Tangi v/s Tik Tok: ಟಿಕ್‌ ಟಾಕ್‌ಗೆ ಟಕ್ಕರ್‌ ಕೊಡಲು ಬಂತು ಗೂಗಲ್‌ನ ಹೊಸ ಆ್ಯಪ್‌

- ಮಲ್ಲಿಕಾರ್ಜುನ ತಿಪ್ಪಾರ
ಟಿಕ್‌ ಟಾಕ್‌ ಎಂಬ ಕಿರು ಅವಧಿಯ ವಿಡಿಯೊ ಆ್ಯಪ್‌ ಹುಟ್ಟು ಹಾಕಿದ ಉತ್ಕರ್ಷ ಅಗಾಧ. ಅತಿ ಕಡಿಮೆ ಅವಧಿಯಲ್ಲೇ ಇದಕ್ಕೆ ಜಗತ್ತಿನಾದ್ಯಂತ 50 ಕೋಟಿಗೂ ಅಧಿಕ ಸಕ್ರಿಯ ಬಳಕೆದಾರರಿದ್ದಾರೆ. ಭಾರತದಲ್ಲೂ ಟಿಕ್‌ ಟಾಕ್‌ 12 ಕೋಟಿ ಸಕ್ರಿಯ ಬಳಕೆದಾರರನ್ನು ಹೊಂದಿದೆ. ಈ ಅಂಕಿ ಸಂಖ್ಯೆಗಳೇ ಟಿಕ್‌ ಟಾಕ್‌ ಜನಪ್ರಿಯತೆಯನ್ನು ಸೂಚಿಸುತ್ತದೆ. ಇದೆಲ್ಲಾ ಯಾಕೆ ಹೇಳಬೇಕಾಯಿತು ಎಂದರೆ, ಇಂಟರ್ನೆಟ್‌ನ ದೈತ್ಯ ಕಂಪನಿಗಳಾದ ಗೂಗಲ್‌ ಮತ್ತು ಫೇಸ್‌ಬುಕ್‌ ಕೂಡ ಇದೀಗ, ಟಿಕ್‌ ಟಾಕ್‌ ಮಾದರಿಯ ಆ್ಯಪ್‌ಗಳನ್ನು ಹೊಂದಲು ಪ್ರಯತ್ನಿಸುತ್ತಿವೆ.

ನೋಕಿಯಾ ಉದಾಹರಣೆ

ಸ್ಪರ್ಧಾತ್ಮಕ ಜಗತ್ತಿನಲ್ಲಿನಿತ್ಯದ ಹೊಸ ಆವಿಷ್ಕಾರಗಳಿಗೆ ಒಗ್ಗಿಕೊಳ್ಳದೇ ಹೋದರೆ ಮಾರುಕಟ್ಟೆಯಿಂದಲೇ ಕಣ್ಮರೆಯಾಗುವ ಅಪಾಯಗಳಿರುತ್ತವೆ. ಇದಕ್ಕೆ ಬೆಸ್ಟ್‌ ಉದಾಹರಣೆ ಎಂದರೆ- ನೋಕಿಯಾ. ಒಂದು ಕಾಲದಲ್ಲಿ ಮೊಬೈಲ್‌ ಫೋನ್‌ ಮಾರುಕಟ್ಟೆಯಲ್ಲಿ ಪ್ರಭುತ್ವ ಸಾಧಿಸಿದ್ದ ನೋಕಿಯಾ, ಸ್ಮಾರ್ಟ್‌ಫೋನ್‌ಗಳ ಜಮಾನದಲ್ಲಿ ಹಿಂದೆ ಬಿತ್ತು. ಅದರರ್ಥ ಭವಿಷ್ಯದ ದಿನಗಳನ್ನು ಊಹಿಸುವಲ್ಲಿ ವಿಫಲವಾಗಿದ್ದೇ ಇದಕ್ಕೆ ಕಾರಣ.

ಟ್ಯಾಂಗಿ ಸೃಷ್ಟಿ

ಇದೇ ಮಾತನ್ನು ಟಿಕ್‌ ಟಾಕ್‌ ವಿಷಯದಲ್ಲೂ ಹೇಳಬಹುದು. ಈಗೇನಿದ್ದರೂ ಕಿರು ಅವಧಿಯ ವಿಡಿಯೊ ಆ್ಯಪ್‌ಗಳದ್ದೇ ಕಾರುಬಾರು. ಇದಕ್ಕೆ ಒಂದು ನಿರ್ದಿಷ್ಟ ದಿಕ್ಕು ತೋರಿಸಿದ್ದು ಟಿಕ್‌ ಟಾಕ್‌. ಈಗ ಅದೇ ಹಾದಿಯನ್ನು ಗೂಗಲ್‌ ಕೂಡ ತುಳಿಯುತ್ತಿದೆ. ಯೂಟ್ಯೂಬ್‌ನಂಥ ಜನಪ್ರಿಯ ವಿಡಿಯೋ ವೇದಿಕೆ ಇದ್ದರೂ ಗೂಗಲ್‌ ಇದೀಗ ಟ್ಯಾಂಗಿ(Tangi) ಕಿರು ಅವಧಿಯ ವಿಡಿಯೊ ಆ್ಯಪ್‌ ಬಿಡುಗಡೆ ಮಾಡಿದೆ. ಸದ್ಯ ಇದು ಪ್ರಯೋಗಾತ್ಮಕ ಆ್ಯಪ್‌ ಆಗಿದ್ದು, ಟ್ಯಾಂಗಿ ಎಂಬ ಪದವನ್ನು The Words TeAch aNd Glveನಿಂದ ಸೃಷ್ಟಿಸಲಾಗಿದೆ. ಈ ಹೊಸ ಮಾದರಿಯ ಆ್ಯಪ್‌ನಲ್ಲಿ ಬಳಕೆದಾರರು 60 ಸೆಕೆಂಡ್‌ಗಳ ಅವಧಿಯ ವಿಡಿಯೋ ಅಪ್‌ಲೋಡ್ ಮಾಡಬಹುದು. ಇಲ್ಲೂಆರ್ಟ್‌, ಡಿಐವೈ(ಡೂ ಇಟ್‌ ಯುವರ್‌ಸೆಲ್ಫ್), ಕುಕಿಂಗ್‌, ಫ್ಯಾಷನ್‌, ಬ್ಯೂಟಿ, ಲೈಫ್‌ಸ್ಟೈಲ್‌ ಸೇರಿ ನಾನಾ ವಿಧದ ವಿಭಾಗಗಳಿವೆ.

ಐಒಎಸ್‌ನಲ್ಲಿ ಮಾತ್ರ ಲಭ್ಯ

ಸದ್ಯಕ್ಕೆ ಈ ಆ್ಯಪ್‌ ಐಒಎಸ್‌ನಲ್ಲಿ ಮಾತ್ರ ಲಭ್ಯವಿದ್ದು, ಆ್ಯಂಡ್ರಾಯ್ಡ್ ಬಳಕೆದಾರರಿಗೆ ದೊರೆಯುವುದಿಲ್ಲ. ಅವರು ಇನ್ನೊಂದಿಷ್ಟ ದಿನ ಕಾಯಬೇಕಾಗಬಹುದು. ಆದರೆ, ವೆಬ್‌ನಲ್ಲಿ ನೀವು ಬಳಸಬಹುದು. ಗೂಗಲ್‌ ಈಗಾಗಲೇ ಯೂಟ್ಯೂಬ್‌ ವಿಡಿಯೋ ವೇದಿಕೆಯ ಮೂಲಕ ಅಗ್ರಸ್ಥಾನ ಕಾಯ್ದುಕೊಂಡಿದೆ. ಹೀಗಿದ್ದೂ, ಕಿರು ಅವಧಿಯ ವಿಡಿಯೋ ವೇದಿಕೆಯು ಯೂಟ್ಯೂಬ್‌ಗೆ ಪ್ರತಿಸ್ಪರ್ಧಿಯೊಂದನ್ನು ಹುಟ್ಟು ಹಾಕುತ್ತಿದೆಯಾ ಅಥವಾ ಟಿಕ್‌ ಟಾಕ್‌ನಂಥ ಆ್ಯಪ್‌ಗಳಿಗೆ ಸ್ಪರ್ಧೆ ನೀಡುತ್ತದೆಯೇ ಎಂಬುದು ಸ್ಪಷ್ಟವಾಗುತ್ತಿಲ್ಲ. ಜೊತೆಗೆ ಈ ಹೊಸ ಆ್ಯಪ್‌ ಬಳಕೆದಾರರನ್ನು ಸೆಳೆಯಲು ವಿಫಲವಾಗಬಹುದು. ಯಾಕೆಂದರೆ, ಇದು ಕೇವಲ ಕಿರು ಅವಧಿ ವಿಡಿಯೋಗೆ ಅವಕಾಶ ಕಲ್ಪಿಸುವುದರಿಂದ ಹೆಚ್ಚಿನ ಮಾಹಿತಿಯನ್ನು ಪಡೆಯಲಾಗುವುದಿಲ್ಲ. ಹಾಗಾಗಿ ಬಳಕೆದಾರರು ಯೂಟ್ಯೂಬ್‌ಗೆ ಮೊರೆ ಹೋಗಬಹುದು ಎಂಬುದು ತಜ್ಞರ ಅಭಿಪ್ರಾಯವಾಗಿದೆ.

​ಸೃಜನಾತ್ಮಕತೆಗೆ ಒತ್ತು

ಟ್ಯಾಂಗಿ ಆ್ಯಪ್‌ನ ಮುಖ್ಯ ಉದ್ದೇಶವೇ ಬಳಕೆದಾರರಲ್ಲಿನ ಸೃಜನಾತ್ಮಕತೆಗೆ ವೇದಿಕೆಯನ್ನು ಒದಗಿಸುವುದು ಆಗಿದೆ. ನಾವು ಕೇವಲ ಡಿಐವೈ ಮತ್ತು ಸೃಜನಶೀಲ ಕಟೆಂಟ್‌ ಬಗ್ಗೆ ಗಮನ ಕೇಂದ್ರೀಕರಿಸಿದ್ದೇವೆ. ಒಂದು ನಿಮಿಷದ ವಿಡಿಯೋ ಅಪ್ಲೋಡ್‌ ಮಾಡಲು ನಾವು ಅವಕಾಶ ಕಲ್ಪಿಸಿಕೊಡುತ್ತಿದ್ದೇವೆ ಎಂದು ಟ್ಯಾಂಗಿ ಸಂಸ್ಥಾಪಕ ಕೊಕೊ ಮಾವೊ ಅವರು ತಮ್ಮ ಬ್ಲಾಗ್‌ನಲ್ಲಿ ಬರೆದುಕೊಂಡಿದ್ದಾರೆ. ಈ ಆ್ಯಪ್‌ ಇನ್ನೊಂದು ವಿಶೇಷ ಏನೆಂದರೆ, ಇದರಲ್ಲಿರುವ ಟ್ರೈ ಇಟ್‌ ವಿಭಾಗದಲ್ಲಿ ಬಳಕೆದಾರರು ಅಲ್ಲಿರುವ ವಿಡಿಯೊಗಳನ್ನು ಮರು ಸೃಷ್ಟಿಸಬಹುದು ಮತ್ತು ಅವುಗಳನ್ನು ಶೇರ್ ಮಾಡಿಕೊಳ್ಳಬಹುದು. ಇದರಿಂದ ಬಹಳಷ್ಟು ಬಳಕೆದಾರರನ್ನು ತಲುಪಲು ಸಾಧ್ಯವಾಗಲಿದೆ

ಟಿಕ್‌ ಟಾಕ್‌ಗೆ ಪೈಪೋಟಿ

ಈ ಮೊದಲೇ ಹೇಳಿದಂತೆ ಟಿಕ್‌ ಟಾಕ್‌ಗೆ ಪೈಪೋಟಿ ನೀಡಲು ಅನೇಕ ಕಂಪನಿಗಳು ಕಿರು ಅವಧಿಯ ವಿಡಿಯೋ ಆ್ಯಪ್‌ಗಳನ್ನು ಪರಿಚಯಿಸುತ್ತಿವೆ. ಕೆಲವು ದಿನಗಳ ಹಿಂದೆ ಫೇಸ್‌ ಬುಕ್‌ ಕೂಡ ಲ್ಯಾಸ್ಸೊ ಆ್ಯಪ್‌ ಬಿಡುಗಡೆ ಮಾಡಿದೆ. ಆದರೆ, ಇದು ಇನ್ನೂ ಭಾರತ ಗ್ರಾಹಕರಿಗೆ ಲಭ್ಯವಾಗಿಲ್ಲ. ಹಾಗೆಯೇ ಟ್ಯಾಂಗಿ ಕೂಡ. ಇನ್ನೂ ಫೇಸ್‌ಬುಕ್‌ ಒಡೆತನದ ಇನ್‌ಸ್ಟಾಗ್ರಾಂ ಕೂಡ ರೀಲ್ಸ್‌ ಎಂಬ ಆಪ್‌ ಬಿಡುಗಡೆ ಮಾಡಿದ್ದನ್ನು ನಾವು ಗಮನಿಸಬಹುದು. ಈ ಬೆಳವಣಿಗೆಗಳು ಏನು ಹೇಳುತ್ತಿವೆ ಎಂದರೆ, ವಿಡಿಯೋ ಫ್ಲಾಟ್‌ಫಾರ್ಮ್‌ ಈಗಿನ ಟ್ರೆಂಡ್‌ ಆಗಿವೆ. ವಿಡಿಯೋ ಕಂಟೆಂಟ್‌ಗೆ ಈಗ ಎಲ್ಲಕ್ಕಿಂತ ಹೆಚ್ಚಿನ ಬೇಡಿಕೆ ಇದ್ದು, ಬಹುತೇಕ ದೊಡ್ಡ ದೊಡ್ಡ ಟೆಕ್‌ ಕಂಪನಿಗಳು ಈ ರೀತಿಯ ವೇದಿಕೆಗಳನ್ನು ಸೃಷ್ಟಿಸಿಕೊಂಡು ತಮ್ಮ ಮಾರುಕಟ್ಟೆಯನ್ನು ವಿಸ್ತರಿಸಿಕೊಳ್ಳುತ್ತವೆ.

(ಈ ಲೇಖನವು ವಿಜಯ ಕರ್ನಾಟಕದ 2020ರ ಫೆಬ್ರವರಿ 3ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ)

New Features for WhatsApp: ವಾಟ್ಸ್‌ಆ್ಯಪ್‌ಗೆ ಮತ್ತಷ್ಟು ಹೊಸ ಫೀಚರ್‌ಗಳು!

- ಮಲ್ಲಿಕಾರ್ಜುನ ತಿಪ್ಪಾರ
ವಾಟ್ಸಪ್ ಎಂಬುದು ಈಗ ನಮ್ಮ ಬದುಕಿನ ಅವಿಭಾಜ್ಯ ಅಂಗವಾಗಿದೆ. ನಮ್ಮ ನಿತ್ಯದ ಕೆಲಸ ಕಾರ್ಯಗಳಲ್ಲಿಅದರ ಅನಿವಾರ್ಯತೆಯ ಸೃಷ್ಟಿಯಾಗಿದೆ. ಅಂದರೆ ಅಷ್ಟರ ಮಟ್ಟಿಗೆ ವಾಟ್ಸಪ್ ನಮ್ಮನ್ನು ಆವರಿಸಿಕೊಂಡಿದೆ. ಇದಕ್ಕೆ ಕಾರಣ ಏನೆಂದು ಹುಡುಕುತ್ತಾ ಹೋದರೆ, ಬಳಕೆದಾರರ ಅಗತ್ಯಗಳನ್ನು ಮನಗಂಡು ಅದಕ್ಕ ತಕ್ಕಂತೆ ಹೊಸ ಹೊಸ ವೈಶಿಷ್ಟ್ಯಗಳನ್ನು ಪರಿಚಯಿಸುತ್ತದೆ. ಆ ಮೂಲಕ ಹೆಚ್ಚೆಚ್ಚು ಬಳಕೆದಾರರ ಸ್ನೇಹಿ ಆ್ಯಪ್‌ ಆಗಿ ಗುರುತಿಸಿಕೊಳ್ಳುತ್ತಿದೆ. ಹೊಸ ವರ್ಷದಲ್ಲೂ ವಾಟ್ಸಪ್ ಅನೇಕ ಹೊಸ ಫೀಚರ್‌ಗಳೊಂದಿಗೆ ನಿಮ್ಮ ಮುಂದೆ ಬರುತ್ತಿದೆ. ಬಹುದಿನಗಳ ಬೇಡಿಕೆಯಾದ ಡಾರ್ಕ್‌ಮೋಡ್ ಸೇರಿದಂತೆ ಅನೇಕ ಸಂಗತಿಗಳು ಸೇರ್ಪಡೆಯಾಗಲಿವೆ. ಜತೆಗೆ ಈ ವರ್ಷದಲ್ಲಿ ಕೆಲವು ಸ್ಮಾರ್ಟ್‌ಫೋನ್‌ಗಳಿಗೆ ವಾಟ್ಸಪ್ ಸಪೋರ್ಟ್‌ ಮಾಡುವುದನ್ನು ನಿಲ್ಲಿಸಲಿದೆ.

ಡಾರ್ಕ್ ಮೋಡ್‌

ಈಗಾಗಲೇ ಬಹಳಷ್ಟು ಆ್ಯಪ್‌ಗಳಲ್ಲಿ ಡಾರ್ಕ್ ಮೋಡ್‌ ಸಾಮಾನ್ಯವಾಗಿದೆ. ಹಾಗೆಯೇ ವಾಟ್ಸಪ್ ಕೂಡ ಡಾರ್ಕ್ ಮೋಡ್‌ ಪರಿಚಯಿಸಲು ಹಲವು ದಿನಗಳಿಂದ ಕಾರ್ಯನಿರತವಾಗಿದೆ. ಬಹುಶಃ ಈ ವರ್ಷದಲ್ಲಿ ಅದು ಕಾರ್ಯರೂಪಕ್ಕೆ ಬರಲಿದೆ. ವಾಬೀಟಾಇನ್ಫೊ ಪ್ರಕಾರ, ವಾಟ್ಸಪ್‌ನ ಡಾರ್ಕ್‌ ಮೋಡ್‌ ಸಿದ್ಧವಾಗಿದೆ. ಆದರೆ, ಸ್ಟೇಟಸ್‌ ಅಪ್‌ಡೇಟ್‌ ಸೆಲ್‌, ಪ್ರೊಫೈಲ್‌ ಸೆಲ್ಸ್‌, ಕಾಂಟಾಕ್ಟ್ ಮತ್ತು ಸ್ಟೋರೇಜ್‌ ಲಿಸ್ಟ್‌ ಸೇರಿದಂತೆ ಇನ್ನಿತರ ಕೆಲವು ಅಂಶಗಳನ್ನು ಡಾರ್ಕ್‌ ಮೋಡ್‌ಗೆ ಹೊಂದಿಸಬೇಕಿದೆ. ಹಾಗಾಗಿ, ಇದಕ್ಕೆ ಸ್ವಲ್ಪ ಸಮಯ ಬೇಕಾಗಬಹುದು. ಈ ವರ್ಷದಲ್ಲಿ ಖಂಡಿತವಾಗಿಯೂ ಐಒಎಸ್‌ ಮತ್ತು ಆಂಡ್ರಾಯ್ಡ್‌ ಫೋನ್‌ಗಳಲ್ಲಿ ನೀವು ಪರಿಪೂರ್ಣವಾದ ಡಾರ್ಕ್‌ ಮೋಡ್‌ ವಾಟ್ಸಪ್ ಅನ್ನು ನಿರೀಕ್ಷಿಸಬಹುದು.

ಐಪ್ಯಾಡ್‌ನಲ್ಲಿ ವಾಟ್ಸಪ್

ಆಂಡ್ರಾಯ್ಡ್‌ ಮತ್ತು ಐಫೋನ್‌ಗಳಲ್ಲಿ ವಾಟ್ಸಪ್ ಅನ್ನು ಸರಳವಾಗಿ ಬಳಸಬಹುದು. ಹಾಗೆಯೇ ಡೆಸ್ಕ್‌ಟಾಪ್‌ಗಳಲ್ಲೂ ವಾಟ್ಸಪ್ ಬಳಕೆ ಸುಲಭ. ಆದರೆ, ಇದುವರೆಗೆ ಐಪ್ಯಾಡ್‌ನಲ್ಲಿ ವಾಟ್ಸಪ್ ಬಳಕೆ ಸಾಧ್ಯವಾಗಿಲ್ಲ. ಒಂದೊಮ್ಮೆ ಆ್ಯಪ್‌ ಸ್ಟೋರ್‌ನಿಂದ ಐಪಾಡ್‌ನಲ್ಲಿ ವಾಟ್ಸಪ್ ಇನ್ಸ್ಟಾಲ್ ಮಾಡಿದರೂ ಅದು ಐಫೋನ್‌ನಲ್ಲಿ ತೆರೆದುಕೊಳ್ಳುವಂತೆ ತೆರೆದುಕೊಳ್ಳುತ್ತದೆ. ಐಪಾಡ್‌ನಲ್ಲಿ ಪೂರ್ಣ ಪ್ರಮಾಣದಲ್ಲಿ ವಾಟ್ಸಪ್ ಕಾರ್ಯನಿರ್ವಹಣೆ ಸಂಬಂಧ ಕಂಪನಿ ಕಾರ್ಯನಿರತವಾಗಿದೆ. ಈ ಬಗ್ಗೆ ಅಧಿಕೃತವಾದ ಮಾಹಿತಿ ಹೊರಬಿದ್ದಿಲ್ಲವಾದರೂ ಈ ವರ್ಷ ಐಪಾಡ್‌ಗೆ ವಾಟ್ಸಪ್ ಸಪೋರ್ಟ್‌ ಮಾಡಲಿದೆ. ಹಾಗಂತ ಐಪಾಡ್‌ಗೆ ರೂಪಿಸಲಾಗುತ್ತಿರುವ ವಾಟ್ಸಪ್ ಇತರ ವಾಟ್ಸಪ್ ಗಿಂತ ಭಿನ್ನವಾಗಿರುತ್ತದೆ ಎಂದು ಭಾವಿಸಬೇಕಿಲ್ಲ.

ಬ್ಲಾಕ್ಡ್ ಕಾಂಟಾಕ್ಟ್ ನೋಟಿಸ್‌

ಬ್ಲಾಕ್‌ ಮಾಡಲಾದ ಕಾಂಟಾಕ್ಟ್‌ಗಳನ್ನು ಮತ್ತೆ ಸಕ್ರಿಯಗೊಳಿಸುವ ಪ್ರಕ್ರಿಯೆಯನ್ನು ಸರಳಗೊಳಿಸುವ ಪ್ರಯತ್ನದಲ್ಲಿ ವಾಟ್ಸಪ್ ಇದೆ. ಬಹುಶಃ ಈ ವರ್ಷಕ್ಕೆ ಸಾಧ್ಯವಾಗಬಹುದು. ಹೊಸ ಫೀಚರ್‌ ಕಾರ್ಯ ಸಾಧ್ಯವಾದರೆ, ಒಂದೇ ಟ್ಯಾಪ್‌ನಲ್ಲಿ ಬ್ಲಾಕ್‌ ಮಾಡಲಾದ ಕಾಂಟಾಕ್ಟ್‌ಗಳನ್ನು ಅನ್‌ಲಾಕ್‌ ಮಾಡಬಹುದು.

ಡಿಲಿಟ್‌ ಮೆಸೇಜ್‌ಗಳು

ಹೊಸ ಡಿಲಿಟ್‌ ಮೆಸೇಜ್‌ ಫೀಚರ್‌ ಸಿದ್ಧತೆಯಲ್ಲಿದೆ ವಾಟ್ಸಪ್. ಈ ಹೊಸ ಫೀಚರ್‌ ವಾಟ್ಸಪ್ ಸಂದೇಶಗಳನ್ನು ನಿಗದಿತ ಸಮಯದ ಬಳಿಕ ಸ್ವಯಂ ಆಗಿ ಡಿಲಿಟ್‌ ಮಾಡುತ್ತದೆ. ಈ ಫೀಚರ್‌ ಖಾಸಗಿ ಮತ್ತು ಗ್ರೂಪ್‌ ಚಾಟ್‌ಗೂ ದೊರೆಯಲಿದೆ. ಈಗಾಗಲೇ ಕುರಿತು ವಾಟ್ಸಪ್ ಕಾರ್ಯನಿರತವಾಗಿದೆ.

ಈ ಫೋನ್‌ಗಳಿಗೆ ಸಪೋರ್ಟ್‌ ಮಾಡಲ್ಲ!

ಈ ಹೊಸ ವರ್ಷದಲ್ಲಿ ವಾಟ್ಸಪ್ ಕೆಲವು ಫೋನ್‌ಗಳಲ್ಲಿ ಕಾರ್ಯ ನಿರ್ವಹಿಸುವುದಿಲ್ಲ. ಈಗಾಗಲೇ ಕಂಪನಿ ಈ ಬಗ್ಗೆ ಮಾಹಿತಿ ನೀಡಿದೆ. ಆಂಡ್ರಾಯ್ಡ್‌ 2.3.7 ಜಿಂಜರ್‌ಬ್ರೆಡ್‌ ಮತ್ತು ಇದಕ್ಕೂ ಹಿಂದಿನ ಆವೃತ್ತಿಗಳಿರುವ ಫೋನ್‌ಗಳು ಹಾಗೂ ಐಒಎಸ್‌ 8 ಮತ್ತು ಅದಕ್ಕೂ ಮೊದಲಿನ ಫೋನ್‌ಗಳಿಗೆ ವಾಟ್ಸಪ್ ಸಪೋರ್ಟ್‌ ಮಾಡುವುದಿಲ್ಲ ಎಂದು ಕಂಪನಿ ತನ್ನ ಬ್ಲಾಗ್‌ನಲ್ಲಿ ಹೇಳಿಕೊಂಡಿದೆ. ಹಾಗಂತ, ವಾಟ್ಸಪ್ ಸಂಪೂರ್ಣವಾಗಿ ನಿಷ್ಕ್ರಿಯಗೊಳ್ಳುತ್ತದೆ ಎಂದರ್ಥವಲ್ಲ. ಈ ಮೊದಲೇ ಅಕೌಂಟ್‌ ಹೊಂದಿದ್ದರೆ ವಾಟ್ಸಪ್ ಬಳಕೆಯನ್ನು ಮುಂದುವರಿಸಬಹುದು. ಆದರೆ, ಅದರಲ್ಲಿರುವ ಫೀಚರ್‌ಗಳು ಯಾವುದೇ ಸಮಯದಲ್ಲಿ ನಿಷ್ಕ್ರಿಯಗೊಳ್ಳಬಹುದು. ಅದರಲ್ಲೂ ವಿಂಡೋಸ್‌ ಫೋನ್‌ ಬಳಸುವವರಿಗೆ ವಾಟ್ಸಪ್ ಬಳಕೆ ಕಷ್ಟಸಾಧ್ಯವಾಗಲಿದೆ.

ಈ ಲೇಖನವು ವಿಜಯ ಕರ್ನಾಟಕದ 6-1-2020ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.

How to download YouTube Video: ಮೊಬೈಲ್‌ನಲ್ಲಿ ಯೂಟ್ಯೂಬ್ ವಿಡಿಯೊ ಡೌನ್‌ಲೋಡ್‌ ಮಾಡಿಕೊಳ್ಳುವುದು ಹೇಗೆ?

- ಮಲ್ಲಿಕಾರ್ಜುನ ತಿಪ್ಪಾರ
ಈಗೇನಿದ್ದರೂ ವಿಡಿಯೊಗಳ ಕಾಲ. ಎಲ್ಲವೂ ವಿಡಿಯೊಮಯ. ನಿಮಗನ್ನಿಸಿದ್ದನ್ನು ಪಠ್ಯ ಅಥವಾ ಚಿತ್ರದ ಮೂಲಕವೇ ಹೇಳಬೇಕು ಎನ್ನುವ ಕಾಲ ಈಗಿಲ್ಲ. ಕೈಯಲ್ಲಿರುವ ಸ್ಮಾರ್ಟ್‌ಫೋನ್‌ ಮೂಲಕ ನಿಮಗನ್ನಿಸಿದ್ದನ್ನು ಚಿಕ್ಕ ವಿಡಿಯೊ ಮಾಡಿಯೋ ಅಥವಾ ನೀವು ನೋಡಿದ್ದ ಸ್ಥಳ, ಘಟನೆ ಮತ್ತಿತರ ಸಂಗತಿಯನ್ನು ವಿಡಿಯೊ ಮಾಡಿ ಯೂಟ್ಯೂಬ್‌ ಸೇರಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿಷೇರ್‌ ಮಾಡಿಕೊಂಡರೆ ಸಾಕು. ಸಹಸ್ರಾರು ಜನರು ಅದನ್ನು ನೋಡುತ್ತಾರೆ; ತಮಗನ್ನಿಸಿದ್ದನ್ನು ಕಮೆಂಟ್‌ ರೂಪದಲ್ಲಿಫೀಡ್‌ಬ್ಯಾಕ್‌ ನೀಡುತ್ತಾರೆ. ಹಾಗಾಗಿ, ಇದು ‘ವಿಡಿಯೊ ಜಮಾನ’ ಎಂದು ಹೇಳಿದರೆ ತಪ್ಪಲ್ಲ.
ಈಗ ವಿಡಿಯೊ ಆಧರಿತ ಆ್ಯಪ್‌ಗಳೇ ಸಾಕಷ್ಟಿವೆ. ಆದರೆ, ಯೂಟ್ಯೂಬ್‌ ಒದಗಿಸುವ ಸೇವೆ ಮಾತ್ರ ಅನನ್ಯವಾಗಿರುತ್ತದೆ ಮತ್ತು ಗುಣಮಟ್ಟದಿಂದ ಕೂಡಿರುತ್ತದೆ. ಹಾಗಾಗಿ, ವಿಡಿಯೊ ಪ್ರಪಂಚದಲ್ಲಿಈಗಲೂ ಯೂಟ್ಯೂಬ್‌ ಅನಭಿಷಿಕ್ತ ದೊರೆಯ ರೀತಿಯಲ್ಲಿದೆ. ಯೂಟ್ಯೂಬ್‌ ಅನ್ನೋದು ವಿಡಿಯೊಗಳ ಸಮುದ್ರ. ಅಲ್ಲಿ, ಸಿನಿಮಾದಿಂದ ಹಿಡಿದು ಕಾರ್‌ ಕ್ಲೀನ್‌ ಹೇಗೆ ಮಾಡೋದು ಎಂದು ಹೇಳುವ ನಾನಾ ರೀತಿಯ, ನಾನಾ ವರ್ಗದ, ನಾನಾ ವಿಷಯದ ವಿಡಿಯೊಗಳು ಇವೆ. ಬೇಕು, ಬೇಡದ್ದು ಎಲ್ಲವಿಡಿಯೊಗಳು ನಿಮಗೆ ದೊರೆಯುತ್ತವೆ. ಯಾವುದನ್ನು ನೋಡಬೇಕು, ಯಾವುದನ್ನು ನೋಡಬಾರದು ಎಂಬುದು ನಿಮಗೆ ಬಿಟ್ಟದ್ದು. ಹೀಗೆ, ಯೂಟ್ಯೂಬ್‌ನಲ್ಲಿನೋಡಿದ ವಿಡಿಯೊಗಳನ್ನು ನಿಮ್ಮ ಡೆಸ್ಕ್‌ಟಾಪ್‌ ಇಲ್ಲವೇ ಸ್ಮಾರ್ಟ್‌ಫೋನ್‌ಗೆ ಡೌನ್‌ಲೋಡ್‌ ಮಾಡಿಕೊಳ್ಳವುದು ಹೇಗೆ? ಯಾಕೆಂದರೆ, ಡೌನ್‌ಲೋಡ್‌ ಮಾಡಿಕೊಳ್ಳುವ ಆಯ್ಕೆಯನ್ನು ಯೂಟ್ಯೂಬ್‌ ನಿಮಗೆ ನೀಡುವುದಿಲ್ಲ.
ಯೂಟ್ಯೂಬ್‌ನಿಂದ ವಿಡಿಯೊಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳಲು ಅನೇಕ ಆ್ಯಪ್‌ಗಳಿವೆ. ಆದರೆ, ಇವುಗಳ ಹೊರತಾಗಿಯೂ ಸಿಂಪಲ್‌ ಆದ ಸ್ಟೆಪ್‌ಗಳ ಮೂಲಕ ಸ್ಮಾರ್ಟ್‌ಫೋನ್‌ಲ್ಲಿಯೂಟ್ಯೂಬ್‌ ವಿಡಿಯೊಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಅದು ಹೇಗೆ ಎಂಬುದನ್ನು ಸಿಂಪಲ್‌ ಆಗಿ ಇಲ್ಲಿವಿವರಿಸಲಾಗಿದೆ.

 ಫೋನ್‌ನಲ್ಲಿಡೌನ್‌ಲೋಡ್‌ ಮಾಡಿಕೊಳ್ಳಲು ಹೀಗೆ ಮಾಡಿ....
- ಯೂಟ್ಯೂಬ್‌ ಆ್ಯಪ್‌ಗೆ ಹೋಗಿ. ನೀವು ಡೌನ್‌ಲೋಡ್‌ ಮಾಡಿಕೊಳ್ಳಲು ಇಚ್ಛಿಸಿರುವ ವಿಡಿಯೊ ಅನ್ನು ಓಪನ್‌ ಮಾಡಿಕೊಳ್ಳಿ
- ವಿಡಿಯೊ ಓಪನ್‌ ಮಾಡಿದ ಮೇಲೆ, ಪ್ಲೇನಲ್ಲಿರುವ ವಿಡಿಯೊವನ್ನು ಪಾಜ್‌ ಮಾಡಿ. ಆಗ ವಿಡಿಯೊ ಕೆಳಗೆ  ನೀವು ಷೇರ್‌ ಬಟನ್‌ ನೋಡಬಹುದು.
- ಆ ಷೇರ್‌ ಬಟನ್‌ ಮೇಲೆ ಕ್ಲಿಕ್‌ ಮಾಡಿ. ಆಗ ಕಾಪಿ ಲಿಂಕ್‌ ಎಂಬ ಆಪ್ಷನ್‌ ಕಾಣುತ್ತದೆ. ಅದರ ಮೇಲೆ ಕ್ಲಿಕ್‌ ಮಾಡಿ ಆ ಲಿಂಕ್‌ ಕಾಪಿ ಮಾಡಿಕೊಳ್ಳಿ.
- ಲಿಂಕ್‌ ಕಾಪಿ ಮಾಡಿಕೊಂಡ ಮೇಲೆ ನಿಮ್ಮ ಕ್ರೋಮ್‌ ಬ್ರೌಸರ್‌ಗೆ ಹೋಗಿ.
- ಬ್ರೌಸರ್‌ನಲ್ಲಿಹೊಸ ಟ್ಯಾಬ್‌ ಓಪನ್‌ ಮಾಡಿ, ಕಾಪಿ ಮಾಡಿಕೊಂಡ ಲಿಂಕ್‌ ಅನ್ನು ಸರ್ಚ್‌ ಬಾಕ್ಸ್‌ನಲ್ಲಿಪೇಸ್ಟ್‌ ಮಾಡಿ.
- ನೀವು ಆಯ್ಕೆ ಮಾಡಿದ ವಿಡಿಯೊ ಬ್ರೌಸರ್‌ನಲ್ಲಿತೆರೆದುಕೊಳ್ಳುತ್ತದೆ.
- ವಿಡಿಯೊ ಓಪನ್‌ ಆದ ಮೇಲೆ, ಯೂಟ್ಯೂಬ್‌ನಲ್ಲಿರುವ y ಅಕ್ಷ ರದ ಹಿಂದೆ ಕರ್ಸರ್‌ ತೆಗೆದುಕೊಂಡು ಬನ್ನಿ
- ಆ ನಂತರ ಯೂಟ್ಯೂಬ್‌ ಅಕ್ಷ ರ ಹಿಂದಿರುವ ಎಲ್ಲವನ್ನು ಅಳಸಿ ಹಾಕಿ.
-  http://m. ಅಳಸಿ ಹಾಕಿದ ಮೇಲೆ, ಯುಟೂಬ್‌ ಪದಕ್ಕಿಂತ ಮುಂಚೆ ಅದೇ ಜಾಗದಲ್ಲಿ ss ಟೈಪ್‌ ಮಾಡಿ.
- ಇಷ್ಟಾದ ಮೇಲೆ ಸರ್ಚ್‌ ಮೇಲೆ ಕ್ಲಿಕ್‌ ಮಾಡಿ. ಆಗ ಹೊಸ ಲಿಂಕ್‌ ತೆರೆದುಕೊಳ್ಳುತ್ತದೆ.
ಇಷ್ಟು ಮಾಡಿದ ಮೇಲೆ ನೀವು ಆಯ್ಕೆ ಮಾಡಿಕೊಂಡಿದ್ದ ವಿಡಿಯೊ ಅನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಇದೇ ಪದ್ಧತಿಯನ್ನು ನೀವು ಡೆಸ್ಕ್‌ಟಾಪ್‌ ಬಳಸಿಕೊಂಡು ಯೂಟ್ಯೂಬ್‌ ವಿಡಿಯೊಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಆ್ಯಪ್‌ಗಳನ್ನು ಬಳಸಿಕೊಂಡಿಯೂ ವಿಡಿಯೊಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಇದಕ್ಕಾಗಿಯೇ ಸಾಕಷ್ಟು ಆ್ಯಪ್‌ಗಳೂ ಇವೆ. ಆದರೆ ಎಲ್ಲಕ್ಕಿಂತ ಮೇಲು ಎಂದರೆ, ಈ ಮೇಲೆ ಹೇಳಿದ ಸಿಂಪಲ್‌ ಟಿಫ್ಸ್‌ ಬಳಸಿಕೊಂಡು ವಿಡಿಯೊ ಡೌನ್‌ಲೋಡ್‌ ಮಾಡಿಕೊಳ್ಳುವುದು. ಇದರಿಂದ ಅನಗತ್ಯವಾಗಿ ಆ್ಯಪ್‌ಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳುವುದು ತಪ್ಪುತ್ತದೆ.

 ಯೂಟ್ಯೂಬ್‌ ಬಗ್ಗೆ ನಿಮಗೆ ಗೊತ್ತಾ?
- 2005 ಫೆಬ್ರವರಿ 14ರಂದು ಯೂಟ್ಯೂಬ್‌ ಅನ್ನು ಸ್ಟಿವ್‌ ಚೆನ್‌, ಚಾದ್‌ ಹರ್ಲಿ ಮತ್ತು ಜಾವೆದ್‌ ಕರೀಮ್‌ ಎಂಬುವರು ಆರಂಭಿಸಿದರು.
- ಜಗತ್ತಿನಲ್ಲೇ 2ನೇ ಅತಿ ಹೆಚ್ಚು ಭೇಟಿ ನೀಡುವವರ ವೆಬ್‌ಸೈಟ್‌ ಎಂಬ ಖ್ಯಾತಿ ಇದೆ.
- 1,300,000,000 ಇದು ಯೂಟ್ಯೂಬ್‌ ಬಳಕೆದಾರರ ಸಂಖ್ಯೆ.
- ಪ್ರತಿ ದಿನ 5 ಕೋಟಿ ವಿಡಿಯೊಗಳನ್ನು ಜಗತ್ತಿನಾದ್ಯಂತ ನೋಡಲಾಗುತ್ತದೆ.
- ನಿತ್ಯ 3 ಕೋಟಿ ಜನರು ಯೂಟ್ಯೂಬ್‌ಗೆ ಭೇಟಿ ನೀಡುತ್ತಾರೆ.
- ಒಟ್ಟು ಯೂಟ್ಯೂಬ್‌ ನೋಡುವವರ ಪೈಕಿ ಅರ್ಧದಷ್ಟು ಜನರು ಮೊಬೈಲ್‌ ಬಳಕೆದಾರರಾಗಿದ್ದಾರೆ.


ಈ ಲೇಖನವು ವಿಜಯ ಕರ್ನಾಟಕದ 2019ರ ಡಿಸೆಂಬರ್ 23ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.

How did Google Assistant works: ರಿಯಲ್‌ ಟೈಮ್‌ ದುಭಾಷಿ ಹೇಗೆ ಕೆಲಸ ಮಾಡುತ್ತದೆ?

- ಮಲ್ಲಿಕಾರ್ಜುನ ತಿಪ್ಪಾರ

ಗೂಗಲ್‌ ಹೊರ ತಂದಿರುವ ಅನೇಕ ಉತ್ಪನ್ನಗಳಲ್ಲಿ'ಗೂಗಲ್‌ ಅಸಿಸ್ಟೆಂಟ್‌' ಭಿನ್ನವಾಗಿದ್ದು, ಅತ್ಯುಪಯುಕ್ತ ಮತ್ತು ಬಳಕೆದಾರರ ಸ್ನೇಹಿಯಾಗಿದೆ. ಐಫೋನ್‌ನಲ್ಲಿ ಸಿರಿ, ವಿಂಡೋಸ್‌ ಫೋನ್‌ನಲ್ಲಿ ಕೋರ್ಟನಾ, ಅಮೆಜಾನ್‌ನ ಅಲೆಕ್ಸಾ ರೀತಿಯಲ್ಲೇ ಗೂಗಲ್‌ನ ಈ 'ಗೂಗಲ್‌ ಅಸಿಸ್ಟೆಂಟ್‌' ಕೆಲಸ ಮಾಡುತ್ತದೆ. ಈ ಉತ್ಪನ್ನ ಮೊದಲಿಗೆ ಆರಂಭವಾದಾಗ ಗೂಗಲ್‌ನ ಪ್ರಾಡಕ್ಟ್‌ಗಳಾದ ಪಿಕ್ಸೆಲ್‌ ಫೋನ್‌ ಅಥವಾ ಗೂಗಲ್‌ ಹೋಮ್‌ ಗ್ಯಾಜೆಟ್‌ಗಳಿಗೆ ಮಾತ್ರ ಸಿಮೀತವಾಗಿತ್ತು. ಆದರೆ, ಇದೀಗ ಎಲ್ಲಆ್ಯಂಡ್ರಾಯ್ಡ್‌ ಹಾಗೂ ಐಒಎಸ್‌ ಆಧರಿತ ಫೋನ್‌, ಡಿವೈಸ್‌ಗಳಿಗೂ ಇದು ಸಪೋರ್ಟ್‌ ಮಾಡುತ್ತದೆ.

ಆರಂಭದಲ್ಲಿ ಗೂಗಲ್‌ ಅಸಿಸ್ಟೆಂಟ್‌ ಇಂಗ್ಲಿಷ್‌ನಲ್ಲಿ ಮಾತ್ರ ಸೇವೆಯನ್ನು ಒದಗಿಸುತ್ತಿತ್ತು. ಆನಂತರ ಜಗತ್ತಿನ ಅನೇಕ ಭಾಷೆಗಳಲ್ಲಿ ಸೇವೆಯನ್ನು ನೀಡಲಾರಂಭಿಸಿತು. ಇದರಲ್ಲಿ ನಮ್ಮ ಕೆಲವು ಭಾರತೀಯ ಭಾಷೆಗಳೂ ಸೇರಿವೆ. ಇದೆಲ್ಲವೂ ಗೊತ್ತಿರುವ ಸಂಗತಿಯೇ. ಆದರೆ, ಹೊಸ ವಿಷಯ ಏನೆಂದರೆ, ಗೂಗಲ್‌ ಅಸಿಸ್ಟೆಂಟ್‌ ಇನ್ನು ಮುಂದೆ 'ರಿಯಲ್‌ ಟೈಮ್‌ನಲ್ಲಿ ಭಾಷಾಂತರ ಮಾಡಲಿದೆ'! ಅರ್ಥಾತ್‌ ಅದು ದುಭಾಷಿ ರೀತಿಯಲ್ಲಿಕೆಲಸ ಮಾಡಲಿದೆ.

ಹೌದು, ಇದು ನಿಜ. ಇದಕ್ಕಾಗಿ ಗೂಗಲ್‌, ಅಸಿಸ್ಟೆಂಟ್‌ಗೆ 'ಇಂಟರ್‌ಪ್ರೆಟರ್‌ ಮೋಡ್‌' ಪರಿಚಯಿಸಿದೆ. ಇದು ಆ್ಯಂಡ್ರಾಯ್ಡ್‌ ಮತ್ತು ಐಒಎಸ್‌ ಆಧರಿತ ಸಾಧನಗಳಿಗೆ ಸಪೋರ್ಟ್‌ ಮಾಡಲಿದೆ. 2019ರ ಜನವರಿಯಲ್ಲೇ ಈ ಬಗ್ಗೆ ಗೂಗಲ್‌ ಘೋಷಣೆ ಮಾಡಿ, ಗೂಗಲ್‌ ಹೋಮ್‌ ಸ್ಪೀಕರ್‌, ಸ್ಮಾರ್ಟ್‌ ಡಿಸ್‌ಪ್ಲೇಸ್‌ ಸೇರಿದಂತೆ ಇನ್ನಿತ ಸಾಧನಗಳಿಗೆ ಪರಿಚಯಿಸಿತ್ತು. ಇದೀಗ ಈ ಫೀಚರ್‌ ಜಾಗತಿಕವಾಗಿ ಎಲ್ಲ ಫೋನ್‌ ಬಳಕೆದಾರರಿಗೆ ವಿಸ್ತರಿಸಲಾಗಿದೆ.

ವಿಮಾನಗಳು, ಸ್ಥಳೀಯ ರೆಸ್ಟೊರೆಂಟ್‌ಗಳ ಶೋಧ ಸೇರಿದಂತೆ ಇನ್ನಿತರ ಮಾಹಿತಿಗಾಗಿ ಪ್ರವಾಸಿಗರು ಗೂಗಲ್‌ ಅಸಿಸ್ಟೆಂಟ್‌ ನೆರವು ಪಡೆಯುತ್ತಿದ್ದಾರೆ. ಪ್ರಯಾಣದ ವೇಳೆ ಇನ್ನೂ ಹೆಚ್ಚಿನ ನೆರವು ನೀಡುವ ನಿಟ್ಟಿನಲ್ಲಿಅಸಿಸ್ಟೆಂಟ್‌ ಇದೀಗ ರಿಯಲ್‌ ಟೈಮ್‌ ಭಾಷಾಂತರ ಫೀಚರ್‌ ಇಂಟರ್‌ಪ್ರಿಟರ್‌ ಮೋಡ್‌ನೊಂದಿಗೆ ನಿಮ್ಮ ಮುಂದೆ ಬಂದಿದೆ. ಜಗತ್ತಿನಾದ್ಯಂತದ ಆ್ಯಂಡ್ರಾಯ್ಡ್‌ ಮತ್ತು ಐಒಎಸ್‌ ಫೋನ್‌ಗಳಲ್ಲಿನ ಅಸಿಸ್ಟೆಂಟ್‌ಗಳಿಗೆ ಇದು ಲಭ್ಯವಾಗಲಿದೆ ಎಂದು ಗೂಗಲ್‌ ತನ್ನ ಬ್ಲಾಗ್‌ನಲ್ಲಿತಿಳಿಸಿದೆ.

ಕನ್ನಡ ಸಹಿತ 44 ಭಾಷೆಗೆ ಬೆಂಬಲ

ಪ್ರಯಾಣದ ವೇಳೆ ವಿದೇಶಿ ಭಾಷೆಯಲ್ಲಿ ಮಾತನಾಡುವವರಿದ್ದರೆ ನೀವು ನಿಮ್ಮ ಫೋನ್‌ನಲ್ಲಿರುವ ಈ ಫೀಚರ್‌ ಅನ್ನು ಬಳಸಿಕೊಂಡು ಅವರೊಂದಿಗೆ ಮಾತನಾಡಬಹುದು. ಉದಾಹರಣೆಗೆ, ''ಹೇ ಗೂಗಲ್‌, ಬಿ ಮೈ ಫ್ರೆಂಚ್‌ ಟ್ರಾನ್ಸ್‌ಲೇಟರ್‌,'' ಎಂದು ಹೇಳಿದರೆ, ಆ ಭಾಷೆಯಲ್ಲಿನೀವು ಮತ್ತೊಬ್ಬರೊಂದಿಗೆ ಸಂವಹನ ಮಾಡಬಹುದು. ಗೂಗಲ್‌ ಹೇಳುವಂತೆ ಗೂಗಲ್‌ ಅಸಿಸ್ಟೆಂಟ್‌ ಇಂಟರ್‌ಪ್ರೆಟರ್‌ ಜಗತ್ತಿನ 44 ಭಾಷೆಗಳಿಗೆ ಸಪೋರ್ಟ್‌ ಮಾಡಲಿದೆ. ಈ ಪಟ್ಟಿಯಲ್ಲಿ ಕನ್ನಡವೂ ಇದೆ ಎಂದು ಪ್ರತ್ಯೇಕವಾಗಿ ಹೇಳಬೇಕಿಲ್ಲ.

ಯಾವೆಲ್ಲ ಭಾಷೆಗಳಿವೆ?

ಅರೆಬಿಕ್‌, ಬಂಗಾಲಿ, ಬರ್ಮೀಸ್‌, ಕಾಂಬೋಡಿಯನ್‌, ಜೆಕ್‌, ಡ್ಯಾನಿಷ್‌, ಡಚ್‌, ಇಂಗ್ಲಿಷ್‌, ಇಸ್ಟೋನಿಯನ್‌, ಫಿಲಿಪಿನೊ, ಫ್ರೆಂಚ್‌, ಜರ್ಮನ್‌, ಗ್ರೀಕ್‌, ಗುಜರಾತಿ, ಹಿಂದಿ, ಹಂಗೇರಿಯನ್‌, ಇಂಡೋನೇಷಿಯನ್‌, ಇಟಾಲಿಯನ್‌, ಜಾಪನೀಸ್‌, ಕೊರಿಯನ್‌, ಮಲಯಾಳಂ, ಮರಾಠಿ, ನೇಪಾಳಿ, ಮ್ಯಾಂಡ್ರಿಯನ್‌, ನಾರ್ವೇಯಿನ್‌, ಪೋರ್ಚುಗೀಸ್‌, ರೋಮಾನಿಯನ್‌, ರಷ್ಯನ್‌, ಸಿಂಹಳಿ, ಸ್ಪ್ಯಾನಿಶ್‌, ಸ್ವೀಡಿಶ್‌, ತಮಿಳು, ತೆಲುಗು, ತುರ್ಕಿಷ್‌, ಉಕ್ರೇನಿಯನ್‌, ಉರ್ದು ಇತ್ಯಾದಿ ಭಾಷೆಗಳಲ್ಲಿಗೂಗಲ್‌ ಅಸಿಸ್ಟೆಂಟ್‌ ಇಂಟರ್‌ಪ್ರೆಟರ್‌ ಸೇವೆ ಲಭ್ಯವಿದೆ. ಸಂಭಾಷಣೆ ಮೇಲೆ ಹೆಚ್ಚು ನಿಯಂತ್ರಣ ಸಾಧಿಸುವುದಕ್ಕಾಗಿ ಇದು ನಿಮಗೆ ಮ್ಯಾನುವಲ್‌ ಮೋಡ್‌ ಕೂಡ ಒದಗಿಸುತ್ತದೆ. ಹಾಗೆಯೇ, ಕೀ ಬೋರ್ಡ್‌ ಮೋಡ್‌ನಿಂದಾಗಿ ನೀವು ಟೈಪಿಸಿಯೂ ಭಾಷಾಂತರ ಮಾಡಬಹುದು. ಈ ಮೋಡ್‌ಗಳನ್ನು ಬಳಸುವಾಗ ನೀವು ಇಂಟರ್‌ಪ್ರೆಟರ್‌ ಮೋಡ್‌ ಅಥವಾ ವಾಯ್ಸ್ ಕಮಾಂಡ್‌ ಅನ್ನು ಟ್ರಿಗರ್‌ ಬಟನ್‌ ಮೇಲೆ ಟ್ಯಾಪ್‌ ಮಾಡುವ ಮೂಲಕ ಸ್ವಿಚ್‌ ಆಫ್‌ ಮಾಡಬಹುದು.

ಏನಿದು ಗೂಗಲ್‌ ಅಸಿಸ್ಟೆಂಟ್‌?

ಇದು ಗೂಗಲ್‌ನ ಅತಿ ಜನಪ್ರಿಯ ಉತ್ಪನ್ನವಾಗಿದ್ದು, ಆರ್ಟಿಫಿಷಿಯಲ್‌ ಇಂಟೆಲಿಜೆನ್ಸ್‌(ಕೃತಕ ಬುದ್ಧಿಮತ್ತೆ) ಆಧರಿತ ವರ್ಚುವಲ್‌ ಸೇವೆಯಾಗಿದೆ. ಮೊಬೈಲ್‌ ಮತ್ತು ಸ್ಮಾರ್ಟ್‌ ಹೋಮ್‌ ಗ್ಯಾಜೆಟ್‌ಗಳಲ್ಲಿಈ ಸೇವೆ ದೊರೆಯುತ್ತದೆ. ಈ ಹಿಂದಿನ ಗೂಗಲ್‌ ನೌ ಏಕಮುಖವಾಗಿ ಸಂಭಾಷಣೆಗೆ ಅನುವು ಮಾಡಿಕೊಡುತ್ತಿತ್ತು. ಆದರೆ, ಗೂಗಲ್‌ ಅಸಿಸ್ಟೆಂಟ್‌ ದ್ವಿಮುಖ ಸಂಭಾಷಣೆಗೆ ಬೆಂಬಲ ನೀಡುತ್ತದೆ. ಗೂಗಲ್‌ನ ಮೆಸೇಜಿಂಗ್‌ ಆ್ಯಪ್‌ 'ಅಲ್ಲೋ' ಭಾಗವಾಗಿ ಈ ಅಸಿಸ್ಟೆಂಟ್‌ ಸೇವೆ 2016ರಲ್ಲಿಆರಂಭವಾಯಿತು. 2017ರಲ್ಲಿ ಆ್ಯಂಡ್ರಾಯ್ಡ್‌ ಸಾಧನಗಳಿಗೂ ವಿಸ್ತರಣೆಯಾಯಿತು. 2017ರಲ್ಲಿ ಅಂದಾಜು 40 ಕೋಟಿ ಬಳಕೆದಾರರು ಗೂಗಲ್‌ ಅಸಿಸ್ಟೆಂಟ್‌ ಇನ್ಸ್‌ಟಾಲ್‌ ಮಾಡಿಕೊಂಡಿದ್ದಾರೆ.

ಈ ಲೇಖನವು ವಿಜಯ ಕರ್ನಾಟಕದ 2019ರ ಡಿಸೆಂಬರ್ 16ರ ಸಂಚಿಕೆಯಲ್ಲಿ ಪ್ರಕಟಗೊಂಡಿದೆ.

Safety Apps: ಮಹಿಳೆಯರ ಫೋನ್‌ನಲ್ಲಿ ಇರಲೇಬೇಕಾದ ಆ್ಯಪ್ಸ್

'ಮಧ್ಯರಾತ್ರಿಯಲ್ಲಿ ಮಹಿಳೆಯೊಬ್ಬಳು ಸುರಕ್ಷಿತವಾಗಿ ಸಂಚರಿಸಿದಾಗಲೇ ನಮಗೆ ನಿಜವಾದ ಸ್ವಾತಂತ್ರ್ಯ ಸಿಕ್ಕ ಹಾಗೆ' ಎಂದು ಮಹಾತ್ಮ ಗಾಂಧಿ ಹೇಳಿದ್ದರು. ಆದರೆ, ಇತ್ತೀಚಿನ ಅತ್ಯಾಚಾರ, ಮಹಿಳೆಯರ ಮೇಲಿನ ದೌರ್ಜನ್ಯಗಳನ್ನು ಗಮನಿಸಿದರೆ ನಮಗೆ ಇನ್ನೂ ಸ್ವಾತಂತ್ರ್ಯ ಸಿಕ್ಕಿಲ್ಲಎಂದು ಹೇಳಬೇಕು. ಯಾಕೆಂದರೆ, ಇತ್ತೀಚೆಗಷ್ಟೇ ಬೆಳಕಿಗೆ ಬಂದ ತೆಲಂಗಾಣದ 'ದಿಶಾ ಅತ್ಯಾಚಾರ' ಪ್ರಕರಣವು ಇಡೀ ದೇಶದಲ್ಲಿಆಕ್ರೋಶಕ್ಕೆ ಕಾರಣವಾಗಿದೆ. 2012ರಲ್ಲಿ ದಿಲ್ಲಿಯಲ್ಲಿ ನಡೆದ 'ನಿರ್ಭಯಾ ಪ್ರಕರಣ'ವಂತೂ ಇಡೀ ಜಗತ್ತನ್ನೇ ತಲ್ಲಣಗೊಳಿಸಿತ್ತು. ವಸ್ತುಸ್ಥಿತಿ ಹೀಗಿದ್ದಾಗಲೂ, ಲಭ್ಯವಿರುವ ತಂತ್ರಜ್ಞಾನವನ್ನು ಬಳಸಿಕೊಂಡು ಮಹಿಳೆಯರು ತಮ್ಮನ್ನು ತಾವು ತಕ್ಕಮಟ್ಟಿಗಾದರೂ ಸುರಕ್ಷಿತವಾಗಿಟ್ಟುಕೊಳ್ಳಬಹುದು. ಸ್ಮಾರ್ಟ್‌ಫೋನ್‌ ದಿನಮಾನದಲ್ಲಿ ಬದುಕುತ್ತಿರುವ ನಮಗೆ ತಂತ್ರಜ್ಞಾನ ಲಾಭ ಅಗಾಧವಾಗಿದೆ. ವಿಶೇಷವಾಗಿ ಮಹಿಳೆಯ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ಅನೇಕ ಆ್ಯಪ್‌ಗಳು ಕಾರ್ಯಾಚರಿಸುತ್ತಿವೆ. ವಿಷಮ ಸ್ಥಿತಿಯಲ್ಲಿಅಲರ್ಟ್‌ ರವಾನಿಸುವ, ಅಸುರಕ್ಷಿತ ಪ್ರದೇಶಗಳನ್ನು ಎಚ್ಚರಿಕೆ ನೀಡುವುದು ಸೇರಿದಂತೆ ಅನೇಕ ಫೀಚರ್‌ಗಳನ್ನು ಒಳಗೊಂಡ ಆ್ಯಪ್‌ಗಳಿವೆ. ಅಂಥ ಆ್ಯಪ್‌ಗಳ ಬಗ್ಗೆ ಇಲ್ಲಿದೆ ಮಾಹಿತಿ.

ಸುರಕ್ಷಾ ಆ್ಯಪ್‌ (Suraksha)

ಈ ಆ್ಯಪ್‌ನಲ್ಲಿ ಬಳಕೆದಾರರು ತುರ್ತು ಸಂದರ್ಭದಲ್ಲಿ ಸಂಪರ್ಕಿಸಬಹುದಾದ ಸ್ನೇಹಿತರು, ಪೋಷಕರ ಮೊಬೈಲ್‌ ನಂಬರ್‌ಗಳನ್ನು ಸೇರಿಸಬಹುದು. ತುರ್ತು ಸಂದರ್ಭದಲ್ಲಿ ಆ್ಯಪ್‌ ತರೆದು ಪವರ್‌ ಬಟನ್‌ ಅನ್ನು ಒತ್ತಿ ಹಿಡಿದರೆ ಪೊಲೀಸ್‌ ಸಹಾಯವಾಣಿಗೆ ಕರೆ ಹೋಗುತ್ತದೆ. ಇಷ್ಟು ಮಾತ್ರವಲ್ಲದೇ, ಬಳಕೆದಾರರು ಇರುವ ಪ್ರದೇಶದ ಸ್ಥಳ ಗುರುತು, ಆಡಿಯೊ ಮತ್ತು ವಿಡಿಯೊ ಕೂಡ ರವಾನೆಯಾಗುತ್ತದೆ. ಜತೆಗೆ, ಸೂಚಿಸಲಾದ ತುರ್ತು ನಂಬರ್‌ಗಳಿಗೂ ಕರೆ ಕೂಡ ಹೋಗುತ್ತದೆ. ಇದರಿಂದಾಗಿ ಸಂಕಷ್ಟದಲ್ಲಿ ಸಿಲುಕಿರುವ ಮಹಿಳಾ ಬಳಕೆದಾರರು ನೆರವು ಪಡೆಯಲು ಸಾಧ್ಯವಾಗುತ್ತದೆ. ಅಂದ ಹಾಗೆ ಈ ಆ್ಯಪ್‌ ಅನ್ನು ಬೆಂಗಳೂರು ಪೊಲೀಸರು ಅಭಿವೃದ್ಧಿಪಡಿಸಿದ್ದಾರೆ.

ಎಸ್‌ಒಎಸ್‌(SOS Stay Safe)

ಯಾವುದೇ ರೀತಿಯ ಕಷ್ಟದಲ್ಲಿ ಸಿಲುಕಿದಾಗ ಸಹಾಯಕ್ಕಾಗಿ ಮತ್ತೊಬ್ಬರ ನೆರವು ಪಡೆಯಲು ಈ ಆ್ಯಪ್‌ ಅವಕಾಶ ಕಲ್ಪಿಸಿಕೊಡುತ್ತದೆ. ಇಂಥ ಸಂದರ್ಭದಲ್ಲಿಈ ಆ್ಯಪ್‌ ಬಳಕೆದಾರರ ಗೆಳೆಯರು, ಕುಟುಂಬದ ಸದಸ್ಯರಿಗೆ ತ್ವರಿತ ಗತಿಯಲ್ಲಿಸಂದೇಶವನ್ನು ರವಾನಿಸುತ್ತದೆ. ಬಳಕೆದಾರರು ತಮ್ಮ ಕೈಯಲ್ಲಿರುವ ಉಪಕರಣವನ್ನು ಅಲುಗಾಡಿಸಿದರೆ ಸಾಕು ಎಸ್‌ಒಎಸ್‌ ಸಂದೇಶ ಹೋಗುತ್ತದೆ. ಲೈಂಗಿಕ ಕಿರುಕುಳ ಅಥವಾ ವೈದ್ಯಕೀಯ ತುರ್ತು ಪರಿಸ್ಥಿತಿಯಲ್ಲಿ ಈ ಆ್ಯಪ್‌ನ ನೆರವು ಪಡೆಯಬಹುದು.

​ಸ್ಮಾರ್ಟ್‌ 24x7(Smart 24x7)'

ಈ ಆ್ಯಪ್‌ನಲ್ಲಿರುವ ಪ್ಯಾನಿಕ್‌ ಬಟನ್‌ ಪ್ರೆಸ್‌ ಮಾಡಿದರೆ ಪೊಲೀಸರಿಗೆ ಕರೆ ಹೋಗುತ್ತದೆ. ಹಾಗೆಯೇ ಈ ಮೊದಲೇ ಬಳಕೆದಾರರು ಸೆಟ್‌ ಮಾಡಿದ ಫೋನ್‌ ನಂಬರ್‌ಗಳಿಗೂ ಕರೆ ಮಾಡುವ ಅವಕಾಶವನ್ನು ಈ ಆ್ಯಪ್‌ ಒದಗಿಸುತ್ತದೆ. ಒಂದು ವೇಳೆ, ಜಿಪಿಆರ್‌ಎಸ್‌ ಕಾರ್ಯನಿರ್ವಹಿಸದಿದ್ದ ಪಕ್ಷದಲ್ಲಿ ಲೊಕೇಷನ್‌ ಮಾಹಿತಿಯನ್ನು ಎಸ್‌ಎಂಎಸ್‌ ಮೂಲಕ ಈ ಆ್ಯಪ್‌ ಕಳುಹಿಸುತ್ತದೆ. ಟ್ರ್ಯಾಕಿಂಗ್‌, ಕಸ್ಟಮ್‌ ಕೇರ್‌ ಮತ್ತು ಚಾಟ್‌ ಸೇರಿದಂತೆ ಇನ್ನೂ ಅನೇಕ ಫೀಚರ್‌ಗಳಿವೆ. ತುರ್ತು ಸಂದರ್ಭದಲ್ಲಿ ಬಳಕೆದಾರರಿರುವ ಜಾಗದ ಆಡಿಯೊ-ವಿಡಿಯೊವನ್ನು ದಾಖಲಿಸಿಕೊಳ್ಳುತ್ತದೆ.

ಮೈ ಸೇಫ್ಟಿಪಿನ್‌(My Safetipin)

ಮ್ಯಾಪ್‌ ಬೇಸ್ಡ್‌ ಸೇಫ್ಟಿ ಆ್ಯಪ್‌ ತುಂಬ ಉಪಯುಕ್ತವಾಗಿದೆ. ಈ ಆ್ಯಪ್‌ ವಿಶೇಷ ಏನೆಂದರೆ, ನೀವಿರುವ ಸ್ಥಳದ ಸುರಕ್ಷತೆಯ ಶ್ರೇಯಾಂಕವನ್ನು ಸೂಚಿಸುತ್ತದೆ. ಆ್ಯಪ್‌ ನಕ್ಷೆಯಲ್ಲಿರುವ ಪಿನ್‌ ಸ್ಥಳದ ಸುರಕ್ಷತೆಯ ಶ್ರೇಯಾಂಕವನ್ನು ಒದಗಿಸುತ್ತದೆ. ಅಸುರಕ್ಷಿತ ಪ್ರದೇಶವಾಗಿದ್ದರೆ ಪಿನ್‌ ಕೆಂಪು ಬಣ್ಣದ್ದಾಗಿರುತ್ತದೆ. ಸುರಕ್ಷಿತ ಪ್ರದೇಶವಾಗಿದ್ದರೆ ಅದು ಹಸಿರು ಬಣ್ಣದ್ದಾಗಿರುತ್ತದೆ. ಕಡಿಮೆ ಸುರಕ್ಷತೆಯ ಪ್ರದೇಶವನ್ನು ಅಂಬರ್‌(ತುಸು ಹಳದಿ) ಪಿನ್‌ ಸೂಚಿಸುತ್ತದೆ. ನೀವಿರುವ ಪ್ರದೇಶದಲ್ಲಿನ ಸಾರ್ವಜನಿಕ ಸಾರಿಗೆ, ಅಲ್ಲಿರುವ ಪೊಲೀಸ್‌ ಠಾಣೆ, ಫಾರ್ಮಸಿ ಅಥವಾ ಹತ್ತಿರದ ಎಟಿಎಂ, ಜನಸಂದಣಿ ಪ್ರದೇಶ ಮಾಹಿತಿ ನೀಡುವುದು ಮಾತ್ರವಲ್ಲದೆ, ರಿಯಲ್‌ ಟೈಮ್‌ ಲೊಕೇಷನ್‌ ವಿವರವನ್ನು ಜಿಪಿಎಸ್‌ ಟ್ರ್ಯಾಕಿಂಗ್‌ ಮೂಲಕ ನಿಮ್ಮ ಹತ್ತಿರದವರೆಗೆ ರವಾನಿಸುತ್ತದೆ. ಉಳಿದ ಬಳಕೆದಾರರಿಗೆ ನೆರವಾಗುವ ನಿಟ್ಟಿನಲ್ಲಿ ನಿಮಗೆ ಅಸುರಕ್ಷಿತ ಎನಿಸಿದ ಪ್ರದೇಶವನ್ನೂ ಮ್ಯಾಪ್‌ನಲ್ಲಿ ಪಿನ್‌ ಮಾಡಬಹುದು.

ರೆಸ್ಕೂಯರ್‌ (Rescuer)

ಬಳಕೆದಾರರು ಈ ಆ್ಯಪ್‌ನಲ್ಲಿರುವ ಎಮರ್ಜೆನ್ಸಿ ಟ್ಯಾಬ್‌ ಪ್ರೆಸ್‌ ಮಾಡಿದರೆ ತಕ್ಷಣವೇ ಗೂಗೂಲ್‌ ಲೊಕೇಷನ್‌ ಸಹಿತ ಸಂದೇಶವನ್ನು ಬಳಕೆದಾರರ ಕಾಂಟಾಕ್ಟ್ ಲಿಸ್ಟ್‌ ಮತ್ತು ಫೇಸ್‌ಬುಕ್‌ ಫ್ರೆಂಡ್‌ ಲಿಸ್ಟ್‌ನಲ್ಲಿರುವ ಐವರಿಗೆ ಸಂದೇಶವನ್ನು ಕಳುಹಿಸುತ್ತದೆ. ಹಾಗೆಯೇ, ತುರ್ತು ಸಂದರ್ಭದಲ್ಲಿ ಇಬ್ಬರಿಕೆ ಕರೆ ಮಾಡುವ ಆಯ್ಕೆಯನ್ನು ಹೊಂದಿದೆ.

ನಿರ್ಭಯ(Nirbhaya)

ಮಹಿಳೆಯರ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡೇ ಈ ಆ್ಯಪ್‌ ಅನ್ನು ರೂಪಿಸಲಾಗಿದೆ. ಬಳಕೆದಾರರು ದಾಖಲಿಸಿದ ಫೋನ್‌ ನಂಬರ್‌ಗಳಿಗೆ ಅಲರ್ಟ್‌ ರವಾನಿಸುವ ಕೆಲಸವನ್ನು ಇದು ಮಾಡುತ್ತದೆ. ಅಸುರಕ್ಷಿತ ಪ್ರದೇಶದ ಬಗ್ಗೆಯೂ ಇದು ಮಾಹಿತಿ ನೀಡುತ್ತದೆ. ಬಳೆಕದಾರರು ಅಂಥ ಪ್ರದೇಶಕ್ಕೆ ಹೋದಾಗ ಈ ಮಾಹಿತಿಯನ್ನು ನೀಡುತ್ತದೆ.

ಸಿಟಿಜನ್‌ಕಾಪ್‌ (CitizenCop)

ಈ ಆ್ಯಪ್‌ ಬಳಸಿಕೊಂಡು ನೀವಿರುವ ಸ್ಥಳಲ್ಲಿ ನಡೆಯುವ ಕ್ರಿಮಿನಲ್‌ ಕೆಲಸಗಳು ಅಥವಾ ಕಾನೂನು ಬಾಹಿರ ಚಟುವಟಿಕೆಗಳ ಬಗ್ಗೆ ರಿಪೋರ್ಟ್‌ ಮಾಡಬಹುದು. ಮತ್ತು ನಿಮ್ಮ ಹೆಸರನ್ನು ಗುಪ್ತವಾಗಿಡಲಾಗುತ್ತದೆ. ಈ ಆ್ಯಪ್‌ನಲ್ಲಿ ಲಕ್ಷಣ್‌ರೇಖಾ ಎಂಬ ಫೀಚರ್‌ ಇದ್ದು, ಅದನ್ನು ಮಹಿಳೆಯರು ತುರ್ತು ಸಂದರ್ಭದಲ್ಲಿ ಬಳಸಬಹುದು. ಟ್ರ್ಯಾಕಿಂಗ್‌, ಎಮರ್ಜೆನ್ಸಿ ಕರೆ, ಎಸ್‌ಒಎಸ್‌ ಎಚ್ಚರಿಕೆಗಳನ್ನು ರವಾನಿಸುತ್ತದೆ.

​ಚಿಲ್ಲಾ(Chilla)

ತುರ್ತು ಸಂದರ್ಭದಲ್ಲಿ ಮಹಿಳೆಯರು ತಮ್ಮ ಫೋನ್‌ ಅನ್ನು ಬಳಸಲು ಸಾಧ್ಯವಾಗದಿದ್ದಾಗ, ಜೋರಾಗಿ ಕೂಗುವ ಮೂಲಕ ಈ ಚಿಲ್ಲಾ ಆ್ಯಪ್‌ ಸಕ್ರಿಯಗೊಳಿಸಬಹುದು. ಆಗ ಈ ಆ್ಯಪ್‌ ಪೋಷಕರಿಗೆ ತುರ್ತು ಸಂದೇಶವನ್ನು ರವಾನಿಸುತ್ತದೆ. ಇದರ ಹೊರತಾಗಿಯೂ, ಈ ಮೊದಲೇ ಸೆಟ್‌ ಮಾಡಿದ ಫೋನ್‌ ನಂಬರ್‌ಗಳಿಗೂ ಸಂದೇಶಗಳನ್ನು ಕಳುಹಿಸುತ್ತದೆ. ಇದಕ್ಕಾಗಿ ನೀವು ಪವರ್‌ ಬಟನ್‌ ಅನ್ನು 5 ನಿಮಿಷದವರೆಗೆ ಒತ್ತಿ ಹಿಡಿಯಬೇಕು.

ಈ ಲೇಖನವು ವಿಜಯಕರ್ನಾಟಕದ 2019ರ ಡಿಸೆಂಬರ್ 12ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.

Keep Children Safe: ಅಪಾಯಕಾರಿ ವಸ್ತುಗಳು ಮಕ್ಕಳ ಕೈಗೆ ಸಿಗದಂತಿರಲಿ

- ಮಲ್ಲಿಕಾರ್ಜುನ ತಿಪ್ಪಾರ

ಮನೆ ತುಂಬ ಮಕ್ಕಳು ಆಟ ಆಡಿಕೊಂಡು, ಓಡಾಡಿಕೊಂಡಿರೋದನ್ನು ನೋಡೋದೇ ಖುಷಿ ಮತ್ತು ಚಂದ. ಆದರೆ, ಸ್ವಲ್ಪವೇ ಎಚ್ಚರ ತಪ್ಪಿದರೂ ಪೋಷಕರ ಈ ಖುಷಿ ಕ್ಷಣದಲ್ಲೇ ಮಾಯವಾಗಿ ಕಣ್ಣೀರು ಸುರಿಸಬೇಕಾಗುತ್ತದೆ.

ಇದಕ್ಕೆ ತಾಜಾ ಉದಾಹರಣೆ ಎಂದರೆ, ಚಿಕ್ಕಮಗಳೂರು ಜಿಲ್ಲೆ ಮೂಡಿಗೆರೆ ತಾಲೂಕಿನ ದುರ್ಗದ ಹಳ್ಳಿಯಲ್ಲಿ ಅಗಸ್ತ್ಯ ಎಂಬ 3 ವರ್ಷದ ಮಗುವೊಂದು ಜ್ಯೂಸ್‌ ಎಂದು ಭಾವಿಸಿ ಕ್ರಿಮಿನಾಶಕ ಸೇವಿಸಿ ಮೃತಪಟ್ಟ ಪ್ರಕರಣ. ಈ ರೀತಿಯ ಘಟನೆಗಳು ಆಗಾಗ ನಡೆಯುತ್ತಲೇ ಇರುತ್ತವೆ. ನಾಣ್ಯ ನುಂಗಿದ ಮಗು, ಮೇಲಿಂದ ಮಗು ಬಿದ್ದ ಸಾವು, ಆಡಲು
ಹೋಗಿ ಸಂಪ್‌ಗೆ ಬಿದ್ದ ಮಗು ಇತ್ಯಾದಿ ಸುದ್ದಿಗಳನ್ನು ನೀವು ಓದಿರುತ್ತೀರಿ. ಇವೆಲ್ಲವೂ ಪೋಷಕರು ಎಚ್ಚರ ತಪ್ಪಿದಾಗ, ಬೇಜವಾಬ್ದಾರಿಯಿಂದ ಇದ್ದಾಗ ನಡೆದ ದುರ್ಘಟನೆಗಳೇ ಆಗಿರುತ್ತವೆ. ಹಾಗಾಗಿ, ಮಕ್ಕಳ ಪಾಲನೆ, ಪೋಷಣೆಯಲ್ಲಿ ಅದರಲ್ಲೂ ಐದು ವರ್ಷದೊಳಗಿನ ಮಕ್ಕಳ ವಿಷಯದಲ್ಲಿ ಹೆಚ್ಚು ಜಾಗರೂಕವಾಗಿರಬೇಕು. ಇಲ್ಲದಿದ್ದರೆ ಅಪಾಯ ತಪ್ಪಿದ್ದಲ್ಲ.

ಮಕ್ಕಳಿಗೆ ಹಾನಿಯುಂಟು ಮಾಡುವ ಯಾವುದೇ ವಸ್ತುಗಳು ಅವರ ಕೈಸಿಗದಂತೆ ನೋಡಿಕೊಂಡರೆ ನೀವು ಅರ್ಧ ಗೆದ್ದಂತೆ. ಹಾಗಾದರೆ, ಮಕ್ಕಳನ್ನು ಸುರಕ್ಷಿತವಾಗಿಟ್ಟುಕೊಳ್ಳುವುದು ಹೇಗೆ? ಇದಕ್ಕೇನೂ ಮಹಾ ಜ್ಞಾನ ಬೇಕಾಗಿಲ್ಲ; ಒಂದಿಷ್ಟು ಸಾಮಾನ್ಯ ಜ್ಞಾನ ಇದ್ದರೆ ಸಾಕು. ಮಗುವಿಗೆ ಅಪಾಯ ತಂದೊಡ್ಡಬಹುದಾದ ವಸ್ತುಗಳನ್ನು ಗುರುತಿಸಿದರೆ ಸಾಕು. ನೀರು ಮತ್ತು ಬೆಂಕಿ ಹತ್ತಿರ ಮಕ್ಕಳು ಸುಳಿಯದಂತೆ ನೋಡಿಕೊಳ್ಳಬೇಕು. ಯಾವಾಗಲೂ ಮಕ್ಕಳ ಚಟುವಟಿಕೆಗಳ ಮೇಲೆ ನಿಗಾ
ಇಟ್ಟರೆ ಸಂಭಾವ್ಯ ಯಾವುದೇ ಅಪಾಯವನ್ನು ತಪ್ಪಿಸಬಹುದು.

ಅಪಾಯಕಾರಿ ವಸ್ತುಗಳು ಮಕ್ಕಳ ಕೈಗೆ ಸಿಗದಿರಲಿ

ನಾಣ್ಯ, ಬಟನ್‌, ಕ್ವಾಯಿನ್‌ ಬ್ಯಾಟರಿ: ಮಕ್ಕಳ ಗಂಟಲಲ್ಲಿ ನಾಣ್ಯ ಸಿಕ್ಕಿ ಹಾಕಿಕೊಂಡು ಅಸು ನೀಗಿದ ಉದಾಹರಣೆಗಳಿವೆ. ಹಾಗಾಗಿ ನಾಣ್ಯಗಳಿಂದ ದೂರ ಇರಲಿ. ಬಟನ್‌ (ಗುಂಡಿ), ಕ್ವಾಯಿನ್‌ ಗಾತ್ರದ ಬ್ಯಾಟರಿ ಸಿಗದಂತಿರಲಿ. ಸಿಂಗಿಂಗ್‌ ಗ್ರೀಟಿಂಗ್‌ ಕಾರ್ಡ್ಸ್, ರಿಮೋಟ್‌ ಕಂಟ್ರೋಲ್‌, ವಾಚ್‌ಗಳು, ಹಿಯರಿಂಗ್‌ ಸಾಧನಗಳು, ಡಿಜಿಟಲ್‌ ಸ್ಕೇಲ್ಸ್‌, ಥರ್ಮೋ ಮೀಟರ್ಸ್‌, ಕ್ಯಾಲ್ಕುಲೇಟರ್‌, ಆಟಿಕೆಗಳು, ಲೈಟ್‌ ಅಪ್‌ ಬಟನ್ಸ್‌ಗಳಲ್ಲಿ ಕ್ವಾಯಿನ್‌ ಗಾತ್ರದ ಬ್ಯಾಟರಿಗಳು ಇರುತ್ತವೆ.

ಆಟಿಕೆಗಳು: ಮ್ಯಾಗ್ನೆಟ್‌ ಮತ್ತು ಕ್ವಾಯಿನ್‌ ಬ್ಯಾಟರಿಗಳಿಲ್ಲದ ಆಟಿಕೆಗಳೂ ಮಕ್ಕಳ ಪ್ರಾಣಕ್ಕೆ ಎರವಾಗಬಹುದು. ಗಟ್ಟಿಮುಟ್ಟಾದ ಆಟಿಕೆಗಳಿರಲಿ. ಆಟಿಕೆಯ ಭಾಗಗಳು ಸುಲಭವಾಗಿ
ಕಿತ್ತು ಬರುವಂತಿರಬಾರದು. ಆಟಿಕೆಗಳಲ್ಲಿರುವ ಮ್ಯಾಗ್ನೆಟ್‌ಗಳನ್ನು ತೆಗೆದಿಡಿ. ಹೈ ಪವರ್‌ ಮ್ಯಾಗ್ನೆಟ್‌ಗಳು ಹೆಚ್ಚು ಅಪಾಯಕಾರಿ.

ಬಾತ್‌ಟಬ್ಸ್‌, ಟಾಯ್ಲೆಟ್ಸ್‌, ಬಕೆಟ್‌: ಮಕ್ಕಳನ್ನು ಒಂಟಿಯಾಗಿ ಬಾತ್‌ಟಬ್‌ಗೆ ಬಿಡಬೇಡಿ. ನಿಮ್ಮ ಬಾತ್‌ರೂಮ್‌ ಬಾಗಿಲುಗಳು ಯಾವಾಗಲೂ ಮುಚ್ಚಿರಲಿ. ಟಾಯ್ಲೆಟ್‌ ಸೀಟ್‌ ಕವರ್‌ ಆಗಿರಲಿ. ಆಯ ತಪ್ಪಿ ಕಮೋಡ್‌ನೊಳಗೆ ಮಕ್ಕಳ ಬಿದ್ದ ಉದಾಹರಣೆಗಳಿವೆ. ನೀರು ತುಂಬಿದ ದೊಡ್ಡ ಗಾತ್ರ ಬಕೆಟ್‌ಗಳತ್ತ ಹೋಗದಂತೆ ನೋಡಿಕೊಳ್ಳಿ.

ಔಷಧಗಳು, ಟ್ಯಾಬ್ಲೆಟ್ಸ್‌: ಮಕ್ಕಳ ಕೈಗೆ ಟ್ಯಾಬ್ಲೆಟ್‌, ಟಾನಿಕ್‌ ಬಾಟಲ್‌ಗಳು ಮತ್ತಿತರ ಔಷಧಗಳು ಸಿಗದಂತಿರಲಿ. ಮಕ್ಕಳ ಮುಂದೆ ನೀವು ಔಷಧವಾಗಲಿ, ಟ್ಯಾಬ್ಲೆಟ್‌ ಆಗಲಿ ಸೇವಿಸಲು ಹೋಗಬೇಡಿ. ಮಗು ನಿಮ್ಮನ್ನು ಅನುಕರಿಸುವ ಸಾಧ್ಯತೆ ಹೆಚ್ಚು.

ಬಾತ್‌ರೂಂ ಕ್ಲೀನರ್‌ಗಳು: ಸಾಬೂನುಗಳು, ಬ್ಲೀಚಿಂಗ್‌, ಬಾತ್‌ರೂಂ ಕ್ಲೀನ್‌ಗೆ ಬಳಸುವ ಇತರ ಯಾವುದೇ ರಾಸಾಯನಿಕ ಪದಾರ್ಥಗಳು ಮಕ್ಕಳಿಗೆ ನಿಲುಕದಂತೆ ನೋಡಿಕೊಳ್ಳಿ.

ವಸ್ತುಗಳು ಬೀಳದಂತಿರಲಿ: ಮಗು ಎಂದ ಮೇಲೆ ಅದು ಮನೆ ತುಂಬ ಓಡಾಡಿಕೊಂಡಿರುತ್ತದೆ. ಹಾಗಾಗಿ, ಯಾವುದೇ ವಸ್ತುಗಳು ಸುಲಭವಾಗಿ ನೆಲಕ್ಕೆ ಬೀಳದಂತೆ ಇರಲಿ. ಇಲ್ಲದಿದ್ದರೆ ಆಟವಾಡುವ ಹುಮ್ಮಸ್ಸಿನಲ್ಲಿ ಮನೆಯ ಯಾವುದೇ ವಸ್ತು ಹಿಡಿದು ಜಗ್ಗಿದರೆ ಅದು ಅದರ ಮೇಲೆ ಬೀಳುವ ಸಾಧ್ಯತೆಗಳಿರುತ್ತವೆ. ಅಂದರೆ ಫರ್ನಿಚರ್‌, ಟಿವಿಗಳು, ಡ್ರೆಸರ್ಸ್‌, ಬುಕ್‌ಗಳು ಇತ್ಯಾದಿ.

ವಾಲ್‌ ಪ್ಲಗ್‌, ವೈರ್‌, ಚಾರ್ಜರ್‌: ಈ ವಿಷಯದಲ್ಲಿ ಪೋಷಕರು ಬಹಳ ಎಚ್ಚರವಾಗಿರಬೇಕು. ಮಕ್ಕಳಿಗೆ ವಾಲ್‌ಪ್ಲಗ್‌ಗಳು, ಎಲೆಕ್ಟ್ರಿಕಲ್‌ ವೈರ್‌, ಮೊಬೈಲ್‌ ಚಾರ್ಜರ್‌ಗಳು ಎಟುಕದಂತಿರಲಿ. ಬಾತ್‌ಟಬ್‌, ಸಿಂಕ್‌ಗಳ ಹತ್ತಿರ ಎಲೆಕ್ಟ್ರಿಕಲ್‌ ಸಲಕರಣೆಗಳು ಇರದಿರಲಿ. ಮಕ್ಕಳಿಗೆ ಯಾವುದ ಸ್ವಿಚ್‌ಗಳನ್ನು ಆನ್‌ ಅಥವಾ ಆಫ್‌ ಮಾಡಲು ಹೇಳಬೇಡಿ.

ಚಾಕು, ಹರಿತ ವಸ್ತುಗಳು: ಮಕ್ಕಳಿಗೆ ಅಡಿಗೆ ಮನೆ ಯಾವಾಗಲೂ ಕುತೂಹಲದ ಕಣಜ. ಅಲ್ಲಿರುವ ಚಾಕು ಮತ್ತು ಇತರೆ ಹರಿತವಾದ ವಸ್ತುಗಳು ಅವರ ಕೈಗೆ ಸಿಗದಿರಲಿ. ಚೂಪಾದ ಪೆನ್ಸಿಲ್‌ಗಳು ಒಮ್ಮೊಮ್ಮೆ ಮಕ್ಕಳಿಗೆ ಗಾಯವುಂಟು ಮಾಡಬಹುದು. ಪೆನ್ಸಿಲ್‌ ಹೇಗೆ ಬಳಸಬೇಕು ಎಂಬುದನ್ನು ಹೇಳಿಕೊಡಬೇಕು.

ಗ್ಯಾಸ್‌ ಸಿಲಿಂಡರ್‌, ಸ್ಟೋವ್‌: ಅಡುಗೆ ಮನೆಯಲ್ಲಿರುವ ಸ್ಟೋವ್‌ ಹತ್ತಿರ ಮಕ್ಕಳು ಸುಳಿಯದಂತೆ ನೋಡಿಕೊಳ್ಳಿ. ಹಾಗೆಯೇ ಅಡುಗೆ ಸಿಲಿಂಡರ್‌ಗಳು ಕೂಡ ಮಕ್ಕಳಿಗೆ ಗೊತ್ತಾಗದಂತೆ ಇರಲಿ.

ಕ್ರಿಮಿನಾಶಕ, ಪೆಟ್ರೋಲ್: ಈ ವಿಷಯದಲ್ಲಿ ಹೆಚ್ಚು ಜಾಗೂರಕರಾಗಿರಬೇಕು. ಕ್ರಿಮಿನಾಶಕಗಳು, ಬೆಳೆಗೆ ಸಿಂಪಡಿಸುವ ಇತರೆ ಯಾವುದೇ ರಾಸಾಯನಿಕಗಳು ದೂರವಿಡಿ. ಪೆಟ್ರೋಲ್‌ ಮತ್ತು ಡೀಸೆಲ್ ಸಂಗ್ರಹ ಬಾಟಲ್‌ಗಳು ಮಕ್ಕಳ ಕಣ್ಣಿಗೆ ಬೀಳದಂತಿರಲಿ.

ಎತ್ತರ ಏರದಿರಲಿ: ಮಕ್ಕಳು ಒಂಟಿಯಾಗಿ ಸ್ಟೆಪ್‌ಗಳು, ಮಾಳಿಗೆ ಮೇಲೆ ಹೋಗದಂತೆ ನೋಡಿಕೊಳ್ಳಿ. ಆಡುತ್ತಾ ಮೇಲಿಂದ ಬಿದ್ದರೆ ಅಪಾಯ ಗ್ಯಾರಂಟಿ.

ಈ ವರದಿಯು ವಿಜಯ ಕರ್ನಾಟಕದ 2019ರ ನವೆಂಬರ್ 13ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.

Dark Mode: ಜಿ ಮೇಲ್ ಡಾರ್ಕ್‌ ಮೋಡ್‌ಗೆ ಬದಲಿಸುವುದು ಹೇಗೆ?

- ಮಲ್ಲಿಕಾರ್ಜುನ ತಿಪ್ಪಾರ
ದಿನಗಳೆದಂತೆ ಈ 'ಡಾರ್ಕ್ ಮೋಡ್‌' ಕೂಡ 'ಡಾರ್ಕ್ ಹಾರ್ಸ್‌' ರೀತಿಯಲ್ಲೇ ಸ್ಮಾರ್ಟ್‌ಫೋನ್‌ ಬಳಕೆದಾರರಿಗೆ ಮೋಡಿ ಮಾಡುತ್ತಿದೆ. ಬಹುತೇಕ ಆ್ಯಪ್‌ಗಳು ಇದೀಗ 'ಡಾರ್ಕ್ ಮೋಡ್‌'ಗೆ ಫೀಚರ್‌ ಅಳವಡಿಸಿಕೊಳ್ಳುತ್ತಿವೆ. ಇದಕ್ಕೆ ತಾಜಾ ಉದಾಹರಣೆ ಎಂದರೆ- ವಾಟ್ಸ್‌ಆ್ಯಪ್‌. ಈ ಆ್ಯಪ್‌ ಕೂಡ ಡಾರ್ಕ್ ಮೋಡ್‌ ಫೀಚರ್‌ ಅನ್ನು ಪರಿಚಯಿಸುತ್ತಿದೆ. ಅಂದರೆ, ಬಳಕೆದಾರರು ಡಾರ್ಕ್ ಮೋಡ್‌ಗೆ ಮರುಳಾಗಿದ್ದು, ಅಂಥ ಸೇವೆಯನ್ನು ಎಲ್ಲಆ್ಯಪ್‌ಗಳಿಂದಲೂ ನಿರೀಕ್ಷಿಸುತ್ತಿದ್ದಾರೆ ಎಂದಾಯಿತು.

ಈಗಾಗಲೇ ಗೂಗಲ್‌ ಕೂಡ ಗೂಗಲ್‌ ಮ್ಯಾಫ್ಸ್‌, ಜಿಮೇಲ್‌ ಸೇರಿದಂತೆ ತನ್ನ ಅನೇಕ ಉತ್ಪನ್ನಗಳಿಗೆ ಡಾರ್ಕ್ ಮೋಡ್‌ ಪರಿಚಯಿಸಿದ್ದು, ಬಳಕೆದಾರರ ಮೆಚ್ಚುಗೆ ಗಳಿಸಿದೆ. ಆದರೆ, ಬಹಳಷ್ಟು ಜನರಿಗೆ ಈ ಡಾರ್ಕ್ ಮೋಡ್‌ ಅನ್ನು ಹೇಗೆ ಸಕ್ರಿಯಗೊಳಿಸಬೇಕೆಂಬುದು ಗೊತ್ತಿರುವುದಿಲ್ಲ. ಈ ಹಿನ್ನೆಲೆಯಲ್ಲಿಜಿಮೇಲ್‌ ಅನ್ನು ಡಾರ್ಕ್ ಮೋಡ್‌ಗೆ ಬದಲಿಸುವುದು ಹೇಗೆಂದು ತಿಳಿದುಕೊಳ್ಳೋಣ. ಆಂಡ್ರಾಯ್ಡ್‌, ಮೊಬೈಲ್‌ ಮತ್ತು ಡೆಸ್ಕ್‌ಟಾಪ್‌ಗಳೆರಡಲ್ಲೂಜಿಮೇಲ್‌ಗೆ ಡಾರ್ಕ್ ಮೋಡ್‌ ಲಭ್ಯವಿದೆ.

ಡೆಸ್ಕ್‌ಟಾಪ್‌ನಲ್ಲಿಡಾರ್ಕ್ ಮೋಡ್‌
ಸ್ಮಾರ್ಟ್‌ಫೋನ್‌, ಟ್ಯಾಬ್‌ಗಿಂತ ಡೆಸ್ಕ್‌ಟಾಪ್‌(ಕಂಪ್ಯೂಟರ್‌)ನಲ್ಲೇ ನೀವು ಹೆಚ್ಚಾಗಿ ಜಿಮೇಲ್‌ ಬಳಸುತ್ತಿದ್ದಿರಿ ಮತ್ತು ಜಿಮೇಲ್‌ ಅನ್ನು ಡಾರ್ಕ್ ಮೋಡ್‌ಗೆ ಹೇಗೆ ಬದಲಿಸುವುದು ಗೊತ್ತಿಲ್ಲಎಂದರೆ ಹೀಗೆ ಮಾಡಿ: ಜಿಮೇಲ್‌.ಕಾಮ್‌ಗೆ ಹೋಗಿ. ನಿಮ್ಮ ಖಾತೆ ತೆರೆಯಿರಿ. ಜಿಮೇಲ್‌ ಪೇಜ್‌ನ ಬಲಗಡೆಯ ಮೇಲಗಡೆ ಪ್ರೊಫೈಲ್‌ ಪಿಕ್ಚರ್‌ ಕೆಳಗಿರುವ 'ಸೆಟ್ಟಿಂಗ್ಸ್‌' ಮೇಲೆ ಕ್ಲಿಕ್‌ ಮಾಡಿ. ಬಳಿಕ 'ಥೀಮ್ಸ್‌' ಸೆಲೆಕ್ಟ್ ಮಾಡಿಕೊಳ್ಳಿ. ಬಳಿಕ ನಿಮಗೆ ಥೀಮ್‌ಗಳಿರುವ ಥಂಬ್‌ನೇಲ್‌ಗಳು ಕಾಣ ಸಿಗುತ್ತವೆ ಅಲ್ಲವೇ? ಅವುಗಳನ್ನು ಸ್ಕ್ರಾಲ್‌ ಮಾಡಿ ಆಗ ಬ್ಲ್ಯಾಕ್‌ ಥಂಬ್‌ನೇಲ್‌(ಚಿತ್ರ) ಮೇಲೆ ಕ್ಲಿಕ್‌ ಮಾಡಿ. ಆಗ ನಿಮ್ಮ ಜಿಮೇಲ್‌ ಡಾರ್ಕ್ ಮೋಡ್‌ಗೆ ಹೊರಳುತ್ತದೆ.

ಆಂಡ್ರಾಯ್ಡ್‌ನಲ್ಲಿ ಹೇಗೆ ಮಾಡೋದು?
ನಿಮ್ಮ ಫೋನ್‌ನಲ್ಲಿನೂತನ ಜಿಮೇಲ್‌ ಆ್ಯಪ್‌ ಇನ್ಸ್‌ಟಾಲ್‌ ಆಗಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಿ. ಇದಕ್ಕಾಗಿ ನೀವು ಗೂಗಲ್‌ ಪ್ಲೇ ಸ್ಟೋರ್‌ಗೆ ಹೋಗಿ ಅಲ್ಲಿ, ಜಿಮೇಲ್‌ ಆ್ಯಪ್‌ ಅಪ್‌ಡೇಟ್‌ ಮಾಡಿಕೊಳ್ಳಿ. ಒಂದೊಮ್ಮೆ ಅಪ್‌ಡೇಟ್‌ ಬಟನ್‌ ಅಲ್ಲಿಕಾಣದಿದ್ದರೆ ಹೊಚ್ಚ ಹೊಸ ಆ್ಯಪ್‌ ಇದೆ ಎಂದರ್ಥ.

ಫೈನ್‌, ಈಗ ಡಾರ್ಕ್ ಮೋಡ್‌ಗೆ ಮಾರ್ಪಾಡಿಸುವುದು ನೋಡೋಣ; ಒಂದು ವೇಳೆ ನೀವು ಆಂಡ್ರಾಯ್ಡ್‌ 10 ಸಿಸ್ಟಮ್‌ ಇದ್ದರೆ ಅದರಲ್ಲಿವೈಡ್‌ ಡಾರ್ಕ್ ಥೀಮ್‌ ಸಕ್ರಿಯವಾಗಿರುತ್ತದೆ ಮತ್ತು ಆ್ಯಪ್‌ ಸ್ವಯಂ ಆಗಿ ಹೊಸ ಲುಕ್‌ಗೆ ಮಾರ್ಪಾಡುಗೊಳ್ಳುತ್ತದೆ. ಇಲ್ಲದಿದ್ದರೆ ಇದನ್ನು ನೀವು ಮ್ಯಾನ್ಯುಯಲ್‌ ಆಗಿ ಮಾಡಿಕೊಳ್ಳಬೇಕು.

ಜಿಮೇಲ್‌ನ ಆ್ಯಪ್‌ ಎಡಗಡೆಯ ಮೇಲ್ಭಾಗದಲ್ಲಿರುವ ಮೆನ್ಯು ಐಕಾನ್‌ ಮೇಲೆ ಟ್ಯಾಪ್‌ ಮಾಡಿದ ಬಳಿಕ ಸ್ಕ್ರಾಲ್‌ ಡೌನ್‌ ಮಾಡಿ ಆಗ ಸೆಟ್ಟಿಂಗ್ಸ್‌ ಕಾಣುತ್ತದೆ; ಅದರ ಮೇಲೆ ಟ್ಯಾಪ್‌ ಮಾಡಿ. ಬಳಿಕ ಜನರಲ್‌ ಸೆಟ್ಟಿಂಗ್ಸ್‌ ಮೇಲೆ ಟ್ಯಾಪ್‌ ಮಾಡಿ; ಇಲ್ಲಿನೀವು ಜಿಮೇಲ್‌ ಥೀಮ್‌ ಅನ್ನು ಲೈಟ್‌, ಡಾರ್ಕ್ ಅಥವಾ ಸಿಸ್ಟಮ್‌ ಡಿಫಾಲ್ಟ್‌ ಅನ್ನು ಆಯ್ಕೆ ಮಾಡಿಕೊಳ್ಳಬಹುದು. ಗಮನಿಸಬೇಕಾದ ಸಂಗತಿ ಏನೆಂದರೆ, ಈ ಡಾರ್ಕ್ ಮೋಡ್‌ ಆಂಡ್ರಾಯ್ಡ್‌ ಪೈ ಅಥವಾ ಅದಕ್ಕೂ ಮೊದಲಿನ ಓಎಸ್‌ಗಳಲ್ಲಿಲಭ್ಯವಿಲ್ಲ. ಹಾಗಿದ್ದೂ, ಡೆಸ್ಕ್‌ಟಾಪ್‌ ಮೋಡ್‌ನಲ್ಲಿಡಾರ್ಕ್ ಮೋಡ್‌ ಬಳಸಬಹುದು. ಈ ಆಯ್ಕೆ ನಿಮಗೆ ಆಂಡ್ರಾಯ್ಡ್‌ ಕ್ರೋಮ್‌ ಹಾಗೂ ಫೈರ್‌ಫಾಕ್ಸ್‌ ಪ್ರಿವಿವ್ಯೂನಲ್ಲಿದೊರೆಯುತ್ತದೆ.ಘ್ಕಿ

ಐಒಎಸ್‌ನಲ್ಲಿ ಆಕ್ಟಿವೇಟ್‌ ಮಾಡೋದು?
ಐಒಎಸ್‌ಗೆ ಇನ್ನೂ ಜಿಮೇಲ್‌ ಡಾರ್ಕ್ ಮೋಡ್‌ ಪರಿಚಯಿಸಿಲ್ಲ. ಆ್ಯಪಲ್‌ ಈ ಫೀಚರ್‌ ಅನ್ನು ಸರ್ವರ್‌ ಸೈಡ್‌ನಲ್ಲಿಆಕ್ಟಿವೇಟ್‌ ಮಾಡದ ಹೊರತು ಬಳಕೆದಾರರಿಗೆ ದೊರೆಯುವುದಿಲ್ಲ. ಒಂದೊಮ್ಮೆ ಅದು ಐಒಎಸ್‌ಗೂ ಪರಿಚಯಗೊಂಡರೆ ಸ್ವಯಂ ಆಗಿ ನಿಮ್ಮ ಐಫೋನ್‌ ಸಿಸ್ಟಮ್‌ ವೈಡ್‌ ಡಾರ್ಕ್ ಮೋಡ್‌ಗೆ ಬದಲಾಗುತ್ತದೆ. ಇಲ್ಲದಿದ್ದರೆ, ಜಿಮೇಲ್‌ ಮೆನ್ಯುಗೆ ಹೋಗಿ, ಅಲ್ಲಿಂದ ಸೆಟ್ಟಿಂಗ್ಸ್‌ ಹೋಗಿ ಮತ್ತು ಥೀಮ್‌ ಮೇಲೆ ಟ್ಯಾಪ್‌ ಮಾಡಿ ಡಾರ್ಕ್ ಸೆಲೆಕ್ಟ್ ಮಾಡಿಕೊಂಡರೆ ಸಾಕು.

ಯಾಕೆ ಡಾರ್ಕ್ ಮೋಡ್‌?
ಗೂಗಲ್‌ ಸಂಸ್ಥೆಯೇ ಸಂಶೋಧನೆ ನಡೆಸಿದ್ದು, ವೈಟ್‌ ಪಿಕ್ಸೆಲ್‌ಗಳಿಗಿಂತಲೂ ಡಾರ್ಕರ್‌ ಪಿಕ್ಸೆಲ್‌ಗಳು ಕಡಿಮೆ ಪವರ್‌ ಬಳಸಿಕೊಳ್ಳುತ್ತವೆ. ಅಂದರೆ, ಡಾರ್ಕ್ ಮೋಡ್‌ನಲ್ಲಿಜಿಮೇಲ್‌ ಬಳಸಿದರೆ ನಿಮ್ಮ ಫೋನ್‌ ಬ್ಯಾಟರಿ ಕೂಡ ದೀರ್ಘ ಕಾಲದವರೆಗೂ ಇರುತ್ತದೆ. ಜತೆಗೆ, ನಿಮ್ಮ ಕಣ್ಣಿಗೂ ದಣಿವಾಗುವುದಿಲ್ಲಎಂಬುದು ನೆನಪಿರಲಿ.

This article has been published in VK on 11 November 2019
ಡಾರ್ಕ್ ಮೋಡ್ ಎಂಬ ಡಾರ್ಕ್ ಹಾರ್ಸ್!

Best Yoga Apps: ಯೋಗ ಕಲಿಕೆಗೆ ಆ್ಯಪ್ ಗುರು

- ಮಲ್ಲಿಕಾರ್ಜುನ ತಿಪ್ಪಾರ 
ಭಾರತವು ಯೋಗವನ್ನು ಇಡೀ ಜಗತ್ತಿಗೆ ಕೊಡುಗೆಯಾಗಿ ನೀಡಿದೆ. ಪ್ರಾಚೀನ ಕಾಲದ ಈ ವೈದ್ಯ ಪದ್ಧತಿ ಕೇವಲ ದೈಹಿಕವಾಗಿ ಮಾತ್ರ ಲಾಭವನ್ನು ತಂದುಕೊಡುವುದಲ್ಲದೇ ಮಾನಸಿಕವಾಗಿ ಅಧ್ಯಾತ್ಮಿಕ ದೃಷ್ಟಿಯಲ್ಲೂ ನಿಮ್ಮನ್ನು ಗಟ್ಟಿಗೊಳಿಸುತ್ತದೆ. ಹಾಗಾಗಿಯೇ ಯೋಗವನ್ನು ಇಡೀ ಜಗತ್ತು ಒಪ್ಪಿಕೊಂಡಿದೆ. ಯಾವುದೇ ಧರ್ಮ, ವರ್ಗ, ಜಾತಿ, ಬಣ್ಣ, ಪ್ರಾದೇಶಿಕ ಹಂಗಿಲ್ಲದೇ ಬೆಳೆಯುತ್ತಿದೆ. ಕಳೆದ ಐದು ವರ್ಷಗಳಿಂದ ವಿಶ್ವಸಂಸ್ಥೆ ಆಚರಿಸಿಕೊಂಡು ಬರುತ್ತಿರುವ 'ಅಂತಾರಾಷ್ಟ್ರೀಯ ಯೋಗ ದಿನಾಚರಣೆ' ಇದಕ್ಕೆ ಸಾಕ್ಷಿಯಾಗುತ್ತಿದೆ. ಯೋಗವನ್ನು ಗುರುವಿನ ನೆರವಿನಿಂದಲೇ ಕಲಿಯಬೇಕು ಎಂಬ ಮಾತಿದೆ. ಇಂದಿನ ಆಧುನಿಕ ಯುಗದಲ್ಲಿ ಈ ಗುರುವಿನ ಸ್ಥಾನವನ್ನು ಆ್ಯಪ್‌ಗಳು ತುಂಬುತ್ತಿವೆ. ಯೋಗಕ್ಕೆ ಸಂಬಂಧಿಸಿದಂತೆ ನೂರಾರು ಆ್ಯಪ್‌ಗಳಿವೆ. ಗೂಗಲ್‌ ಪ್ಲೇ ಸ್ಟೋರ್‌, ಆ್ಯಪಲ್‌ನಲ್ಲಿ ಸಾಕಷ್ಟು ಆ್ಯಪ್‌ಗಳಿದ್ದು, ಆ ಪೈಕಿ ಒಂದಿಷ್ಟು ಆ್ಯಪ್‌ಗಳು ತುಂಬ ಉಪಯುಕ್ತವಾಗಿವೆ. ಗುರು ನೀಡುವ ಮಾರ್ಗದರ್ಶನದಷ್ಟೇ ಶುದ್ಧವಾದ ಪಾಠವನ್ನು ಈ ಆ್ಯಪ್‌ಗಳು ನೀಡುತ್ತವೆ. ಅಂಥ ಕೆಲವು ಉಪಯುಕ್ತ ಆ್ಯಪ್‌ಗಳ ಬಗ್ಗೆ ಇಲ್ಲಿದೆ ಮಾಹಿತಿ. 

ಹೆಡ್‌ಸ್ಪೇಸ್‌
ಯಾವುದೇ ಯೋಗ ಮಾಡಲು ಏಕಾಗ್ರತೆಯೂ ಮುಖ್ಯ. ಏಕಾಗ್ರತೆಯನ್ನು ಸಾಧಿಸಲು ಧ್ಯಾನ ನಿಮಗೆ ಹೆಚ್ಚಿನ ನೆರವು ನೀಡುತ್ತದೆ. ಆ ಹಿನ್ನೆಲೆಯಲ್ಲಿ ಹೆಡ್‌ಸ್ಪೇಸ್‌ ನಿಮಗೆ ಧ್ಯಾನದ ಅನೇಕ ಪಾಠಗಳನ್ನು ಹೇಳಿಕೊಡುತ್ತದೆ. ವಿಶೇಷವಾಗಿ ಯೋಗ ಆರಂಭಿಕರಿಗೆ ಇದು ಹೆಚ್ಚಿನ ಸಹಾಯ ಮಾಡಬಲ್ಲದು. ಅನೇಕ ಹೊಸ ಹೊಸ ಫೀಚರ್‌ಗಳನ್ನು ಹೊಂದಿರುವ ಈ ಆ್ಯಪ್‌, ಸ್ಲೀಪ್‌ ವಿಥ್‌ ನರೇಟೆಡ್‌ ಸ್ಟೋರಿಸ್‌ ಎಂಬ ಸೆಕ್ಷ ನ್‌ ಹೊಂದಿದೆ. ಇದು ನಿಮಗೆ ಸುಖವಾದ ನಿದ್ರೆ ಮಾಡಲು ನೆರವು ನೀಡುತ್ತದೆ. 

ಯೋಗ ಗೋ
ಯೋಗಕ್ಕೆ ಸಂಬಂಧಿಸಿದ ಬಹಳಷ್ಟು ಆ್ಯಪ್‌ಗಳು ಯೋಗಾಸನಗಳು ಬಗ್ಗೆ ವಿಶೇಷವಾದ ಮಾಹಿತಿ ನೀಡುತ್ತವೆ. ಆದರೆ, ಈ ಯೋಗ ಗೋ ಆ್ಯಪ್‌ ನಿಮಗೆ ಯೋಗದ ಜತೆಗೆ ಡಯಟ್‌ ಪ್ಲ್ಯಾನ್‌ ಬಗ್ಗೆ ಸವಿಸ್ತಾರವಾದ ಮಾಹಿತಿ ನೀಡುತ್ತದೆ. ಫಿಟ್ನೆಸ್‌ ಗೋಲ್‌ ಅನ್ನು ನೀವು ನಿರ್ಧರಿಸಿ ಆ ದಿಸೆಯಲ್ಲಿ ಯೋಗ ಗೋ ಆ್ಯಪ್‌ ಮೂಲಕ ಅದನ್ನು ತಲುಪಬಹುದು. ಜತೆಗೆ ಆರೋಗ್ಯಕಾರಿ ಊಟದ ರೆಸೆಪಿಗಳು ಕೂಡ ಈ ಆ್ಯಪ್‌ನಲ್ಲಿವೆ. 

5 ಮಿನಿಟ್‌ ಯೋಗ
ಇದೊಂದು ಅತ್ಯಂತ ಸರಳವಾದ ಯೋಗ ಆ್ಯಪ್‌. ಹೆಸರೇ ಹೇಳುವಂತೆ ಐದು ನಿಮಿಷದಲ್ಲೇ ನಿಮಗೆ ಯೋಗ ಪಾಠ ಮಾಡುತ್ತದೆ. ಜತೆಗೆ, ಡೈಲಿ ರಿಮೈಂಡರ್ಸ್‌, ಟೈಮರ್‌ ಕೂಡ ಒದಗಿಸುತ್ತದೆ. ಇದರಲ್ಲಿರುವ ವಿಡಿಯೊ ಟುಟೊರಿಯಲ್ಸ್‌ ಚೆನ್ನಾಗಿವೆ. ಯೋಗಾಸನದ ಚಿತ್ರಗಳು ಮತ್ತು ವಿವರಣೆಗಳು ಪರಿಪೂರ್ಣವಾಗಿವೆ. ಎಲ್ಲಕ್ಕಿಂತ ಹೆಚ್ಚಾಗಿ, ಇಲ್ಲಿರುವ ವಿಡಿಯೊಗಳನ್ನು ರನ್‌ ಮಾಡಲು ತುಂಬ ಹೆಚ್ಚಿನ ಡೇಟಾ ಏನೂ ಖರ್ಚು ಮಾಡುವುದಿಲ್ಲ. ಹೆಚ್ಚಿನ ಮಾಹಿತಿ ಬೇಕಿದ್ದರೆ ನೀವು ಹಣ ಕೊಟ್ಟು ಚಂದಾದಾರರಾಗಬೇಕಾಗುತ್ತದೆ ಮತ್ತು ಈ ಆ್ಯಪ್‌ಗೆ 4.5 ರಾರ‍ಯಂಕಿಂಗ್‌ ಅನ್ನು ಬಳಕೆದಾರರು ನೀಡಿದ್ದಾರೆ. 

ಡೌನ್‌ ಯೋಗ
ಯೋಗಕ್ಕೆ ಸಂಬಂಧಿಸಿದಂತೆ ಇದೊಂದು ಅತ್ಯುತ್ತಮ ಆ್ಯಪ್‌ ಆಗಿದ್ದು, ಅದ್ಭುತ ಅನುಭವವನ್ನು ನೀಡುತ್ತದೆ. ಜತೆಗೆ, ಇಲ್ಲಿರುವ ಯೋಗ ಪಾಠಗಳನ್ನು ನಿಮಗೆ ಬೇಕಾದಂತೆ ಕಸ್ಟ್‌ಮೈಸ್‌ ಮಾಡಿಕೊಳ್ಳಬಹುದು. ಜತೆಗೆ, ಗೂಗಲ್‌ ಫಿಟ್ನೆಸ್‌ ಸಪೋರ್ಟ್‌, ಬಿಗಿನರ್ಸ್‌ ಕ್ಲಾಸಸ್‌, ಆಫ್‌ಲೈನ್‌ ಸಪೋರ್ಟ್‌, ವಾಯ್ಸ್‌ ಗೈಡನ್ಸ್‌, ಮ್ಯೂಸಿಕ್‌ ಸೇರಿದಂತೆ ಇನ್ನಿತರ ಸೇವೆಗಳನ್ನು ಈ ಆ್ಯಪ್‌ ಒದಗಿಸುತ್ತದೆ. ಯೋಗ ಆಸನಗಳ ಬಗ್ಗೆ ಅತ್ಯತ್ತಮ ಮಾಹಿತಿಯನ್ನು ಈ ಆ್ಯಪ್‌ ಒಳಗೊಂಡಿದೆ. ಇದು ಕೂಡ ಉಚಿತ ಮತ್ತು ಪ್ರೀಮಿಯಂ ಆಫರ್‌ಗಳನ್ನು ಹೊಂದಿದೆ. ಬಳಕೆದಾರರು 4.9 ಶ್ರೇಯಾಂಕವನ್ನು ಈ ಆ್ಯಪ್‌ಗೆ ನೀಡಿದ್ದಾರೆ. 

ಪಾಕೆಟ್‌ ಯೋಗ
ಯೋಗ ಆ್ಯಪ್‌ಗಳಲ್ಲೇ ಪಾಕೆಟ್‌ ಯೋಗ ಕೂಡ ಅತ್ಯುತ್ತಮ ಆ್ಯಪ್‌ ಎಂದು ಗುರುತಿಸಿಕೊಂಡಿದೆ. ಯೋಗಾಸನ ತಿಳಿಸಿಕೊಡಲು ಈ ಆ್ಯಪ್‌ ಪಠ್ಯ ಮತ್ತು ಇಮೇಜ್‌ಗಳನ್ನು ಬಳಸುತ್ತದೆ. 200ಕ್ಕೂ ಹೆಚ್ಚುವ ಯೋಗಾಸನಗಳ ಬಗ್ಗೆ ಸಂಪೂರ್ಣವಾದ ಮಾಹಿತಿ ಇದರಲ್ಲಿದೆ. ಪ್ರಾಕ್ಟಿಸ್‌ ಸೆಷನ್‌, ಯೋಗ ಚಟುವಟಿಕೆ ಲಾಗ್‌ ಬುಕ್‌ ಕೂಡ ಇದ್ದು, ಸಂಗೀತ ಕೂಡ ಇದೆ. ವಿಶೇಷ ಎಂದರೆ, ಪಾಕೆಟ್‌ ಯೋಗ ಕರ್ಮ(ಪಾಯಿಂಟ್‌) ಪದ್ಧತಿಯನ್ನು ಅಳವಡಿಸಿಕೊಂಡಿದ್ದು, ನೀವು ಎಷ್ಟು ಯೋಗಾಸನಗಳನ್ನು ಮಾಡುತ್ತೀರೋ ಅಷ್ಟು ಕರ್ಮ ನೀವು ಪಡೆದುಕೊಳ್ಳುತ್ತೀರಿ. ಹೀಗೆ ಕರ್ಮ ಪಡೆದುಕೊಳ್ಳುತ್ತ ಹೋದಂತೆ ನೀವು ಇನ್ನೂ ಹೆಚ್ಚಿನ ಫೀಚರ್‌ಗಳನ್ನು ಅನ್‌ಲಾಕ್‌ ಮಾಡುತ್ತ ಹೋಗುತ್ತೀರಿ. ಅದಂರೆ, ಇನ್ನೂ ಹೆಚ್ಚಿನ ಸೌಲಭ್ಯ ದೊರೆಯುತ್ತದೆ. ಈ ಆ್ಯಪ್‌ಗೆ ಬಳಕೆದಾರರು 4.4 ಶ್ರೇಯಾಂಕ ನೀಡಿದ್ದಾರೆ. 

ಟ್ರ್ಯಾಕ್‌ ಯೋಗ 
ಯೋಗಾಸಕ್ತರ ಎಲ್ಲ ಅಗತ್ಯಗಳನ್ನು ಈ ಆ್ಯಪ್‌ ಪೂರೈಸುತ್ತದೆ. ಯೋಗ ಕಲಿಯುಲು ಆರಂಭಿಸುವವರು, ಈಗಾಗಲೇ ಒಂದಿಷ್ಟು ಮಾಹಿತಿ ಹೊಂದಿವರು ಮತ್ತು ತಜ್ಞತೆ ಸಾಧಿಸಿದವರು ಎಂಬ ಮೂರೂ ವರ್ಗದ ಯೋಗಾಸಕ್ತರನ್ನು ಗಮನದಲ್ಲಿಟ್ಟುಕೊಂಡು ಈ ಆ್ಯಪ್‌ ಅಭಿವೃದ್ಧಿಪಡಿಸಲಾಗಿದೆ. ಎಲ್ಲಕ್ಕಿಂತ ಹೆಚ್ಚಾಗಿ ಇದು ಎಚ್‌ಡಿ ವಿಡಿಯೊ ಕಂಟೆಂಟ್‌ ಒದಗಿಸುತ್ತದೆ. ಲೈಬ್ರರಿ ಇದೆ. ಯೋಗ ಮಾತ್ರವಲ್ಲದೆ ಫ್ರೀಸ್ಟೈಲ್‌ ವರ್ಕೌಟ್‌ಗಳ ಬಗ್ಗೆ ಇಲ್ಲಿ ಮಾಹಿತಿ ದೊರೆಯುತ್ತದೆ. ಪಾಕೆಟ್‌ ಯೋಗದ ಕರ್ಮ ಪಾಯಿಂಟ್‌ ರೀತಿಯಲ್ಲೇ ಈ ಆ್ಯಪ್‌ ಕೂಡ ಕ್ರಿಯಾ ಪಾಯಿಂಟ್‌ ಸಿಸ್ಟಮ್‌ ಹೊಂದಿದ್ದು, ಇದು ಯೋಗದ ಮೇಲೆ ಆಸಕ್ತಿಯನ್ನು ಹೆಚ್ಚಿಸಲು ಸಹಕಾರಿಯಾಗಿದೆ. ಕ್ರಿಯಾ ಪಾಯಿಂಟ್‌ ಹೆಚ್ಚೆಚ್ಚು ಗಳಿಸಿದಂತೆ ನಿಮಗೆ ಇನ್ನೂ ಹೆಚ್ಚಿನ ಫೀಚರ್‌ಗಳನ್ನು ಅನ್‌ಲಾಕ್‌ ಮಾಡುತ್ತ ಹೋಗಬಹುದು. ಗೂಗಲ್‌ ಪ್ಲೇ ಸ್ಟೋರ್‌ನಲ್ಲಿ 4.5 ಶ್ರೇಯಾಂಕವಿದೆ. 

ಯೋಗ ಡೈಲಿ ಫಿಟ್ನೆಸ್‌
ಉಚಿತ ಯೋಗ ಆ್ಯಪ್‌ಗಳಲ್ಲೇ ಯೋಗ ಡೈಲಿ ಫಿಟ್ನೆಸ್‌ ಅತ್ಯುತ್ತಮ ಆ್ಯಪ್‌ ಎಂದು ಗುರುತಿಸಿಕೊಂಡಿದೆ. ಸರಳ ಫೀಚರ್‌ಗಳನ್ನು ಹೊಂದಿರುವ ಸರಳ ಆ್ಯಪ್‌ ಎಂದು ಹೇಳಬಹುದು. ನಾನಾ ತರಹದ ಎಕ್ಸರ್‌ಸೈಜ್‌, ಆಸನಗಳು ಮತ್ತು 30 ದಿನ ಯೋಗ ಕಲಿಕೆಯ ಕೋರ್ಸ್‌ ಇದೆ. 

ಯೋಗ ಸ್ಟುಡಿಯೊ
ಈ ಆ್ಯಪ್‌ ಅದ್ಭತವಾದ ಲೈಬ್ರರಿ ಹೊಂದಿದ್ದು, ಅನೇಕ ಯೋಗಾಸನಗಳ ಬಗ್ಗೆ ಮಾಹಿತಿ ನೀಡುತ್ತದೆ. ಜತೆಗೆ 70ಕ್ಕ ಹೆಚ್ಚು ಯೋಗ ಮತ್ತು ಧ್ಯಾನದ ಕ್ಲಾಸ್‌ಗಳು ಇಲ್ಲಿವೆ. ಎಚ್‌ಡಿ ವಿಡಿಯೊ ಸೇರಿದಂತೆ ಇನ್ನಿತರ ಹೈಟೆಕ್‌ ಅದ್ಭುತ ಅನುಭವವನ್ನು ಈ ಆ್ಯಪ್‌ ನೀಡುತ್ತದೆ. 

Yoga Page

'Q' ಬಗ್ಗೆ ಏನಾದರೂ ಕ್ಲೂ ಇದೆಯಾ?

ಸ್ಮಾರ್ಟ್‌ಫೋನ್‌ಗಳ ಕ್ರಾಂತಿಗೆ ಕಾರಣವಾಗಿರುವ ಆ್ಯಂಡ್ರಾಯ್ಡ್‌ ಆಪರೇಟಿಂಗ್‌ ಸಿಸ್ಟಮ್‌ ಆಗಾಗ ಹೊಸ ಹೊಸ ಆವೃತ್ತಿಗಳನ್ನು ಬಿಡುಗಡೆ ಮಾಡುತ್ತದೆ. ಆ ಮೂಲಕ ಬಳಕೆದಾರರಿಗೆ ಆ್ಯಂಡ್ರಾಯ್ಡ್‌ ವಿಶಿಷ್ಟ ಅನುಭವವನ್ನು ನೀಡುತ್ತದೆ. ಕಳೆದ ಕೆಲವು ದಿನಗಳಿಂದ ಅತ್ಯಾಧುನಿಕ ತಾಂತ್ರಿಕತೆ ಹಾಗೂ ವಿಶಿಷ್ಟ ಫೀಚರ್‌ಗಳನ್ನು ಹೊಂದಿರುವ ಆ್ಯಂಡ್ರಾಯ್ಡ್‌ ಕ್ಯೂ ಆಪರೇಟಿಂಗ್‌ ಸಿಸ್ಟಮ್‌ ಅನ್ನು ಸರ್ಚ್‌ ಎಂಜಿನ್‌ ದೈತ್ಯ ಗೂಗಲ್‌ ಬಿಡುಗಡೆ ಮಾಡಲಿದೆ ಎಂಬ ಸುದ್ದಿ ಹರಿದಾಡುತ್ತಲೇ ಇತ್ತು. ಕೊನೆಗೆ ಕಳೆದ ವಾರ ಗೂಗಲ್‌ ತನ್ನ ಬಹು ನಿರೀಕ್ಷೆಯ 'ಆ್ಯಂಡ್ರಾಯ್ಡ್‌ ಕ್ಯೂ' ಆಪರೇಟಿಂಗ್‌ ಸಿಸ್ಟಮ್‌ ಅನ್ನು ಅನಾವರಣ ಮಾಡಿದೆ. ಈ ಹೊಸ ಆಪರೇಟಿಂಗ್‌ ಸಿಸ್ಟಮ್‌ ಕ್ಯೂ ಬೀಟಾ ವರ್ಷನ್‌ನಲ್ಲಿದೆ. 

ಪಿಕ್ಸೆಲ್‌, ಪಿಕ್ಸೆಲ್‌ ಎಕ್ಸ್‌ಎಲ್‌, ಪಿಕ್ಸೆಲ್‌2, ಪಿಕ್ಸೆಲ್‌ 2 ಎಕ್ಸ್‌ಎಲ್‌, ಪಿಕ್ಸೆಲ್‌ 3, ಪಿಕ್ಸೆಲ್‌ 3 ಎಕ್ಸ್‌ಎಲ್‌ ಸ್ಮಾರ್ಟ್‌ಫೋನ್‌ಗಳಿಗೆ ಈ ಹೊಸ ವರ್ಷನ್‌ ಸಪೋರ್ಟ್‌ ಮಾಡುತ್ತದೆ. ಈ ಹೊಸ ಒಎಸ್‌ ಬಳಕೆದಾರರ ಖಾಸಗಿತನ ರಕ್ಷ ಣೆಯ ಬಗ್ಗೆ ಹೆಚ್ಚು ಒತ್ತು ನೀಡಿದೆ. ಬಹುಶಃ ಆ್ಯಪ್‌ಗಳಿಗೆ ಸಂಬಂಧಿಸಿದಂತೆ ಖಾಸಗಿತನ ಕಾಪಾಡಿಕೊಳ್ಳಲು ಅತಿ ಹೆಚ್ಚು ನಿಯಂತ್ರಣ ಹೊಂದಿದ ಮೊದಲ ಒಎಸ್‌ ಇದಾಗಿದೆ ಎನಿಸುತ್ತದೆ. ಇದು ಮಡಚಬಲ್ಲ ಸ್ಮಾರ್ಟ್‌ಫೋನ್‌ಗಳಿಗೆ ಸಪೋರ್ಟ್‌ ಮಾಡುತ್ತದೆ. ಈಗಾಗಲೇ ಸ್ಯಾಮ್ಸಂಗ್‌ ಮತ್ತು ಹ್ಯುವಯಿ ಕಂಪನಿಗಳು ತಮ್ಮ ಫೋಲ್ಡೆಬಲ್‌ ಸ್ಮಾರ್ಟ್‌ಗಳನ್ನು ಅನಾವರಣ ಮಾಡಿದ್ದು, ಇವುಗಳಲ್ಲಿ ಕ್ಯೂ ಅಧಿಕೃತವಾಗಿ ಬಳಕೆಯಾಗುವ ಬಗ್ಗೆ ಘೋಷಣೆಯಾಗಬೇಕಿದೆ. ಜತೆಗೆ, ಕ್ಯಾಮೆರಾ ಕಾರ್ಯನಿರ್ವಹಣೆಯಲ್ಲಿ ಹೆಚ್ಚಿನ ಸುಧಾರಣೆ, ಎಪಿಐ ಕನೆಕ್ಟಿವಿಟಿ ಸೇರಿದಂತೆ ಇನ್ನಿತರ ಕಾರ್ಯನಿರ್ವಹಣೆಯು ಹೆಚ್ಚು ಶಕ್ತಿಶಾಲಿಯಾಗಿರಲಿದೆ. ಕ್ವಿಕ್‌ ಆ್ಯಪ್‌ ಸ್ಟಾರ್ಟ್‌ಅಪ್‌ ಕೂಡ ಇರಲಿದೆ. ಲೊಕೇಷನ್‌ ಆ್ಯಕ್ಸೆಸ್‌ಗೆ ಸಂಬಂಧಿಸಿದಂತೆ ಬಳಕೆದಾರರು ಹೆಚ್ಚಿನ ನಿಯಂತ್ರಣ ಸಾಧಿಸಲಿದ್ದಾರೆ. ಈಗಾಗಲೇ ಸಾಕಷ್ಟು ಸದ್ದು ಮಾಡುತ್ತಿರುವ ಆ್ಯಂಡ್ರಾಯ್ಡ್‌ ಕ್ಯೂ ಬಗ್ಗೆ ಸಂಪೂರ್ಣ ಮಾಹಿತಿ ಮೇ ತಿಂಗಳಲ್ಲಿ ಹೊರಬೀಳಲಿದೆ. ಕ್ಯಾಲಿಫೋರ್ನಿಯಾದಲ್ಲಿ ಮೇ 7ರಂದು ನಡೆಯಲಿರುವ ಡೆವಲಪರ್‌ಗಳ ಸಮಾವೇಶದಲ್ಲಿ ಇನ್ನೂ ಹೆಚ್ಚಿನ ಸಂಗತಿಗಳು ಬೆಳಕಿಗೆ ಬರಲಿವೆ. 

ಫೋಲ್ಡೆಬಲ್‌ ಫೋನ್‌ಗೆ ಸಪೋರ್ಟ್‌ 
ಆ್ಯಂಡ್ರಾಯ್ಡ್‌ ಕ್ಯೂ ವಿಶೇಷ ಏನೆಂದರೆ ಇದು ಫೋಲ್ಡೆಬಲ್‌ ಫೋನ್‌ಗೆ ಸಪೋರ್ಟ್‌ ಮಾಡುತ್ತದೆ. ಈ ಹೊಸ ಮಾದರಿಯ ಫೋನ್‌ನಲ್ಲಿರುವ ಆ್ಯಪ್‌ಗಳ ಸುಗಮ ಕಾರ್ಯನಿರ್ವಹಣೆಗೆ ಈ ಹೊಸ ಆಪರೇಟಿಂಗ್‌ ಸಿಸ್ಟಮ್‌ ಹೆಚ್ಚು ಸೂಕ್ತವಾಗಿದೆ. 

ಡಾರ್ಕ್‌ ಮೋಡ್‌ 
ಡಾರ್ಕ್‌ಮೋಡ್‌ನಿಂದ ಬ್ಯಾಟರಿ ಹೆಚ್ಚು ಖರ್ಚಾಗುವುದನ್ನು ತಡೆಯಬಹುದು ಮತ್ತು ಕೆಲವು ಆ್ಯಪ್‌ಗಳ ನಿರ್ವಹಣೆಗೆ ಇದು ಅಗತ್ಯ. ಈ ಹಿನ್ನೆಲೆಯಲ್ಲಿ ಗೂಗಲ್‌ ಕಂಪನಿಯು ತನ್ನ ಹೊಸ ಆಪ್‌ರೇಟಿಂಗ್‌ ಸಿಸ್ಟಮ್‌ನಲ್ಲಿ ಡಾರ್ಕ್‌ಮೋಡ್‌ ಅನ್ನು ಪರಿಚಯಿಸುತ್ತಿದೆ. 

ಸುಧಾರಿತ ಪಿಐಪಿ ಮೋಡ್‌ 
ಅತ್ಯಾಧುನಿಕ ಸ್ಯಾಮ್ಸಂಗ್‌ ಫೋನ್‌ಗಳಲ್ಲಿ ಕೆಲಸ ಮಾಡುವ ರೀತಿಯಲ್ಲೇ ಪಿಐಪಿ ಮೋಡ್‌ ಅನ್ನು ಕ್ಯೂನಲ್ಲೂ ಪರಿಚಯಲಸಲಾಗುತ್ತಿದೆ. ಪಿಐಪಿ ಮೋಡ್‌ನಿಂದಾಗಿ ಬಳಕೆದಾರರು ಸ್ಕ್ರೀನ್‌ ಮೇಲೆ ಬೇರೆ ಬೇರೆ ಆ್ಯಪ್‌ಗಳನ್ನು ಪ್ಲೇಸ್‌ ಮಾಡಿಕೊಳ್ಳಬಹುದು. ವಿಶೇಷ ಎಂದರೆ, ಈ ಎಲ್ಲ ಆ್ಯಪ್‌ಗಳನ್ನು ಏಕ ಕಾಲಕ್ಕೆ ರನ್‌ ಮಾಡಬಹುದು. ಹೀಗೆ ಮಾಡುವುದರಿಂದ ಅದು ಪ್ರೊಡಕ್ಟಿವ್‌ ಆಗಿರುತ್ತವೆ. 

ಮುಖ ಚಹರೆ ಪತ್ತೆ 
2018ರಲ್ಲಿ ಬಹಳಷ್ಟು ಕಂಪನಿಗಳು ತಮ್ಮ ಸ್ಮಾರ್ಟ್‌ಫೋನ್‌ಗಳಲ್ಲಿ ಫೇಷಿಯಲ್‌ ರೆಕಗ್ನಿಷನ್‌(ಮುಖ ಚಹರೆ ಪತ್ತೆ) ಫೀಚರ್‌ ಅನ್ನು ಅಳವಡಿಸಿದವು. ಈ ಹಿನ್ನೆಲೆಯಲ್ಲಿ ಗೂಗಲ್‌ ತನ್ನ ಕ್ಯೂ ಆಪರೇಟಿಂಗ್‌ ಸಿಸ್ಟಮ್‌ನಲ್ಲಿ ಇನ್ನೂ ಹೆಚ್ಚಿನ ಪ್ರಮಾಣದಲ್ಲಿ ಫೇಷಿಯಲ್‌ ರೆಕಗ್ನಿಷನ್‌ ಸಶಕ್ತವಾಗಿ ಕಾರ್ಯನಿರ್ವಹಿಸಲು ಅನುಕೂಲವಾಗುವಂತೆ ಮಾಡಿದೆ. ಈ ಫೀಚರ್‌ ಅನ್ನು ಬಳಸಲು ತುಂಬ ಸರಳವಾಗಲಿದೆ. ಇದರಿಂದಾಗಿ ಬರುವ ದಿನಗಳಲ್ಲಿ ಇನ್ನಷ್ಟು ಹ್ಯಾಂಡ್‌ಸೆಟ್‌ಗಳಲ್ಲಿ ಈ ವಿಶಿಷ್ಟತೆಯನ್ನು ನಾವು ಕಂಡುಕೊಳ್ಳಬಹುದು. 

ಇನ್ನಷ್ಟು ಪರ್ಮಿಷನ್‌ಗಳು 
ಕ್ಯೂ ಒಎಸ್‌ನ ಇನ್ನೊಂದು ವಿಶೇಷತೆ ಎಂದರೆ, ಕ್ಲಿಪ್‌ಬೋರ್ಡ್‌ನಲ್ಲಿ ಉಳಿಸಿಕೊಳ್ಳಲಾಗಿರುವ ವಿಷಯಗಳಿಗೆ ಆ್ಯಪ್‌ ಆ್ಯಕ್ಸೆಸ್‌ ಪಡೆಯಲು ಅನುಮತಿ ಕೇಳತ್ತದೆ. ಈ ರೀತಿಯ ವ್ಯವಸ್ಥೆ ಸದ್ಯ ಯಾವ ಫೋನ್‌ನಲ್ಲೂ ಇಲ್ಲ. ಹಾಗಾಗಿ, ನೀವು ಕ್ಲಿಪ್‌ಬೋರ್ಡ್‌ನಲ್ಲಿ ಉಳಿಸಿಕೊಳ್ಳಲಾಗಿರುವ ಯಾವುದೇ ವಿಷಯಗಳಿಗೆ ಆ್ಯಪ್‌ ಪ್ರವೇಶಿಸಬೇಕೆಂದರೆ ಅದಕ್ಕೆ ಅನುಮತಿ ನೀಡಲೇಬೇಕಾಗುತ್ತದೆ. 

ಇನ್ನಷ್ಟು ಪರ್ಮಿಷನ್‌ಗಳು 
ಕ್ಯೂ ಬೀಟಾ ವರ್ಷನ್‌ನಲ್ಲಿ ಈಗಾಗಲೇ ಎರಡು ಹೊಸ ಮಾದರಿ ಸ್ಮಾರ್ಟ್‌ ಲಾಕ್‌ಗಳಿರುವುದು ಗೊತ್ತಾಗಿದೆ. ಮೊದಲನೆಯದು- ಆ್ಯಂಡ್ರಾಯ್ಡ್‌ ಸಾಧನಗಳ ಅನ್‌ಲಾಕ್‌ ಟೈಮ್‌ ಅನ್ನು ಇನ್ನೂ ಹೆಚ್ಚಿಗೆ ಮಾಡಬಹುದು. ಎರಡನೆಯದು- ಟ್ರಸ್ಟೆಡ್‌ ಡಿವೈಸ್‌ ಇನ್ನು ಮುಂದೆ ಮತ್ತಷ್ಟು ಟ್ರಸ್ಟೆಡ್‌ ಡಿವೈಸ್‌ ಆಗಿ ಉಳಿಯುತ್ತದೆ. ಯಾಕೆಂದರೆ, ಹೊಸ ಆಪರೇಟಿಂಗ್‌ ಸಿಸ್ಟಮ್‌ ಇನ್ನೂ ಹೆಚ್ಚಿನ ಖಾಸಗಿತವನ್ನು ಪೊರೆಯುತ್ತದೆ ಮತ್ತು ಹೆಚ್ಚಿನ ಭದ್ರತೆಯನ್ನು ಒದಗಿಸುತ್ತದೆ. 

ಹಳೆ ಆ್ಯಪ್‌ಗಳ ಸೂಚನೆ 
ಆಂಡ್ರಾಯ್ಡ್‌ ಕ್ಯೂ ಒಎಸ್‌ ಮತ್ತೊಂದು ವಿಶೇಷ ಎಂದರೆ, ಇದು ನಿಮ್ಮ ಫೋನ್‌ನಲ್ಲಿರುವ ಹಳೆಯದಾದ ಆ್ಯಪ್‌ಗಳ ಬಗ್ಗೆ ಮುನ್ಸೂಚನೆ ನೀಡುತ್ತದೆ. ಲಾಲಿಪಾಪ್‌ ಅಥವಾ ಅದಕ್ಕಿಂತ ಹಿಂದಿನ ಆಪ್‌ರೇಟಿಂಗ್‌ ಸಿಸ್ಟಮ್‌ಗಳ ಆಧಾರದಲ್ಲಿ ಆ್ಯಪ್‌ಗಳನ್ನು ಡೌನ್‌ಲೋಡ್‌ ಮಾಡಿಕೊಂಡಿದ್ದರೆ ಅಂಥ ಆ್ಯಪ್‌ಗಳು ಕ್ಯೂ ಒಎಸ್‌ಗೆ ಹೊಂದಾಣಿಕೆಯಾಗುವುದಿಲ್ಲ ಎಂಬುದನ್ನು ವಿವರಿಸುತ್ತದೆ. ಆ ಮೂಲಕ ಹಳೆಯ ಆ್ಯಪ್‌ಗಳ ಬಗ್ಗೆ ಬಳಕೆದಾರರಿಗೆ ಮಾಹಿತಿ ಒದಗಿಸುತ್ತದೆ. 

ಈ ಲೇಖನವು ವಿಜಯ ಕರ್ನಾಟಕದ 2019ರ ಮಾರ್ಚ್ 27 ಸಂಚಿಕೆಯಲ್ಲಿ ಪ್ರಕಟವಾಗಿದೆ

'ಬಿಸಿ'ಯೇರಿದೆಯಾ ಫೋನು?, ಮಂಡೆ ಬಿಸಿ ಮಾಡಿಕೊಳ್ಳಬೇಡಿ, ಕೂಲ್‌ ಮಾಡಲು ಇಲ್ಲಿದೆ ಪರಿಹಾರ

''ಫೋನ್‌ ತುಂಬಾ ಬಿಸಿಯಾಗುತ್ತದೆ,'' ಎಂದು ನಿಮ್ಮ ಸ್ನೇಹಿತರು ಆಗಾಗ ದೂರುವುದನ್ನು ನೀವು ಕೇಳಿರುತ್ತೀರಿ. ಅಲ್ಲದೇ, ನೀವು ಕೂಡ ಅದೇ ರೀತಿ ಹೇಳಿರುತ್ತೀರಿ. ಇದು ಸ್ಮಾರ್ಟ್‌ಫೋನ್‌ ಬಳಕೆದಾರರ ಸಾಮಾನ್ಯ ದೂರು. ವಿಶೇಷವಾಗಿ ಫೋನ್‌ ರಿಜಾರ್ಜ್‌ ಮಾಡುವಾಗ, ಗೇಮ್‌ ಆಡುವಾಗ, ಸ್ಟ್ರೀಮಿಂಗ್‌ ಕಂಟೆಂಟ್‌ ನೋಡುವಾಗ ಫೋನ್‌ ವಿಪರೀತ ಎನ್ನುವಷ್ಟರ ಮಟ್ಟಿಗೆ ಬಿಸಿಯಾಗುತ್ತದೆ. ಇತ್ತೀಚಿನ ದಿನಗಳಲ್ಲಿ ಅತಿ ಹೆಚ್ಚಿನ ಸಾಮರ್ಥ್ಯವಿರುವ ಬ್ಯಾಟರಿಗಳನ್ನು ಎಲ್ಲ ಕಂಪನಿಗಳು ತಮ್ಮ ಸ್ಮಾರ್ಟ್‌ಫೋನ್‌ಗಳಿಗೆ ಒದಗಿಸುತ್ತಿವೆ. ಈಗೀಗ 4000 ಎಂಎಎಚ್‌ ಸಾಮರ್ಥ್ಯದ ಬ್ಯಾಟರಿಗಳು ಸಾಮಾನ್ಯ ಎನ್ನುವಂತಾಗಿದೆ. ಇಷ್ಟು ದೊಡ್ಡ ಸಾಮರ್ಥ್ಯದ ಬ್ಯಾಟರಿ ಹೊಂದಿರುವ ಫೋನ್‌ಗಳನ್ನು ಚಾರ್ಜ್‌ ಮಾಡುವಾಗ ಫೋನ್‌ ಬಿಸಿ ನಮ್ಮ ಅನುಭವಕ್ಕೆ ಬರುತ್ತದೆ. ಹಾಗಾದರೆ, ಫೋನ್‌ ಮಿತಿಮೀರಿ ಬಿಸಿಯಾಗಲು ಕಾರಣ ಏನು ಎಂದು ಹುಡುಕತ್ತಾ ಹೊರಟರೆ ಅನೇಕ ಅಂಶಗಳು ನಮ್ಮ ಗಮನಕ್ಕೆ ಬರುತ್ತವೆ. ಆ ಪೈಕಿ, ಫೋನ್‌ನ ಹಾರ್ಡ್‌ವೇರ್‌ ಸಮಸ್ಯೆ, ಥರ್ಡ್‌ ಪಾರ್ಟಿ ಚಾರ್ಜರ್‌ ಬಳಕೆ, ಅನವಶ್ಯಕ ಆ್ಯಪ್‌ಗಳು ಬಳಕೆ... ಹೀಗೆ ನಾನಾ ಕಾರಣಗಳಿಂದಾಗಿ ಫೋನ್‌ ಬಿಸಿಯಾಗುತ್ತಲೇ ಇರುತ್ತದೆ. ಆದರೆ, ಫೋನ್‌ ಬಿಸಿಯಾಗಿದೆ ಎಂದು ನೀವು ಮಂಡೆಬಿಸಿ ಮಾಡಿಕೊಳ್ಳುವ ಅಗತ್ಯವಿಲ್ಲ. ಕೆಲವು ಟಿಫ್ಸ್‌ಗಳನ್ನು ಅನುಸರಿಸಿದರೆ ಫೋನ್‌ ಬಿಸಿಯಾಗುವುದನ್ನು ಕಡಿಮೆ ಮಾಡಬಹುದು. 

ಬಿಸಿಲು ತಪ್ಪಿಸಿ 

ಬಹಳ ಸಮಯದವರೆಗೆ ಸ್ಮಾರ್ಟ್‌ಫೋನ್‌ ಮೇಲೆ ಬಿಸಿಲು ಬೀಳದಂತೆ ನೋಡಿಕೊಳ್ಳಬೇಕು. ಇಲ್ಲದಿದ್ದರೆ ಅದು ಸ್ಮಾರ್ಟ್‌ಫೋನ್‌ ಬಿಸಿಯಾಗಲು ಕಾರಣವಾಗುತ್ತದೆ. ಅದರಲ್ಲೂ ಪ್ಲ್ಯಾಸ್ಟಿಕ್‌ ವಿನ್ಯಾಸ ಹೊಂದಿರುವ ಫೋನ್‌ಗಳು ಇನ್ನೂ ಹೆಚ್ಚಿಗೆ ಬಿಸಿಯಾಗಬಹುದು. ಅಧ್ಯಯನದ ವರದಿಯೊಂದ ಪ್ರಕಾರ, ದೀರ್ಘ ಸಮಯದವರೆಗೆ ಸ್ಮಾರ್ಟ್‌ಫೋನ್‌ ಬಿಸಿಲಿಗೆ ತೆರೆದುಕೊಂಡರೆ ಅದರ ಟಚ್‌ಸ್ಕ್ರೀನ್‌ ಕಾರ್ಯನಿರ್ವಹಣೆಯ ಮೇಲೂ ವ್ಯತಿರಿಕ್ತ ಪರಿಣಾಮ ಬೀರುತ್ತದಯಂತೆ. ಹಾಗಾಗಿ, ಮೊಬೈಲ್‌ಗಳನ್ನು ಸಾಧ್ಯವಾದಷ್ಟು ಬ್ಯಾಗ್‌ಗಳಲ್ಲಿ ಇಡಲು ಪ್ರಯತ್ನಿಸಿ. ಅದರಲ್ಲೂ ಚರ್ಮದ ಬ್ಯಾಗ್‌ಗಳಲ್ಲಿದ್ದರೂ ಇನ್ನೂ ಬೆಟರ್‌. 

ಚಾರ್ಜಿಂಗ್‌ ಮಾಡುವಾಗ ಹುಷಾರ್‌ 

ಚಾರ್ಜಿಂಗ್‌ ಮಾಡುವಾಗ ಫೋನ್‌ ಒಂದಿಷ್ಟು ಉಷ್ಣಾಂಶವನ್ನು ಹೊರ ಹಾಕುತ್ತದೆ. ಹಾಗಾಗಿ, ಫೋನ್‌ ಸ್ವಲ್ಪ ಗಾಳಿಗೆ ಮುಕ್ತವಾಗಿರುವಂತೆ ನೋಡಿಕೊಳ್ಳಬೇಕು. ಚಾರ್ಜ್‌ ಮಾಡುವಾಗ ಅದನ್ನು ಬೆಡ್‌ ಅಥವಾ ಸೋಫಾ ಮೇಲೆ ಇಟ್ಟರೆ, ಉತ್ಪತ್ತಿಯಾಗುವ ಉಷ್ಣಾಂಶವನ್ನು ಹೊರ ಹಾಕಲು ಸಾಧ್ಯವಾಗುವುದಿಲ್ಲ. ಹಾಗಾದಾಗ ಫೋನ್‌ನ ಶಾಖ ಇನ್ನೂ ಹೆಚ್ಚಾಗತೊಡಗುತ್ತದೆ. ಚಾರ್ಜ್‌ ಮಾಡುವಾಗ ಫೋನ್‌ ಅನ್ನು ಗಟ್ಟಿ ಮೇಲ್ಮೈ ಹೊಂದಿರುವ ವಸ್ತುವಿನ ಮೇಲೆ ಇಡುವುದು ಒಳ್ಳೆಯದು. 

ಬ್ಯಾಕ್‌ ಕೇಸ್‌ ತೆಗೆಯರಿ 

ಫೋನ್‌ ಸುರಕ್ಷ ತೆಗೋಸ್ಕರ ಸಾಮಾನ್ಯವಾಗಿ ಎಲ್ಲರೂ ಬ್ಯಾಕ್‌ ಕೇಸ್‌ ಹಾಕಿರುತ್ತಾರೆ. ಆದರೆ, ಇದು ಚಾರ್ಜಿಂಗ್‌ ಮಾಡುವಾಗ ಫೋನ್‌ನ ಉಷ್ಣಾಂಶ ಹೆಚ್ಚಾಗಲು ಕಾರಣವಾಗುತ್ತದೆ ಎಂಬುದು ಬಹಳಷ್ಟು ಜನರಿಗೆ ಗೊತ್ತಿಲ್ಲ. ಚಾರ್ಜ್‌ ಮಾಡುವಾಗ ಹ್ಯಾಂಡ್‌ಸೆಟ್‌ನ ಬ್ಯಾಕ್‌ ಕೇಸ್‌ ತೆಗೆಯಿರಿ. ಇದರಿಂದ ಫೋನ್‌ ಹೀಟ್‌ ಆಗುವುದು ತಡೆಯಬಹುದು ಮತ್ತು ಕೂಲ್‌ ಆಗಿ ಇಡಲು ಸಾಧ್ಯವಾಗುತ್ತದೆ. 

 ರಾತ್ರಿ ಪೂರ್ತಿ ಚಾರ್ಜಿಂಗ್‌ ಮಾಡಬಹುದೇ? 

ಈ ಅಂಶವು ಹೊಸ ಮಾದರಿಯ ಸ್ಮಾರ್ಟ್‌ಫೋನ್‌ಗಳಿಗೆ ಅನ್ವಯಿಸುವುದಿಲ್ಲ. ಯಾಕೆಂದರೆ, ಅತ್ಯಾಧುನಿಕ ಸ್ಮಾರ್ಟ್‌ಫೋನ್‌ಗಳನ್ನು ರಾತ್ರಿಯಿಡಿ ಚಾರ್ಜಿಂಗ್‌ ಇಟ್ಟರೂ ಫೋನ್‌ ಹೀಟ್‌ ಆಗುವುದಾಗಲೀ, ಬ್ಯಾಟರಿ ನಷ್ಟವಾಗುವುದು ಆಗಲಿ ಆಗುವುದಿಲ್ಲ. ಯಾಕೆಂದರೆ, ಬ್ಯಾಟರಿ ಚಾರ್ಜಿಂಗ್‌ ಆದ ತಕ್ಷ ಣ ಅದಕ್ಕೆ ಕರೆಂಟ್‌ ಪ್ರಸರಣ ತಡೆಯಾಗುವಂತೆ ವ್ಯವಸ್ಥೆ ರೂಪಿಸಲಾಗಿರುತ್ತದೆ. ಆದರೆ, ಇದೇ ಮಾತನ್ನು ಹಳೆ ಮಾದರಿಯ ಫೋನ್‌ಗಳಿಗೆ ಹೇಳುವಂತಿಲ್ಲ. ವಿಶೇಷವಾಗಿ ಬೇಸಿಕ್‌ ಫೋನ್‌ಗಳಲ್ಲಿ ಇಂಥ ವ್ಯವಸ್ಥೆ ಇರುವುದಿಲ್ಲ. ಹಾಗಾಗಿ, ರಾತ್ರಿಯಿಡಿ ಫೋನ್‌ ಅನ್ನು ಚಾರ್ಜಿಂಗ್‌ ಮಾಡಿದರೆ ಹೆಚ್ಚು ಹೀಟ್‌ ಆಗುವು ಸಾಧ್ಯತೆ ಹೆಚ್ಚಿರುತ್ತದೆ. 

ಆ್ಯಪ್‌ಗಳ ಬಗ್ಗೆ ಇರಲಿ ಎಚ್ಚರ 

ನಮ್ಮ ಸ್ಮಾರ್ಟ್‌ಫೋನ್‌ಗಳ ಆ್ಯಪ್‌ಗಳಿಂದ ತುಂಬಿ ಹೋಗಿರುತ್ತವೆ. ಬೇಕಾದ್ದು, ಬೇಡವಾದ ಎಲ್ಲ ಆ್ಯಪ್‌ಗಳನ್ನು ನಾವು ಡೌನ್‌ಲೋಡ್‌ ಮಾಡಿಕೊಂಡಿರುತ್ತೇವೆ. ಹೀಗೆ ಡೌನ್‌ಲೋಡ್‌ ಮಾಡಿಕೊಂಡ ಆ್ಯಪ್‌ಗಳ ಪೈಕಿ ಅನೇಕ ಆ್ಯಪ್‌ಗಳು ಬ್ಯಾಕ್‌ಗ್ರೌಂಡ್‌ನಲ್ಲಿ ರನ್‌ ಆಗುತ್ತಲೇ ಇರುತ್ತವೆ ಮತ್ತು ಅವು ಬ್ಯಾಟರಿ ಪವರ್‌ ಅನ್ನು ಕಬಳಿಸುವ ಜತೆಗೆ ಫೋನ್‌ ಹೀಟ್‌ ಆಗಲು ತಮ್ಮ ಕೊಡುಗೆಯನ್ನು ನೀಡುತ್ತವೆ. ಹಾಗಾಗಿ, ಕೆಲಸಕ್ಕೆ ಬಾರದ ಮತ್ತು ಬ್ಯಾಕ್‌ಗ್ರೌಂಡ್‌ನಲ್ಲಿ ರನ್‌ ಆಗುವ ಆ್ಯಪ್‌ ಅನ್ನು ಅನ್‌ಇನ್ಸ್‌ಟಾಲ್‌ ಮಾಡುವುದು ಇದಕ್ಕೆ ಇರುವ ಪರಿಹಾರ. 

ಥರ್ಡ್‌ ಪಾರ್ಟಿ ಚಾರ್ಜರ್‌ ಬೇಡ 

ಥರ್ಡ್‌ ಪಾರ್ಟಿ ಚಾರ್ಜರ್‌ ಬಳಕೆಯನ್ನು ಆದಷ್ಟು ಕಡಿಮೆ ಮಾಡಿ. ನಿಮ್ಮ ಫೋನ್‌ ಯಾವ ಕಂಪನಿಯದ್ದು ಇರುತ್ತದೆ ಅದೇ ಕಂಪನಿ ಒದಗಿಸುವ ಚಾರ್ಜರ್‌ಗಳನ್ನು ಬಳಸುವುದು ಸೂಕ್ತ. ಇಲ್ಲದಿದ್ದರೆ ಬ್ಯಾಟರಿ ಮತ್ತು ಚಾರ್ಜರ್‌ ನಡುವಿನ ಹೊಂದಾಣಿಕೆಯ ಕೊರತೆಯಿಂದಾಗಿ ಬ್ಯಾಟರಿ ಹೆಚ್ಚಿನ ಪ್ರಮಾಣದಲ್ಲಿ ಹೀಟ್‌ ಆಗುವ ಸಾಧ್ಯತೆಗಳು ಹೆಚ್ಚಾಗಿರುತ್ತದೆ. 


ಸ್ಟ್ರೀಮಿಂಗ್‌ ಕಂಟೆಂಟ್‌ 

ಫೋನ್‌ ಬಿಸಿಯಾಲು ಸ್ಟ್ರೀಮಿಂಗ್‌ ಕಂಟೆಂಟ್‌ ಕೂಡ ಕಾರಣವಾಗುತ್ತದೆ. ಸ್ಮಾರ್ಟ್‌ಫೋನ್‌ನಲ್ಲಿ ನೀವು ಯೂಟೂಬ್‌ ಅಥವಾ ನೆಟ್‌ಫ್ಲಿಕ್ಸ್‌ನಲ್ಲಿ ಗಂಟೆಗಳ ಕಾಲ ಸ್ಟ್ರೀಮಿಂಗ್‌ ಕಂಟೆಂಟ್‌ ನೋಡುತ್ತಿದ್ದರೆ ಹೀಟ್‌ ಜನರೇಟ್‌ ಆಗುತ್ತದೆ. ಇದಕ್ಕೆ ಕಾರಣ; ಫೋನ್‌ ಪ್ರೊಸೆಸರ್‌ ಮೇಲೆ ಹೆಚ್ಚಿನ ಒತ್ತಡ ಬೀಳುವುದರಿಂದ ಉಷ್ಣಾಂಶ ಹೆಚ್ಚಾಗುತ್ತದೆ. 



ಫೋನ್‌ ಯಾಕೆ ಬಿಸಿಯಾಗುತ್ತದೆ? 

ಫೋನ್‌ ಯಾಕೆ ಬಿಸಿಯಾಗುತ್ತದೆ ಎಂಬ ಪ್ರಶ್ನೆಗೆ ಉತ್ತರ ಸರಳವಾಗಿದೆ. ಫೋನ್‌ ಬಿಸಿ ಮಾಡುವ ನಿಜವಾದ 'ಅಪರಾಧಿ'ಗಳೆಂದರೆ ಬ್ಯಾಟರಿ, ಪ್ರೊಸೆಸರ್‌ ಮತ್ತು ಸ್ಕ್ರೀನ್‌. ಈ ಮೂರು ಘಟಕಗಳು ಉಷ್ಣಾಂಶವನ್ನು ಹೊರ ಹಾಕುತ್ತಲೇ ಇರುತ್ತವೆ. ಬ್ಯಾಟರಿಯೊಳಗಿನ ರಾಸಾಯನಿಕಗಳು ವಿದ್ಯುತ್‌ ಅನ್ನು ಉತ್ಪಾದಿಸಿ ನೀಡುವಾಗ ಬಿಸಿ ಸಹಜ. ಅದೇ ರೀತಿ, ಪ್ರೊಸೆಸರ್‌ ಮಾಹಿತಿಯನ್ನು ಅತ್ಯಂತ ವೇಗದಲ್ಲಿ ವರ್ಗಾವಣೆ ಮಾಡುತ್ತದೆ. ಸ್ಕ್ರೀನ್‌ ಬೆಳಕಳನ್ನು ಹೊರ ಚೆಲ್ಲುತ್ತದೆ. ಹೀಗಾಗಿ, ಈ ಎಲ್ಲ ಘಟಕಗಳು ತಮ್ಮ ಕಾರ್ಯವನ್ನು ನಿರ್ವಹಿಸುವಾಗ ಉಷ್ಣಾಂಶ ಹೊರ ಹಾಕುತ್ತವೆ ಮತ್ತು ಅದರ ಒಟ್ಟು ಬಿಸಿ ಅನುಭವ ನಮಗಾಗುತ್ತದೆ. ಈ ಮೂರು ಘಟಕಗಳು ಮಾತ್ರವಲ್ಲದೆ ಇನ್ನು ಅನೇಕ ಅಂಶಗಳು ಫೋನ್‌ ಹೀಟ್‌ ಆಗಲು ಕಾರಣಗಳಾಗುತ್ತದೆ. ಈ ಲೇಖನವು ವಿಜಯ ಕರ್ನಾಟಕಲ್ಲಿ  ಪ್ರಕಟವಾಗಿದೆ.

ನಿಮಗೆ ಕಿಡಲ್ ಗೊತ್ತಾ?, ಮಕ್ಕಳಿಗೋಸ್ಕರವೇ ಇರುವ ಸರ್ಚ್‌ ಎಂಜಿನ್‌

ಗೂಗಲ್‌ ಸರ್ಚ್‌ ಎಂಜಿನ್‌ ಜಗತ್ತಿನ ಎಲ್ಲ ಮಾಹಿತಿಯನ್ನು ಕ್ಷ ಣ ಮಾತ್ರದಲ್ಲಿ ನಿಮ್ಮ ಮುಂದೆ ಹರವಿ ಇಡುತ್ತದೆ. ಅದರಲ್ಲಿ ಬೇಕಾದದ್ದು, ಬೇಡವಾದದ್ದೂ ಎಲ್ಲವೂ ಇರುತ್ತದೆ. ನಮ್ಮ ಆದ್ಯತೆಗನುಗುಣವಾಗಿ ನಾವೇ ಹೆಕ್ಕಿಕೊಳ್ಳಬೇಕಷ್ಟೆ. ಆದರೆ, ಮಕ್ಕಳ ವಿಷಯಕ್ಕೆ ಬಂದಾಗ ನಾವು ಬಹಳಷ್ಟು ಹುಷಾರ್‌ ಆಗಿರಬೇಕಾಗುತ್ತದೆ. ಎಲ್ಲವನ್ನೂ ಮುಚ್ಚು ಮರೆಯಿಲ್ಲದೇ ನೀಡುವ ಗೂಗಲ್‌ ಸರ್ಚ್‌ ಎಂಜಿನ್‌ ಬಳಕೆಯನ್ನು ನಿಧಾನಗೊಳಿಸಬೇಕಾಗುತ್ತದೆ. ಈ ಹಿನ್ನೆಲೆಯಲ್ಲಿ ಮಕ್ಕಳಿಗೋಸ್ಕರವೇ 'ಕಿಡಲ್‌ ಸರ್ಚ್‌ ಎಂಜಿನ್‌' ಇದೆ. ಅದನ್ನು ಬಳಸಲು ಮಕ್ಕಳಿಗೆ ಪ್ರೇರೇಪಿಸಬೇಕು. 


- ಮಲ್ಲಿಕಾರ್ಜುನ ತಿಪ್ಪಾರ 
ಈ ಇಂಟರ್ನೆಟ್‌ ಯುಗದಲ್ಲಿ ಎಲ್ಲವೂ ಮುಕ್ತ ಮುಕ್ತ. ಯಾವುದೇ ಮುಚ್ಚು ಮರೆಯಿಲ್ಲ. ನಮಗೆ ಬೇಕಾದ್ದು, ಬೇಡವಾದದ್ದು ಎಲ್ಲ ಮಾಹಿತಿಯೂ ನಮ್ಮ ಕಣ್ಣೆದುರಿಗೆ ಬಂದು ಬೀಳುತ್ತಿದೆ. ಕೈ ಬೆರಳಲ್ಲಿ ತುದಿಯಲ್ಲೇ ನಲಿದಾಡುತ್ತಿರುತ್ತದೆ. ಆದರೆ, ಹೀಗೆ ಯಾವುದೇ ಸೆನ್ಸಾರ್‌ ಇಲ್ಲದೇ ಬೇಕಾಬಿಟ್ಟಿಯಾಗಿ ದೊರೆಯುವ ಮಾಹಿತಿ ನಮ್ಮ ಮಕ್ಕಳ ಮೇಲೆ ಯಾವ ರೀತಿ ಪರಿಣಾಮ ಬೀರಬಲ್ಲದು ಎಂಬುದು ಯೋಚಿಸಿದರೆ ಆತಂಕವಾಗುತ್ತದೆ. ಹಾಗಾಗಿಯೇ, ಮಕ್ಕಳಿಗೋಸ್ಕರವೇ ಗೂಗಲ್‌ ಕಂಪನಿಯು ಕಿಡಲ್‌ ಸರ್ಚ್‌ ಎಂಜಿನ್‌ ಆರಂಭಿಸಿದೆ. ಆದರೆ, ಬಹಳಷ್ಟು ಜನರಿಗೆ ಈ ಬಗ್ಗೆ ಜ್ಞಾನವಿಲ್ಲ. ಸಾಮಾನ್ಯವಾಗಿ ಗೂಗಲ್‌ ಸರ್ಚ್‌ ಎಂಜಿನ್‌ನಲ್ಲಿ ಯಾವುದೇ ಮಿತಿ ಇಲ್ಲ. ಅಲ್ಲಿ ದೊರೆಯುವ ಕಂಟೆಂಟ್‌ ಅನೇಕ ಬಾರಿ ಮಕ್ಕಳಿಗೆ ಬೇಡವಾದದ್ದೇ ಇರುತ್ತದೆ. ಅಂಥದ್ದೆಲ್ಲ ಅವರ ಕಣ್ಣಿಗೆ ಬಿದ್ದರೆ, ಇಲ್ಲವೇ ಅದರ ಗೀಳಿಗೆ ಮಕ್ಕಳು ಅಂಟಿಕೊಂಡು ಬಿಟ್ಟರೆ ಅದರಿಂದಾಗುವ ದುಷ್ಪರಿಣಾಮವನ್ನು ಊಹಿಸುವುದು ಕಷ್ಟ. ಮಕ್ಕಳ ಬೆಳವಣಿಗೆ ಮೇಲೆ ನಕಾರತ್ಮಕ ಪರಿಣಾಮ ಬೀರುವ ಸಾಧ್ಯತೆಗಳೇ ಹೆಚ್ಚು. ಶಿಕ್ಷ ಣ ವ್ಯವಸ್ಥೆಯು ಹೆಚ್ಚೆಚ್ಚು ತಂತ್ರಜ್ಞಾನಸ್ನೇಹಿಯಾಗುತ್ತ ಮುಂದುವರಿಯುತ್ತಿರುವುದರಿಂದ ಮಕ್ಕಳ ಹಂತದಲ್ಲೇ ಸ್ಮಾರ್ಟ್‌ಫೋನ್‌, ಕಂಪ್ಯೂಟರ್‌, ಇಂಟರ್ನೆಟ್‌ ಬಳಕೆ ಅನಿವಾರ್ಯವಾಗಿದೆ. ಶಾಲಾ ಕಾಲೇಜು ಮಕ್ಕಳು ಪ್ರಾಜೆಕ್ಟ್ಗಳನ್ನು ಮಾಡಬೇಕಾಗುತ್ತದೆ. ಅವರು ತಮ್ಮ ಪ್ರಾಜೆಕ್ಟ್ಗಳನ್ನು ಪೂರೈಸಲು ಮತ್ತೆ ಮೊರೆ ಹೋಗುವುದು ಈ ಗೂಗಲ್ಲನ್ನೇ. ಹಾಗಾಗಿ, ಮಕ್ಕಳ ಸೇಫ್‌ ಸರ್ಚ್‌ ಎಂಜಿನ್‌ ಆಗಿ ಕಿಡಲ್‌ ಅನ್ನು ರೂಪಿಸಲಾಗಿದೆ. 

2014ರಲ್ಲಿ ಆರಂಭ 

ಮಕ್ಕಳಿಗೋಸ್ಕರವೇ ಮೀಸಲಾಗಿರುವ ಈ ಡೊಮೈನ್‌ ಅನ್ನು 2014ರಲ್ಲಿ ನೋಂದಣಿ ಮಾಡಲಾಯಿತು. ಕಿಡಲ್‌ ಸರ್ಚ್‌ ಎಂಜಿನ್‌, ಗೂಗಲ್‌ ಕಸ್ಟಮ್‌ ಸರ್ಚ್‌ ಎಂಜಿನ್‌ ವಿಂಡೋ ರೀತಿಯಲ್ಲಿ ಕಾಣಿಸಿಕೊಳ್ಳುತ್ತದೆ. ಬಳಕೆದಾರರು ತಮಗೆ ಬೇಕಿದ್ದ ಮಾಹಿತಿ ಬಗ್ಗೆ ಕೀ ವರ್ಡ್‌ ಹಾಕಿದಾಗ, ಸರ್ಚ್‌ ರಿಸಲ್ಟ್‌ಗಳನ್ನು ತೋರಿಸುತ್ತದೆ. ಮೊದಲ ಮೂರು ರಿಸಲ್ಟ್‌ಗಳು ಸುರಕ್ಷಿತವಾಗಿದ್ದು ಮತ್ತು ಮಕ್ಕಳಿಗೋಸ್ಕರವೇ ಇರುವ ಮಾಹಿತಿಯಾಗಿರುತ್ತದೆ. ಕಿಡಲ್‌ ಎಡಿಟರ್‌ಗಳಿಂದ ದೃಢೀಕರಣಗೊಂಡಿರುತ್ತದೆÜ. ಮುಂದಿನ ನಾಲ್ಕು ಪೇಜ್‌ಗಳ ಬಗ್ಗೆ ಮಕ್ಕಳಿಗೋಸ್ಕರವೇ ಎಂಬ ಕಡ್ಡಾಯವಿರುವುದಿಲ್ಲ ಬದಲು ಮಕ್ಕಳ ಸ್ನೇಹಿಯಾಗಿರುತ್ತವೆ. 8 ಮತ್ತು ಅದರಿಂದಾಚೆಯ ಎಲ್ಲ ರಿಸಲ್ಟ್‌ಗಳು ವಯಸ್ಕರಿಗೆ ಅರ್ಥವಾಗುವಂಥವುಗಳಾಗಿರುತ್ತವೆ. ಮಕ್ಕಳು ಇವುಗಳನ್ನು ಅರಿತು ಮಾಡಿಕೊಳ್ಳುವುದು ಕಷ್ಟ. ಹೀಗೆ ಕಾಣಿಸಿಕೊಳ್ಳುವ ಎಲ್ಲ ರಿಸಲ್ಟ್‌ಗಳು ಗೂಗಲ್‌ನ ಸೇಫ್‌ಸರ್ಚ್‌ ಮೂಲಕ ಜರಡಿಗೊಳಗಾಗಿರುತ್ತವೆ. ಒಂದೊಮ್ಮೆ ಬಳಕೆದಾರರು ಕೆಟ್ಟ ಪದಗಳನ್ನು ಸರ್ಚ್‌ ಮಾಡಿದರೂ ಅದರ ರಿಸಲ್ಟ್‌ ದೊರೆಯುವುದಿಲ್ಲ. ಮತ್ತೊಮ್ಮೆ ಪ್ರಯತ್ನಿಸಿ ಎಂಬ ಸಂದೇಶ ಡಿಸ್‌ಪ್ಲೇ ಆಗುತ್ತದೆ. 

ಕೆಪಿಡಿಯಾ 

ಸರ್ಚ್‌ ಎಂಜಿನ್‌ ಒದಗಿಸುವ ಆನ್‌ಲೈನ್‌ ವಿಶ್ವಕೋಶವನ್ನು ಕಿಡಲ್‌ ವಿಶ್ವಕೋಶ(ಕೆಪಿಡಿಯಾ) ಎಂದು ಕರೆಯಲಾಗುತ್ತದೆ. ಅದರಲ್ಲಿ 700,000ಕ್ಕೂ ಹೆಚ್ಚು ಆರ್ಟಿಕಲ್‌ಗಳಿವೆ. ಮಕ್ಕಳಿಗಾಗಿಯೇ ಮರುಸೃಷ್ಟಿಸಲಾದ ವಿಕಿಪಿಡಿಯಾ ಲೇಖನಗಳನ್ನು ಇದು ಒಳಗೊಂಡಿರುತ್ತದೆ. 

ಕೆಪಿಡಿಯಾ

ಗೇ, ಲೆಸ್ಬಿಯನ್‌, ಸೆಕ್ಸ್‌ ಎಜುಕೇಷನ್‌ನಂಥ ಶಬ್ದಗಳನ್ನು ನಿಷೇಧಿಸಿದ್ದರಿಂದ 2016ರಲ್ಲಿ ಕಿಡಲ್‌ ಭಾರೀ ಟಿಕೆಯನ್ನು ಎದುರಿಸಬೇಕಾಯಿತು. ಜತೆಗೆ ಟ್ರಾನ್ಸ್‌ಜೆಂಡರ್‌, ಬೈಸೆಕ್ಸುವಲ್‌ ಪದಗಳನ್ನು ಬ್ಲಾಕ್‌ ಮಾಡಲಾಗಿತ್ತು. ಆದರೆ, ವಿರೋಧ ಹೆಚ್ಚಾಗುತ್ತಿದ್ದಂತೆ ಈ ಪದಗಳನ್ನು ಅನ್‌ಬ್ಲಾಕ್‌ ಮಾಡುವುದಾಗಿ ಕಿಡಲ್‌ ಪ್ರಕಟಣೆ ನೀಡಿತು. 

ಸುರಕ್ಷಿತ ಸರ್ಚ್‌ 

ಕಿಡಲ್‌ನಲ್ಲಿ ಕಾಣಿಸಿಕೊಳ್ಳುವ ಸರ್ಚ್‌ ರಿಸಲ್ಟ್‌ಗಳು ಫ್ಯಾಮಿಲಿ ಫ್ರೆಂಡ್ಲಿಯಾಗಿರುತ್ತವೆ. ಸೈಟ್‌ಗಳಿಗೆ ಜರಡಿ ಹಿಡಿದು ಮಕ್ಕಳಿಗೆ ಯೋಗ್ಯವಾದ ಸೈಟ್‌ಗಳನ್ನು ಮಾತ್ರ ಪ್ರದರ್ಶಿಸಲಾಗುತ್ತದೆ. 

ಬೃಹತ್‌ ಥಂಬ್‌ನೇಲ್ಸ್‌ 

ಕಿಡಲ್‌ನ ಬಹುತೇಕ ಸರ್ಚ್‌ ರಿಸಲ್ಟ್‌ಗಳು ಬೃಹತ್‌ ಥಂಬ್‌ನೇಲ್ಸ್‌ಗಳನ್ನು ಹೊಂದಿರುವಂತೆ ವಿನ್ಯಾಸ ಮಾಡಲಾಗಿದೆ. ಇದರಿಂದ ರಿಸಲ್ಟ್‌ಗಳನ್ನು ಸುಲಭವಾಗಿ ಶೋಧಿಸಲು ಮತ್ತು ಅವುಗಳ ನಡುವಿನ ವ್ಯತ್ಯಾಸವನ್ನು ಅರಿಯಲು ಮಕ್ಕಳಿಗೆ ಸಾಧ್ಯವಾಗುತ್ತದೆ. ಜತೆಗೆ ಅಗತ್ಯವಿರುವ ಹೆಚ್ಚು ಸೂಕ್ತವಾದ ರಿಸಲ್ಟ್‌ಗಳ ಮೇಲೆ ಕ್ಲಿಕ್‌ ಮಾಡಲು ಅನುವು ಮಾಡಿಕೊಡುತ್ತದೆ. ಥಂಬ್‌ನೇಲ್ಸ್‌ಗಳು ಚಿತ್ರಿಕೆ ಸುಳಿವುಗಳಾಗಿ ಕಾರ್ಯನಿರ್ವಹಿಸುವುದರಿಂದ ಮಕ್ಕಳಿಗೆ ಬೇಗ ಅರ್ಥ ಮಾಡಿಕೊಳ್ಳಲು ಸಾಧ್ಯವಾಗುತ್ತದೆ. ಯಾಕೆಂದರೆ, ದೊಡ್ಡವರಂತೆ ಮಕ್ಕಳಿಗೆ ವೇಗವಾಗಿ ಓದಿ ಅರ್ಥ ಮಾಡಿಕೊಳ್ಳುವ ಸಾಮರ್ಥ್ಯವಿರುವುದಿಲ್ಲ. 

- ಮಕ್ಕಳಿಗೆ ಓದಲು ಸುಲಭವಾಗುವ ದೃಷ್ಟಿಯಿಂದ ಬೃಹತ್‌ ಏರಿಯಲ್‌ ಫಾಂಟ್‌ಗಳನ್ನು ಕಿಡಲ್‌ ಬಳಸುತ್ತದೆ. ಹಾಗಾಗಿ, ರಿಸಲ್ಟ್‌ಗಳಲ್ಲಿ ಇರುವ ಕಂಟೆಂಟ್‌ ಬೇಗ ಅರ್ಥ ಮಾಡಿಕೊಳ್ಳಲು ಸಾಧ್ಯವಾಗುತ್ತದೆ. 

 ಖಾಸಗಿತನ 
ಕಿಡಲ್‌ ಯಾವುದೇ ರೀತಿಯಲ್ಲಿ ಬಳಕೆದಾರ ವೈಯಕ್ತಿಕ ಮಾಹಿತಿಯನ್ನು ಸಂಗ್ರಹಿಸುವುದಿಲ್ಲ ಮತ್ತು ಪ್ರತಿ 24 ಗಂಟೆಗೊಮ್ಮೆ ಲಾಗ್‌ಗಳನ್ನು ಡಿಲಿಟ್‌ ಮಾಡಲಾಗುತ್ತದೆ. 

ಕಿಡಲ್ ಸರ್ಚ್ ಎಂಜಿನ್ ವೆಬ್ ವಿಳಾಸ- ಕ್ಲಿಕ್ ಮಾಡಿ.
 ​https://www.kiddle.co

ಈ ಲೇಖನವು ವಿಜಯ ಕರ್ನಾಟಕದ 11-2-19ರ ಸಂಚಿಕೆಯಲ್ಲಿ ಪ್ರಕಟವಾಗಿದೆ.

ಇಲ್ಲೂ ಕ್ಲಿಕ್ ಮಾಡಿ