೆ ಪ್ರಕ್ರಿಯೆ ನಡೆದು, ಟ್ರಂಪ್‌ ವಿರುದ್ಧ ಗೆಲುವು ದೊರೆತರೆ ಅವರು ಹುದ್ದೆಯನ್ನು ಕಳೆದುಕೊಳ್ಳುತ್ತಾರೆ, ಇಲ್ಲದಿದ್ದರೆ ಅಧ್ಯಕ್ಷರಾಗಿ ಮುಂದುವರಿಯುತ್ತಾರೆ.

ಅಮೆರಿಕದ 45ನೇ ಅಧ್ಯಕ್ಷರಾಗಿರುವ ಡೊನಾಲ್ಡ್‌ ಟ್ರಂಪ್‌ ಅವರು ಸದಾ ವಿವಾದದಿಂದಲೇ ಸುದ್ದಿಯಾಗಿದ್ದು, ಇದೀಗ ತಮ್ಮ ಅವಧಿಯ ಕೊನೆಯ ಹಂತದಲ್ಲಿವಾಗ್ದಂಡನೆಗೆ ಗುರಿಯಾಗುತ್ತಿದ್ದಾರೆ. ಅಮೆರಿಕ ಸಂಸತ್ತಿನ 230 ವರ್ಷಗಳ ಇತಿಹಾದಲ್ಲಿಈ ವರೆಗೆ ಟ್ರಂಪ್‌ ಅವರನ್ನು ಸೇರಿಸಿಕೊಂಡು ಐವರು ಅಧ್ಯಕ್ಷರು ವಾಗ್ದಂಡನೆ ಪ್ರಕ್ರಿಯೆಗೊಳಪಟ್ಟಿದ್ದಾರೆ. ಆದರೆ, ಯಾವ ಅಧ್ಯಕ್ಷರ ವಿರುದ್ಧವೂ ವಾಗ್ದಂಡನೆ ಸಂಪೂರ್ಣವಾಗಿ ಗೆಲುವು ಕಂಡಿಲ್ಲ. ಟ್ರಂಪ್‌ ಪ್ರಕರಣದಲ್ಲೂಇದೇ ಫಲಿತಾಂಶವನ್ನು ನಿರೀಕ್ಷಿಸಬಹುದು.

ಟ್ರಂಪ್‌ ವಿರುದ್ಧ ವಾಗ್ದಂಡನೆ ಯಶಸ್ವಿಯಾಗಬೇಕಿದ್ದರೆ 'ನಂಬರ್‌ ಗೇಮ್‌' ಮುಖ್ಯ ಪಾತ್ರವಹಿಸುತ್ತದೆ. ಈ ಆಟದಲ್ಲಿಟ್ರಂಪ್‌ ಗೆಲುವು ಸಾಧಿಸಬಹುದು. ಆದರೆ, ಅವರ ವಿರುದ್ಧದ ಆರೋಪಗಳಂತೂ ನಿಷ್ಕರ್ಷೆಯಲ್ಲಿಇರಲಿವೆ ಮತ್ತು ಇತಿಹಾಸದಲ್ಲಿದಾಖಲಾಗಲಿವೆ. ಎಲ್ಲಕ್ಕಿಂತ ಹೆಚ್ಚಾಗಿ ಪ್ರಜ್ಞಾವಂತ ಪ್ರಜಾಪ್ರಭುತ್ವ ಎನಿಸಿಕೊಂಡಿರುವ ಅಮೆರಿಕದಲ್ಲಿತಪ್ಪು ಮಾಡಿದರೆ ಅಧ್ಯಕ್ಷರೂ ಶಿಕ್ಷೆಯನ್ನು ಅನುಭವಿಸಬೇಕು ಎಂಬ ಸಂದೇಶವನ್ನಂತೂ ಟ್ರಂಪ್‌ ಪ್ರಕರಣ ಇಡೀ ಜಗತ್ತಿಗೇ ರವಾನಿಸಿದೆ.

ಸಂವಿಧಾನ ಏನು ಹೇಳುತ್ತದೆ?
ಅವಧಿಪೂರ್ವ ಅಧ್ಯಕ್ಷರನ್ನು ಹುದ್ದೆಯಿಂದ ಕೆಳಗಿಳಿಸಲು ಕಾಂಗ್ರೆಸ್‌ಗೆ ಅಮೆರಿಕ ಸಂವಿಧಾನ ಸಂಪೂರ್ಣ ಅಧಿಕಾರ ನೀಡಿದೆ. ಆದರೆ, ಅದಕ್ಕೆ ಜನಪ್ರತಿನಿಧಿಗಳು ಹೆಚ್ಚಿನ ಸಂಖ್ಯೆಯಲ್ಲಿಒಪ್ಪಿಗೆ ನೀಡಬೇಕು. ಎಲ್ಲಕ್ಕಿಂತ ಹೆಚ್ಚಾಗಿ ಅಧ್ಯಕ್ಷರ ವಿರುದ್ಧ, ದೇಶದ್ರೋಹ, ಭ್ರಷ್ಟಾಚಾರ, ಗಂಭೀರ ಸ್ವರೂಪದ ಅಪರಾಧ ಮತ್ತು ದುಷ್ಕೃತ್ಯದಂಥ ಪ್ರಕರಣಗಳಿರಬೇಕು. ಆದರೆ, ಈ ಆರೋಪಗಳನ್ನು ಯಾವ ರೀತಿ ವ್ಯಾಖ್ಯಾನಿಸಬೇಕು ಎಂಬುದನ್ನು ಸಂವಿಧಾನ ಸ್ಪಷ್ಪಡಿಸಿಲ್ಲ. ಇದಕ್ಕಾಗಿಯೇ ಸ್ಟ್ಯಾಂಡರ್ಡ್‌ ಎನ್ನಬಹುದಾದ ಯಾವುದೇ ಮಾನದಂಡಗಳಿಲ್ಲ. ಹಾಗಾಗಿ ಬಹುತೇಕ ಸಂದರ್ಭದಲ್ಲಿಅಧ್ಯಕ್ಷರ ವಿರುದ್ಧದ ವಾಗ್ದಂಡನೆಗಳಿಗೆ ಸೋಲಾಗಿದೆ. ಹೀಗಿದ್ದೂ, ಬಲಿಷ್ಠ ರಾಷ್ಟ್ರವೊಂದರ ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿಮುಖ್ಯಸ್ಥರನ್ನು ವಾಗ್ದಂಡನೆಗೆ ಗುರಿಪಡಿಸುವ ಸಾಧ್ಯತೆಯನ್ನು ಮಾತ್ರ ತೆರೆದಿಟ್ಟಿದೆ.

ಟ್ರಂಪ್‌ ವಿರುದ್ಧ 2 ಆರೋಪ
1. ಅಧಿಕಾರದ ದುರುಪಯೋಗ. ಅಧ್ಯಕ್ಷ ಮರು ಆಯ್ಕೆಗೆ ವಿದೇಶಿ ಸರಕಾರದ ನೆರವು.
2. ವಾಗ್ದಂಡನೆ ಪ್ರಕ್ರಿಯೆಯಲ್ಲಿಕಾಂಗ್ರೆಸ್‌ ಕಾರ್ಯ ನಿರ್ವಹಣೆಗೆ ಅಡ್ಡಿ ಆರೋಪ

ಮುಂದೆ ಏನಾಗುತ್ತದೆ?
ಸಂಸತ್ತಿನಲ್ಲಿ(ಹೌಸ್‌ ಆಫ್‌ ರಿಪ್ರಸೆಂಟೆಟೀವ್‌) ಟ್ರಂಪ್‌ ವಿರುದ್ಧ ವಾಗ್ದಂಡನೆಗೆ ಒಪ್ಪಿಗೆ ಸಿಕ್ಕಿದೆ. ಟ್ರಂಪ್‌ ಅವರು ಶಿಕ್ಷೆ ಎದುರಿಸಬೇಕಿದ್ದರೆ ಅದಕ್ಕೆ ಅಮೆರಿಕದ ಸೆನೆಟ್‌ ಒಪ್ಪಿಗೆ ನೀಡಬೇಕಾಗುತ್ತದೆ. ಸಂಸತ್ತಿನಲ್ಲಿಡೆಮಾಕ್ರಟ್‌ಗಳ ಪಾರಮ್ಯವಿದ್ದರೆ, ಸೆನೆಟ್‌ನಲ್ಲಿರಿಪಬ್ಲಿಕನ್ನರ ಸಂಖ್ಯೆ ಹೆಚ್ಚಿದೆ. ಹಾಗಾಗಿ, ಸೆನೆಟ್‌ನಲ್ಲಿಈ ವಾಗ್ದಂಡನೆಗೆ ಸೋಲಾಗಬಹುದು. ಹಾಗಾಗಿ ಅಷ್ಟು ಸರಳವಾಗಿ ಟ್ರಂಪ್‌ ಅವರನ್ನು ಅಧ್ಯಕ್ಷ ಸ್ಥಾನದಿಂದ ಕೆಳಗಿಳಿಸಲು ಸಾಧ್ಯವಿಲ್ಲ. ಸೆನೆಟ್‌ನಲ್ಲಿರಿಪಬ್ಲಿಕನ್ನರ ನಾಯಕರಾಗಿರುವ ಮಿಚ್‌ ಮೆಕ್‌ಕೆನ್ನಾಲ್‌ ಅವರು, ವಿಚಾರಣೆ ವೇಳೆ ಅಧ್ಯಕ್ಷರ ತಂಡದೊಂದಿಗೆ ರಿಪಬ್ಲಿಕನ್‌ ಸೆನೆಟರ್‌ಗಳು ಸಂಪೂರ್ಣ ಸಹಕಾರದೊಂದಿಗೆ ಕಾರ್ಯನಿರ್ವಹಿಸಲಿದ್ದಾರೆ ಎಂದು ಹೇಳಿದ್ದರು. ಇದೀಗ ಸೆನೆಟ್‌ನಲ್ಲಿವಾಗ್ದಂಡನೆಗೆ ಸಂಬಂಧಿಸಿದ ನಿಯಮಗಳನ್ನು ರಚಿಸಬೇಕಾದ ಹೊಣೆಗಾರಿಕೆ ಮೆಕ್‌ಕೆನ್ನಾಲ್‌ ಮೇಲಿದೆ.

ವಾಗ್ದಂಡನೆ ಪ್ರಕ್ರಿಯೆ ಹೀಗಿದೆ
- ಅಮೆರಿಕ ಹೌಸ್‌ ಆಫ್‌ ರಿಪ್ರಸೆಂಟೇಟಿವ್‌ನಲ್ಲಿಗೆದ್ದಿರುವ ವಾಗ್ದಂಡನೆ ಇನ್ನು ಸೆನೆಟ್‌ಗೆ ವರ್ಗಾವಣೆಯಾಗುತ್ತದೆ.
- ಸೆನೆಟ್‌ನಲ್ಲಿಸುದೀರ್ಘ ವಿಚಾರಣೆ ನಡೆಯುತ್ತದೆ. ಬಳಿಕ, ಅಧ್ಯಕ್ಷರ ವಿರುದ್ಧದ ವಾಗ್ದಂಡನೆಯನ್ನು ಮತಕ್ಕೆ ಹಾಕಲಾಗುತ್ತದೆ.
- ಒಂದು ವೇಳೆ, ಸೆನೆಟ್‌ನಲ್ಲಿಟ್ರಂಪ್‌ ವಿರುದ್ಧ ಮೂರನೇ ಎರಡಕ್ಕಿಂತ ಕಡಿಮೆ ಮತ ಬಿದ್ದರೆ ಅವರು ಅವರು ಶಿಕ್ಷೆಯಿಂದ ಪಾರಾಗಲಿದ್ದಾರೆ.
- ಟ್ರಂಪ್‌ಗೆ ಶಿಕ್ಷೆಯ ಪರವಾಗಿ ಮೂರನೇ ಎರಡಕ್ಕಿಂತ ಹೆಚ್ಚು ಅಂದರೆ ಶೇ.67ರಷ್ಟು ಮತ ಬಿದ್ದರೆ ಅವರು ತಮ್ಮ ಹುದ್ದೆಯಿಂದ ಕೆಳಗಿಳಯಬೇಕಾಗುತ್ತದೆ.

ಎಷ್ಟು ದಿನಗಳ ಕಾಲ ನಡೆಯಲಿದೆ?
- ಒಟ್ಟಾರೆ 126 ಗಂಟೆಗಳ ಕಾಲ ವಾಗ್ದಂಡನೆ ಪ್ರಕ್ರಿಯೆ ನಡೆಯಲಿದೆ
- ಡಿಸೆಂಬರ್‌ 18: ಈಗಾಗಲೇ ಹೌಸ್‌ ಆಫ್‌ ರಿಪ್ರಸೆಂಟೆಟೀವ್‌ನಲ್ಲಿವಾಗ್ದಂಡನೆಗೆ ಒಪ್ಪಿಗೆ ದೊರೆತಿದೆ.
- 2020 ಜನವರಿ 6: ರಿಪಬ್ಲಿಕನ್ನರೇ ಹೆಚ್ಚಾಗಿರುವ ಸೆನೆಟ್‌ನಲ್ಲಿವಿಚಾರಣೆ ಆರಂಭ. ವಾಗ್ದಂಡನೆಯ ಪ್ರಕ್ರಿಯೆಯೆ ನಿಯಮ, ಮಾರ್ಗದರ್ಶಿ ಸೂತ್ರಗಳನ್ನು ನಿಗದಿಪಡಿಸಲಾಗುವುದು.
- 2020 ಜನವರಿ 7: ಮುಖ್ಯ ನ್ಯಾಯಮೂರ್ತಿ ರಾಬರ್ಟ್ಸ್ ಮತ್ತು ಸೆನೆಟರ್‌ಗಳು ತೀರ್ಪುಗಾರರಾಗಿ ಪ್ರಮಾಣ ಸ್ವೀಕಾರ
- 2020 ಜನವರಿ 9: ಹೌಸ್‌ ಪ್ರಾಸೆಕ್ಯೂಟರ್‌ಗಳು ಮತ್ತು ಶ್ವೇತಭವನದ ಅಧಿಕಾರಿಗಳು ಪ್ರತಿ 24 ಗಂಟೆಗೆ ತಮ್ಮ ವಾದಗಳನ್ನು ಮಂಡಿಸುತ್ತಾರೆ.
- ಈ ಒಟ್ಟಾರೆ ಪ್ರಕ್ರಿಯೆ ಮುಗಿಯಲು ವಾರ ಬೇಕಾಗಬಹುದು. ಆದರೆ, ಅಮೆರಿಕ ಅಧ್ಯಕ್ಷರ ಪ್ರೈಮರಿ ಎಲೆಕ್ಷನ್‌ ಹೊತ್ತಿಗೆ ಈ ಪ್ರಕ್ರಿಯೆ ಮುಗಿಯಬೇಕೆಂದು ಡೆಮಾಕ್ರಟ್‌ಗಳು ಬಯಸುತ್ತಿದ್ದಾರೆ.

ಟ್ರಂಪ್‌ ರಾಜೀನಾಮೆ ನೀಡ್ತಾರಾ?
ಇಲ್ಲ. ಸದ್ಯಕ್ಕೆ ಇಲ್ಲ. ಸಂಸತ್ತಿನ ಜನಪ್ರತಿನಿಧಿಗಳ ಮನೆಯಲ್ಲಿಮಾತ್ರ ವಾಗ್ದಂಡನೆಗೆ ಒಪ್ಪಿಗೆ ದೊರೆತಿದೆ. ಅವರನ್ನು ಅಧಿಕಾರದಿಂದ ಕೆಳಗೆ ಇಳಿಸಬೇಕಿದ್ದರೆ ಸಂಸತ್ತಿನ ಮತ್ತೊಂದು ಹೌಸ್‌ ಸೆನೆಟ್‌ ಕೂಡ ಒಪ್ಪಿಗೆ ನೀಡಬೇಕು. ಆದರೆ, ಈಗಿರುವ ಲೆಕ್ಕಾಚಾರ ಪ್ರಕಾರ ಅಷ್ಟು ಸುಲಭವಲ್ಲ. ಟ್ರಂಪ್‌ ವಾಗ್ದಂಡನೆಗೆ ಸೆನೆಟ್‌ ಕೂಡ ಮೂರನೇ ಎರಡರಷ್ಟು ಮತ ಹಾಕಬೇಕು. ಆದರೆ, ಇಷ್ಟೊಂದು ಮತಗಳು ದೊರೆಯುವುದು ಕಷ್ಟ. ಯಾಕೆಂದರೆ, ಸೆನೆಟ್‌ನಲ್ಲಿರಿಪಬ್ಲಿಕನ್ನರು ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಸೆನೆಟ್‌ನಲ್ಲಿರುವ 45 ಡೆಮಾಕ್ರಟ್‌ ಹಾಗೂ ಇಬ್ಬರು ಸ್ವತಂತ್ರ ಸದಸ್ಯರ ಜತೆಗೆ 53 ರಿಪಬ್ಲಿಕನ್ನರ ಪೈಕಿ ಕನಿಷ್ಠ 20 ರಿಪಬ್ಲಿಕನ್ನರಾದರೂ ವಾಗ್ದಂಡನೆ ಪರವಾಗಿ ಮತ ಹಾಕಬೇಕು. ಆಗ ಮಾತ್ರ ಟ್ರಂಪ್‌ ತೊಂದರೆಗೆ ಸಿಲುಕಿಕೊಳ್ಳುತ್ತಾರೆ. ಈಗಿನ ಪರಿಸ್ಥಿತಿ ನೋಡಿದರೆ, ಡೆಮಾಕ್ರಟ್‌ಗಳ ಪೈಕಿಯೇ ಇಬ್ಬರು ಕೈಕೊಡುವ ಎಲ್ಲಸಾಧ್ಯತೆ ಇದೆ.

ಉಪಾಧ್ಯಕ್ಷ ಅಧ್ಯಕ್ಷ?
ಸದ್ಯದ ಲೆಕ್ಕಾಚಾರ ಪ್ರಕಾರ ಟ್ರಂಪ್‌ ಅಧ್ಯಕ್ಷ ಹುದ್ದೆಯಿಂದ ಕೆಳಗಿಳಿಯುವುದು ಅಸಂಭವ. ಸೆನೆಟ್‌ನಲ್ಲಿವಾಗ್ದಂಡನೆಗೆ ಸೋಲಾಗುವ ಎಲ್ಲಸಾಧ್ಯತೆಗಳಿವೆ. ಹೀಗಿದ್ದೂ ಒಂದು ವೇಳೆ, ವಾಗ್ದಂಡನೆಗೆ ಗುರಿಯಾಗಿ ಟ್ರಂಪ್‌ ಅಧಿಕಾರ ಬಿಟ್ಟು ಕೊಟ್ಟರೆ ಆಗ ಅಮೆರಿಕ ಅಧ್ಯಕ್ಷರು ಯಾರು ಆಗ್ತಾರೆ? ಅಲ್ಲಿನ ಸಂವಿಧಾನ ಪ್ರಕಾರ, ಸರಕಾರದ ಉಳಿದ ಅವಧಿಯವರೆಗೆ ಉಪಾಧ್ಯಕ್ಷರಾದವರು ಅಧ್ಯಕ್ಷರಾಗಿರುತ್ತಾರೆ. ಅಂದರೆ,ಉಪಾಧ್ಯಕ್ಷ ಮೈಕ್‌ ಪೆನ್ಸ್‌ ಅಧ್ಯಕ್ಷರಾಗಲಿದ್ದಾರೆ. ಆದರೆ, ಸದ್ಯಕ್ಕಂತೂ ಇದು ಸಾಧ್ಯವಿಲ್ಲ!

ರಾಜಕೀಯ ಪರಿಣಾಮವೇನು?
ಟ್ರಂಪ್‌ ವಿರುದ್ಧ ವಾಗ್ದಂಡನೆ ರಾಜಕೀಯ ಪರಿಣಾಮ ಬಗ್ಗೆ ಕೂಡ ಚರ್ಚೆಗಳು ನಡೆಯುತ್ತಿವೆ. ಈಗಾಗಲೇ ಟ್ರಂಪ್‌ ಹೇಳಿರುವ ಪ್ರಕಾರ, ಈ ವಾಗ್ದಂಡನೆ ಡೆಮಾಕ್ರಟ್‌ಗಳಿಗೆ ಹಿನ್ನಡೆಯುಂಟು ಮಾಡಲಿದ್ದು, ಅಧ್ಯಕ್ಷೀಯ ಚುನಾವಣೆ ವೇಳೆ ಪ್ರತಿಕೂಲ ಪರಿಣಾಮ ಬೀರಲಿದೆ ಎಂದು ಹೇಳಿದ್ದಾರೆ. ಹಾಗೆ ನೋಡಿದರೆ, ಇದು ಎರಡು ಅಗಲಿನ ಕತ್ತಿಯ ನಡಿಗೆಯೇ ಆಗಿದೆ. ಮುಂದಿನ ವರ್ಷ ನವೆಂಬರ್‌ 20ರ ಹೊತ್ತಿಗೆ ಅಮೆರಿಕದ ಅಧ್ಯಕ್ಷೀಯ ಚುನಾವಣೆ ನಡೆಯಲಿದೆ. ಟ್ರಂಪ್‌ ಎರಡನೇ ಅವಧಿಗೆ ಮರು ಆಯ್ಕೆ ಬಯಸಿದ್ದಾರೆ. ಒಂದು ವೇಳೆ, ವಾಗ್ದಂಡನೆ ಅವರ ಪರವಾಗಿ ಸಹಾನುಭೂತಿ ಸೃಷ್ಟಿಸಿದರೆ ಖಂಡಿತವಾಗಿಯೂ ಅವರ ಗೆಲುವಿಗೆ ಇದು ಕಾರಣವಾಗಲಿದೆ. ಹಾಗೆಯೇ, ಡೆಮಾಕ್ರಟ್‌ಗಳ ರೀತಿಯಲ್ಲಿಅಮೆರಿಕದ ಜನ ಕೂಡ ಯೋಚನೆ ಮಾಡಿದ್ದಾದರೆ, ಖಂಡಿತವಾಗಿಯೂ ಟ್ರಂಪ್‌ ಹಿನ್ನಡೆಯಾಗಲಿದೆ.

ಐವರು ಅಧ್ಯಕ್ಷರ ವಿರುದ್ಧ ವಾಗ್ದಂಡನೆ
- ಭ್ರಷ್ಟಾಚಾರ ಆರೋಪ ಹೊತ್ತಿದ್ದ ಅಧ್ಯಕ್ಷ ಜೇಮ್ಸ್‌ ಬ್ಯೂಕ್ಯಾನನ್‌ ಅವರ ವಿರುದ್ಧ 1860ರಲ್ಲಿವಾಗ್ದಂಡನೆ ಪ್ರಕ್ರಿಯೆ ನಡೆಸಲಾಗಿತ್ತು. ಆದರೆ, ಅವರು ಶಿಕ್ಷೆಯಿಂದ ಪಾರಾಗಿದ್ದರು.
- ಟೆನ್ಯೂರ್‌ ಆಫೀಸ್‌ ಕಾಯಿದೆ ಉಲ್ಲಂಘನೆಯ ಆರೋಪದ ಹಿನ್ನೆಲೆಯಲ್ಲಿ1868ರಲ್ಲಿಆಂಡ್ರೋ ಜಾನ್ಸನ್‌ ವಿರುದ್ಧ ವಾಗ್ದಂಡನೆ ಪ್ರಕ್ರಿಯೆ ನಡೆದಿತ್ತು. ಕೇವಲ ಒಂದು ಮತದ ಅಂತರದಲ್ಲಿಅವರು ವಾಗ್ದಂಡನೆಯಿಂದ ಪಾರಾಗಿದ್ದರು.
- 1974ರಲ್ಲಿಅಧ್ಯಕ್ಷ ರಿಚರ್ಡ್‌ ನಿಕ್ಸನ್‌ ಅವರ ವಿರುದ್ಧವೂ ವಾಗ್ದಂಡನೆ ನಡೆದಿತ್ತು. ಅಧಿಕಾರದ ದುರುಪಯೋಗ ಸೇರಿದಂತೆ ನಾನಾ ಕಾರಣಗಳಿಂದ ವಾಗ್ದಂಡನೆ ಪ್ರಕ್ರಿಯೆ ಕೈಗೊಳ್ಳಲಾಗಿತ್ತು. ಇನ್ನೇನು ತನಿಖೆ ಮುಗಿಯುವ ಹಂತದಲ್ಲಿಅವರು ರಾಜೀನಾಮೆ ನೀಡಿದ್ದರಿಂದ ವಾಗ್ದಂಡನೆ ಕೈ ಬಿಡಲಾಗಿತ್ತು.
- 1998ರಲ್ಲಿಅಧ್ಯಕ್ಷ ಬಿಲ್‌ ಕ್ಲಿಂಟನ್‌ ಅವರು ವಾಗ್ದಂಡನೆ ಪ್ರಕ್ರಿಯೆಗೆ ಒಳಗಾಗಬೇಕಾಯಿತು. ವಿಚಾರಣೆಯಲ್ಲಿಅವರು ನಿರ್ದೋಷಿ ಎಂದು ಸಾಬೀತಾಗಿ, ವಾಗ್ದಂಡನೆ ವಿರುದ್ಧ ಗೆಲುವು ಸಾಧಿಸಿದ್ದರು.
- 2019ರಲ್ಲಿ ಹಾಲಿ ಅಧ್ಯಕ್ಷ ಟ್ರಂಪ್‌ ವಿರುದ್ಧವೂ ವಾಗ್ದಂಡನೆ ಪ್ರಕ್ರಿಯೆ ನಡೆಯುತ್ತಿದೆ. ಮರು ಆಯ್ಕೆಗೆ ವಿದೇಶಿ ಸರಕಾರಗಳ ನೆರವು ಸೇರಿದಂತೆ ಇನ್ನಿತರ ಆರೋಪಗಳನ್ನು ಅವರು ಎದುರಿಸುತ್ತಿದ್ದಾರೆ.

ಈ ಲೇಖನವು ವಿಜಯ ಕರ್ನಾಟಕದ 2019ರ ಡಿಸೆಂಬರ್ 20ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.

How did Google Assistant works: ರಿಯಲ್‌ ಟೈಮ್‌ ದುಭಾಷಿ ಹೇಗೆ ಕೆಲಸ ಮಾಡುತ್ತದೆ?

- ಮಲ್ಲಿಕಾರ್ಜುನ ತಿಪ್ಪಾರ

ಗೂಗಲ್‌ ಹೊರ ತಂದಿರುವ ಅನೇಕ ಉತ್ಪನ್ನಗಳಲ್ಲಿ'ಗೂಗಲ್‌ ಅಸಿಸ್ಟೆಂಟ್‌' ಭಿನ್ನವಾಗಿದ್ದು, ಅತ್ಯುಪಯುಕ್ತ ಮತ್ತು ಬಳಕೆದಾರರ ಸ್ನೇಹಿಯಾಗಿದೆ. ಐಫೋನ್‌ನಲ್ಲಿ ಸಿರಿ, ವಿಂಡೋಸ್‌ ಫೋನ್‌ನಲ್ಲಿ ಕೋರ್ಟನಾ, ಅಮೆಜಾನ್‌ನ ಅಲೆಕ್ಸಾ ರೀತಿಯಲ್ಲೇ ಗೂಗಲ್‌ನ ಈ 'ಗೂಗಲ್‌ ಅಸಿಸ್ಟೆಂಟ್‌' ಕೆಲಸ ಮಾಡುತ್ತದೆ. ಈ ಉತ್ಪನ್ನ ಮೊದಲಿಗೆ ಆರಂಭವಾದಾಗ ಗೂಗಲ್‌ನ ಪ್ರಾಡಕ್ಟ್‌ಗಳಾದ ಪಿಕ್ಸೆಲ್‌ ಫೋನ್‌ ಅಥವಾ ಗೂಗಲ್‌ ಹೋಮ್‌ ಗ್ಯಾಜೆಟ್‌ಗಳಿಗೆ ಮಾತ್ರ ಸಿಮೀತವಾಗಿತ್ತು. ಆದರೆ, ಇದೀಗ ಎಲ್ಲಆ್ಯಂಡ್ರಾಯ್ಡ್‌ ಹಾಗೂ ಐಒಎಸ್‌ ಆಧರಿತ ಫೋನ್‌, ಡಿವೈಸ್‌ಗಳಿಗೂ ಇದು ಸಪೋರ್ಟ್‌ ಮಾಡುತ್ತದೆ.

ಆರಂಭದಲ್ಲಿ ಗೂಗಲ್‌ ಅಸಿಸ್ಟೆಂಟ್‌ ಇಂಗ್ಲಿಷ್‌ನಲ್ಲಿ ಮಾತ್ರ ಸೇವೆಯನ್ನು ಒದಗಿಸುತ್ತಿತ್ತು. ಆನಂತರ ಜಗತ್ತಿನ ಅನೇಕ ಭಾಷೆಗಳಲ್ಲಿ ಸೇವೆಯನ್ನು ನೀಡಲಾರಂಭಿಸಿತು. ಇದರಲ್ಲಿ ನಮ್ಮ ಕೆಲವು ಭಾರತೀಯ ಭಾಷೆಗಳೂ ಸೇರಿವೆ. ಇದೆಲ್ಲವೂ ಗೊತ್ತಿರುವ ಸಂಗತಿಯೇ. ಆದರೆ, ಹೊಸ ವಿಷಯ ಏನೆಂದರೆ, ಗೂಗಲ್‌ ಅಸಿಸ್ಟೆಂಟ್‌ ಇನ್ನು ಮುಂದೆ 'ರಿಯಲ್‌ ಟೈಮ್‌ನಲ್ಲಿ ಭಾಷಾಂತರ ಮಾಡಲಿದೆ'! ಅರ್ಥಾತ್‌ ಅದು ದುಭಾಷಿ ರೀತಿಯಲ್ಲಿಕೆಲಸ ಮಾಡಲಿದೆ.

ಹೌದು, ಇದು ನಿಜ. ಇದಕ್ಕಾಗಿ ಗೂಗಲ್‌, ಅಸಿಸ್ಟೆಂಟ್‌ಗೆ 'ಇಂಟರ್‌ಪ್ರೆಟರ್‌ ಮೋಡ್‌' ಪರಿಚಯಿಸಿದೆ. ಇದು ಆ್ಯಂಡ್ರಾಯ್ಡ್‌ ಮತ್ತು ಐಒಎಸ್‌ ಆಧರಿತ ಸಾಧನಗಳಿಗೆ ಸಪೋರ್ಟ್‌ ಮಾಡಲಿದೆ. 2019ರ ಜನವರಿಯಲ್ಲೇ ಈ ಬಗ್ಗೆ ಗೂಗಲ್‌ ಘೋಷಣೆ ಮಾಡಿ, ಗೂಗಲ್‌ ಹೋಮ್‌ ಸ್ಪೀಕರ್‌, ಸ್ಮಾರ್ಟ್‌ ಡಿಸ್‌ಪ್ಲೇಸ್‌ ಸೇರಿದಂತೆ ಇನ್ನಿತ ಸಾಧನಗಳಿಗೆ ಪರಿಚಯಿಸಿತ್ತು. ಇದೀಗ ಈ ಫೀಚರ್‌ ಜಾಗತಿಕವಾಗಿ ಎಲ್ಲ ಫೋನ್‌ ಬಳಕೆದಾರರಿಗೆ ವಿಸ್ತರಿಸಲಾಗಿದೆ.

ವಿಮಾನಗಳು, ಸ್ಥಳೀಯ ರೆಸ್ಟೊರೆಂಟ್‌ಗಳ ಶೋಧ ಸೇರಿದಂತೆ ಇನ್ನಿತರ ಮಾಹಿತಿಗಾಗಿ ಪ್ರವಾಸಿಗರು ಗೂಗಲ್‌ ಅಸಿಸ್ಟೆಂಟ್‌ ನೆರವು ಪಡೆಯುತ್ತಿದ್ದಾರೆ. ಪ್ರಯಾಣದ ವೇಳೆ ಇನ್ನೂ ಹೆಚ್ಚಿನ ನೆರವು ನೀಡುವ ನಿಟ್ಟಿನಲ್ಲಿಅಸಿಸ್ಟೆಂಟ್‌ ಇದೀಗ ರಿಯಲ್‌ ಟೈಮ್‌ ಭಾಷಾಂತರ ಫೀಚರ್‌ ಇಂಟರ್‌ಪ್ರಿಟರ್‌ ಮೋಡ್‌ನೊಂದಿಗೆ ನಿಮ್ಮ ಮುಂದೆ ಬಂದಿದೆ. ಜಗತ್ತಿನಾದ್ಯಂತದ ಆ್ಯಂಡ್ರಾಯ್ಡ್‌ ಮತ್ತು ಐಒಎಸ್‌ ಫೋನ್‌ಗಳಲ್ಲಿನ ಅಸಿಸ್ಟೆಂಟ್‌ಗಳಿಗೆ ಇದು ಲಭ್ಯವಾಗಲಿದೆ ಎಂದು ಗೂಗಲ್‌ ತನ್ನ ಬ್ಲಾಗ್‌ನಲ್ಲಿತಿಳಿಸಿದೆ.

ಕನ್ನಡ ಸಹಿತ 44 ಭಾಷೆಗೆ ಬೆಂಬಲ

ಪ್ರಯಾಣದ ವೇಳೆ ವಿದೇಶಿ ಭಾಷೆಯಲ್ಲಿ ಮಾತನಾಡುವವರಿದ್ದರೆ ನೀವು ನಿಮ್ಮ ಫೋನ್‌ನಲ್ಲಿರುವ ಈ ಫೀಚರ್‌ ಅನ್ನು ಬಳಸಿಕೊಂಡು ಅವರೊಂದಿಗೆ ಮಾತನಾಡಬಹುದು. ಉದಾಹರಣೆಗೆ, ''ಹೇ ಗೂಗಲ್‌, ಬಿ ಮೈ ಫ್ರೆಂಚ್‌ ಟ್ರಾನ್ಸ್‌ಲೇಟರ್‌,'' ಎಂದು ಹೇಳಿದರೆ, ಆ ಭಾಷೆಯಲ್ಲಿನೀವು ಮತ್ತೊಬ್ಬರೊಂದಿಗೆ ಸಂವಹನ ಮಾಡಬಹುದು. ಗೂಗಲ್‌ ಹೇಳುವಂತೆ ಗೂಗಲ್‌ ಅಸಿಸ್ಟೆಂಟ್‌ ಇಂಟರ್‌ಪ್ರೆಟರ್‌ ಜಗತ್ತಿನ 44 ಭಾಷೆಗಳಿಗೆ ಸಪೋರ್ಟ್‌ ಮಾಡಲಿದೆ. ಈ ಪಟ್ಟಿಯಲ್ಲಿ ಕನ್ನಡವೂ ಇದೆ ಎಂದು ಪ್ರತ್ಯೇಕವಾಗಿ ಹೇಳಬೇಕಿಲ್ಲ.

ಯಾವೆಲ್ಲ ಭಾಷೆಗಳಿವೆ?

ಅರೆಬಿಕ್‌, ಬಂಗಾಲಿ, ಬರ್ಮೀಸ್‌, ಕಾಂಬೋಡಿಯನ್‌, ಜೆಕ್‌, ಡ್ಯಾನಿಷ್‌, ಡಚ್‌, ಇಂಗ್ಲಿಷ್‌, ಇಸ್ಟೋನಿಯನ್‌, ಫಿಲಿಪಿನೊ, ಫ್ರೆಂಚ್‌, ಜರ್ಮನ್‌, ಗ್ರೀಕ್‌, ಗುಜರಾತಿ, ಹಿಂದಿ, ಹಂಗೇರಿಯನ್‌, ಇಂಡೋನೇಷಿಯನ್‌, ಇಟಾಲಿಯನ್‌, ಜಾಪನೀಸ್‌, ಕೊರಿಯನ್‌, ಮಲಯಾಳಂ, ಮರಾಠಿ, ನೇಪಾಳಿ, ಮ್ಯಾಂಡ್ರಿಯನ್‌, ನಾರ್ವೇಯಿನ್‌, ಪೋರ್ಚುಗೀಸ್‌, ರೋಮಾನಿಯನ್‌, ರಷ್ಯನ್‌, ಸಿಂಹಳಿ, ಸ್ಪ್ಯಾನಿಶ್‌, ಸ್ವೀಡಿಶ್‌, ತಮಿಳು, ತೆಲುಗು, ತುರ್ಕಿಷ್‌, ಉಕ್ರೇನಿಯನ್‌, ಉರ್ದು ಇತ್ಯಾದಿ ಭಾಷೆಗಳಲ್ಲಿಗೂಗಲ್‌ ಅಸಿಸ್ಟೆಂಟ್‌ ಇಂಟರ್‌ಪ್ರೆಟರ್‌ ಸೇವೆ ಲಭ್ಯವಿದೆ. ಸಂಭಾಷಣೆ ಮೇಲೆ ಹೆಚ್ಚು ನಿಯಂತ್ರಣ ಸಾಧಿಸುವುದಕ್ಕಾಗಿ ಇದು ನಿಮಗೆ ಮ್ಯಾನುವಲ್‌ ಮೋಡ್‌ ಕೂಡ ಒದಗಿಸುತ್ತದೆ. ಹಾಗೆಯೇ, ಕೀ ಬೋರ್ಡ್‌ ಮೋಡ್‌ನಿಂದಾಗಿ ನೀವು ಟೈಪಿಸಿಯೂ ಭಾಷಾಂತರ ಮಾಡಬಹುದು. ಈ ಮೋಡ್‌ಗಳನ್ನು ಬಳಸುವಾಗ ನೀವು ಇಂಟರ್‌ಪ್ರೆಟರ್‌ ಮೋಡ್‌ ಅಥವಾ ವಾಯ್ಸ್ ಕಮಾಂಡ್‌ ಅನ್ನು ಟ್ರಿಗರ್‌ ಬಟನ್‌ ಮೇಲೆ ಟ್ಯಾಪ್‌ ಮಾಡುವ ಮೂಲಕ ಸ್ವಿಚ್‌ ಆಫ್‌ ಮಾಡಬಹುದು.

ಏನಿದು ಗೂಗಲ್‌ ಅಸಿಸ್ಟೆಂಟ್‌?

ಇದು ಗೂಗಲ್‌ನ ಅತಿ ಜನಪ್ರಿಯ ಉತ್ಪನ್ನವಾಗಿದ್ದು, ಆರ್ಟಿಫಿಷಿಯಲ್‌ ಇಂಟೆಲಿಜೆನ್ಸ್‌(ಕೃತಕ ಬುದ್ಧಿಮತ್ತೆ) ಆಧರಿತ ವರ್ಚುವಲ್‌ ಸೇವೆಯಾಗಿದೆ. ಮೊಬೈಲ್‌ ಮತ್ತು ಸ್ಮಾರ್ಟ್‌ ಹೋಮ್‌ ಗ್ಯಾಜೆಟ್‌ಗಳಲ್ಲಿಈ ಸೇವೆ ದೊರೆಯುತ್ತದೆ. ಈ ಹಿಂದಿನ ಗೂಗಲ್‌ ನೌ ಏಕಮುಖವಾಗಿ ಸಂಭಾಷಣೆಗೆ ಅನುವು ಮಾಡಿಕೊಡುತ್ತಿತ್ತು. ಆದರೆ, ಗೂಗಲ್‌ ಅಸಿಸ್ಟೆಂಟ್‌ ದ್ವಿಮುಖ ಸಂಭಾಷಣೆಗೆ ಬೆಂಬಲ ನೀಡುತ್ತದೆ. ಗೂಗಲ್‌ನ ಮೆಸೇಜಿಂಗ್‌ ಆ್ಯಪ್‌ 'ಅಲ್ಲೋ' ಭಾಗವಾಗಿ ಈ ಅಸಿಸ್ಟೆಂಟ್‌ ಸೇವೆ 2016ರಲ್ಲಿಆರಂಭವಾಯಿತು. 2017ರಲ್ಲಿ ಆ್ಯಂಡ್ರಾಯ್ಡ್‌ ಸಾಧನಗಳಿಗೂ ವಿಸ್ತರಣೆಯಾಯಿತು. 2017ರಲ್ಲಿ ಅಂದಾಜು 40 ಕೋಟಿ ಬಳಕೆದಾರರು ಗೂಗಲ್‌ ಅಸಿಸ್ಟೆಂಟ್‌ ಇನ್ಸ್‌ಟಾಲ್‌ ಮಾಡಿಕೊಂಡಿದ್ದಾರೆ.

ಈ ಲೇಖನವು ವಿಜಯ ಕರ್ನಾಟಕದ 2019ರ ಡಿಸೆಂಬರ್ 16ರ ಸಂಚಿಕೆಯಲ್ಲಿ ಪ್ರಕಟಗೊಂಡಿದೆ.

Finland PM Sanna Marin- 'ಸನ್ನ' ವಯಸ್ಸಿಗೇ ಪ್ರಧಾನಿ!

ಸಲಿಂಗ ಕುಟುಂಬದ ಹಿನ್ನೆಲೆ ಹೊಂದಿರುವ ಸನ್ನಾ ಮರಿನ್‌ ತಮ್ಮ ಆರಂಭದ ದಿನಗಳಲ್ಲಿಬೇಕರಿಯಲ್ಲಿಕೆಲಸ ಮಾಡುತ್ತಿದ್ದರು...

- ಮಲ್ಲಿಕಾರ್ಜುನ ತಿಪ್ಪಾರ

ಡಿಸೆಂಬರ್‌ ಹತ್ತಕ್ಕಿಂತ ಮೊದಲು 'ಸನ್ನಾ ಮರಿನ್‌' ಎಂಬ ಯುವತಿಯ ಬಗ್ಗೆ ಫಿನ್ಲೆಂಡ್‌ ಬಿಟ್ಟು ಹೊರ ಜಗತ್ತಿಗೆ ಅಷ್ಟೇನೂ ಗೊತ್ತಿರಲಿಲ್ಲ. ಆದರೆ, 34 ವರ್ಷ ವಯಸ್ಸಿನಲ್ಲೇ ಫಿನ್ಲೆಂಡ್‌ನ ಪ್ರಧಾನಿ ಹುದ್ದೆಗೇರಿರುವ ಈ ಯುವತಿಯ ಬಗ್ಗೆ ಈ ಇಡೀ ಜಗತ್ತೇ ಈಗ ಮಾತನಾಡುತ್ತಿದೆ. ತೀರಾ ಚಿಕ್ಕ ವಯಸ್ಸಿಗೇ ಪ್ರಧಾನಿ ಹುದ್ದೆಗೇರಿದರು ಎಂಬ ಕಾರಣಕ್ಕಲ್ಲ; ಬದಲಿಗೆ ಅವರಲ್ಲಿರುವ ನಾಯಕತ್ವ, ಬದ್ಧತೆಗಾಗಿ. ಹಾಗೆಯೇ, ಸದ್ಯ ಸೇವೆ ಸಲ್ಲಿಸುತ್ತಿರುವ ಪ್ರಧಾನಿಗಳ ಪೈಕಿ ಇವರೇ ಅತ್ಯಂತ ಕಿರಿಯ ಪ್ರಧಾನಿ. ಸನ್ನಾ ನಂತರದ ಕಿರಿಯ ಸ್ಥಾನದ ಪ್ರಧಾನಿಗಳ ಸಾಲಿನಲ್ಲಿನ್ಯೂಜಿಲೆಂಡ್‌ನ ಪ್ರಧಾನಿ ಜಸಿಂದಾ ಆರ್ಡೇನ್‌(39) ಮತ್ತು ಉಕ್ರೇನಿಯನ್‌ ಪ್ರಧಾನಿ ಒಲೆಕ್ಸಿಯ ಹಂಚರಕ್‌(35) ಇದ್ದಾರೆ.

ಸಂಸದೀಯ ಜನಪ್ರತಿನಿಧಿ ಪ್ರಜಾಪ್ರಭುತ್ವ ಹೊಂದಿರುವ ಫಿನ್ಲೆಂಡ್‌ನಲ್ಲಿಮೊದಲಿನಿಂದಲೂ ಮಹಿಳೆಯರು ರಾಜಕಾರಣದಲ್ಲಿಸಕ್ರಿಯವಾಗಿ ತೊಡಗಿಸಿಕೊಂಡಿದ್ದಾರೆ. ಬಹುಶಃ ಜಗತ್ತಿನಲ್ಲೇ ಪ್ರಥಮ ಬಾರಿಗೆ ಮಹಿಳೆಯರಿಗೆ ಅನಿಯಂತ್ರಿತ ಸ್ವಾತಂತ್ರ್ಯ ಹಾಗೂ ಮತದಾನದ ಹಕ್ಕು ನೀಡಿದ ಕೀರ್ತಿ ಫಿನ್ಲೆಂಡ್‌ಗೆ ಸಲ್ಲುತ್ತದೆ. ಅದರ ಪರಿಣಾಮವೇ ಈ ವರೆಗೆ ಮೂವರು ಮಹಿಳೆಯರು ಫಿನ್ಲೆಂಡ್‌ನ ಪ್ರಧಾನಿಯಾಗಲು ಸಾಧ್ಯವಾಗಿದೆ. ಈಗ ಪ್ರಧಾನಿಯಾಗಿರುವ ಸನ್ನಾ ಮರಿನ್‌ ನೇತೃತ್ವದ ಸರಕಾರದ ಸಂಪುಟದ ಒಟ್ಟು 14 ಸಚಿವರ ಪೈಕಿ 9 ಮಹಿಳೆಯರಿದ್ದಾರೆ! ಅದರರ್ಥ, ಫಿನ್ಲೆಂಡ್‌ ರಾಜಕೀಯದಲ್ಲಿಮಹಿಳೆ ಮತ್ತು ಪುರುಷರ ನಡುವಿನ ವ್ಯತ್ಯಾಸ ತೀರಾ ತೆಳುವು. ಹಾಗಾಗಿಯೇ, ಸನ್ನಾ ಮರಿನ್‌ನಂಥ ಯುವತಿ ಚಿಕ್ಕ ವಯಸ್ಸಿಗೇ ಪ್ರಧಾನಿಯಾಗಲು ಸಾಧ್ಯವಾಗುತ್ತದೆ.

ಸೋಷಿಯಲ್‌ ಡೆಮಾಕ್ರಟಿಕ್‌ ಪಾರ್ಟಿಯ ನಾಯಕಿ ಮತ್ತು ಪ್ರಧಾನಿಯಾಗಿದ್ದ ಆಂಟ್ಟಿ ರಿನ್ನಾ ಪ್ರಧಾನಿ ಹುದ್ದೆಯಿಂದ ಕೆಳಗಿಳಿದಾಗ ಪಕ್ಷದ ಕಣ್ಣಿಗೆ ಬಿದ್ದಿದ್ದೇ ಸಾರಿಗೆ ಸಚಿವೆಯಾಗಿದ್ದ ಈ ಸನ್ನಾ ಮರಿನ್‌. ಸೋಷಿಯಲ್‌ ಡೆಮಾಕ್ರಟಿಕ್‌ ಪಕ್ಷದ ಜತೆಗೆ ಇನ್ನೂ ನಾಲ್ಕು ಪಕ್ಷಗಳು ಸೇರಿ ರಚಿಸಿಕೊಂಡಿರುವ ಸರಕಾರದ ನೇತೃತ್ವವನ್ನು ಸನ್ನಾ ವಹಿಸಿದ್ದಾರೆ. ಚಿಕ್ಕ ವಯಸ್ಸಿಗೇ ರಾಜಕಾರಣದಲ್ಲಿಪಳಗಿರುವ ಸನ್ನಾ ಅವರ ಆರಂಭದ ದಿನಗಳೇನೂ ಅತ್ಯುತ್ತಮವಾಗಿರಲಿಲ್ಲ. ಕಾಲೇಜು ಶಿಕ್ಷಣ ಮುಗಿದ ಕೂಡಲೇ 2006ರಲ್ಲಿಸೋಷಿಯಲ್‌ ಡೆಮಾಕ್ರಟಿಕ್‌ ಪಕ್ಷದ ಯುವ ವಿಭಾಗವನ್ನು ಸೇರಿ, 2010ರಿಂದ 2012ರವರೆಗೆ ಅದರ ಮೊದಲ ಉಪಾಧ್ಯಕ್ಷರಾಗಿ ಕಾರ್ಯ ನಿರ್ವಹಿಸಿದರು.

2008ರಲ್ಲಿನಡೆದ ಫಿನ್ನಿಷ್‌ ಮುನ್ಸಿಪಲ್‌ ಚುನಾವಣೆಗೆ ಸನ್ನಾ ಸ್ಪರ್ಧಿಸಿದ್ದರು. 'ಪ್ರಥಮ ಚುಂಬನಂ ದಂತ ಭಗ್ನಂ' ಎಂಬಂತೆ ಅವರಿಗೆ ಸೋಲು ಎದುರಾಯಿತು. ಮಧ್ಯೆ ಸ್ವಲ್ಪ ಬಿಡುವು ತೆಗೆದುಕೊಂಡು ಮತ್ತೆ 2012ರಿಂದ ರಾಜಕಾರಣದಲ್ಲಿಪೂರ್ಣ ಪ್ರಮಾಣದಲ್ಲಿಸನ್ನಾ ಸಕ್ರಿಯರಾದರು. 27ನೇ ವಯಸ್ಸಿನಲ್ಲೇ ಟ್ಯಾಂಪೇರ್‌ ಸಿಟಿ ಕೌನ್ಸಿಲ್‌ಗೆ ಆಯ್ಕೆಯಾದರು. ಇದು ಅವರ ರಾಜಕೀಯ ಜೀವನಕ್ಕೆ ಬಹುದೊಡ್ಡ ತಿರುವು ನೀಡಿತ್ತು. ಅಷ್ಟೇ ಅಲ್ಲದೆ, ಅವರು ಇಲ್ಲಿಂದ ಮತ್ತೆ ಹಿಂದಿರುಗಿ ನೋಡಲೇ ಇಲ್ಲ. ಅವರ ರಾಜಕೀಯ ಪಯಣವು ಪ್ರಧಾನಿಯ ಹುದ್ದೆಯವರೆಗೆ ಟಾಪ್‌ ಗೇರ್‌ನಲ್ಲಿಓಡಿತು. 2013ರಿಂದ 2017ರ ವರೆಗೂ ಸಿಟಿ ಕೌನ್ಸಿಲ್‌ನ ಅಧ್ಯಕ್ಷರಾಗಿದ್ದರು. 2017ರಲ್ಲಿಪುನಃ ಆಯ್ಕೆಯಾದರು. ಆ ಮೇಲೆ ಟ್ಯಾಂಪೇರ್‌ ಪ್ರಾದೇಶಿಕ ಅಸೆಂಬ್ಲಿಯ ಸದಸ್ಯರಾಗಿದ್ದರು. ಇದೇ ಸಮಯದಲ್ಲಿ2013-16ವರೆಗೆ ಪಿರ್ಕಾನ್ಮಾ ರಿಜನಲ್‌ ಕೌನ್ಸಿಲ್‌ನ ಮೇಂಬರ್‌ ಕೂಡ ಆಗಿದ್ದರು.

30ನೇ ವರ್ಷದಲ್ಲಿಅಂದರೆ, 2014ರಲ್ಲಿಸನ್ನಾ ಸೋಷಿಯಲ್‌ ಡೆಮಾಕ್ರಟಿಕ್‌ ಪಾರ್ಟಿಯ ಎರಡನೇ ಡೆಪ್ಯುಟಿ ಚೇರ್ಮನ್ನರಾಗಿ ಆಯ್ಕೆಯಾದರು. 2015ರಲ್ಲಿಪಿರ್ಕಾನ್ಮಾ ಪ್ರದೇಶದ ಪ್ರತಿನಿಧಿಯಾಗಿ ಫಿನ್ಲೆಂಡ್‌ ಸಂಸತ್ತಿಗೆ ಅಡಿಯಿಟ್ಟರು. ನಾಲ್ಕು ವರ್ಷಗಳ ಬಳಿಕ ಪುನಃ ಆಯ್ಕೆಗೊಂಡ ಸನ್ನಾ, 2019ರ ಜೂನ್‌ 6ರಂದು ಸಾರಿಗೆ ಮತ್ತು ಸಂವಹನ ಇಲಾಖೆಯ ಸಚಿವೆಯಾಗಿ ನೇಮಕಗೊಂಡರು.

ಹಂತ ಹಂತವಾಗಿ ರಾಜಕೀಯದಲ್ಲಿಮೇಲೇರಿದ ಸನ್ನಾ ಮರಿನ್‌ಗೆ ಚಿಕ್ಕ ವಯಸ್ಸಿಗೇ ದೇಶದ ಪ್ರಧಾನಿಯಾಗಬಹುದೆಂಬ ಸಣ್ಣ ಸುಳಿವು ಕೂಡ ಆರಂಭದ ದಿನಗಳಲ್ಲಿಇರಲಿಲ್ಲವೇನೋ? ಆದರೆ, ಅವರ ಬದ್ಧತೆ ಮತ್ತು ದೇಶದೆಡೆಗಿನ ಕಾಳಜಿ, ಸಮ್ಮಿಶ್ರ ಸರಕಾರವನ್ನು ಕರೆದೊಯ್ಯುವ ಛಾತಿ ಅವರನ್ನು ಇಂದು ದೇಶದ ಉನ್ನತ ಹುದ್ದೆಯವರೆಗೂ ಕರೆ ತಂದಿದೆ. ಸನ್ನಾಗಿಂತ ಮೊದಲ ಪ್ರಧಾನಿಯಾಗಿದ್ದ ರಿನ್ನಾ ಅವರು ಪೋಸ್ಟಲ್‌ ಮುಷ್ಕರವನ್ನು ಸರಿಯಾಗಿ ನಿರ್ವಹಣೆ ಮಾಡಲಿಲ್ಲಎಂಬ ಆರೋಪ ಕೇಳಿಬಂದಿತ್ತು. ಈ ಹಿನ್ನೆಲೆಯಲ್ಲಿಅವರು ಅಧಿಕಾರದಿಂದ ಕೆಳಗಿಳಿಯಬೇಕಾಯಿತು.

ಸನ್ನಾ ಮರಿನ್‌ ಅವರಿಗೇನೂ ರಾಜಕೀಯ ಕುಟುಂಬದ ಹಿನ್ನೆಲೆ ಇಲ್ಲ; ಶ್ರೀಮಂತರೂ ಅಲ್ಲ. 1985 ನವೆಂಬರ್‌ 16ರಂದು ಸನ್ನಾ ಮರಿನ್‌ ಅವರು ಹೆಲ್ಸಿಂಕಿಯಲ್ಲಿಜನಸಿದರು. ತಂದೆ ಕುಡುಕನಾಗಿದ್ದ. ಹೀಗಾಗಿ ತಂದೆ-ತಾಯಿಗಳಿಬ್ಬರು ಸನ್ನಾ ತೀರಾ ಚಿಕ್ಕವಳಿದ್ದಾಗಲೇ ಬೇರೆ ಬೇರೆಯಾದರು. ಆಗ ಇಡೀ ಕುಟುಂಬ ಹಣಕಾಸಿನ ಮುಗ್ಗಟ್ಟು ಎದುರಿಸುತ್ತಿತ್ತು. ತಾಯಿ ಮತ್ತು ತಾಯಿಯ ಗೆಳತಿ(ಸಂಗಾತಿ)ಯ ಪೋಷಕತ್ವದಲ್ಲಿಸನ್ನಾ ಬೆಳೆದರು. ಸನ್ನಾ ಅವರದ್ದು ರೇನ್‌ಬೋ ಫ್ಯಾಮಿಲಿ(ಎಲ್‌ಜಿಬಿಟಿ ಕಮ್ಯುನಿಟಿ). ತಮ್ಮ ಈ ಕುಟುಂಬದ ಬಗ್ಗೆ ಮುಕ್ತವಾಗಿ ಮಾತನಾಡುವ ಅವಕಾಶವಿರಲಿಲ್ಲ. ಫಿನ್ಲೆಂಡ್‌ ಸಮಾಜದಲ್ಲಿಸಲಿಂಗ ಕುಟುಂಬಗಳು ನಿಷಿದ್ಧವಾಗಿವೆ. ಇಂಥ ಸಾಮಾಜಿಕ ಪರಿಸ್ಥಿತಿಯಲ್ಲಿಸನ್ನಾ ಅವರ ಮೇಲಾದ ಪರಿಣಾಮ ಬಗ್ಗೆ ನಾವು ಊಹಿಸಬಹುದು.

ಮಗುವಾಗಿ ತಾವು ಎದುರಿಸಿದ ಆ ದಿನಗಳನ್ನು ಅವರದ್ದೇ ಮಾತಿನಲ್ಲಿಹೇಳುವುದಾದರೆ, ಅವರಿಗೆ ಅದು ಸಂಪೂರ್ಣ ನಿಶ್ಶಬ್ಧ ರೀತಿಯ ಅನುಭವ. ಇದು ಅವರಿಗೆ ಅಸಮರ್ಥತೆಯ ಭಾವನೆಯನ್ನು ತಂದುಕೊಡುತ್ತಿತ್ತು. ಅವರನ್ನು ಒಂದು ಕುಟುಂಬ ರೀತಿಯಲ್ಲಿಅಥವಾ ಇನ್ನುಳಿದವರ ಜತೆ ಸರಿಸಮಾನವಾಗಿ ನೋಡುವ ಸ್ಥಿತಿಯಲ್ಲಿಫಿನ್ಲೆಂಡ್‌ ಸಮಾಜ ಇಲ್ಲ. ಆದರೆ, ಇದಾವುದೂ ಸನ್ನಾ ಅವರ ಆತ್ಮವಿಶ್ವಾಸವನ್ನು ಕುಂದಿಸಲಿಲ್ಲ. ತಮಗೆ ಬೇಕಾದದ್ದನ್ನು ಸಾಧಿಸುವ ಛಲಕ್ಕೆ ಅಡ್ಡಿಯಾಗಲಿಲ್ಲ.

ತಮ್ಮ ಆರಂಭದ ದಿನಗಳನ್ನು ಬಹುತೇಕ ಅವರು ಬೇಕರಿಯಲ್ಲಿಕೆಲಸ ಮಾಡುತ್ತಾ ಕಳೆದರು. ವಿಶೇಷ ಎಂದರೆ, ಅವರ ಕುಟುಂಬದಲ್ಲಿವಿಶ್ವವಿದ್ಯಾಲಯ ಮೆಟ್ಟಿಲು ತುಳಿದ ಮೊದಲ ವ್ಯಕ್ತಿ ಇವರು. ಸನ್ನಾ ಅವರ ಪ್ರತಿ ಸಾಹಸಕ್ಕೂ ತಾಯಿಯಿಂದ ಬೆಂಬಲ ದೊರೆಯುತ್ತಿತ್ತು ಎಂದು ಹೇಳಿಕೊಂಡಿದ್ದಾರೆ. ರಾಜಕಾರಣದ ಆಚೆಯೂ ಕೌಟುಂಬಿಕ ಜೀವನಕ್ಕೆ ಹೆಚ್ಚು ಮಹತ್ವ ನೀಡುವ ಸನ್ನಾ, ಮಾರ್ಕೋಸ್‌ ರಾಯ್ಕೊನೆನ್‌ ಎಂಬವರನ್ನು ವಿವಾಹವಾಗಿದ್ದು, 2018ರ ಜನವರಿಯಲ್ಲಿಅವರು ಎಮ್ಮಾ ಎಂಬ ಹೆಣ್ಣು ಮಗುವಿನ ತಾಯಿಯಾದರು. ಮಗುವಿಗೆ ಈಗ 22 ತಿಂಗಳು. ಸೋಷಿಯಲ್‌ ಮೀಡಿಯಾದಲ್ಲಿಗರ್ಭಿಣಿಯಾದಾಗಿನಿಂದ ಹಿಡಿದು ತಾಯಿಯಾಗುವವರೆಗಿನ ಮಾಹಿತಿಯನ್ನು ಹಂಚಿಕೊಳ್ಳುತ್ತಾ ಬಂದಿದ್ದಾರೆ. ಆ ಮೂಲಕ ವೃತ್ತಿನಿರತ ತಾಯಿಯಾಗುವ ಮಹಿಳೆಯರಿಗೆ ಸ್ಫೂರ್ತಿಯಾಗಿದ್ದಾರೆ.

ಯುನಿವರ್ಸಿಟಿ ಆಫ್‌ ಟ್ಯಾಂಪೇರ್‌ನಿಂದ ಪದವಿ ಪಡೆದಿರುವ ಸನ್ನಾ ಫಿನ್ನಿಷ್‌, ಇಂಗ್ಲಿಷ್‌ ಮತ್ತು ಸ್ವೀಡಿಷ್‌ ಭಾಷೆಗಳಲ್ಲಿಸರಾಗವಾಗಿ ಮಾತನಾಡುತ್ತಾರೆ. ಹೊರಾಂಗಣ ಚಟುವಟಿಕೆಗಳೆಂದರೆ ತುಂಬ ಇಷ್ಟ. ಸಮ್ಮಿಶ್ರ ಸರಕಾರದ ನೇತೃತ್ವ ವಹಿಸಿರುವ ಸನ್ನಾ ಎದುರು ಆಡಳಿತವೇನೂ ಸುಲಭವಾಗಿಲ್ಲ. ಪೋಸ್ಟಲ್‌ ಮುಷ್ಕರದಿಂದಾಗಿ ಮುನಿಸಿಕೊಂಡಿರುವ ಮೈತ್ರಿ ಪಕ್ಷಗಳನ್ನು ಒಂದೇ ದಿಕ್ಕಿನಡಿ ಕೊಂಡೊಯ್ಯುವ ಮಹತ್ತರ ಜವಾಬ್ದಾರಿ ಇದೆ. ಸರಕಾರದ ಬಗ್ಗೆ ಜನರು ಕಳೆದುಕೊಂಡಿರುವ ವಿಶ್ವಾಸವನ್ನು ಮತ್ತೆ ಗಳಿಸುವ ದಾರಿ ಕೂಡ ಅಷ್ಟು ಸುಲಭವಾಗಿಲ್ಲ. ಹಾಗಾಗಿ, ತೀರಾ ಚಿಕ್ಕ ವಯಸ್ಸಿಗೇ ಪ್ರಧಾನಿಯಾಗಿರುವ ಸನ್ನಾ ಇದೆಲ್ಲವನ್ನೂ ನಿಭಾಯಿಸಬಲ್ಲರೇ ಎಂಬ ಪ್ರಶ್ನೆಗೆ ಅವರು ಆತ್ಮವಿಶ್ವಾಸದಿಂದಲೇ, ''ನನ್ನ ವಯಸ್ಸು ಅಥವಾ ಲಿಂಗದ ಬಗ್ಗೆ ಎಂದೂ ಯೋಚಿಸುವುದಿಲ್ಲ,'' ಎನ್ನುತ್ತಾರೆ. ಅಂದರೆ, ರಾಜಕಾರಣವೇ ಇರಲಿ, ಆಡಳಿತ ರಂಗವೇ ಇರಲಿ ನೀವು ಹೇಗೆ ವರ್ತಿಸುತ್ತೀರಿ, ನಿಮ್ಮ ಸಾಮರ್ಥ್ಯವನ್ನು ಹೇಗೆ ಪ್ರತಿಷ್ಠಾಪಿಸುತ್ತೀರಿ ಎಂಬುದಷ್ಟೇ ಮಹತ್ವದ್ದಾಗಿರುತ್ತದೆ. ಬಾಕಿ ಎಲ್ಲವೂ ನಗಣ್ಯ ಎಂಬುದನ್ನು ಅವರ ಮಾತುಗಳು ಧ್ವನಿಸುತ್ತವೆ.

ಸಾಂಸ್ಕೃತಿಕವಾಗಿ ಮತ್ತು ರಾಜಕೀಯವಾಗಿ ಭಿನ್ನವಾಗಿರುವ ಫಿನ್ಲೆಂಡ್‌ ದೇಶದ ಚುಕ್ಕಾಣಿ ಹಿಡಿದಿರುವ ಸನ್ನಾ ಮರಿನ್‌, ಜಗತ್ತಿನ ಯುವತಿಯರಿಗೆ ಹೊಸ ರೋಲ್‌ ಮಾಡೆಲ್‌ ಅಂದರೆ ತಪ್ಪಲ್ಲ.

ಈ ಲೇಖನವು ವಿಜಯ ಕರ್ನಾಟಕದ 2019ರ ಡಿಸೆಂಬರ್ 15ರ ಸಂಚಿಕೆಯಲ್ಲಿ ಪ್ರಕಟಗೊಂಡಿದೆ.

Safety Apps: ಮಹಿಳೆಯರ ಫೋನ್‌ನಲ್ಲಿ ಇರಲೇಬೇಕಾದ ಆ್ಯಪ್ಸ್

'ಮಧ್ಯರಾತ್ರಿಯಲ್ಲಿ ಮಹಿಳೆಯೊಬ್ಬಳು ಸುರಕ್ಷಿತವಾಗಿ ಸಂಚರಿಸಿದಾಗಲೇ ನಮಗೆ ನಿಜವಾದ ಸ್ವಾತಂತ್ರ್ಯ ಸಿಕ್ಕ ಹಾಗೆ' ಎಂದು ಮಹಾತ್ಮ ಗಾಂಧಿ ಹೇಳಿದ್ದರು. ಆದರೆ, ಇತ್ತೀಚಿನ ಅತ್ಯಾಚಾರ, ಮಹಿಳೆಯರ ಮೇಲಿನ ದೌರ್ಜನ್ಯಗಳನ್ನು ಗಮನಿಸಿದರೆ ನಮಗೆ ಇನ್ನೂ ಸ್ವಾತಂತ್ರ್ಯ ಸಿಕ್ಕಿಲ್ಲಎಂದು ಹೇಳಬೇಕು. ಯಾಕೆಂದರೆ, ಇತ್ತೀಚೆಗಷ್ಟೇ ಬೆಳಕಿಗೆ ಬಂದ ತೆಲಂಗಾಣದ 'ದಿಶಾ ಅತ್ಯಾಚಾರ' ಪ್ರಕರಣವು ಇಡೀ ದೇಶದಲ್ಲಿಆಕ್ರೋಶಕ್ಕೆ ಕಾರಣವಾಗಿದೆ. 2012ರಲ್ಲಿ ದಿಲ್ಲಿಯಲ್ಲಿ ನಡೆದ 'ನಿರ್ಭಯಾ ಪ್ರಕರಣ'ವಂತೂ ಇಡೀ ಜಗತ್ತನ್ನೇ ತಲ್ಲಣಗೊಳಿಸಿತ್ತು. ವಸ್ತುಸ್ಥಿತಿ ಹೀಗಿದ್ದಾಗಲೂ, ಲಭ್ಯವಿರುವ ತಂತ್ರಜ್ಞಾನವನ್ನು ಬಳಸಿಕೊಂಡು ಮಹಿಳೆಯರು ತಮ್ಮನ್ನು ತಾವು ತಕ್ಕಮಟ್ಟಿಗಾದರೂ ಸುರಕ್ಷಿತವಾಗಿಟ್ಟುಕೊಳ್ಳಬಹುದು. ಸ್ಮಾರ್ಟ್‌ಫೋನ್‌ ದಿನಮಾನದಲ್ಲಿ ಬದುಕುತ್ತಿರುವ ನಮಗೆ ತಂತ್ರಜ್ಞಾನ ಲಾಭ ಅಗಾಧವಾಗಿದೆ. ವಿಶೇಷವಾಗಿ ಮಹಿಳೆಯ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ಅನೇಕ ಆ್ಯಪ್‌ಗಳು ಕಾರ್ಯಾಚರಿಸುತ್ತಿವೆ. ವಿಷಮ ಸ್ಥಿತಿಯಲ್ಲಿಅಲರ್ಟ್‌ ರವಾನಿಸುವ, ಅಸುರಕ್ಷಿತ ಪ್ರದೇಶಗಳನ್ನು ಎಚ್ಚರಿಕೆ ನೀಡುವುದು ಸೇರಿದಂತೆ ಅನೇಕ ಫೀಚರ್‌ಗಳನ್ನು ಒಳಗೊಂಡ ಆ್ಯಪ್‌ಗಳಿವೆ. ಅಂಥ ಆ್ಯಪ್‌ಗಳ ಬಗ್ಗೆ ಇಲ್ಲಿದೆ ಮಾಹಿತಿ.

ಸುರಕ್ಷಾ ಆ್ಯಪ್‌ (Suraksha)

ಈ ಆ್ಯಪ್‌ನಲ್ಲಿ ಬಳಕೆದಾರರು ತುರ್ತು ಸಂದರ್ಭದಲ್ಲಿ ಸಂಪರ್ಕಿಸಬಹುದಾದ ಸ್ನೇಹಿತರು, ಪೋಷಕರ ಮೊಬೈಲ್‌ ನಂಬರ್‌ಗಳನ್ನು ಸೇರಿಸಬಹುದು. ತುರ್ತು ಸಂದರ್ಭದಲ್ಲಿ ಆ್ಯಪ್‌ ತರೆದು ಪವರ್‌ ಬಟನ್‌ ಅನ್ನು ಒತ್ತಿ ಹಿಡಿದರೆ ಪೊಲೀಸ್‌ ಸಹಾಯವಾಣಿಗೆ ಕರೆ ಹೋಗುತ್ತದೆ. ಇಷ್ಟು ಮಾತ್ರವಲ್ಲದೇ, ಬಳಕೆದಾರರು ಇರುವ ಪ್ರದೇಶದ ಸ್ಥಳ ಗುರುತು, ಆಡಿಯೊ ಮತ್ತು ವಿಡಿಯೊ ಕೂಡ ರವಾನೆಯಾಗುತ್ತದೆ. ಜತೆಗೆ, ಸೂಚಿಸಲಾದ ತುರ್ತು ನಂಬರ್‌ಗಳಿಗೂ ಕರೆ ಕೂಡ ಹೋಗುತ್ತದೆ. ಇದರಿಂದಾಗಿ ಸಂಕಷ್ಟದಲ್ಲಿ ಸಿಲುಕಿರುವ ಮಹಿಳಾ ಬಳಕೆದಾರರು ನೆರವು ಪಡೆಯಲು ಸಾಧ್ಯವಾಗುತ್ತದೆ. ಅಂದ ಹಾಗೆ ಈ ಆ್ಯಪ್‌ ಅನ್ನು ಬೆಂಗಳೂರು ಪೊಲೀಸರು ಅಭಿವೃದ್ಧಿಪಡಿಸಿದ್ದಾರೆ.

ಎಸ್‌ಒಎಸ್‌(SOS Stay Safe)

ಯಾವುದೇ ರೀತಿಯ ಕಷ್ಟದಲ್ಲಿ ಸಿಲುಕಿದಾಗ ಸಹಾಯಕ್ಕಾಗಿ ಮತ್ತೊಬ್ಬರ ನೆರವು ಪಡೆಯಲು ಈ ಆ್ಯಪ್‌ ಅವಕಾಶ ಕಲ್ಪಿಸಿಕೊಡುತ್ತದೆ. ಇಂಥ ಸಂದರ್ಭದಲ್ಲಿಈ ಆ್ಯಪ್‌ ಬಳಕೆದಾರರ ಗೆಳೆಯರು, ಕುಟುಂಬದ ಸದಸ್ಯರಿಗೆ ತ್ವರಿತ ಗತಿಯಲ್ಲಿಸಂದೇಶವನ್ನು ರವಾನಿಸುತ್ತದೆ. ಬಳಕೆದಾರರು ತಮ್ಮ ಕೈಯಲ್ಲಿರುವ ಉಪಕರಣವನ್ನು ಅಲುಗಾಡಿಸಿದರೆ ಸಾಕು ಎಸ್‌ಒಎಸ್‌ ಸಂದೇಶ ಹೋಗುತ್ತದೆ. ಲೈಂಗಿಕ ಕಿರುಕುಳ ಅಥವಾ ವೈದ್ಯಕೀಯ ತುರ್ತು ಪರಿಸ್ಥಿತಿಯಲ್ಲಿ ಈ ಆ್ಯಪ್‌ನ ನೆರವು ಪಡೆಯಬಹುದು.

​ಸ್ಮಾರ್ಟ್‌ 24x7(Smart 24x7)'

ಈ ಆ್ಯಪ್‌ನಲ್ಲಿರುವ ಪ್ಯಾನಿಕ್‌ ಬಟನ್‌ ಪ್ರೆಸ್‌ ಮಾಡಿದರೆ ಪೊಲೀಸರಿಗೆ ಕರೆ ಹೋಗುತ್ತದೆ. ಹಾಗೆಯೇ ಈ ಮೊದಲೇ ಬಳಕೆದಾರರು ಸೆಟ್‌ ಮಾಡಿದ ಫೋನ್‌ ನಂಬರ್‌ಗಳಿಗೂ ಕರೆ ಮಾಡುವ ಅವಕಾಶವನ್ನು ಈ ಆ್ಯಪ್‌ ಒದಗಿಸುತ್ತದೆ. ಒಂದು ವೇಳೆ, ಜಿಪಿಆರ್‌ಎಸ್‌ ಕಾರ್ಯನಿರ್ವಹಿಸದಿದ್ದ ಪಕ್ಷದಲ್ಲಿ ಲೊಕೇಷನ್‌ ಮಾಹಿತಿಯನ್ನು ಎಸ್‌ಎಂಎಸ್‌ ಮೂಲಕ ಈ ಆ್ಯಪ್‌ ಕಳುಹಿಸುತ್ತದೆ. ಟ್ರ್ಯಾಕಿಂಗ್‌, ಕಸ್ಟಮ್‌ ಕೇರ್‌ ಮತ್ತು ಚಾಟ್‌ ಸೇರಿದಂತೆ ಇನ್ನೂ ಅನೇಕ ಫೀಚರ್‌ಗಳಿವೆ. ತುರ್ತು ಸಂದರ್ಭದಲ್ಲಿ ಬಳಕೆದಾರರಿರುವ ಜಾಗದ ಆಡಿಯೊ-ವಿಡಿಯೊವನ್ನು ದಾಖಲಿಸಿಕೊಳ್ಳುತ್ತದೆ.

ಮೈ ಸೇಫ್ಟಿಪಿನ್‌(My Safetipin)

ಮ್ಯಾಪ್‌ ಬೇಸ್ಡ್‌ ಸೇಫ್ಟಿ ಆ್ಯಪ್‌ ತುಂಬ ಉಪಯುಕ್ತವಾಗಿದೆ. ಈ ಆ್ಯಪ್‌ ವಿಶೇಷ ಏನೆಂದರೆ, ನೀವಿರುವ ಸ್ಥಳದ ಸುರಕ್ಷತೆಯ ಶ್ರೇಯಾಂಕವನ್ನು ಸೂಚಿಸುತ್ತದೆ. ಆ್ಯಪ್‌ ನಕ್ಷೆಯಲ್ಲಿರುವ ಪಿನ್‌ ಸ್ಥಳದ ಸುರಕ್ಷತೆಯ ಶ್ರೇಯಾಂಕವನ್ನು ಒದಗಿಸುತ್ತದೆ. ಅಸುರಕ್ಷಿತ ಪ್ರದೇಶವಾಗಿದ್ದರೆ ಪಿನ್‌ ಕೆಂಪು ಬಣ್ಣದ್ದಾಗಿರುತ್ತದೆ. ಸುರಕ್ಷಿತ ಪ್ರದೇಶವಾಗಿದ್ದರೆ ಅದು ಹಸಿರು ಬಣ್ಣದ್ದಾಗಿರುತ್ತದೆ. ಕಡಿಮೆ ಸುರಕ್ಷತೆಯ ಪ್ರದೇಶವನ್ನು ಅಂಬರ್‌(ತುಸು ಹಳದಿ) ಪಿನ್‌ ಸೂಚಿಸುತ್ತದೆ. ನೀವಿರುವ ಪ್ರದೇಶದಲ್ಲಿನ ಸಾರ್ವಜನಿಕ ಸಾರಿಗೆ, ಅಲ್ಲಿರುವ ಪೊಲೀಸ್‌ ಠಾಣೆ, ಫಾರ್ಮಸಿ ಅಥವಾ ಹತ್ತಿರದ ಎಟಿಎಂ, ಜನಸಂದಣಿ ಪ್ರದೇಶ ಮಾಹಿತಿ ನೀಡುವುದು ಮಾತ್ರವಲ್ಲದೆ, ರಿಯಲ್‌ ಟೈಮ್‌ ಲೊಕೇಷನ್‌ ವಿವರವನ್ನು ಜಿಪಿಎಸ್‌ ಟ್ರ್ಯಾಕಿಂಗ್‌ ಮೂಲಕ ನಿಮ್ಮ ಹತ್ತಿರದವರೆಗೆ ರವಾನಿಸುತ್ತದೆ. ಉಳಿದ ಬಳಕೆದಾರರಿಗೆ ನೆರವಾಗುವ ನಿಟ್ಟಿನಲ್ಲಿ ನಿಮಗೆ ಅಸುರಕ್ಷಿತ ಎನಿಸಿದ ಪ್ರದೇಶವನ್ನೂ ಮ್ಯಾಪ್‌ನಲ್ಲಿ ಪಿನ್‌ ಮಾಡಬಹುದು.

ರೆಸ್ಕೂಯರ್‌ (Rescuer)

ಬಳಕೆದಾರರು ಈ ಆ್ಯಪ್‌ನಲ್ಲಿರುವ ಎಮರ್ಜೆನ್ಸಿ ಟ್ಯಾಬ್‌ ಪ್ರೆಸ್‌ ಮಾಡಿದರೆ ತಕ್ಷಣವೇ ಗೂಗೂಲ್‌ ಲೊಕೇಷನ್‌ ಸಹಿತ ಸಂದೇಶವನ್ನು ಬಳಕೆದಾರರ ಕಾಂಟಾಕ್ಟ್ ಲಿಸ್ಟ್‌ ಮತ್ತು ಫೇಸ್‌ಬುಕ್‌ ಫ್ರೆಂಡ್‌ ಲಿಸ್ಟ್‌ನಲ್ಲಿರುವ ಐವರಿಗೆ ಸಂದೇಶವನ್ನು ಕಳುಹಿಸುತ್ತದೆ. ಹಾಗೆಯೇ, ತುರ್ತು ಸಂದರ್ಭದಲ್ಲಿ ಇಬ್ಬರಿಕೆ ಕರೆ ಮಾಡುವ ಆಯ್ಕೆಯನ್ನು ಹೊಂದಿದೆ.

ನಿರ್ಭಯ(Nirbhaya)

ಮಹಿಳೆಯರ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡೇ ಈ ಆ್ಯಪ್‌ ಅನ್ನು ರೂಪಿಸಲಾಗಿದೆ. ಬಳಕೆದಾರರು ದಾಖಲಿಸಿದ ಫೋನ್‌ ನಂಬರ್‌ಗಳಿಗೆ ಅಲರ್ಟ್‌ ರವಾನಿಸುವ ಕೆಲಸವನ್ನು ಇದು ಮಾಡುತ್ತದೆ. ಅಸುರಕ್ಷಿತ ಪ್ರದೇಶದ ಬಗ್ಗೆಯೂ ಇದು ಮಾಹಿತಿ ನೀಡುತ್ತದೆ. ಬಳೆಕದಾರರು ಅಂಥ ಪ್ರದೇಶಕ್ಕೆ ಹೋದಾಗ ಈ ಮಾಹಿತಿಯನ್ನು ನೀಡುತ್ತದೆ.

ಸಿಟಿಜನ್‌ಕಾಪ್‌ (CitizenCop)

ಈ ಆ್ಯಪ್‌ ಬಳಸಿಕೊಂಡು ನೀವಿರುವ ಸ್ಥಳಲ್ಲಿ ನಡೆಯುವ ಕ್ರಿಮಿನಲ್‌ ಕೆಲಸಗಳು ಅಥವಾ ಕಾನೂನು ಬಾಹಿರ ಚಟುವಟಿಕೆಗಳ ಬಗ್ಗೆ ರಿಪೋರ್ಟ್‌ ಮಾಡಬಹುದು. ಮತ್ತು ನಿಮ್ಮ ಹೆಸರನ್ನು ಗುಪ್ತವಾಗಿಡಲಾಗುತ್ತದೆ. ಈ ಆ್ಯಪ್‌ನಲ್ಲಿ ಲಕ್ಷಣ್‌ರೇಖಾ ಎಂಬ ಫೀಚರ್‌ ಇದ್ದು, ಅದನ್ನು ಮಹಿಳೆಯರು ತುರ್ತು ಸಂದರ್ಭದಲ್ಲಿ ಬಳಸಬಹುದು. ಟ್ರ್ಯಾಕಿಂಗ್‌, ಎಮರ್ಜೆನ್ಸಿ ಕರೆ, ಎಸ್‌ಒಎಸ್‌ ಎಚ್ಚರಿಕೆಗಳನ್ನು ರವಾನಿಸುತ್ತದೆ.

​ಚಿಲ್ಲಾ(Chilla)

ತುರ್ತು ಸಂದರ್ಭದಲ್ಲಿ ಮಹಿಳೆಯರು ತಮ್ಮ ಫೋನ್‌ ಅನ್ನು ಬಳಸಲು ಸಾಧ್ಯವಾಗದಿದ್ದಾಗ, ಜೋರಾಗಿ ಕೂಗುವ ಮೂಲಕ ಈ ಚಿಲ್ಲಾ ಆ್ಯಪ್‌ ಸಕ್ರಿಯಗೊಳಿಸಬಹುದು. ಆಗ ಈ ಆ್ಯಪ್‌ ಪೋಷಕರಿಗೆ ತುರ್ತು ಸಂದೇಶವನ್ನು ರವಾನಿಸುತ್ತದೆ. ಇದರ ಹೊರತಾಗಿಯೂ, ಈ ಮೊದಲೇ ಸೆಟ್‌ ಮಾಡಿದ ಫೋನ್‌ ನಂಬರ್‌ಗಳಿಗೂ ಸಂದೇಶಗಳನ್ನು ಕಳುಹಿಸುತ್ತದೆ. ಇದಕ್ಕಾಗಿ ನೀವು ಪವರ್‌ ಬಟನ್‌ ಅನ್ನು 5 ನಿಮಿಷದವರೆಗೆ ಒತ್ತಿ ಹಿಡಿಯಬೇಕು.

ಈ ಲೇಖನವು ವಿಜಯಕರ್ನಾಟಕದ 2019ರ ಡಿಸೆಂಬರ್ 12ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.